|
ຄວາມເຈັບທໍລະມັນເໝືອນດັ່ງເກືອ
cri
Author: min
|
ສະບາຍດີ, ທ່ານຜູ້ຟັງທີ່ເຄົາລົບ, ສົມບູນຜູ້ດຳເນີນລາຍການຍິນດີຕ້ອນຮັບທ່ານເຂົ້າສູ່ລາຍການຄາລົມຄົມຄາຍ!
ຊີວິດກໍເໝືອນດັ່ງດົນຕີປະສານສຽງ, ມີບ່ອນຂຶ້ນມີບ່ອນລົງ, ບາງທີຫວານຊື່ນ, ບາງທີຂົມຂື່ນ. ໃຜກໍຫວັງໃຫ້ຊີວິດຂອງຕົນເຕັມໄປດ້ວຍຄວາມສຸກສຳລານ, ແຕ່ຄວາມຫຍຸ້ງຍາກແລະຄວາມເຈັບປວດທຳລະມານບໍ່ເຄີຍເປັນໄປຕາມຄວາມຄຶດຂອງຄົນຈັກເທື່ອ, ເຮົາຢາກຜີກໜີກໍຜີກບໍ່ໄດ້, ເພາະທາງຊີວິດຄົນເຮົາບໍ່ໄດ້ໂຮຍດ້ວຍດອກອຸຫຼາບສະເໝີໄປ, ເມື່ອພົບຄວາມຫຍຸ້ງຍາກແລະຄວາມທຸກທໍລະມັນເທື່ອໃດ, ຄຶດວ່າ, ທ່ານຄົງອາລົມຕົກຕ່ຳ, ຮູ້ສຶກຊີວິດເຕັມໄປດ້ວຍຄວາມມົວໝອງ. ໃນລາຍການພາກນີ້, ສົມບູນຂໍລົມເລື່ອງກ່ຽວກັບຫົວຂໍ້ນີ້ນຳທ່ານ, ກ່ອນອື່ນ, ເຊີນຟັງນິທານກ້ອມເລື່ອງໜຶ່ງ:
ຢູ່ວັດແຫ່ງໜຶ່ງເທິງພູ, ມີຈົວນ້ອຍຕົນໜຶ່ງມັກຈົ່ມນີ້ຈົ່ມນັ້ນຕໍ່ເຈົ້າຫົວ, ຕອນເຊົ້າມື້ໜຶ່ງ, ເຈົ້າຫົວສັ່ງໃຫ້ຈົວນ້ອຍໄປເອົາເກືອມາໜ້ອຍໜຶ່ງ.
ເມື່ອຈົວນ້ອຍເອົາເກືອມາແລ້ວ, ເຈົ້າຫົວກໍສັ່ງໃຫ້ຈົວນ້ອຍເອົາເກືອຖອກໃສ່ຈອກນ້ຳ, ແລ້ວໃຫ້ກິນນ້ຳເກືອໃນຈອກ, ແລ້ວຖາມຈົວວ່າລົດມັນເປັນຈັ່ງໃດ.
ຈົວນ້ອຍຖົ່ມນ້ຳເກືອຖີ້ມໃນທັນທີ, ແລະຕອບວ່າ:"ຂົມຫຼາຍ."
ເຈົ້າຫົວກໍຫົວ, ແລ້ວພາຈົວນ້ອຍຖືເກືອໄປແຄມໜອງນຳເພິ່ນ.
ເມື່ອຮອດແຄມໜອງ, ເຈົ້າຫົວກໍໃຫ້ຈົວນ້ອຍເອົາເກືອໂຮຍໃສ່ໜອງ, ແລ້ວເວົ້າຕໍ່ຈົວນ້ອຍວ່າ:"ບັດນີ້, ໃຫ້ຈົວຕັກເອົານ້ຳໃນໜອງມາກິນເບິ່ງ."
ຈົວນ້ອຍກໍຕັກເອົານ້ຳໃນໜອງມາກິນ, ເຈົ້າຫົວຖາມວ່າ:"ເປັນແນວໃດ?"
ຈົວນ້ອຍຕອບວ່າ:"ເຢັນດີ."
ເຈົ້າຫົວຖາມວ່າ:"ເຄັມບໍ່?"
ຈົວນ້ອຍຕອບວ່າ:"ບໍ່."
ພາຍຫຼັງມາ, ເຈົ້າຫົວນັ່ງຢູ່ຂ້າງຈົວນ້ອຍທີ່ມັກຈົ່ມຜູ້ນີ້, ຈັບມືຂອງຈົວ, ແລະເວົ້າວ່າ: "ຄວາມທຸກທໍລະມານນັ້ນມັນກໍຄືກັບເກືອເຫຼົ່ານີ້ແຫຼະ, ມັນຕ້ອງມີ, ແຕ່ບໍ່ຫຼາຍແລະກໍບໍ່ໜ້ອຍ. ລະດັບຄວາມເຈັບປວດຢູ່ນຳຄວາມສາມາດອົດທົນຂອງເຮົາເອງ. ດັ່ງນັ້ນ, ເມື່ອເຈົ້າຮູ້ສຶກເຈັບປວດຫຼາຍ, ເຈົ້າກໍເພີ່ມຄວາມສາມາດອົດທົນໃຫ້ຫຼາຍຂຶ້ນ, ບໍ່ແມ່ນເອົານ້ຳຈອກໜຶ່ງມາໃສ່, ແຕ່ຫາກແມ່ນນ້ຳໝົດໜອງ, ບາດນັ້ນ, ເຈົ້າກໍຈະບໍ່ຮູ້ສຶກວ່າເກືອຂົມພໍປານໃດ."
ໃນຊີວິດຂອງຄົນເຮົາ, ເລື່ອງທີ່ບໍ່ສົມຫວັງມີເຖິງແປດ ເກົ້າສ່ວນ, ຄົນເຮົາມີຊີວິດຢູ່ໃນໂລກນີ້, ຄວາມເຈັບປວດແມ່ນຫຼີກເວັ້ນບໍ່ໄດ້. ຄົນທັງຫຼາຍມັກເວົ້າວ່າ:"ຄວາມເຈັບປວດແລະຄວາມຫຍຸ້ງຍາກກໍເໝືອນດັ່ງລໍຊໍ, ເຈົ້າອ່ອນມັນກໍແຂງ, ເຈົ້າແຮງມັນກໍ່ອ່ອນລົງ", ເມື່ອເຮົາຖືຄວາມເຈັບປວດເປັນພູສູງທີ່ປີນຂ້າມບໍ່ໄດ້, ຖືກມັນນາບຂູ່ແລ້ວ, ເຖິງວ່າມັນຈະນ້ອຍປານໃດ, ມັນກໍ່ຈະກາຍເປັນພູເຂົາໃຫຍ່, ກາຍເປັນຫາບໜັກ, ໜີບເຕັງເຮົາຈົນຫາຍໃຈບໍ່ໄດ້. ແຕ່ກົງກັນຂ້າມ, ເມື່ອເຮົາພົບຄວາມຫຍຸ້ງຍາກແລ້ວ, ຖ້າເຮົາມີຄວາມກ້າຫານຕໍ່ສູ້ກັບມັນດ້ວຍຄວາມທຸ່ນທ່ຽງ, ໃຫ້ຕົວເອງເປັນຄົນເຂັ້ມແຂງ, ເປັນຄົນໃຈກວ້າງ, ເມື່ອເຮົາເຂັ້ມແຂງແລ້ວ, ມັນກໍອ່ອນຍອບລົງ, ຈະເຈັບປວດປານໃດກໍບໍ່ເປັນຕາຢ້ານ.
ເພື່ອນຜູ້ຟັງທີ່ຮັກແພງ, ຖ້າທ່ານພົບຄວາມຫຍຸ້ງຍາກແລະຄວາມເຈັບທໍລະມານເທື່ອໃດ, ໃຫ້ທ່ານລອງຫັນໜ້າໃສ່ດ້ວຍໃຈກວ້າງຂວາງແລະເອົາຊະນະມັນດ້ວຍທ່າທີທີ່ເຂັ້ມແຂງກວ່າເກົ່າ, ຖ້າເປັນແນວນັ້ນແລ້ວ, ມັນບໍ່ພຽງແຕ່ບໍ່ສາມາດຜາບແພ້ເຮົາໄດ້, ກົງກັນຂ້າມຍັງຈະກາຍເປັນຄຸນສົມບັດອັນລ້ຳຄ່າຂອງຊີວິດເຮົາ, ເຮັດໃຫ້ຊີວິດຂອງພວກເຮົາສົມບູນຂຶ້ນ, ແລະກໍ່ເຮັດໃຫ້ເຮົາເອງເຂັ້ມແຂງຂຶ້ນ! ທ່ານຜູ້ຟັງທີ່ເຄົາລົບ, ລາຍການຄາລົມຄົມຄາຍພາກນີ້ຂໍຈົບລົງພຽງທໍ່ນີ້, ສົມບູນແລະວິໄລວັນຜູ້ຮຽບຮຽງຂອບໃຈທ່ານທີ່ຮັບຟັງ, ພົບກັນໃໝ່ໃນວັນເສົາໜ້າ, ສະບາຍດີ!
|
|
