|
ຕາມຂ່າວສານຊິນຮວາ: ທ່ານເວິນເຈຍປາວ ນາຍົກລັດຖະມົນຕີຈີນກ່າວຢູ່ປັກກິ່ງວ່າ, ໃນຂະນະທີ່ຮັບປະກັນຜົນປະໂຫຍດດ້ານວັດຖຸຂອງຊາວກະສິກອນ, ການປະຕິຮູບຊົນນະບົດຂອງຈີນຈະປົກປັກຮັກສາສິດປະຊາທິປະໄຕຂອງຊາວກະສິກອນ.
ໃນກອງປະຊຸມວຽກງານປະຕິຮູບສັງລວມຊົນນະບົດທົ່ວປະເທດຈີນທີ່ຈັດຂຶ້ນໃນຫວ່າງມໍ່ໆນີ້, ທ່ານເວິນເຈຍປາວ ນາຍົກລັດຖະມົນຕີຈີນກ່າວວ່າ, ການປະຕິຮູບຊົນນະບົດຂອງຈີນບໍ່ພຽງແຕ່ກ່ຽວພັນເຖິງຂົງເຂດເສດຖະກິດທໍ່ນັ້ນ, ຫາກຍັງກ່ຽວພັນເຖິງຂົງເຂດການເມືອງ ສັງຄົມແລະວັດທະນະທຳອີກດ້ວຍ, ລັດຖະບາຈີນຈະລົງທຶນເຂົ້າໃນກະສິກຳແລະຊົນນະບົດຫຼາຍຍິ່ງຂຶ້ນຢ່າງບໍ່ຢຸດຢັ້ງ, ແກ້ໄຂບັນຫາຕິດຕົວຂອງຊາວກະສິກອນໃນການຜະລິດຜົນແລະຊີວິດການເປັນຢູ່; ຈັດຕັ້ງປະຕິບັດນະໂຍບາຍແລະມາດຕະການທີ່ສະໜັບສະໜູນການພັດທະນາຂອງກະສິກຳ, ຫຼຸດພັນທະຂອງຊາວກະສິກອນທັງເຮັດໃຫ້ຊາວກະສິກອນມີລາຍໄດ້ເພີ່ມຂຶ້ນ.
ທ່ານເວິນເຈຍປາວກ່າວວ່າ, ຊາວກະສິກອນປົກຄອງຕົນເອງ ເປີດກວ້າງປະຊາທິປະໄຕໃນຂັ້ນຮາກຖານ, ແມ່ນເນື້ອໃນສຳຄັນຂອງການປະຕິຮູບຊົນນະບົດ. ຈີນຈະບູລະນະລະບອບຊາວກະສິກອນປົກຄອງຕົນເອງເປັນກ້າວໆ, ຈັດການເລືອກຕັ້ງຢ່າງປະຊາທິປະໄຕ ຕັດສິນຊີ້ຂາດຢ່າງປະຊາທິປະໄຕ ຄຸ້ມຄອງຢ່າງປະຊາທິປະໄຕແລະຕິດຕາມກວດກາຢ່າງປະຊາທິປະໄຕ, ໃຫ້ຊາວກະສິກອນເປັນເຈົ້າຂອງບ້ານເມືອງຢ່າງແທ້ຈິງ; ແນະນຳຊາວກະສິກອນໃຊ້ສິດປະຊາທິປະໄຕຂອງຕົນຢ່າງຖືກຕ້ອງຕາມກົນໄກປະຊາທິປະໄຕແລະຕາມກົດໝາຍ.
|
