ຕາມ​ຂ່າວສານ​ຊິນ​ຮວາ: ວັນ​ທີ 3 ກັນຍາ ຢູ່​ທີ່​ຢາ​ກາກ​ຕາ, ທ່ານ​ຊູ​ນາ​ໂຕ ​ໂຄສົກ​ກອງ​ບັນ​ຊາ​ການ​ກອງ​ທັບ​ແຫ່ງຊາ​ດອິນ​ໂດ​ເນ​ເຊຍ​ກ່າວ​ວ່າ, ພາຍຫຼັງນັກ​ໂທດ 57 ຄົນ​ເຊິ່ງ​ລວມ​ທັງ​ອານ​​ເຟຼ​ໂດ ​ເຣນາ​ໂດ ຜູ່​ນຳ​ຂອງ​ທະຫານ​ກໍ່​ການ​ຈະລາຈົນ​ຢູ່​ຕີ​ມໍ​ເລ​ສ​ເຕ​ໄດ້​ໂຕນ​ຄຸກ​ໃນ​ວັນ​ທີ 30 ສິງ​ຫາ​ແລ້ວ, ກອງ​ທະຫານ​ອິນ​ໂດ​ເນ​ເຊຍ​ໄດ້​ເພີ່ມ​ການ​ປ້ອງ​ກັນ​ຢູ່​ເຂດ​ຊາຍ​ແດນ​ອິນ​ໂດ​ເນ​ເຊຍ​ຕີມໍ​ເລ​ສ​ເຕ.

ທ່ານ​ຊູ​ນາ​ໂຕ​ກ່າວ​ວ່າ, ຈຸດປະສົງ​​ແມ່ນ​ເພື່ອ​ປ້ອງ​ກັນ​ບໍ່​ໃຫ້​​ເຣນາ​ໂດ​ພ້ອມ​ເພື່ອນ​ຂອງ​ເຂົາ​ເຂົ້າ​ອິນ​ໂດ​ເນ​ເຊຍ, ​ແລະ​ກໍ່​ແມ່ນ​ເພື່ອຫຼີກ​ເວັ້ນການ​ຕິ​ຕຽນ​ຂອງ​ຕີ​ມໍ​ເລສ​ເຕທີ່​ວ່າ​ອິນ​ໂດ​ເນ​ເຊຍ​ສະໜັບສະໜູນ​ການ​ກະບົດ. ພ້ອມ​ກັນນັ້ນ ທ່ານກ່າວ​ຢ້ຳ​ວ່າ, ລັດ​ຖະ​ບານ​ອິນ​ໂດ​ເນ​ເຊຍ​ບໍ່​ແຊກ​ແຊງ​ວຽກ​ງານ​ພາຍ​ໃນ​ຂອງ​ຕີ​ມໍ​ເລ​ສ​ເຕ.

ທ້າຍ​ເດືອນ​ເມສາ​ປີ​ນີ້, ທະຫານ​ຕີ​ມໍ​ເລ​ສ​ເຕທີ່​ຖືກ​ຍຸບ​ປະມານ 600 ຄົນ​ໄດ້​ກໍ່​ການ​ຈະ​ລາ​ຈົນ​ຢູ່​ນະຄອນຫຼວງດີ​ລີ, ​ເຮັດ​ໃຫ້ 30 ຄົນ​ເສຍ​ຊີວິດ​ເປັນ​ຢ່າງ​ໜ້ອຍ, 1 ​ແສນ​ຄົນ​ພັດ​ຖິ່ນ. ​​ໂດຍ​ຕອບ​ສະໜອງ​ການຮຽກຮ້ອງຂອງ​ລັດຖະບານ​ຕີ​ມໍ​ເລ​ສ​ເຕ, ກອງ​ທະຫານ​ຮັກ​ສາ​ສັນ​ຕິ​ພາບ​ນາໆ​ຊາດ​ທີ່​ປະກອບ​ດ້ວຍ​ທະຫານ​ອົສຕຼາລີ ປອກຕຸຍ​ການ ນູ​ແວນ​ເຊ​ລັງ​ແລະ​ມາ​ເລ​ເຊຍ​ໄດ້​ເຂົ້າ​ປະ​ຈຳ​ຕີ​ມໍ​ເລ​ສ​ເຕ.