|
|
 |
| (GMT+08:00)
2006-09-05 11:35:46
|
 |
|
ຄົນຈີນພາກັນເອົາໃຈໃສ່ການບໍລິຫານເງິນໃນຄອບຄົວ
cri
|
ໃນເມື່ອກ່ອນ,ເວົ້າສຳລັບຊາວຈີນແລ້ວ,ຄຳວ່າ"ການບໍລິຫານເງິນຂອງຄອບຄົວ"ເປັນສັບແປກໃໝ່ທີ່ສຸດ,ແຕ່ວ່າດຽວນີ້,ທະແນມແຕ່ທ່ານສົນໃຈຈັກໜ້ອຍນຳຖະໜົນໃນຕົວເມືອງຕ່າງໆຂອງຈີນ,ທ່ານກໍຈະໄດ້ເຫັນວ່າມີການໂຄສະນາກ່ຽວກັບການແນະນຳວິທີບໍລິຫານການເງິນຢ່າງຫຼວງຫຼາຍ.ຄຽງຄູ່ກັບສັງຄົມພັດທະນາແລະຊັບສິນເພີ່ມຂຶ້ນ,ເຮັດແນວໃດຈະຈັດສັນຊັບສິນທີ່ນັບມື້ນັບຫຼາຍຂຶ້ນຂອງຕົນໄດ້ກາຍເປັນສິ່ງທີ່ຄົນຈີນຫຼວງຫຼາຍພວມພິຈາລະນາຢູ່.
ນີ້ແມ່ນຊຸດອົບຮົມຄວາມຮູ້ບໍລິຫານການເງິນເທື່ອໜຶ່ງທີ່ສະຫະພັນແມ່ຍິງແຫ່ງຊາດຈີນແລະທະນາຄານແຫ່ງໜຶ່ງຂອງຈີນຮ່ວມກັນຈັດຂຶ້ນຢູ່ປັກກິ່ງເມື່ອຫວ່າງກ່ອນນີ້ບໍ່ດົນ.ຜູ້ທີ່ມາເຂົ້າຮ່ວມຊຸດອົບຮົມດັ່ງກ່າວເກືອບແມ່ນເພດຍິງຈາກວົງການຕ່າງໆໝົດ.
ນາງຈູ່ອີ້ຈິ້ງເຮັດວຽກຢູ່ກົງຈັກແຫ່ງໜຶ່ງຂອງປັກກິ່ງ,ນາງກໍໄດ້ໄປເຂົ້າຮ່ວມຊຸດອົບຮົມ.ນາງບອກນັກຂ່າວວ່າ,ແຕ່ກ່ອນນາງໃຊ້ເງິນທຶນຕາມໃຈມັກ.ເມື່ອແຕ່ງງານແລ້ວ,ນາງກັບແມ່ຍ່າໄປຊື້ເຄື່ອງນຳກັນເລື້ອຍໆ,ນາງເຫັນວ່າ,ເມືອບ້ານແລ້ວແມ່ຍ່າໄດ້ບັນທຶກຄ່າໃຊ້ຈ່າຍທັງໝົດໄວ້ໃນປຶ້ມນ້ອຍ,ນາງຮູ້ສຶກວ່າມັນດີຫຼາຍ,ຈຶ່ງເລີ່ມບັນທຶກຄ່າໃຊ້ຈ່າຍຄືກັນ.ໃນເວລາຈົດບັນທຶກ,ນາງສັງເກດເຫັນເລື້ອຍໆວ່າມີຄ່າໃຊ້ຈ່າຍທີ່ບໍ່ຈຳເປັນຈຳນວນໜຶ່ງ,ຕໍ່ຈາກນັ້ນກໍຕັ້ງອົກຕັ້ງໃຈຫຼີກເວັ້ນໃນການຊື້ເຄື່ອງທີ່ບໍ່ຈຳເປັນນັ້ນ.ເຮັດຄືແນວນີ້ແລ້ວ,ການບໍລິໂພກຂອງນາງກໍມີສະຕິຫຼາຍກວ່າເກົ່າ.
ນາງຈູ່ອີ້ຈິ້ງເຫັນວ່າ,ໃນເມື່ອກ່ອນນາງພຽງແຕ່ຮູ້ເຕັກນິກບໍລິຫານການເງິນແບບງ່າຍດາຍທີ່ສຸດ,ນາງຍັງຢາກຊອກຮູ້ຄວາມຮູ້ດ້ານນີ້ຫຼາຍກວ່າເກົ່າ,ສະນັ້ນຈຶ່ງໄດ້ສະເໜີເຂົ້າຮ່ວມຊຸດອົບຮົມດັ່ງກ່າວ.ນາງເວົ້າວ່າ,
ແຕ່ກ່ອນພວກເຮົາພຽງແຕ່ຊອກຮູ້ຄວາມຮູ້ແບບງ່າຍດາຍກ່ຽວກັບການບໍລິຫານການເງິນໃນຊີວິດການເປັນຢ່ທໍ່ນັ້ນູ.ຂ້ອຍຫວັງວ່າຜູ້ຊ່ຽວຊານບໍລິຫານການເງິນສອນແລ້ວຈະຊ່ອຍພວກເຮົາໃຫ້ຮູ້ບໍລິຫານການເງິນຫຼາຍກວ່າເກົ່າ,ເຊິ່ງຈະມີຜົນດີຫຼາຍກວ່າຕໍ່ຊີວິດການເປັນຢູ່ປະຈຳວັນ.
ທີ່ຈິງແລ້ວ,ຄວາມຕ້ອງການບໍລິຫານເງິນຂອງນາງຈູ່ອີ້ຈິ້ງໄດ້ສ່ອງແສງໃຫ້ເຫັນການປ່ຽນແປງດ້ານລາຍໄດ້ຂອງຊາວຈີນ.ໃນເມື່ອກ່ອນ,ຈີນປະຕິບັດລະບອບເສດຖະກິດແຜນການ, ປະຊາຊົນບໍ່ມີເງິນເຫຼືອໃຊ້ຫຼາຍປານໃດ,ສະນັ້ນກໍບໍ່ມີບັນຫາກ່ຽວກັບບໍລິຫານການເງິນ.ແຕ່ດຽວນີ້ເສດຖະກິດຂອງຈີນພັດທະນາຢ່າງວ່ອງໄວ,ປະຊາຊົນຈີນມີລາຍໄດ້ເພີ່ມຂຶ້ນຢ່າງຫຼວງຫຼາຍ.
ທ່ານລິວອ້ຽນປິ່ນ ອາຍຸ40ກວ່າປີ,ແມ່ນເລຂາຄະນະກຳມະການວິຊາການຈັດວາງແຜນການບໍລິຫານການເງິນຂອງຈີນ,ທ່ານຍັງໄດ້ຈື່ວ່າ,ເມື່ອຍັງເປັນເດັກນ້ອຍ,ພໍ່ແມ່ມີລາຍໄດ້ໜ້ອຍ,ນອກຈາກຄ່າຄອງຊີບພື້ນຖານແລ້ວກໍບໍ່ມີເງິນເຫຼືອໃຊ້ຫຼາຍປານໃດ.ແຕ່ດຽວນີ້ມັນຕ່າງກັນແລ້ວ.ລາຍໄດ້ຂອງທ່ານແລະເມຍນອກຈາກຫັກຄ່າໃຊ້ຈ່າຍປະຈຳວັນຂອງຄອບຄົວສາມຄົນແລ້ວ,ຍັງມີເງິນເຫຼືອໃຊ້ບໍ່ໜ້ອຍ,ສະນັ້ນການບໍລິຫານການເງິນກໍກາຍເປັນສິ່ງທີ່ມີຄວາມຈຳເປັນແລ້ວ.ທ່ານລິວອ້ຽນປິ່ນເວົ້າວ່າ,
ແຕ່ກ່ອນເມື່ອຂ້າພະເຈົ້າຍັງເປັນເດັກນ້ອຍ,ເງິນເດືອນຂອງພໍ່ແມ່ມີແຕ່ຫຼາຍສິບຢວນເທົ່ານັ້ນ,ໃນເວລານັ້ນໃຊ້ເງິນຕ້ອງຄິດໄລ່ຢ່າງລະອຽດລະອໍ.ດຽວນີ້ລາຍໄດ້ເພີ່ມຂຶ້ນຫຼາຍແລ້ວ,ສະນັ້ນກໍຄິດວ່າຈະໄປລົງທຶນແນວໃດ,ເຮັດແນວໃດຈະເຮັດໃຫ້ຊີວິດການເປັນຢູ່ຂອງຕົນໃນອະນາຄົດໝັ້ນທ່ຽງກວ່າເກົ່າ,ຄຸນນະພາບຊີວິດຈະໄດ້ຍົກສູງຂຶ້ນຢ່າງບໍ່ຢຸດຢັ້ງ.
ຜູ້ຊ່ຽວຊານເວົ້າວ່າ,ຄວາມຕ້ອງການດ້ານບໍລິຫານການເງິນປະກົດອອກກໍແມ່ນຄວາມຕ້ອງການຊະນິດໜຶ່ງແຫ່ງການພັດທະນາຂອງສັງຄົມຈີນ.ແຕ່ກ່ອນ,ໃນລະບອບເສດຖະກິດແຜນການ,ການປິ່ນປົວແລະບຳນານຂອງຊາວຈີນສ່ວນຫຼາຍແມ່ນລັດເປັນຜູ້ຮັບຜິດຊອບ.ແຕ່ຊຸມປີ1990ມານີ້,ຄຽງຄູ່ກັບເສດຖະກິດຕະຫຼາດພັດທະນາ,ບຳນານແລະການປິ່ນປົວໄດ້ຫັນໄປຂຶ້ນກັບຊຸມຊົນທີ່ກ່ຽວຂ້ອງ,ລັດພຽງແຕ່ໃຫ້ການຄ້ຳປະກັນຂັ້ນພື້ນຖານເທົ່ານັ້ນ,ຖ້າຢາກມີຊີວິດການເປັນຢູ່ທີ່ມີຄຸນນະພາບສູງໃນຕອນທ້າຍຊີວິດ,ກໍຈຳເປັນຕ້ອງຈັດວາງແຜນການໃຫ້ດີ.ນອກນັ້ນ,ການພັດທະນາຂອງສັງຄົມກໍເຮັດໃຫ້ມວນຊົນສະແຫວງຫາເປົ້າໝາຍສູງກວ່າເກົ່າທາງວັດຖຸແລະຈິດໃຈ.ການບໍລິຫານເງິນກໍກາຍເປັນພາຫະນະອັນຍັງເກີດຜົນທີ່ຊ່ອຍບັນລຸເປົ້າໝາຍດັ່ງກ່າວ.
ທ່ານລິວອ້ຽນປິ່ນເວົ້າວ່າ,ເຮັດແນວໃດຈຶ່ງຈະຈັດສັນຊັບສິນຂອງຕົນເປັນຢ່າງດີ,ນີ້ຈະສົ່ງຜົນສະທ້ອນຕໍ່ຄຸນນະພາບຊີວິດການເປັນຢູ່ຂອງຄົນເຮົາ.ການບໍລິຫານການເງິນມີຄວາມສຳຄັນຕໍ່ທຸກໆຄົນ.
ໃນຖານະທີ່ເປັນຜູ້ຊ່ຽວຊານດ້ານບໍລິຫານການເງິນ,ທ່ານລິວອ້ຽນປິ່ນເຫັນວ່າ,ເຖິງວ່າຊາວຈີນພວມເອົາໃຈໃສ່ນຳການບໍລິຫານການເງິນຫຼາຍກວ່າເກົ່າ,ແຕ່ວ່າຍ້ອນບາງຄົນບໍ່ຊ່າງບໍລິຫານການເງິນ,ຕົວຢ່າງແມ່ນມີການບໍລິຫານການເງິນທີ່ບໍ່ອອກຜົນກໍຫຼາຍ.ບາງຄອບຄົວບໍ່ມີແຜນການຈັດວາງຊັບສິນຢ່າງສົມເຫດສົມຜົນ,ຈຶ່ງເຮັດໃຫ້ສະພາບການເງິນຕົກຢູ່ໃນສະພາບທີ່ບໍ່ຄ່ອງຕົວ.ເພື່ອແກ້ໄຂເລື່ອງນີ້,ຄະນະກຳມະການຜູ້ຈັດວາງແຜນການບໍລິຫານການເງິນທີ່ທ່ານລິວອ້ຽນປິ່ນເຮັດວຽກຢູ່ນັ້ນພວມຈັດຕັ້ງຊຸດອົບຮົມຄວາມຮູ້ດ້ານບໍລິຫານການເງິນຫຼາຍຊະນິດ,ຊ່ອຍເຫຼືອປະຊາ ຊົນຮຽນໄດ້ຄວາມຮູ້ດ້ານບໍລິຫານການເງິນຢ່າງເປັນລະບົບ,ແລ້ວສາມາດບໍລິຫານການເງິນຢ່າງຖືກຕ້ອງ.
ດຽວນີ້,ອົງການທະນາຄານຈຳນວນໜຶ່ງຂອງຈີນກໍໄດ້ຈັດກິດຈະກຳຈັດວາງແຜນການບໍລິຫານການເງິນຢ່າງຫຼວງຫຼາຍ,ແນະນຳລູກຄ້າຄວນຈັດສັນຊັບສິນແນວໃດ,ຍັງມີວິທີຝາກເງິນຫຼາຍຢ່າງທີ່ສອດຄ່ອງກັບຊັ້ນຄົນທີ່ມີລາຍໄດ້ຕ່າງກັນ.ນາງມາເມີຍຊິນ ຮອງຜູ້ຈັດການໃຫຍ່ພະແນກການທະນາຄານສ່ວນບຸກຄົນຂອງທະນາຄານກໍ່ສ້າງຂອງຈີນ ນັກເສດຖະສາດຊັ້ນສູງບອກນັກຂ່າວວ່າ,ທະນາຄານກໍ່ສ້າງບໍ່ພຽງແຕ່ໄດ້ປັບປຸງບໍລິການອອມສິນແບບດັ້ງເດີມ,ອຳນວຍຄວາມສະດວກໃຫ້ແກ່ລູກຄ້າໃຫ້ຫຼາຍເທົ່ານັ້ນ,ຍັງໄດ້ມີການທີ່ບໍລິຫານເງິນຝາກຕາງລູກຄ້າ,ເຊັ່ນການຄຸ້ມຄອງມູນນິທິ ຫຼັກຊັບຄຳແລະເງິນຕາຕ່າງປະເທດເປັນຕົ້ນ.ການບໍລິການເຫຼົ່ານີ້ບາງຊະນິດແມ່ນລົງທຶນຢູ່ໃນປະເທດໂດຍກົງ,ບາງຊະນິດແມ່ນເອົາໄປລົງທຶນຢູ່ຕ່າງປະເທດ,ແລ້ວມອບຜົນກຳໄລໃຫ້ແກ່ລູກຄ້າ.ວິທີຝາກເງິນຫຼາຍຢ່າງຫຼາຍແນວດັ່ງກ່າວໄດ້ຮັບຄວາມນິຍົມຊົມຊອບຈາກລູກຄ້າ.ນາງມາເມີຍຊີນເວົ້າວ່າ,
ດຽວນີ້ລູກຄ້າໄດ້ເລືອກໃຊ້ວິທີຝາກເງິນທີ່ໃຫ້ທະນາຄານບໍລິຫານຕາງຕົນເອງນັບມື້ນັບຫຼາຍ,ປີໃດກໍມີລູກຄ້າໃໝ່ມາເປີດບັນຊີຊື້ການບໍລິການຊະນິດນີ້;ແລະປະກົດວ່າມີຜູ້ຊື້ຫຼາຍຂຶ້ນເລື້ອຍໆ,ລູກຄ້ານັບມື້ນັບເອົາໃຈໃສ່ນຳການບໍລິຫານການເງິນຂອງຕົນ.
ຄວາມຕ້ອງການໃນດ້ານບໍລິຫານເງິນຍັງເຮັດໃຫ້ມີອາຊີບໃໝ່ຄືອາຊີບຜູ້ບໍລິຫານການເງິນກຳເນີດຂຶ້ນ.ຕາມໄດ້ຊາບ,ປັດຈຸບັນ,ຄອບຄົວຂອງຈີນທີ່ມີລາຍໄດ້5ແສນຢວນຕໍ່ປີມີປະມານ10ລ້ານຄອບຄົວ,ເມື່ອຄິດໄລ່ຕາມ100ຄອບຄົວຈ້າງຜູ້ບໍລິຫານການເງິນຜູ້ໜຶ່ງແລ້ວ,ກໍຕ້ອງການຜູ້ມີອາຊີບນີ້ເຖິງ1ແສນຄົນເປັນຢ່າງໜ້ອຍເພື່ອບໍລິຫານການເງິນໃຫ້ແກ່ຄອບຄົວເຫຼົ່ານີ້.
|
|
|
