|
|
 |
| (GMT+08:00)
2006-09-06 21:38:49
|
 |
|
ສະເໜີແຜ່ນCDໃໝ່ຂອງນາງຊຸ້ນຈື"Songs For Lovers"ເພງຮັກອັນຊຶ້ງໃຈ
cri
Author: mo
|
ສະບາຍດີທ່ານຜູ້ຟັງທີ່ເຄົາລົບ, ດາລາວັນຜູ້ດຳເນີນລາຍການຂໍສະແດງຄວາມຍິນດີຕ້ອນຮັບທ່ານຮັບຟັງລາຍການຢ່ອນອາລົມໃນວັນເສົາ. ຫວ່າງບໍ່ດົນນີ້, ນາງຊຸ້ນຈື ນັກຮ້ອງໄຕ້ຫວັນໄດ້ອັດCDເພງພາສາອັງກິດແລະພາສາຝຣັ່ງແຜ່ນໜຶ່ງທີ່ໃຫ້ຊື່ວ່າ: "Songs For Lovers" ເພງຮັກອັນຊຶ້ງໃຈ, ນາງໄດ້ເລືອກເອົາເພງອະມະຕະຫຼາຍເພງມາອັດໃໝ່ເປັນຈັງຫວະດົນຕີແຈັສ, ໄດ້ນຳເອົາຄວາມຮູ້ສຶກອັນອອນຊອນມາໃຫ້ຜູ້ຟັງ. ໃນລາຍການມື້ນີ້, ດາລາວັນຂໍແນະນຳCDແຜ່ນນີ້ຂອງນາງຊຸ້ນຈື.
ທີ່ທ່ານພວມຟັງຢູ່ນີ້ແມ່ນເພງ"Lex Yeux Ouverts" ມືນຕາທັງຄູ່, ເພງນີ້ ແຕ່ເດີມແມ່ນເພງພື້ນເມືອງຊົນນະບົດຝຣັ່ງ, ເນື້ອເພງແຕ່ງດ້ວຍພາສາບູຮານຝຣັ່ງ. ເຖິງວ່ານາງຊຸ້ນຈືເວົ້າພາສາຝຣັ່ງພໍຫຼ່ຽນໄຫຼປານໃດ, ໂດຍສະເພາະແມ່ນພາສາຝຣັ່ງບູຮານ, ເພື່ອອອກສຽງໃຫ້ຖືກ, ນາງໄດ້ຕັ້ງເດີນທາງໄປຂໍຮຽນການອອກສຽງນຳອາຈານພາສາສາດຢູ່ປາຣີ. ຄວາມພະຍາຍາມຂອງນາງໄດ້ເຮັດໃຫ້ຜູ້ຟັງຮູ້ສຶກພໍໃຈຫຼາຍ, ການອອກສຽງອັນນິ້ມນວນພິເສດຂອງພາສາຝຣັ່ງໄດ້ເຮັດໃຫ້ເພງນີ້ເຕັມໄປດ້ວຍຄວາມອົບອຸ່ນແລະຊຶ້ງໃຈ.
ເພງໃນCDແຜ່ນໃໝ່ຂອງນາງຊຸ້ນຈືລ້ວນແລ້ວແຕ່ແມ່ນເພງອະມະຕະຂອງນັກຮ້ອງຊື່ດັງ. ເຖິງວ່າແມ່ນຮ້ອງເພງຂອງຜູ້ອື່ນ, ແຕ່ນາງຊຸ້ນຈືໄດ້ລະບາຍຈິດໃຈອາລົມຂອງຕົນເອງເຂົ້າໃນເພງ, ທັງໃຊ້ສຽງຄໍແລະວີທີຮ້ອງອັນພິເສດຂອງຕົນ, ຈຶ່ງເຮັດໃຫ້ເພງມີຊີວິດໃໝ່.
ທີ່ທ່ານພວມຟັງຢູ່ນີ້ແມ່ນເພງMy Funny Valentine. ເພງນີ້ແມ່ນເພງຂອງທ່ານເຊັດ ເບກເຄີ ນັກດົນຕີແຈັສອາເມລິກາທີ່ລ່ວງລັບໄປແລ້ວ. ໃນຄາວນັ້ນ, ເມື່ອເພງນີ້ນຳອອກສະແດງ, ກໍດົ່ງດັງໃນທັນທີ, ຫຼັງຈາກນັ້ນ, ໄດ້ມີນັກຮ້ອງຫຼາຍໆຄົນເຄີຍຮ້ອງເພງນີ້. ຫຼາຍສິບປີຜ່ານມາ, ເພງນີ້ກໍຍັງເປັນເພງທີ່ຜູ້ມັກດົນຕີແຈັສມັກຮ້ອງເລື້ອຍໆ. ນາງຊຸ້ນຈືທີ່ຕິດອົກຕິດໃຈນຳດົນຕີແຈັສກໍຄືກັນ, ຕ່າງແຕ່ວ່າ, ນາງຮ້ອງເພງນີ້, ບໍ່ມີຄວາມໂສກເສົ້າເຍືອກເຢັນຄືໃນເພງເດີມ, ຫາກເຕັມໄປແຕ່ຄວາມອົບອຸ່ນ. ຕໍ່ໄປເຊີນຟັງເພງນີ້ໄດ້ເລີຍ. My Funny Valentine.
ໃນCDແຜ່ນໃໝ່ນີ້, ນາງຊຸ້ນຈືໄດ້ສະແດງຄວາມຊຳນານຂອງຕົນຢ່າງເຕັມສ່ວນ, ນາງໄດ້ເລືອກຮ້ອງເພງທີ່ມີຊື່ສຽງຂອງນາງອາເລັດທາ ແຟຼັງຄິຼນ ນັກຮ້ອງອາເມລິກາຄືເພງYou Make Me Feel Like A Natural Woman. ແລະເພງSmooth Operator ຂອງນາງຊາເດ ນັກດົນຕີແຈັສທີ່ມີຊື່ສຽງຂອງອັງກິດທີ່ມີສຽງຄໍທຸ້ມໆທັງແຫບໆ. ສອງເພງນີ້ ເພງໃດກໍມີບ່ອນຮ້ອງຍາກໆ. ເພງໜຶ່ງຕ້ອງໃຊ້ພະລິງສຽງສູງແລະອາລົມຈິດອັນສຸດເຊິ່ງ. ອີກເພງໜຶ່ງ, ຕ້ອງໃຊ້ສຽງກາງສຽງທຸ້ມທີ່ມີສະເໜຈັບໃຈດູດດຶງຜູ້ຟັງ. ທັງໝົດເຫຼົ່ານີ້, ນາງຊຸ້ນຈືເຮັດໄດ້ດີຫຼາຍ. ຕໍ່ໄປເຊີນຟັງເພງ Smooth Operator ທີ່ຂັບຮ້ອງໂດຍນາງຊຸ້ນຈື.
ໃນແຜ່ນCD "Songs For Lovers" ເພງຮັກຊຶ້ງໃຈ, ນາງຊຸ້ນຈືໄດ້ເລືອກເອົາເພງຊຶ້ງໃຈທີ່ມີທຳນອງເພງສະໄໝນິຍົມແລະທຳນອງແຈັສ 9 ເພງ, ແລ້ວໃຊ້ສຽງອັນສະບາຍໆໆທີ່ສຸດເຮັດໃຫ້ຄົນຮູ້ສຶກອອນຊອນ. ຕໍ່ໄປ ເຊີນຟັງເພງ You Are The Sunshine of My Life ເຈົ້າແມ່ນແສງຕາເວັນໃນຊີວິດຂອງຂ້ອຍ.
ເພງນີ້ແຕ່ເດີມແມ່ນເພງທີ່ທ່ານສະຕິຟ ວັນເດີ ເປັນຜູ້ຂັບຮ້ອງ. ທ່ານສະຕິຟ ວັນເດີ ຕາບອດທັງສອງເບື້ອງ, ແຕ່ທ່ານບໍ່ໄດ້ປະລະຈຸດໝາຍແຫ່ງຊີວິດ, ແລະໄດ້ດຳລົງຊີບດ້ວຍນ້ຳໃຈອັນໝັ້ນໜຽວທົນທານ, ທັງໄດ້ກາຍເປັນນັກຮ້ອງຜູ້ຍິ່ງໃຫຍ່ກວ່າໝູ່ຂອງອາເມລິກາໃນສະຕະວັດທີ 20. ນາງຊຸ້ນຈືຮ້ອງເພງນີ້, ແມ່ນຫວັງຢາກໃຫ້ມານະຈິດຂອງທ່ານສະຕິຟ ວັນເດີໃຫ້ກຳລັງໃຈແກ່ຜູ້ທີ່ສູ້ຊົນຢູ່ບົນເສັ້ນທາງແຫ່ງດົນຕີ, ຍຶດໝັ້ນຄວາມຝັນແຫ່ງດົນຕີຂອງຕົນຕະຫຼອດໄປ.
ດົນຕີແຈັສແມ່ນດົນຕີທີ່ນາງຊຸ້ນຈືມັກທີ່ສຸດຕະຫຼອດມາ. ປີ 2000, ນາງໄດ້ຮັບລາງວັນຄຳການແຕ່ງແລະຮ້ອງເພງxie yi shou ge ຂອງໄຕ້ຫວັນ, ເພງນີ້ມີທຳນອງແຈັສອັນເຂັ້ມຂຸ້ນ. ນາງຊຸ້ນຈືອັດCDດົນຕີແຈັສຊຸດນີ້, ກໍເພື່ອຢາກໃຊ້ຄວາມສາມາດນ້ອຍໆຂອງຕົນ ເຜີຍແຜ່ດົນຕີແຈັສທີ່ນາງມັກທີ່ສຸດນັ້ນຕໍ່ຊາວຈີນໃນໂລກ, ໃຫ້ຄົນສຳຜັດສະເໜຂອງດົນຕີແຈັສ. ສຸດທ້າຍນີ້, ເຊີນຟັງເພງBizarre Love Triangle ຮັກສາມເສົາ. ແຕ່ເດີມເພງນີ້ແມ່ນເພງພື້ນເມືອງ, ແຕ່ນາງຊຸ້ນຈືໄດ້ດັດແປງເປັນເພງທຳນອງແຈັສ, ຮູ້ສຶກວ່າໜ້າຟັງເປັນພິເສດ.
ທ່ານຜູ້ຟັງທີ່ເຄົາລົບ, ທີ່ຟັງມານັ້ນແມ່ນຊຸດເພງ: "Songs For Lovers" ເພງຮັກອອນຊອນຂອງນາງຊຸ້ນຈື. ລາຍການຢ່ອນອາລົມໃນວັນເສົາພາກນີ້ຂໍຈົບລົງທໍ່ນີ້, ຂອບໃຈທ່ານທີ່ຮັບຟັງ, ສະບາຍດີ.
|
|
|
