|
ສວນຈົ່ງກວ່ນຊຸ່ນຕັ້ງຢູ່ ພາກຕາເວັນຕົກສຽງເໜືອຂອງປັກກິ່ງ,ຄົນທົ່ວໄປເອີ້ນວ່າຊິລິເຄິນ ແວລີ(Silicon Valley)ຂອງຈີນ.ສິບກວ່າປີກ່ອນ,ມີຄົນຈຳນວນໜຶ່ງທີ່ມີຄວາມປາຖະໜາຢາກພັດທະນາພາລະກິດວິທະຍາສາດເຕັກນິກຂອງຈີນໄດ້ມາເຕົ້າໂຮມກັນຢູ່ບ່ອນນີ້,ເລີ່ມສ້າງພາລະກິດຂອງຕົນ.ໃນຕອນເລີ່ມຕົ້ນ,ວຽກງານຂອງພວກເພິ່ນແມ່ນຕິດຕັ້ງເຄື່ອງອາໄລ່ຂອງຜະລິດຕະພັນເອເລັກໂຕຼນິກທີ່ນຳເຂົ້າມາຈາກຕ່າງປະເທດ,ແລ້ວຂາຍໃຫ້ຜູ້ບໍລິໂພກ,ເກືອບວ່າບໍ່ມີຄວາມສາມາດຄົ້ນຄວ້າພັດທະນາແລະປະດິດສ້າງຫຍັງເລີຍ.ແຕ່ໃນຊູ່ມື້ນີ້,ຈົ່ງກວ່ນຊຸ່ນໄດ້ກາຍເປັນສວນໄຮເຕັກທີ່ມີຂະໜາດໃຫຍ່ກວ່າໝູ່ຂອງຈີນ,ຜະລິດຕະພັນຂອງສວນຈົ່ງກວ່ນຊຸ່ນ,ມີ90%ຂຶ້ນໄປມີລະດັບເທົ່າທຽມກັບລະດັບກ້າວໜ້າຂອງໂລກ.ໃນລາຍການສວນວິທະຍາສາດແລະການສຶກສາພາກນີ້,ສັງຂານຈະເວົ້າສູ່ຟັງກ່ຽວກັບບົດບາດຂໍກະແຈຂອງການເປັນເຈົ້າການປະດິດສ້າງໃນການພັດທະນາຂອງສວນຈົ່ງກວ່ນຊຸ່ນ.
ມີບຸກຄົນໃນຂະແໜງການທີ່ກ່ຽວຂ້ອງເຄີຍບອກນັກຂ່າວວ່າ,ຢູ່ສວນຈົ່ງກວ່ນຊຸ່ນ,ບໍ່ວ່າຈະຍ່າງເຂົ້າບໍລິສັດໃດ,ເອກະສານຂອງໂຄງການຄົ້ນຄວ້າວິທະຍາສາດເຕັກນິກທີ່ນັກຄົ້ນຄວ້າມີຢູ່ໃນມືນັ້ນ,ລ້ວນແຕ່ຈະເຮັດໃຫ້ທ່ານຮູ້ສຶກງຶດງໍ້.ເພາະວ່າເຕັກນິກຂອງໂຄງການຄົ້ນຄວ້າພັດທະນາເຫຼົ່ານີ້,ສ່ວນຫຼາຍມີລະດັບເທົ່າທຽມກັບລະດັບທີ່ກ້າວໜ້າທີ່ສຸດໃນໂລກ.
ໃນເວລານັກຂ່າວໄປເອົາຂ່າວຢູ່ບໍລິສັດຫຸ້ນສ່ວນຮ້ານວາງຈຳກັດທີ່ຕັ້ງຢູ່ສວນຈົ່ງກວ່ນຊຸ່ນ,ຄຳເວົ້າດັ່ງກ່າວກໍໄດ້ຮັບການຢຶນຢັນແລ້ວ.ທ່ານຈ່າງຮ້າວເພີງ ວິສະວະກອນຂອງບໍລິສັດແຫ່ງນີ້ບອກວ່າ,ປະຈຸບັນນີ້,ໃນຕະຫຼາດ,ໂທລະສັບມືຖືຍີ່ຫໍ້ຕ່າງໆລ້ວນແຕ່ສາມາດໃຊ້ມືຂຽນຕົວໜັງສືຈີນເຂົ້າໂທລະສັບມືຖືໄດ້,ໃນໂທລະສັບເຫຼົ່ານີ້,ມີ80%ແມ່ນໄດ້ໃຊ້ເຕັກນິກຈຳແນກຕົວໜັງສືຈີນທີ່ຂຽນດ້ວຍມືທີ່ບໍລິສັດຮ້ານວາງຄົ້ນຄວ້າຜະລິດ.
ໃນຫຼາຍປີມານີ້,ບໍລິສັດຮ້ານວາງໄດ້ນຳໃຊ້ປະມານ10%ຂອງມູນຄ່າຈຳໜ່າຍເພື່ອໃຊ້ເຂົ້າໃນການພັດທະນາຜະລິດຕະພັນໃໝ່.ປະຈຸບັນນີ້,ບໍລິສັດແຫ່ງນີ້ໄດ້ຮັບຜົນສຳເລັດຢ່າງຍິ່ງໃຫຍ່ໃນການຄົ້ນຄວ້າເຕັກນິກຕ່າງໆ ເຊັ່ນ ການຈຳແນກຕົວໜັງສືຈີນທີ່ຂຽນດ້ວຍມື ການຄຸ້ມຄອງການຈາລະຈອນແບບອັດຕະໂນມັດແລະໂທລະສັບສະໝອງກົນເປັນຕົ້ນ,ມີເຕັກນິກຫຼາຍອັນໄດ້ຈົດລິກຂະສິດຊັບສິນທາງປັນຍາຂອງຕົນ,ລະດັບມາດຕະຖານເຕັກນິກກໍຢືນຢູ່ຖານະນຳໜ້າຢູ່ຈີນແລະຕ່າງປະເທດ.
ຢູ່ສວນຈົ່ງກວ່ນຊຸ່ນ,ວິສາຫະກິດຈີນທີ່ຄືກັນກັບບໍລິສັດຮ້ານວາງນັ້ນມີຢູ່ບໍ່ໜ້ອຍ,ຄືໄດ້ຮັບຜົນສຳເລັດດ້ວຍການເປັນເຈົ້າການປະດິດສ້າງສິ່ງໃໝ່.ທ່ານເຢິນໄຈ້ຊີ ຜູ້ຮັບຜິດຊອບທີ່ກ່ຽວຂ້ອງຂອງຄະນະກຳມະການຄຸ້ມຄອງຄຸ້ມສວນວິທະຍາສາດເຕັກນິກຈົ່ງກ່ວນຊຸ່ນເວົ້າ ສູ່ຟັງວ່າ,ໃນສາກົນ,ແຕ່ລະປີ,ການລົງທຶນເຂົ້າໃນການຄົ້ນຄວ້າພັດທະນາເຕັກນິກໃໝ່ຂອງວິສາຫະກິດກວມປະມານ5%ຫາ8%ຂອງມູນຄ່າຈຳໜ່າຍ.ປະຈຸບັນນີ້,ມີວິສາຫະກິດ1ໝື່ນ7ພັນແຫ່ງຕັ້ງອາຄານຫ້ອງການຢູ່ຄຸ້ມສວນຈົ່ງກວ່ນຊຸ່ນ,ການລົງທຶນເຂົ້າໃນການຄົ້ນຄວ້າພັດທະນາຂອງວິສາຫະກິດເຫຼົ່ານີ້ສ່ວນຫຼາຍໄດ້ລື່ນກາຍລະດັບສາກົນ.ທ່ານເວົ້າວ່າ,ປີກາຍນີ້,ເງິນທຶນທີ່ວິສາຫະກິດຄຸ້ມສວນຈົ່ງກວ່ນຊຸ່ນໃຊ້ເຂົ້າໃນການຄົ້ນຄວ້າພັດທະນາໄດ້ບັນລຸ22ຕື້ຢວນ,ການລົງທຶນເຫຼົ່ານີ້ເຮັດໃຫ້ທ່າແຮງດ້ານເຕັກນິກຂອງວິສາຫະກິດເຫຼົ່ານີ້ໄດ້ຮັບການເສີມຂະຫຍາຍຢ່າງເຕັມທີ່."ສວນຈົ່ງກວ່ນຊຸ່ນມີທ່າແຮງດ້ານເຕັກນິກທີ່ພົ້ນເດັ່ນ,ດ້ານໜຶ່ງແມ່ນການອອກແບບວົງຈອນໄຟຟ້າ,ເຊິ່ງລວມທັງການອອກແບບຜະລິດຕະພັນສ່ວນບຸກຄົນ,ເຊັ່ນ ໂທລະສັບມືຖື MP3ແລະMP4ເປັນຕົ້ນ.ນອກນີ້,ໃນຂະແໜງຢຸກຢາຊີວະຊາດ,ສວນຈົ່ງກວ່ນຊຸ່ນ ກໍມີພື້ນຖານອັນໜາແໜ້ນທີ່ສຸດໃນດ້ານເຕັກນິກ."
ປະຈຸບັນນີ້,ບໍລິສັດຜະລິດຕະພັນຊີວະຊາດເຄີ່ຊິ່ງປັກກິ່ງຈຳກັດໄດ້ກາຍເປັນຜູ້ນຳໜ້າໃນ ຂະແໜງຢຸກຢາຊີວະຊາດຈົ່ງກວ່ນຊຸ່ນ.ໃນປີ1999,ທ່ານອິນເວີ້ຍຕົ່ງ ຜູ້ຮັບຜິດຊອບບໍລິສັດຜະລິດຕະພັນຊີວະຊາດເຄີ່ຊີ່ງປັກກິ່ງຈຳກັດພ້ອມດ້ວຍທິມງານຂອງທ່ານໄດ້ຄົ້ນຄວ້າຜະລິດວັກແຊງພະຍາດຕັບອັກເສບປະເພດເອຫຼອດທຳອິດຂອງຈີນ.ເພື່ອບັນລຸການຜະລິດວັກແຊງເປັນງວດ,ບໍລິສັດແຫ່ງນີ້ໄດ້ລົງທຶນກ້ອນໃຫຍ່ວາງແຜນການອອກແບບອຸດສາຫະກຳ,ໄດ້ສ້າງແຫຼ່ງຜະລິດວັກແຊງແຫ່ງໜຶ່ງຕາມມາດຖານສາກົນຢ່າງເຂັ້ມງວດ,ພ້ອມກັນນັ້ນ,ຍັງໄດ້ສ້າງບ່ອນຄົ້ນຄວ້າພັດທະນາວັກແຊງ,ບ່ອນຄົ້ນຄວ້າຜະລິດວັກແຊງນີ້ໄດ້ເສີມຂະຫຍາຍບົດບາດສຳຄັນໃນການຄົ້ນຄວ້າພັດທະນາວັກແຊງພະຍາດອັກເສບປອດຮຸນແຮງຫຼືຊາສ໌ແລະວັກແຊງໄຂ້ຫວັດສັດປີກສຳລັບຄົນ."ຜ່ານການຄົ້ນຄວ້າພັດທະນາວັກແຊງພະຍາດຕັບອັກເສບປະເພດເອ,ທິມງານພວກຂ້າພະເຈົ້າໄດ້ຮັບການຝຶກຝົນ,ຕໍ່ຈາກນັ້ນ,ທິມງານນີ້ໄດ້ພັດທະນາວັກແຊງອື່ນໆອີກ."
ໃຕ້ການສະໜັບສະໜູນຂອງບໍລິສັດ,ທິມງານຄົ້ນຄວ້າພັດທະນາຂອງບໍລິສັດເຄີ່ຊິ່ງຍັງໄດ້ຄົ້ນຄວ້າຜະລິດວັກແຊງພະຍາດຊາສ໌ຫຼອດທຳອິດຂອງໂລກໃນເວລາສັ້ນໆ.
ທີ່ຈິງແລ້ວ,ນອກຈາກວິສາຫະກິດໃຫຍ່ຈຳນວນໜຶ່ງທີ່ມີກຳລັງເຂັ້ມແຂງແລ້ວ,ການເດີນຕາມເສັ້ນທາງພັດທະນາທີ່ຖືການເປັນເຈົ້າການປະດິດສ້າງເປັນໃຈກາງກໍແມ່ນຄວາມຮັບຮູ້ທີ່ເປັນເອກະພາບກັນຂອງວິສາຫະກິດຂະໜາດກາງຂະໜາດນ້ອຍທັງຫຼາຍ.ຫຼາຍປີມານີ້,ສວນວິທະຍາສາດເຕັກນິກຈົ່ງກວ່ນຊຸ່ນໄດ້ດຶງດູດນັກວິຊາການຈຳນວນຫຼາຍທີ່ຮຽນຈົບຈາກມະຫາວິທະຍາໄລເຂົ້າເປັນສະມາຊິກຕົ້ນຕໍ.ບໍລິສັດພັດທະນາວິທະຍາສາດເຕັກນິກ ຮຸ້ຍຕຽນປັກກິ່ງຈຳກັດກໍແມ່ນວິສາຫະກິດແບບນີ້.
ບໍລິສັດພັດທະນາວິທະຍາສາດເຕັກນິກຮຸ້ຍຕຽນປັກກິ່ງຈຳກັດແມ່ນສ້າງຕັ້ງຂຶ້ນດ້ວຍນັກຮຽນ10ຄົນທີ່ຮຽນຈົບຈາກມະຫາວິທະຍາໄລຊິ່ງຮວາໃນປີ1998.ທ່ານຈ່ຽງສຽວຕ່ານປະທານຂອງບໍລິສັດແຫ່ງນີ້ບອກນັກຂ່າວວ່າ,ໃນເວລາບໍລິສັດຫາກໍສ້າງຕັ້ງຂຶ້ນ,ທ່ານມີແນວຄິດງ່າຍດາຍທີ່ສຸດ,ຄືຢາກສ້າງພາລະກິດຂອງຕົນຈາກຄວາມຮູ້ວິຊາສະເພາະທີ່ຮຽນໄດ້ໃນມະຫາວິທະຍາໄລຊິ່ງຮວາ.
ແຕ່ວ່າ,ການພັດທະນາວຽກງານນີ້ບໍ່ງ່າຍຄືທ່ານຈ່ຽງສຽວຕ່ານຄິດໄວ້.ໃນໄລຍະຕົ້ນ,ບໍລິສັດໄດ້ພົບພໍ້ອຸປະສັກຫຼາຍຢ່າງຫຼາຍແນວ,ຈົນກະທັ້ງເກືອບຈະຫຼົ້ມຈົມ.ໃນທີ່ສຸດ,ໃນປີ2003,ບໍລິສັດຮຸ້ຍຕຽນໄດ້ກຳໂອກາດໃນຕະຫຼາດຊອຟແວເພື່ອການປະຕິບັດງານແລະຄຸ້ມຄອງຢ່າງອັດຕະໂນມັດ.ທ່ານຈ່ຽງສຽວຕ່ານເວົ້າວ່າ,ໃນຂະນະທີ່ປັບທິດພັດທະນາຂອງຕົນຢ່າງຖືກຕ້ອງນັ້ນ,ເຂົາເຈົ້າກໍພະຍາຍາມສ້າງບ່ອນຄົ້ນຄວ້າພັດທະນາຊອຟແວເພື່ອການ ປະຕິບັດງານແລະຄຸ້ມຄອງແບບອັດຕະໂນມັດທີ່ນຳໜ້າໃນຈີນ.ທ່ານເວົ້າວ່າ:"ພວກຂ້າພະເຈົ້າໄດ້ປັບທິດພັດທະນາຂອງບໍລິສັດ ຄື ເຮັດໃຫ້ບໍລິສັດກາຍເປັນບໍລິສັດນຳໜ້າຂອງຈີນໃນການສະໜອງການບໍລິການຊອຟແວເພື່ອໃຫ້ການປະຕິບັດງານແລະຄຸ້ມຄອງແບບອັດະໂນມັດ.ພ້ອມກັນນັ້ນ,ພວກຂ້າພະເຈົ້າໄດ້ຕັ້ງອົງການຄົ້ນຄວ້າຫຼາຍວິຊາໂດຍອາໄສທ່າແຮງຂອງມະຫາວິທະຍາໄລຊິ່ງຮວາ,ເຊິ່ງລວມທັງຫ້ອງທົດລອງປະສົມກ່ຽວກັບການຄຸ້ມອງຄວາມຮູ້ແລະການຄ້າສະໝອງກົນຮຸ້ຍຕຽນຊິ່ງຮວາ,ແລະໄດ້ຕັ້ງສູນຄົ້ນຄວ້າວຽກງານຂອງອົງການປົກຄອງແບບເອເລັກໂຕຼນິກກັບສະຖາບັນຄຸ້ມຄອງສາທາລະນະສະຖາບັນຄຸ້ມຄອງເສດຖະກິດແລະສະຖາບັນຂໍ້ມູນຂ່າວສານຂອງມະຫາວິທະຍາໄລຊິ່ງຮວາ."
ປີກາຍນີ້,ລາຍໄດ້ຈາກການຈຳໜ່າຍຂອງບໍລິສັດຮຸ້ຍຕຽນໄດ້ບັນລຸ100ລ້ານຢວນ,ອັດຕາ ເຕີບໂຕສະເລ່ຍຕໍ່ປີໃນ3ປີມານີ້ໄດ້ບັນລຸ150%ຂຶ້ນໄປ.ທ່ານຈ່ຽງສຽວຕ່ານເວົ້າວ່າ,ປະຈຸບັນນີ້,ໃນບໍລິສັດແຫ່ງນີ້ໄດ້ມີລະບົບຄົ້ນຄວ້າພັດທະນາຜະລິດພັນທີ່ມີສິດຊັບສິນທາງປັນຍາຂອງຕົນຊຸດໜຶ່ງແລ້ວ,ທ່ານມີຄວາມໝັ້ນໃຈຢ່າງເຕັມປ່ຽມຕໍ່ອະນາຄົດຂອງບໍລິສັດ.
|
