ຕາມ​ຂ່າວ CRI: ວັນ​ທີ 7 ກັນຍາ, ທ່ານນາງ​ອູ​ອີ ຮອງ​ນາຍົກລັດຖະມົນຕີຈີນກ່າວ​ວ່າ, ຈີນ​ຈະ​ປະ​ຕິ​ບັດ​ນະ​ໂຍ​ບາຍ​ທີ່​ດຶງ​ດູດ​ທຶນ​ຕ່າງປະ​ເທດ​ຢ່າງ​ບໍ່​ຫວັ່ນ​ໄຫວ​ຄອນ​ແຄນ, ​ແລະ​ຕັ້ງໜ້າ​ດຶງ​ດູດ​ທຶນ​ຕ່າງ​ປະ​ເທດຢ່າງ​ມີ​ປະສິດທິຜົນ​ກວ່າ​ເກົ່າ.

​ໃນ​ເວລາ​ພົບ​ປະ​ຜູ່​ແທນ​ບໍລິສັດ​ຂ້າມ​ຊາດ​ທີ່​ເຂົ້າຮ່ວມ​ງານ​ພົບ​ປະການ​ລົງທຶນ​ການ​ຄ້າ​ສາ​ກົນ​ຈີນ​ຄັ້ງທີ 10 ຢູ່​ເມືອງ​ເຊ້ຍ​ເໝິນ​ແຂວງ​ຝູຈ້ຽນ, ທ່ານນາງ​ອູ​ອີ​ກ່າວ​ວ່າ, ​ໃນ​ສະ​ເພາະ​ໜ້າ​ນີ້, ບໍ່​ວ່າ​​ໃນ​ດ້ານ​ປະລິມານຫຼືວ່າ​ໃນ​ດ້ານ​ຄຸນ​ນະພາ​ບ, ຈີນ​ດຶງ​ດູດ​​ນັກທຸ​ລະ​ກິດ​ຕ່າງ​ປະ​ເທດມາ​ລົງ​ທຶນ​ຍັງ​ມີ​ຊ່ອງ​ຫວ່າງ​​ຫຼາຍຢູ່. ຈີນ​ຈະ​ເພີ່ມ​ຄວາມເອົາ​ໃຈ​ໃສ່​ນຳການ​ປັບປຸງ​ອົງ​ປະ​ກອບ​ທຶນ​ຕ່າງ​ປະ​ເທດຫຼາຍ​ຂຶ້ນ, ຍົກປະສິດທິພາ​ບ​ການ​ດຶງ​ດູດທຶນ​ຕ່າງປະ​ເທດ, ຊຸກ​ຍູ້​ນັກ​ທຸ​ລະ​ກິດ​ຕ່າງ​ປະ​ເທດມາ​ລົງທຶນ​ເຂົ້າ​ໃນ​ສູນ​ຄົ້ນຄວ້າ​ພັດທະນາ ອຸດສາຫະກຳ​​ເຕັກນິກ​ສູງ ອຸດສາ​ຫະ​ກຳ​ປະ​ຢັດ​ພະ​ລັງ​ງານ​ແລະ​ອະນຸລັກ​ສິ່ງ​ແວດ​ລ້ອມ ກະສິກຳ​ທັນ​ສະ​ໄໝ​ແລະ​ການ​ບໍລິການ​ທັນ​ສະ​ໄໝ.

ນັບ​ແຕ່​ຈີນ​ປະຕິບັດ​ນະ​ໂຍບາຍ​ປະຕິ​ຮູບ​ແລະ​ໄຂ​ປະຕູ​ສູ່​ພາຍ​ນອກ​ເມື່ອ​ປີ 1978 ​ເປັນ​ຕົ້ນ​ມາ, ຈີນ​ໄດ້ດຶງ​ດູດ​ທຶນ​ຕ່າງປະ​ເທດ​ນັບ​ມື້​ນັບ​ເພີ່ມ​ຂຶ້ນ, ​ໃນ​ເກືອບ 15 ປີ​ມາ​ນີ້ ຈີນ​ແມ່ນ​ປະ​ເທດ​ພວມ​ພັດທະນາ​ທີ່​ມີ​ນັກ​ທຸລະ​ກິດ​ຕ່າງປະ​ເທດ​ມາ​ລົງທຶນ​ໂດຍ​ກົງຫຼາຍກວ່າ​ໝູ່​ໃນ​ໂລກ​ຕະ​ຫຼອດ​ມາ, ​ມີ​ບໍລິສັດ​ຕ່າງປະ​ເທດ 2 ​ແສນ 8 ໝື່ນ​ກວ່າ​ແຫ່ງ​ໄດ້​ລົງທຶນຢູ່​ຈີນ, ນັບ​ລວມ​ແລ້ວ ຈີນ​ໄດ້​ດຶງ​ດູດ​ທຶນ​ຕ່າງປະ​ເທດ 350 ກວ່າ​ຕື້​ໂດ​ລາ.