|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ. ໃນຖານະເປັນພາກສ່ວນສຳຄັນຂອງວຽກງານກະກຽມງານກິລາໂອລິມປິກປັກກິ່ງປີ 2008, ວັນທີ 28 ສິງຫາ ງານກິລາໂອລິມປິກແລະງານກິລາໂອລິມປິກຄົນພິການປີ 2008 ເລີ່ມຮັບສະໝັກອາສາສະໝັກໃນໄລຍະແຂ່ງຂັນຢ່າງເປັນທາງການ. ແຕ່ມື້ນັ້ນເປັນຕົ້ນໄປ, ອາສາສະໝັກທີ່ຍິນດີຮັບໃຊ້ງານກິລາໂອລິມປິກປັກກິ່ງປີ 2008 ແລະງານກິລາໂອລິມປິກຄົນພິການເລີ່ມສະເໜີຊື່ໄດ້. ຕໍ່ໄປເຊີນຟັງບົດແຈ້ງຂ່າວລະອຽດ.
ການຮັບສະໝັກອາສາສະໝັກຂອງງານກິລາໂອລິມປິກແລະງານກິລາໂອລິມປິກຄົນພິການແບ່ງອອກເປັນສອງພາກສ່ວນ ຄື "ອາສາສະໝັກໄລຍະກະກຽມ" ແລະ "ອາສາສະໝັກໃນໄລຍະດຳເນີນການແຂ່ງຂັນ". ໃນໄລຍະກະກຽມ, ຄະນະກຳມະການຈັດຕັ້ງງານກິລາໂອລິມປິກປັກກິ່ງໄດ້ຮັບສະໝັກ "ອາສາສະໝັກໄລຍະກະກຽມ" ຈຳນວນໜຶ່ງແລ້ວ, ໄດ້ອົບຮົມແລະເຕົ້າໂຮມອາສາສະໝັກທີ່ມີລະດັບສູງຊຸດທີໜຶ່ງ, ປັດຈຸບັນ, ອາສາສະໝັກໄລຍະກະກຽມທີ່ໄດ້ເຂົ້າຮ່ວມການອົບຮົມເກືອບ 300 ຄົນ.
ຕາມແຜນການ, ວັນທີ 28 ສິງຫາ, ຄະນະກຳມະການຈັດຕັ້ງງານກິລາໂອລິມປິກປັກກິ່ງໄດ້ເລີ່ມຮັບສະໝັກອາສາສະໝັກໃນໄລຍະແຂ່ງຂັນຢ່າງເປັນທາງການ. ໃນກອງປະຊຸມຂ່າວທີ່ຈັດຂຶ້ນໃນມື້ດຽວກັນ, ທ່ານລີປິງຮວາ ຮອງປະທານບໍລິຫານງານຄະນະກຳມະການຈັດຕັ້ງງານກິລາໂອລິມປິກປັກກິ່ງໄດ້ແນະນຳແຜນການຮັບສະໝັກອາສາສະໝັກງານກິລາໂອລິມປິກ. ທ່ານເວົ້າວ່າ: ເມື່ອໄດ້ສຳຫຼວດຄົ້ນຄວ້າແລ້ວໄດ້ຕົກລົງວ່າ, ຕ້ອງການອາສາສະໝັກທີ່ຮັບໃຊ້ງານກິລາໂອລິມປິກຄັ້ງທີ 29 ໃນໄລຍະແຂ່ງຂັນປະມານ 7 ໝື່ນຄົນ, ຕ້ອງການອາສາສະໝັກງານກິລາໂອລິມປິກຄົນພິການຄັ້ງທີ 13 ໃນໄລຍະແຂ່ງຂັນປະມານ 3 ໝື່ນຄົນ. ໃນງານກິລາໂອລິມປິກປັກກິ່ງ, ຈະຈັດວາງອາສາສະໝັກເຫຼົ່ານີ້ໄປເຮັດວຽກຢູ່ເກືອບພັນໜ້າທີ່ຂອງ 80 ກວ່າຂົງເຂດບໍລິການຄື ການຈັດຕັ້ງການແຂ່ງຂັນ ບໍລິການຜູ່ຊົມ ຮັກສາຄວາມປອດໄພແລະຄົມມະນາຄົມ ການຂ່າວແລະການກອບກູ້ປິ່ນປົວເປັນຕົ້ນ.
ຄະນະກຳມະການຈັດຕັ້ງງານກິລາໂອລິມປິກປັກກິ່ງໄດ້ເຜີຍໃຫ້ຮູ້ວ່າ, ເງື່ອນໄຂພື້ນຖານຜູ່ທີ່ຈະສະໝັກເປັນອາສາສະໝັກກ່ອນງານກິລາໂອລິມປິກປີ 2008 ຍັງເດືອນໜຶ່ງອາຍຸຕ່ຳສຸດຕ້ອງແມ່ນ 18 ປີຂຶ້ນໄປ, ນອກນີ້, ເງື່ອນໄຂອື່ນໆທີ່ຄະນະກຳມະການຈັດຕັ້ງງານກິລາໂອລິມປິກປັກກິ່ງກຳນົດໄວ້ນັ້ນຍັງມີດັ່ງນີ້: ສະໝັກໃຈເຂົ້າຮ່ວມການບໍລິການງານກິລາໂອລິມປິກແລະງານກິລາໂອລິມປິກຄົນພິການປັກກິ່ງ; ໂຄລົບກົດໝາຍກົດບັນຍັດຂອງຈີນ; ຈະເຂົ້າຮ່ວມການອົບຮົມແລະກິດຈະກຳທີ່ກ່ຽວຂ້ອງກ່ອນງານກິລາໂອລິມປິກໄດ້; ສາມາດບໍລິການ 7 ມື້ຕິດຕໍ່ກັນຂຶ້ນໄປໃນໄລຍະງານກິລາໂອລິມປິກປັກກິ່ງແລະງານກິລາໂອລິມປິກຄົນພິການ ແລະຮູ້ພາສາທີ່ຈະໃຊ້ເປັນຕົ້ນ.
ແຕ່ວັນທີ 28 ສິງຫາເປັນຕົ້ນໄປ, ຜູ່ສະໝັກເປັນອາສາສະໝັກງານກິລາໂອລິມ ປິກເຂດປັກກິ່ງເລີ່ມສະເໜີຊື່; ເດືອນມີນາປີໜ້າ, ຊາວຮົງກົງ ມາກາວແລະໄຕ້ຫວັນ ຊາວຈີນຕ່າງດ້າວແລະນັກສຶກສາຈີນທີ່ຮຽນຢູ່ຕ່າງປະເທດແລະຊາວຕ່າງປະເທດເລີ່ມ ສະເໜີຊື່.
ໃນມື້ດຽວກັນ, ທ່ານລິວສີ ປະທານຄະນະກຳມະການຈັດຕັ້ງງານກິລາໂອລິມປິກປັກກິ່ງກ່າວວ່າ, ວຽກງານຮັບສະໝັກອາສາສະໝັກແມ່ນວຽກງານສຳຄັນອັນໜຶ່ງທີ່ປະຕິບັດຕາມແຜນການຂອງຄະນະກຳມະການໂອລິມປິກສາກົນແລະຄະນະກຳມະການຈັດຕັ້ງງານກິລາໂອລິມປິກປັກກິ່ງ, ເພື່ອຊຸກຍູ້ການກະກຽມງານ, ພ້ອມກັນນັ້ນ ກໍ່ໄດ້ສ້າງຊ່ອງທາງໃຫ້ແກ່ປະຊາຊົນອັນໄພສານແລະເພື່ອນມິດຕ່າງປະເທດໄດ້ມີສ່ວນຮ່ວມແລະບໍລິການງານກິລາໂອລິມປິກ. ທ່ານເວົ້າວ່າ:
"ມີເພື່ອນມິດມາຈາກທາງໄກ ຈັ່ງແມ່ນດີໃຈແທ້. ພວກຂ້າພະເຈົ້າຫວັງຢ່າງຈິງໃຈວ່າ ປະຊາຊົນ ເຜົ່າຕ່າງໆຢູ່ແຫ່ງຕ່າງໆທົ່ວປະເທດ ຊາວຮົງກົງ ມາກາວແລະໄຕ້ຫວັນ ຊາວຈີນຕ່າງດ້າວແລະເພື່ອນມິດສາກົນຈະສະເໜີຊື່ເຂົ້າຮ່ວມຢ່າງຫ້າວຫັນ, ເພື່ອເປັນອາສາສະໝັກບໍລິການງານກິລາໂອລິມປິກທີ່ມີກຽດ. ສົ່ງເສີມນ້ຳໃຈສະໝັກ ເຜີຍແຜ່ນ້ຳໃຈໂອລິມປິກ…ພວກຂ້າພະເຈົ້າເຊື່ອວ່າ, ໃນປີ 2008, ໃບໜ້າຍິ້ມແຍ້ມແຈ່ມໃສຂອງອາສາສະໝັກຈະເປັນສັນຍາລັກທີ່ດີທີ່ສຸດຂອງປັກກິ່ງ. ຍິນດີຕ້ອນຮັບທ່ານສະໝັກເປັນອາສາສະໝັກງານກິລາໂອລິມປິກປັກກິ່ງ".
ໃນມື້ດຽວກັນ ທ່ານເຈັກເກສ ໂລເກ ປະທານຄະນະກຳມະການໂອລິມປິກສາກົນໄດ້ກ່າວປາໃສທາງໂທລະພາບ, ທ່ານກ່າວວ່າ, ວຽກງານຂອງອາສາສະໝັກງານກິລາໂອລິມປິກປັກກິ່ງປີ 2008 ຈະຊຸກຍູ້ການເຜີຍແຜ່ທັດສະນະຄະຕິຄ່ານິຍົມຂອງໂອລິມປິກຢ່າງແຂງແຮງ. ທ່ານເວົ້າວ່າ:
ທີ່ຈິງແລ້ວ, ຖ້າບໍ່ມີອາສາສະໝັກ, ກໍຈະຈັດງານກິລາໂອລິມປິກບໍ່ໄດ້. ວຽກງານຂອງອາສາສະໝັກໄດ້ສະແດງເຖິງຄວາມຮັບຜິດຊອບແລະຄຸນສົມບັດຂອງນັກກິລາອາຊີບ, ນີ້ຈະເຮັດໃຫ້ງານກິລາໂອລິມປິກກາຍເປັນງານມະໂຫລານຂອງຊາວໜຸ່ມໂລກ. ເປັນອາສາສະໝັກຈະເຮັດໃຫ້ປະສົບການຂອງຄົນຜູ່ໜຶ່ງອຸດົມສົມບູນຂຶ້ນ, ສ່ວນເປັນອາສາສະໝັກຂອງງານກິລາໂອລິມປິກມັກຈະເປັນປະສົບການພຽງຄັ້ງດຽວໃນຕະຫຼອດຊີວິດ…ພວກເຮົາຈະພ້ອມກັນພະຍາຍາມ, ປີ 2008 ປັກກິ່ງຍິນດີຕ້ອນຮັບປະຊາຊົນທົ່ວໂລກມາເຂົ້າຮ່ວມງານກິລາໂອລິມປິກ. ອີກສອງປີ ຂ້າພະເຈົ້າຄອງຄອຍທີ່ຈະພົບໜ້າພໍ້ຕາອາສາສະໝັກຈຳນວນໜຶ່ງ. ເວລານັ້ນ, ອາສາສະໝັກທັງຫຼາຍຈະເວົ້າຕໍ່ແຂກຜູ່ມີກຽດທີ່ມາຈາກປະເທດຕ່າງໆໃນທົ່ວໂລກວ່າ: ປັກກິ່ງຍິນດີຕ້ອນຮັບທ່ານ.
|
