|
|
 |
| (GMT+08:00)
2006-09-08 16:42:45
|
 |
|
ໂທລະພາບຈີນກ້າວສູ່ຍຸກແຂ່ງຂັນກັນຢ່າງດຸເດືອດ
cri
ດຽວນີ້ຢູ່ຈີນໂທລະພາບໄດ້ເຜີຍແຜ່ເຂົ້າສູ່ຊີວິດປະຈຳວັນຂອງມະຫາຊົນຢ່າງທົ່ວເຖິງແລ້ວ,ແລະໄດ້ກາຍເປັນເຄື່ອງມືສຳຄັນສຳລັບປະຊາຊົນຊອກຮູ້ເຫດການສຳຄັນທັງພາຍໃນແລະຕ່າງປະເທດແລະສະແຫວງຄວາມມ່ວນຊື່ນລື້ນເລີງ.ພ້ອມກັນນັ້ນ,ຄຽງຄູ່ກັບຂະແໜງການສື່ມວນຊົນພັດທະນາຢ່າງບໍ່ຢຸດຢັ້ງ,ຂະແໜງໂທລະພາບຂອງຈີນກໍໄດ້ປະເຊີນກັບຄວາມກົດດັນແຫ່ງການແຂ່ງຂັນທີ່ນັບມື້ນັບຂ້ຽວຂາດ,ງານວາງສະແດງວິທະຍຸຮູບເງົາແລະ ໂທລະພາບສາກົນຈີນທີ່ຈັດຂຶ້ນຢູ່ປັກກິ່ງນັ້ນ,ກໍເຮັດໃຫ້ຄົນທັງຫຼາຍຮູ້ສຶກວ່າ,ຂະແໜງການໂທລະພາບຂອງຈີນພວມປະເຊີນກັບໂອກາດພັດທະນາແລະການທ້າທາຍ.
ດຽວນີ້ຈີນມີໂທລະພາບແຫ່ງຊາດໜຶ່ງແຫ່ງ,ຂັ້ນແຂວງ31ແຫ່ງ.ແຕ່ປີ2005ຮອດປີ2006,ຂະແໜງການໂທລະພາບຂອງຈີນພວມຢູ່ໃນສະພາບທີ່ເປີດປະຕູຕະຫຼາດໃຫ້ກວ້າງອອກກວ່າເກົ່າ,ສື່ໂທລະພາບແຫ່ງຕ່າງໆພວມຊອກຫາຊ່ອງທາງປະດິດສ້າງຢ່າງບໍ່ຢຸດຢັ້ງ,ການແຂ່ງຂັນດ້ານລາຍການກໍນັບມື້ນັບດຸເດືອດ,ໄດ້ມີລາຍການອັນດີເດັ່ນຢ່າງ ຫຼວງຫຼາຍທີ່ໄດ້ຮັບຄວາມນິຍົມຊົມຊອບຈາກຜູ້ຊົມ.ທ່ານຫູຈ້ານຟານ,ຮອງຫົວໜ້າກົມໃຫຍ່ວິທະຍຸຮູບເງົາແລະໂທລະພາບແຫ່ງຊາດຈີນແນະນຳວ່າ,
ໃນຫຼາຍປີມໍ່ໆມານີ້,ໂທລະພາບທຸກຂັ້ນໃນທົ່ວປະເທດໄດ້ປະຕິຮູບແລະຄົ້ນຄວ້າຢ່າງກ້າຫານ,ໂຄລຳລາຍການນັບມື້ນັບອຸດົມສົມບູນຂຶ້ນ,ດ້ານເຕັກນິກກໍກ້າວໜ້າກວ່າເກົ່າ,ແລະໄດ້ມີທາງທຸລະກິດແບບໃໝ່ຢ່າງຕໍ່ເນື່ອງ,ໄດ້ສະສົມບົດຮຽນຢ່າງຫຼວງຫຼາຍ.ໃນເວລາປະເຊີນກັບການທ້າທາຍຂອງອົງການໂທລະພາບສາກົນແລະການແຂ່ງຂັນລະຫວ່າງຂະແໜງສື່ພາຍໃນປະເທດ,ໂທລະພາບແຫ່ງຕ່າງໆໄດ້ຖືການປະດິດສ້າງເປັນແມ່ແຮງ,ເພີ່ມສະຕິສ້າງລາຍການດີເດັ່ນທີ່ຜູ້ຊົມນິຍົມ,ຕັ້ງໜ້າຊອກຫາຊ່ອງທາງໃໝ່,ແລະໄດ້ສ້າງແຜນຍຸດທະສາດພັດທະນາຂອງໃຜມັນ,ເຮັດໃຫ້ຂະແໜງການໂທລະພາບປະກົດມີສະພາບຈະເລີນຮຸ່ງເຮືອງ.
CCTVແມ່ນໂທລະພາບແຫ່ງຊາດແຫ່ງດຽວຂອງຈີນ.ໃນຫຼາຍປີມານີ້ CCTVຍຶດໝັ້ນເຜີຍແຜ່ໂຄສະນາຮູບຖານຈິດສຳນຶກແລະວັດທະນະທຳຕົ້ນຕໍຕະຫຼອດມາ,ບາງຄໍລຳມີຊື່ສຽງ ດົ່ງດັງຢູ່ຈີນ,ເຊັ່ນ "ຊິ່ນເວີນລຽນໂປ່"ຄືລາຍການພາກຂ່າວ "ຈ່ຽວຕຽນຝາງທານ"ຄືລາຍການສຳພາດແລະສົນທະນາກ່ຽວກັບເຫດການໜ້າສົນໃຈແລະລາຍການ"ທົງອີ້ໂສວເກີ່"ຊຶ່ງເປັນ ລາຍການດົນຕີເປັນຕົ້ນ.ໃນດ້ານການຈັດທຳລາຍການ,CCTVກໍເອົາໃຈໃສ່ເປັນພິເສດນຳຄຸນນະພາບຂອງລາຍການ.ໃນCCTV,ມີແຕ່ຄໍລຳທີ່ມີຜູ້ຊົມຫຼາຍກວ່າໝູ່ແລະຄຸນນະພາບດີກວ່າໝູ່ຈຶ່ງຈະຈັດອອກອາກາດໃນຊ່ອງໜຶ່ງໄດ້ແລະຍັງຕ້ອງຮັບການກວດສອບດ້ານອັດຕາຜູ້ຊົມຢູ່ທຸກເວລາ,ເພື່ອຮັບປະກັນໃຫ້ລາຍການທີ່ສະເໜີຕໍ່ຜູ້ຊົມນັ້ນຕ້ອງແມ່ນລາຍການທີ່ດີທີ່ສຸດ.ໃນປີ2005,CCTVໄດ້ຖ່າຍທອດສົດກ່ຽວກັບຍານອະວະກາດ"ເສີນໂຈ່ວ"ເລກ6ບິນໃນກາງອະວະກາດ,ເຊິ່ງໄດ້ສ້າງສະຖິຕິທີ່ລາຍງານເຫດການດຽວຢ່າງຂະໜາດໃຫຍ່ກວ່າໝູ່.ໃນປີ2006,ໃນການແຈ້ງຂ່າວງານບານເຕະໂລກ,CCTV ໄດ້ຖ່າຍທອດສົດແຕ່ຕົ້ນຈົນຈົບການແຂ່ງຂັນເປັນຄັ້ງທຳອິດ,ເຮັດໃຫ້ຜູ້ຊົມຈີນໄດ້ຊົມພ້ອມກັບຜູ້ຊົມໃນສະໜາມ.ຜົນການສຳຫຼວດສະແດງໃຫ້ເຫັນວ່າ,ຢູ່ຈີນມີ650ລ້ານຄົນຊົມລາຍການຂອງCCTVທຸກໆມື້.ທ່ານຈ້າວຮວ້າຢົງ ຫົວໜ້າສະຖານີCCTVແນະນຳວ່າ,
ເພື່ອຕອບສະໜອງກັບຄວາມຕ້ອງການຂອງຜູ້ຊົມລະດັບຕ່າງໆ,ພວກເຮົາໄດ້ພັດທະນາດ້ານວິຊາການແລະລັກສະນະຂອງລາຍການຕ່າງໆໃຫ້ພົ້ນເດັ່ນຂຶ້ນຕື່ມອີກ.ແຕ່ປີ1999ຮອດປີ2004,ໂທລະພາບພວກເຮົາຖືCCTV1 ເຊິ່ງເປັນຊ່ອງລວມເປັນຜູ້ນຳໜ້າ,ຊ່ອງວິຊາການອີກ15ຊ່ອງຕ່າງຄ້ຳຊູກັນ,ອອກອາກາດທັງພາຍໃນແລະຕ່າງປະເທດ.ມີລາຍການ 400ກວ່າຄໍລຳ,ສັນຍານລາຍການປົກຄຸມໄປທົ່ວໂລກ,ໄດ້ສ້າງສະຖານີກະຈາຍຕໍ່ຢູ່120ປະເທດແລະເຂດແຄວ້ນ.
ລາຍການບັນເທີງແມ່ນລາຍການສຳຄັນຂອງໂທລະພາບທີ່ດູດດຶງຜູ້ຊົມແລະດຶງດູດເອົານັກທຸລະກິດມາໂຄສະນາສິນຄ້າ.ໃນປີ1997,ໂທລະພາບຜ່ານດາວທຽມຂອງແຂວງຫູນານກໍໄດ້ຈັດລາຍການບັນເທີງ,ທີ່ໃຫ້ຊື່ວ່າ ຄ້ວຍເລີ້ຕ້າເປີນຢິງແປວ່າ ແຫຼ່ງແຫ່ງຄວາມມ່ວນຊື່ນ,ແລະໄດ້ຮັບຄວາມນິຍົມຊົມຊອບຈາກຜູ້ຊົມທົ່ວປະເທດໃນທັນທີ.ໃນລາຍການດັ່ງກ່າວ,ໄດ້ຈັດໃຫ້ມີເກມໂຊຫຼາຍຊະນິດ,ໃຫ້ຜູ້ຊົມເຂົ້າມາຮ່ວມນຳ,ເຊິ່ງລວມທັງຜູ້ຊົມທີ່ເຂົ້າຮ່ວມລາຍການ ແລະຜູ້ຊົມທີ່ຢູ່ທາງບ້ານ.ລາຍການດັ່ງກ່າວໄດ້ສ້າງຕົວຢ່າງໃໝ່ໃຫ້ແກ່ລາຍການ ມ່ວນຊື່ນຂອງໂທລະພາບຈີນ.ແຕ່ປີ2005ເປັນຕົ້ນມາ,ແຕ່ລະປີໂທລະພາບດາວທຽມຫູນານກໍຈັດລາຍການປະກວດນັກຮ້ອງສະໝັກຫຼິ້ນຂະໜາດໃຫຍ່,ຄື Super girl,ຜູ້ຊົມທົ່ວປະເທດພາກັນຕິດຕາມເບິ່ງແລະໄດ້ຮັບຄວາມນີຍົມຊົມຊອບເປັນການໃຫຍ່.ບໍ່ວ່າລາຍການ ແຫຼ່ງຄວາມມ່ວນຊື່ນ ຫຼືລາຍການ Super girl,ໂທລະພາບຂອງທ້ອງຖິ່ນຕ່າງໆກໍພາກັນຮຽນແບບ.ໃນເວລາຕີລາຄາປະກົດການດັ່ງກ່າວ,ທ່ານຢິນຮົງ ສາສະດາຈານວິຊາເຜີຍແຜ່ຮູບເງົາໂທລະພາບຂອງມະຫາວິທະຍາໄລຊິ່ງຮວາເວົ້າວ່າ,
ໃນຫຼາຍປີມານີ້,ລາຍການໂທລະພາບເຮັດໃຫ້ສັງຄົມສົນໃຈໄດ້ໃນລະດັບສູງປານນີ້ແມ່ນມີໜ້ອຍທີ່ສຸດ,ມັນສະແດງໃຫ້ເຫັນວ່າ,ການປະດິດສ້າງໃໝ່ຂອງໂທລະພາບຈີນແມ່ນ ຊ່ອງທາງທີ່ຊອກຫາເສັ້ນທາງພັດທະນາເພື່ອຢູ່ລອດຂອງຕົນໃນຍຸກໂລກາພິວັດ,ນີ້ໄດ້ສະແດງໃຫ້ເຫັນກຳລັງຊີວິດອັນແຂງແຮງ.
ພ້ອມກັນນັ້ນ,ສາສະດາຈານຢິນຮົງຊີ້ອອກວ່າ,ໂທລະພາບທ້ອງຖິ່ນຕ່າງໆພາກັນຈັດລາຍການເກມໂຊ,ໃນດ້ານໜຶ່ງກໍສະແດງໃຫ້ເຫັນວ່າລາຍ ການໂທລະພາບຂອງຈີນອ່ອນແອໃນດ້ານປະດິດແຕ່ງລາຍການໃໝ່,ມັກຈະເກີດສະພາບຮຽນແບບ,ຄວາມສາມາດປະດິດສ້າງໃໝ່ບໍ່ເກັ່ງ.
ດຽວນີ້,ສື່ສາກົນໄດ້ເຂົ້າມາໃນຂົງເຂດຜະລິດລາຍການໂທລະພາບຂອງຈີນແລ້ວ,ໄດ້ສ້າງສະຖານີກະຈາຍຕໍ່ຫຼາຍກວ່າ30ແຫ່ງຢູ່ຈີນ.ESPN STAR SPORTS ແມ່ນໂທລະພາບລາຍການກິລາລະດັບສາກົນແຫ່ງໜຶ່ງ,ມີການຮ່ວມມືກັບໂທລະພາບຈີນໃນຫຼາຍດ້ານ.ທ່ານເຈມມີເດວິສປະທານຄະນະບໍລິຫານງານຂອງໂທລະພາບດັ່ງກ່າວບອກນັກຂ່າວວ່າ,
ຂ້າພະເຈົ້າຮູ້ສຶກດີໃຈຫຼາຍທີ່ໄດ້ກັບຄືນມາຈີນ.ຂ້າພະເຈົ້າໄດ້ເຫັນວ່າສື່ມວນຊົນຂອງຈີນພວມມີການປ່ຽນແປງ.ລາຍການຂອງໂທລະພາບທ້ອງຖິ່ນຕ່າງໆກໍນັບມື້ນັບອຸດົມສົມບູນກວ່າເກົ່າ.ເວົ້າສຳລັບພວກເຮົາແລ້ວແມ່ນໂອກາດອັນໃຫຍ່ຫຼວງ,ພວກເຮົາພວມເປີດກວ້າງສາຍຕາຂອງຜູ້ຊົມໂທລະພາບ,ພວກເຮົາໄດ້ຮັບອະນຸຍາດໃຫ້ຈັດທຳລາຍການພາສາຈີນທີ່ຍິ່ງໃກ້ຊິດກັບຜູ້ຊົມທ້ອງຖິ່ນ,ແລະສະໜອງໃຫ້ຜູ້ຊົມໂທລະພາບຂອງຈີນ.
ຂະແໜງການໂທລະພາບຂອງຈີນມີທັງໂອກາດແລະສິ່ງທ້າທາຍພ້ອມກັນ,ດ້ານໜຶ່ງ,ເສດຖະກິດຈີນພັດທະນາຢ່າງວ່ອງໄວແລະຕໍ່ເນື່ອງ,ໄດ້ສ້າງໂອກາດອັນໃຫຍ່ຫຼວງໃຫ້ແກ່ໂທລະພາບ,ອີກດ້ານໜຶ່ງສື່ແບບໃໝ່ຕ່າງໆ,ເຊັ່ນອິນເຕີເນັດໂທລະພາບມືຖື ໂທລະພາບທາງອິນເຕີເນັດໄດ້ພັດທະນາຢ່າງວ່ອງໄວ,ພ້ອມກັນນັ້ນກຸ່ມມວນຊົນສຶ່ຂະໜາດໃຫຍ່ແລະອົງການໂທລະພາບຂອງຕ່າງປະເທດກໍພາກັນເຂົ້າມາໃນຕະຫຼາດໂທລະພາບຂອງຈີນ,ທັງນີ້ໄດ້ເຮັດໃຫ້ໂທລະພາບແລະອົງການຮູບເງົາໂທລະພາບຂອງຈີນຮູ້ສຶກມີກຳລັງກົດດັນອັນໃຫຍ່ຫຼວງ,ເຂົາເຈົ້າຈຳເປັນຕ້ອງໄດ້ຄົ້ນຄິດປະດິດສ້າງຢ່າງບໍ່ຢຸດຢັ້ງ,ເພື່ອສອດຄ່ອງລົດນິຍົມຂອງຜູ້ຊົມທີ່ສູງຂຶ້ນນຳຄູ່ມື້,ຈຶ່ງຈະສາມາດດຶງດູດເອົາຜູ້ຊົມໃຫ້ຫຼາຍ,ແລະດຶງດູດເອົາຜູ້ເຮັດທຸລະກິດມາລົງທຶນໂຄສະນາສິນຄ້າ.
|
|
|
