|
|
 |
| (GMT+08:00)
2006-09-08 18:44:26
|
 |
|
ທ່ານອູເວີຍຊ່ານ ນັກປັ້ນຮູບໜຸ່ມທີ່ມີຊື່ສຽງຂອງຈີນ
cri
Author: mo
|
ທ່ານອູເວີຍຊ່ານ ນັກປັ້ນຮູບຂອງຈີນ, ເຖິງວ່າອາຍຸຍັງໜຸ່ມແຕ່ກໍໄດ້ຮັບຜົນສຳເລັດທີ່ບໍ່ທຳມະດາແລ້ວ. ຮູບປັ້ນຄົນທີ່ມີຊື່ສຽງທາງດ້ານວັດທະນະທຳປະຫວັດສາດຈີນເກືອບ 3 ຮ້ອຍອົງທີ່ທ່ານເປັນຜູ້ປັ້ນນັ້ນ, ໄດ້ຖືກຫຼາຍອົງການຈີນແລະຕ່າງປະເທດເອົາໄປສະສົມແລະວາງສະແດງ. ປັດຈຸບັນ, ທ່ານຍັງແມ່ນສິນລະປິນອາຊີພຽງຄົນດຽວທີ່ເປັນສະມາຊິກສະມາຄົມນັກປັ້ນຮູບຫຼວງອັງກິດແລະສະມາຄົມນັກປັ້ນຮູບຄົນອັງກິດ.
ຫວ່າງກ່ອນນີ້ບໍ່ດົນ, ທ່ານອູເວີຍຊ່ານ ຫົວໜ້າສະຖາບັນຄົ້ນຄວ້າວິຈິດຕະກຳມະຫາວິທະຍາໄລນານກິ່ງຈີນໄດ້ຈັດງານວາງສະແດງສ່ວນບຸກຄົນຂະໜາດໃຫຍ່ຢູ່ຫໍວິຈິດຕະກຳຂອງຈີນ, ວາງສະແດງຮູບປັ້ນຄົນທີ່ມີຊື່ສຽງທາງດ້ານປະຫວັດສາດແລະວັດທະນະທຳຂອງຈີນ. ຮູບປັ້ນເຫຼົ່ານີ້ມີຊີວິດຊີວາທີ່ສຸດ, ຄືຮູບປັ້ນທ່ານຂົງຈື້ ແລະທ່ານລາວຈື້ ນັກປັດສະຍາບູຮານຈີນ, ແລະທ່ານຢາງເຈີ້ນນິງ ນັກວິທະຍາສາດຍຸກປັດຈຸບັນເປັນຕົ້ນ. ເຈົ້າຊີວິດສິນສືຮວງ ເຈົ້າຊີວິດອົງທຳອິດທີ່ທ້ອນໂຮມປະເທດຈີນ, ຮ່າງຄີງຖືກປັ້ນຄືພູ, ຈຸດສູງສຸດຂອງພູໜ່ວຍນີ້ແມ່ນມົງກຸດທີ່ເປັນສັນຍະລັກໃຫ້ແກ່ອຳນາດເຈົ້າຊີວິດໃນສະໄໝສັກດິນາຂອງຈີນ, ເຖິງວ່າບໍ່ໄດ້ຄວັດໂສມໜ້າລະອຽດ, ແຕ່ຜູ້ຊົມຍັງສາມາດສຳນຶກໄດ້ເຖິງອຳນາດແລະຄວາມເຄັ່ງຂືມຂອງເຈົ້າຊີວິດສິນສືຮວງ; ຮູບປັ້ນທ່ານລາວຈື້ທີ່ມີຖານະສຳຄັນໃນປະຫວັດປັດສະຍາຈີນສູງ 16 ແມັດ, ນຸ່ງເສື້ອຍ່າມຫຼວມ, ແຂນຍາວ, ເປັນແບບບູຮານແທ້ໆ.
ຜູ້ຊົມທີ່ເບິ່ງຮູບປັ້ນເຫຼົ່ານີ້ແລ້ວ, ກໍເໝືອນດັ່ງໄດ້ອ່ານປະຫວັດວັດທະນະທຳຈີນຫຼາຍພັນປີ. ທ່ານສາສະດາຈານອິນຊວງສີ ນັກທິດສະດີວິຈິດຕະກຳທີ່ມີຊື່ສຽງຂອງຈີນເຫັນວ່າ, ທ່ານອູເວີຍຊ່ານໄດ້ປັ້ນຮູບທີ່ສາມາດສະແດງໃຫ້ເຫັນຈິດໃຈຂອງຄົນວັດທະນະທຳດັ້ງເດີມຂອງຈີນ. ທ່ານເວົ້າວ່າ:
"ໃນຄວາມໝາຍເລິກໆແລ້ວ, ຮູບປັ້ນທີ່ທ່ານອູເວີຍຊ່ານປັ້ນນັ້ນແມ່ນໃຊ້ຮູບປັ້ນມາສະແດງໃຫ້ເຫັນວັດທະນະທຳຂອງຈີນ. ຮູບປັ້ນຂອງທ່ານສ່ວນຫຼາຍແມ່ນຜູ້ເຖົ້າທີ່ມີປະສົບປະການສູງແລະຕິດພັນກັບປະຫວັດສາດຂອງຈີນ, ໃນໂຕຂອງພວກເພີ່ນໄດ້ເຕົ້າໂຮມເອົາຄວາມມູນເຊື້ອຂອງວັດທະນະທຳຫຼາຍພັນປີ. ຜູ້ເຖົ້າທັງຫຼາຍທີ່ທ່ານອູເວີຍຊ່ານປັ້ນນັ້ນ, ຄວາມຮູ້ສຶກທາງປະຫວັດສາດ ຄວາມຮູ້ສຶກທາງວັດທະນະທຳແລະສິ່ງຕົກຕະກອນຂອງວັດທະນະທຳຊົນຊາດຂອງຮູບປັ້ນເຫຼົ່ານີ້ກໍເໝືອນດັ່ງໄດ້ຫຼໍ່ຫຼອມໃນເຕົາໄຟ, ແລ້ວຕັ້ງວາງຢູ່ຕໍ່ໜ້າພວກເຮົາຢ່າງໜັກແໜ້ນ."
ທ່ານອູເວີຍຊ່ານນຸ່ງເສື້ອຍາມຈີນສີຂາວ, ຜົມຍາວເຖິງບ່າ, ສຸພາບຄ່ຽມຄົມ, ສາຍຕາເສາະໃສ, ເບິ່ງໜ້າຕາຄືອ່ອນກວ່າອາຍຸຕົວຈິງທີ່ 44 ປີ. ທ່ານບອກນັກຂ່າວວ່າ, ທ່ານເອງອ່ານກາບກອນບູຮານຈີນມາແຕ່ຍາມຍັງນ້ອຍ, ໄດ້ຮັບການຫຼໍ່ລ້ຽງຈາກວັດທະນະທຳທີ່ມີອາຍຸຍາວນານເຖິງ 5 ພັນປີຂອງຈີນໂດຍບໍ່ຮູ້ສຶກຕົວ.
ທ່ານອູເວີຍຊ່ານເກີດຢູ່ຄອບຄົວວັດທະນະທຳຂອງແຂວງຈ່ຽງຊູ່ ພາກຕາເວັນອອກຂອງຈີນ, ອຸດົມການຂອງທ່ານໃນຍາມຍັງນ້ອຍກໍແມ່ນເຕີບໃຫຍ່ແລ້ວຢາກເປັນນັກວິທະຍາສາດ. ທ່ານໄດ້ເຂົ້າຮ່ວມການສອບເສັງເຂົ້າມະຫາວິທະຍາໄລຕາມອຸດົມການຂອງຕົນ, ແຕ່ເສັງຕົກ 2 ປີລຽນຕິດ, ຈົນຮອດປີທີສາມ, ທ່ານຈິ່ງໄດ້ຖືກຮັບເຂົ້າໃນໂຮງຮຽນການຊ່າງທີ່ສອນຝີມືຫັດທະກຳຫຼັງໜຶ່ງໃນເມືອງອູຊີ. ເມືອງອູຊີແມ່ນບ່ອນຜະລິດຄົນດິນປັ້ນທີ່ມີຊື່ສຽງຂອງຈີນ, ໃນໂຮງຮຽນດັ່ງກ່າວ, ທ່ານອູເວີຍຊ່ານຮຽນປັ້ນຮູບຄົນ, ໄດ້ຮູ້ຈັກກັບສິນລະປິນພື້ນເມືອງຫຼາຍໆຄົນ, ໂດຍສະເພາະແມ່ນສິລະປິນອາຍຸ 80 ກວ່າປີຜູ້ໜຶ່ງ, ສີມືຂອງທ່ານສຸດຍອດຫຼາຍ, ປັ້ນຮູບຄືຄົນແທ້ອີຫຼີ, ເຮັດໃຫ້ທ່ານອູເວີຍຊ່ານຮູ້ສຶກໄດ້ເຖິງສະເໜ່ຂອງສິລະປະດັ້ງເດີມຂອງຈີນ.
ທ່ານອູເວີຍຊ່ານໄດ້ເກີດຄວາມຫຼົງໄຫຼຕໍ່ສິລະປະອັນແຮງກ້າຢ່າງບໍ່ຮູ້ສຶກຕົວ. ພາຍຫຼັງໄປເຮັດການຢູ່ໂຮງງານແລ້ວ, ທ່ານຍັງໄດ້ໄປເຂົ້າຮ່ວມການສອບເສັງເຂົ້າມະຫາວິທະຍາໄລຫຼາຍປີລຽນຕິດ, ສຸດທ້າຍກໍ່ໄດ້ເສັງເຂົ້າພະແນກວິຈິດຕະກຳຂອງມະຫາວິທະຍາໄລສ້າງຄູນານກິ່ງ, ໄດ້ສ້າງພື້ນຖານອັນໜາແໜ້ນຢູ່ແຫ່ງນັ້ນ. ເມື່ອຮຽນຈົບແລ້ວ, ທ່ານໄປເປັນຄູສອນ, ແລ້ວໄປຮຽນການປັ້ນຮູບຢູ່ເອີລົບອາເມລິກາ, ແລກປ່ຽນກັບນັກປັ້ນຮູບຊັ້ນຍອດຢູ່ແຫ່ງນັ້ນ. ເມື່ອໄດ້ຜ່ານຫຼາຍປະສົບການ, ໃນເວລາທ່ານອູເວີຍຊ່ານກັບຄືນປະເທດຈີນນັ້ນ, ທ່ານໄດ້ມີຄວາມເຂົ້າໃຈໃໝ່ຕໍ່ວັດທະນະທຳຈີນ. ທ່ານເວົ້າວ່າ:
"ເມື່ອໄດ້ຮັບຮູ້ ສົມທຽບ ແລະສັງລວມຫຼາຍຫຼົບຫຼາຍຕ່າວຕໍ່ວັດທະນະທຳຍຸກປັດຈຸບັນກັບດັ້ງເດີມແລ້ວ, ໄດ້ມີຄວາມເຂົ້າໃຈໃໝ່. ສິລະປະຂອງຂ້າພະເຈົ້າແມ່ນສ້າງຢູ່ບົນພື້ນຖານດັ່ງກ່າວ, ແຫຼ່ງກຳເນີດຂອງມັນແມ່ນຈິດໃຈທີ່ຕ້ອງການສະແດງຄວາມໝາຍຂອງຈີນອອກມາ, ເຊິ່ງກໍແມ່ນຈິດໃຈແຫ່ງບົດກະວີຂອງຈີນ, ເນື້ອໃນບົດກະວີຂອງຈີນກໍແມ່ນຈິດໃຈຂອງຊາວຈີນ, ຈີນແມ່ນປະເທດແຫ່ງບົດກະວີ, ວັດທະນະທຳໃນບົດກະວີໄດ້ສ່ອງແສງເຖີງພູມປັນຍາ, ຄວາມຮັບຮູ້ຕໍ່ສິ່ງສວຍງາມແລະສັດຈະທຳຂອງຊົນຊາດ, ໂດຍສະເພາະແມ່ນຄວາມໄຝ່ຝັນຂອງຊົນຊາດຈີນ. ນີ້ກໍແມ່ນສິ່ງທີ່ຕ້ອງການທີ່ສຸດໃນການປະດິດສ້າງສິລະປະ."
ໃນຊຸມປີ 1990, ທ່ານອູເວີຍຊ່ານເລີ່ມປັ້ນຮູບຄົນທີ່ມີຊື່ສຽງໃນປະຫວັດສາດວັດທະນະທຳຂອງຈີນ. ເພື່ອສະແດງບຸກຄະລິກຂອງຄົນທີ່ຖືກປັ້ນຢ່າງຖືກຕ້ອງນັ້ນ, ທ່ານອູເວີຍຊ່ານໄດ້ຄົ້ນຄວ້າຈິດຕະສາດໂດຍສະເພາະ, ແລະພິມຈຳໜ່າຍ"ຈິດຕະສາດດ້ານສິລະປະສາຍຕາ"ທີ່ມີຕົວໜັງສືຈີນ 2 ແສນ 6 ໝື່ນຕົວ. ທ່ານອູເວີຍຊ່ານໃນເວລານີ້, ທັງມີພື້ນຖານປັ້ນຕົວຈິງທີ່ທັນສະໄໝຂອງຝ່າຍຕາເວັນຕົກ, ທັງມີພື້ນຖານສິລະປະພື້ນເມືອງຈີນ, ໃນການປັ້ນຮູບ, ທ່ານໄດ້ເນັ້ນເຖີງການສະແດງຄວາມໝາຍແລະຈິດໃຈ. ວົງການວິຈິດຕະກຳຈີນເຫັນວ່າ, ຮູບປັ້ນຂອງທ່ານອູເວີຍຊ່ານໄດ້ເຊື່ອມໂຍງການແຕ້ມຮູບແບບດັ້ງເດີມ, ການຂຽນງາມ, ລະຄອນງີ້ວ, ແລະດົນຕີຂອງຈີນເຂົ້າກັນຢ່າງກົມກຽວກັນ, ກາຍເປັນມີເອກະລັກພິເສດຂອງຕົນ, ສະນັ້ນ, ເມື່ອຊົມເບິ່ງຮູບປັ້ນຂອງທ່ານ, ຕ້ອງພິນິດພິຈາລະນາບົນພື້ນຖານຈິດໃຈສູນທອນທັດຂອງຈີນ.
ຮູບປັ້ນຂອງທ່ານອູເວີຍຊ່ານເຄີຍວາງສະແດງຢູ່ຫຼາຍປະເທດໃນໂລກ, ຮູບປັ້ນທີ່ວ່າ"ເດັກນອນ"ຍັງໄດ້ຮັບລາງວັນປານໂກລີນ ເຊິ່ງເປັນລາງວັນສິລະປະຮູບປັ້ນທີ່ມີຊື່ສຽງໃນໂລກ. ທ່ານອູເວີຍຊ່ານຮູ້ສຶກວ່າ, ທ່ານໄດ້ຮັບຜົນສຳເລັດໃນມື້ນີ້, ແມ່ນຍ້ອນທ່ານຮັກຫອມວັດທະນະທຳດັ້ງເດີມຂອງຈີນແລະສິລະປະດັ້ງເດີມຂອງຈີນຢ່າງເລິກເຊິ່ງ. ທ່ານເວົ້າວ່າ:
"ຂ້າພະເຈົ້າຄິດວ່າ, ສິ່ງສຳຄັນທີ່ສຸດສຳລັບຄົນແມ່ນສາມາດສື່ດ້ານຈິດໃຈ, ໃນຫຼາຍປີມານີ້, ຂ້າພະເຈົ້າມັກຄົນວັດທະນະທຳຜູ້ດີເລີດກວ່າໝູ່ຂອງຈີນທີ່ດັ້ງເດີມ, ເຖິງວ່າບໍ່ເຄີຍເຫັນໜ້າເຂົາເຈົ້າ, ແຕ່ໃນຄວາມຝັນ, ໃນເວລາສ້າງຮູບປັ້ນນັ້ນ, ໄດ້ສົນທະນາກັບພວກເຂົາເຈົ້າໃນຄວາມຝັນ, ສະເໜ່ຂອງຄົນເຫຼົ່ານີ້, ກໍແມ່ນສະເໜ່ວັດທະນະທຳຊົນຊາດພວກເຮົາ, ສະເໜດັ່ງກ່າວສາມາດຂ້າມຜ່ານກາລະເວລາ, ອັນໄດ້ເຮັດໃຫ້ຂ້າພະເຈົ້າມີຄວາມເຊື່ອໝັ້ນໃນການສະແດງໃຫ້ເຫັນວັດທະນະທຳທີ່ເກີດໃນດິນແດນແຫ່ງນີ້."
(ຈົບ)
|
|
|
