|
ສັດນຳໂຊກຂອງງານວາງສະແດງສິນຄ້າຫລືເອັກສໂປຈີນອາຊຽນແມ່ນລິງຂົນຫົວຂາວໂຕຫນຶ່ງ, ລິງຊະນິດນີ້ກໍ່ອາໃສຢູ່ເມືອງຊົງໂຈຂອງເຂດກວາງຊີຈີນທີ່ມີຊາຍແດນຕິດກັບຫວຽດນາມ.ທາງດ່ວນຈາກເມືອງນານນິງ ເມືອງເທດສະບານເຂດກວາງຊີໄປດ່ານມິດຕະພາບທີ່ຢູ່ຊາຍແດນຈີນຫວຽດນາມນັ້ນກໍ່ແມ່ນຕໍ່ກັບທາງຫລວງເລກຫນຶ່ງຂອງຫວຽດນາມຢູ່ເມືອງຊົງໂຈ,ແມ່ນທາງຫລວງສາຍຫລັກຂອງຈີນໄປສູ່ຫວຽດນາມແລະບັນດາປະເທດອາຊີອາຄະເນໃນປັດຈຸບັນ.ໃນຫລາຍປີມານີ້,ຄຽງຄູ່ກັບການສ້າງເຂດການຄ້າເສລີຈີນອາຊຽນ, ເມືອງຊົງໂຈທີ່ຫາກໍ່ເລື່ອນຂຶ້ນເປັນກິ່ງແຂວງພຽງສາມປີຂອງເຂດກວາງຊີນີ້ກໍ່ພວມຕັ້ງຫນ້າຮ່ວມມືກັບບັນດາປະເທດອາຊຽນ, ເລັ່ງ ລັດກໍ່ສ້າງເສດຖະກິດທາງຜ່ານ.
ເມືອງຊົງໂຈຕັ້ງຢູ່ພາກຕາເວັນຕົກສຽງໃຕ້ຂອງເຂດກວາງຊີຈີນ,ແມ່ນຕົວເມືອງຊາຍແດນ, ມີທ່າກຳປັ່ນ,ແມ່ນບ່ອນຄົບລະຫວ່າງວົງເສດຖະກິດອາຊຽນ ວົງເສດຖະກິດພາກໃຕ້ຂອງຈີນແລະວົງເສດຖະກິດພາກຕາເວັນຕົກສຽງໃຕ້ຂອງຈີນ.
ເມືອງຜິງຊຽງ ເມືອງນິງມິນ ເມືອງຫລົງໂຈ່ວແລະເມືອງຕ້າຊິ່ນທີ່ຂຶ້ນກັບເມືອງຊົງໂຈຕ່າງມີຊາຍແດນຕິດກັບແຂວງກ່ວງນິ່ງ,ແຂວງຫລັ້ງເຊິ່ນແລະແຂວງກ່າວບັງຂອງຫວຽດນາມ,ລວມທັງຫມົດມີເສັ້ນຊາຍແດນຍາວ 533 ກິໂລແມັດ.ເສັ້ນຊາຍແດນຈີນຫວຽດນາມທີ່ຢູ່ໃນເມືອງຊົງໂຈນັ້ນຫ່າງຈາກນະຄອນຫລວງຮ່າໂນຍຂອງຫວຽດນາມພຽງ 160 ກວ່າກິໂລແມັດທໍ່ນັ້ນ,ແມ່ນດ່ານຈີນທີ່ໃກ້ກັບນະຄອນຫລວງຂອງປະເທດອາຊຽນກວ່າຫມູ່.ທາງລົດໄຟສາກົນແຕ່ມົສກູ-ປັກກິ່ງ-ຮ່າໂນຍກໍ່ແມ່ນຜ່ານແຫ່ງນີ້ແລ້ວອອກຈາກຈີນ.ໃນດ່ານຊັ້ນຫນຶ່ງ 15 ແຫ່ງແລະດ່ານຊັ້ນສອງ 17 ແຫ່ງຂອງຈີນທີ່ຕິດກັບປະເທດອາຊຽນນັ້ນ, ກໍ່ມີດ່ານຊັ້ນຫນຶ່ງ 3 ແຫ່ງແລະດ່ານຊັ້ນສອງ 4 ແຫ່ງຕັ້ງຢູ່ເມືອງຊົງໂຈ,ເມືອງນີ້ຍັງມີຕະຫລາດຊາຍແດນ 24 ແຫ່ງ.
ໃນເວລາໃຫ້ສຳພາດຕໍ່ນັກຂ່າວ CRI, ນາງໂມ້ສາງອິ່ງ ຮອງເຈົ້າຄອງເມືອງຊົງໂຈເວົ້າວ່າ, ຄຽງຄູ່ກັບການສ້າງເຂດການຄ້າເສລີຈີນອາຊຽນໃຫ້ໄວຂຶ້ນ,ແລະການເລີ່ມສ້າງທາງຜ່ານເສດຖະກິດຄຸນມິງ-ລ່າວກາຍ-ຮ່າໂນຍ-ຫ້າຍຟົງ-ກ່ວງນິ່ງ ທາງຜ່ານເສດຖະກິດນານນິງ-ຫລັ້ງເຊິ່ງ-ຮ່າໂນຍ-ຫ້າຍ ຟົງ-ກ່ວງລິ່ງແລະວົງເສດຖະກິດອ່າວພາກເຫນືອ,ເມືອງຊົງໂຈໄດ້ກາຍເປັນແນວຫນ້າຂອງເຂດການຄ້າເສລີຈີນອາຊຽນແລ້ວ.ສະນັ້ນ, ຕັ້ງແຕ່ຊົງໂຈເລື່ອນຂັ້ນເປັນກິ່ງແຂວງເມື່ອປີ 2004 ເປັນຕົ້ນມາ,ກໍ່ໄດ້ສະເຫນີຈະສ້າງເປັນເສດຖະກິດທາງຜ່ານ.
ນາງໂມສາງອິ່ງເວົ້າວ່າ:ທ່າແຮງຂອງເມືອງພວກຂ້າພະເຈົ້າແມ່ນເປັນທາງຜ່ານ,ເລີ່ມແຕ່ປີ 2004,ພວກຂ້າພະເຈົ້າກໍ່ໄດ້ສ້າງເສດຖະກິດທາງຜ່ານ.ໃນການຈັດວາງອຸດສາຫະກຳຕ່າງໆ,ພວກຂ້າພະເຈົ້າໄດ້ສວຍໃຊ້ຈຸດພິເສດທີ່ເປັນທາງຜ່ານສາກົນ, ໄດ້ຕັ້ງເຂດອຸດສາຫະກຳຢູ່ຕາມທາງດ່ວນແຕ່ນານນິງໄປດ່ານມິດຕະພາບແລະຢູ່ຕາມດ່ານຊາຍແດນ,ສ້າງອຸດສາຫະກຳແບບໃຫມ່ທີ່ມີລັກສະນະເປັນທາງຜ່ານ.ເປົ້າຫມາຍຂອງພວກຂ້າພະເຈົ້າແມ່ນສ້າງຕົວເມືອງດ່ານທາງບົກທີ່ຮັບໃຊ້ທົ່ວປະເທດຈີນແລະຮັບໃຊ້ອາຊຽນ.
ເດືອນເມສາປີ 2005, ເມືອງຊົງໂຈໄດ້ເຊັນສັນຍາກັບຫວຽດນາມກ່ຽວກັບການສ້າງໂຮງໄຟຟ້າດ້ວຍຖ່ານຫີນຂະຫນາດ 1 ລ້ານ 2 ແສນກິໂລວັດ,ສ້າງເຂດປຸງແຕ່ງສິນຄ້າຂ້າມຊາດແລະສັນຍາອື່ນໆ.ກອງປະຊຸມກວດບົດວິພາກຄວາມເປັນໄປໄດ້ທີ່ຈະສ້າງກິດຈະການໄລຍະທີຫນຶ່ງຂອງໂຄງການໂຮງໄຟຟ້າດ້ວຍຖ່ານຫີນຂອງເມືອງຊົງໂຈໄດ້ສຳເລັດໃນທ້າຍເດືອນກໍລະກົດປີນີ້,ຕາມຊາບວ່າ, ໂຄງການນີ້ຈະແມ່ນຈີນ ຫວຽດ ນາມແລະໄທຮ່ວມກັນເປັນຜູ່ສ້າງ,ຈະລົງມືສ້າງໃນເດືອນມັງກອນປີ 2008, ກະວ່າຈະເລີ່ມ ຜະລິດໄຟຟ້າໃນປີ 2010.ໂຮງໄຟຟ້າດ້ວຍຖ່ານຫີນຫລັງນີ້ຈະຂົນສົ່ງຖ່ານຫີນທີ່ບໍ່ມີຄວັນທີ່ເປັນເຊືອໄຟຕົ້ນຕໍຈາກຫວຽດນາມຕາມທາງດ່ວນແຕ່ນານນິ່ງຫາດ່ານມິດຕະພາບເຊິ່ງເປັນທາງດ່ວນສາຍທຳອິດຈາກຈີນໄປສູ່ອາຊຽນເປັນເຊື້ອໄຟ,ເມື່ອໂຮງໄຟຟ້ານີ້ເລີ່ມຜະລິດແລ້ວ,ຈະແກ້ໄຂສະພາບການຂາດເຂີນໄຟຟ້າຂອງເມືອງຊົງໂຈວແລະທົ່ວເຂດກວາງຊີ,ນອກນີ້ຍັງຈະສົ່ງໄຟຟ້າໃຫ້ຫວຽດນາມໄດ້ອີກ.
ນາງໂມສາງອິ່ງເວົ້າວ່າ:ໂຄງການນີ້ເປັນການເລີ່ມຕົ້ນການລົງທຶນແລະການຄ້າລະຫວ່າງຈີນກັບບັນດາປະເທດອາຊຽນ, ແມ່ນຕົວຢ່າງແຫ່ງການຮ່ວມມືລະຫວ່າງສາມປະເທດຈີນ ຫວຽດນາມແລະໄທ,ແລະກໍ່ໄດ້ເປີດກວ້າງຂົງເຂດການລົງທຶນຂອງການກໍ່ສ້ງເຂດການຄ້າເສລີຈີນອາຊຽນ.ມີຜົນດີຕໍ່ການປັບປຸງການພົວພັນແບບຄູ່ຮ່ວມມືລະຫວ່າງຝ່າຍຕ່າງໆທີ່ເຊັນສັນຍາສ້າງເຂດການຄ້າເສລີຈີນອາຊຽນ,ຊຸກຍູ້ການຮ່ວມມືດ້ານເສດຖະກິດ,ໂດຍສະເພາະແມ່ນການຄ້າ ການລົງທຶນແລະການຮ່ວມມືກັນພັດທະນາລະຫວ່າງຈີນກັບບັນດາປະເທດຢູ່ອະນຸພາກພື້ນແມ່ນ້ຳຂອງ.
ປັດຈຸບັນ,ນັກທຸລະກິດຈາກ 30 ກວ່າແຂວງ ກຳແພງນະຄອນ ຮົງກົງ ມາກາວແລະໄຕ້ຫວັນຂອງຈີນຢ່າງຫລວງຫລາຍພວມເຮັດທຸລະກິດຢູ່ດ່ານຊາຍແດນເມືອງຊົງໂຈ,ການຄ້າກັບຕ່າງປະເທດຢູ່ດ່ານນັ້ນລ້ວນແຕ່ເປັນການຄ້າແບບຂາຍສ່ງ, ໂດຍສະເພາະແມ່ນການຕົກລົງຄ້າຂາຍຮ່ວມກັນຢູ່ລະຫວ່າງແຂວງຈີນກັບຕ່າງປະເທດແລ້ວມອບຮັບສິນຄ້າຢູ່ຊາຍແດນນັ້ນຫລາຍກວ່າຫມູ່.ນີ້ກໍ່ໄດ້ອຳນວຍເງື່ອນໄຂແກ່ເມືອງຊົງໂຈພັດທະນາຂະແຫນງການຈໍລະຈອນວັດສະດຸບໍລິການສາກົນດີຂຶ້ນຕື່ມ.
ຕາມຊາບວ່າ,ເມືອງຊົງໂຈພວມວາງແຜນສ້າງສູນຈໍລະຈອນວັດສະດຸບໍລິການສາກົນຊົງໂຈທີ່ມີເນື້ອທີ່ກວ້າງ 140 ເຮັກຕາ,ແລະລົງທຶນ 500 ລ້ານຢວນ.ກິດຈະການໄລຍະທີຫນຶ່ງຂອງແຜນການນີ້ຈະບຸກເບີກເນື້ອທີ່ 87 ເຮັກຕາແລະຈະເລີ່ມສ້າງໃນທ້າຍປີນີ້.
ນາງໂມສາງອິ່ງບອກວ່າ, ດຽວນີ້ ແຕ່ລະມື້,ຫມາກໄມ້ຂອງໄທທີ່ຂົນສົ່ງເຂົ້າດ່ານຊົງໂຈນັ້ນກໍ່ມີ 7-8 ຕູ້,ແຕ່ຍັງມີຫລາຍໆຄົນຍັງບໍ່ຮູ້ເສັ້ນທາງແຕ່ອາຊຽນເຂົ້າຈີນທີ່ສະດວກສາຍນີ້.ເມືອງຊົງໂຈຫວັງວ່າເມື່ອສ້າງສູນຈໍລະຈອນວັດສະດຸບໍລິການນີ້ຂຶ້ນແລ້ວ, ຈະໂຮມສູນຜະລິດຕະພັນຂອງແຫ່ງຕ່າງໆ,ເພື່ອໃຫ້ບັນດາປະເທດໃນອາຊີອາຄະເນມາຊື້.
ນາງເວົ້າວ່າ:ສູນຈໍລະຈອນວັດສະດຸບໍລິການຂອງພວກຂ້າພະເຈົ້າຈະສ້າງຮ້ານຂາຍສິນຄ້າທີ່ມີເນື້ອທີ່ກວ້າງກວ່າ 8 ແສນຕາແມັດ, ແມ່ນຖືຕະຫລາດການຄ້າເປັນຕົ້ນຕໍ,ພວກຂ້າພະເຈົ້າໄດ້ວາງແຜນສ້າງຕະຫລາດສະເພາະ 6 ແຫ່ງ, ທັງຈະສ້າງເຂດການກວດກາສາກົນ,ການຂົນສົ່ງສາກົນແລະການຊະສາງບັນຊີສາກົນທີ່ເປັນຊຸດ.ເປົ້າຫມາຍຂອງພວກຂ້າພະເຈົ້າແມ່ນຍາດແຍ່ງໃຫ້ສິນຄ້າສາກົນທີ່ສົ່ງອອກຈາກດ່ານຊົງໂຈນັ້ນ 50% ຄ້າຂາຍຢູ່ຊົງໂຈ,ເພື່ອອຳນວຍຄວາມສະດວກຫລາຍກວ່າເກົ່າແກ່ການຈັດຊືຂອງ 7 ປະເທດຢູ່ແຫລມອິນໂດຈີນ,ບັນລຸການໃຫ້ລົດຂົນສົ່ງຄອນແທນເນີຂອງອາຊຽນແລະຈີນເຊື່ອມຕໍ່ກັນ, ຫລຸດຫນ້ອຍອັດຕາເປົ່າຫວ່າງຂອງລົດຂົນສົ່ງ,ແລະຫລຸດຕົ້ນທຶນການຈໍລະຈອນວັດສະດຸໃຫ້ຫນ້ອຍລົງ.
ນາງໂມສາງອິ່ງ ຮອງເຈົ້າຄອງເມືອງຊົງໂຈເຫັນວ່າ, ເສດຖະກິດທາງຜ່ານທີ່ເມືອງຊົງໂຈພັດທະນານັ້ນເປັນສູນລວມກະສິກຳ,ດ່ານພາສີ,ອຸດສາຫະກຳ,ການທ່ອງທ່ຽວ,ການຈໍລະຈອນວັດສະດຸການບໍລິການແລະເສດ ຖະກິດອື່ນໆທີ່ເພີ່ງພາກັນ.ແລະຫວັງວ່າຜ່ານການພັດທະນາເສດຖະ ກິດເປັນທາງຜ່ານ, ຈະຊ່ອຍກະຕຸ້ນການພັດທະນາເສດຖະກິດແລະຄວາມຈະເລີນຮຸ່ງເຮືອງຂອງຕົວເມືອງຈີນແລະບັນດາປະເທດອາຊຽນທີ່ຢູ່ເຂດຊາຍແດນ.
|
