|
|
 |
| (GMT+08:00)
2006-09-12 16:07:41
|
 |
|
ແຜ່ນດິນໃຫຍ່ໃນສາຍຕາຂອງນັກສຶກສາໄຕ້ຫວັນ
cri
ຫວ່າງກ່ອນນີ້ບໍ່ດົນ,ສະມາຄົມມິດຕະພາບພີ່ນ້ອງຮ່ວມຊາດໄຕ້ຫວັນທົ່ວປະເທດຈີນໄດ້ຈັດໃຫ້ມີຄ້າຍພັກແຮມລະດູຮ້ອນສຳລັບຊາວໜຸ່ມໄຕ້ຫວັນ,ນັກສຶກສາໄຕ້ຫວັນ1300ກວ່າຄົນໄດ້ເຂົ້າຮ່ວມກິດຈະກຳຄັ້ງນີ້.ເຂົາເຈົ້າສ່ວນຫຼາຍແມ່ນມາແຜ່ນດິນໃຫຍ່ເປັນເທື່ອທຳອິດ,ການເດີນທາງມາແຜ່ນດິນໃຫຍ່ຄັ້ງນີ້ໄດ້ເຮັດໃຫ້ເຂົາເຈົ້າມີພາບປະທັບໃຈຢ່າງເລິກເຊິ່ງ.
ໃນໄລຍະຈັດກິດຈະກຄ້າຍພັກແຮມລະດູຮ້ອນ,ຊາວໜຸ່ມໄຕ້ຫວັນເຫຼົ່ານີ້ໄດ້ແບ່ງເປັນສິບກວ່າກຸ່ມ.ບາງຄົນໄດ້ໄປທ່ຽວເມືອງຊີ່ອ່ານເຊິ່ງເປັນເມືອງຫຼວງບູຮານຂອງຈີນ,ແລະໄດ້ຟັງເພງພື້ນເມືອງພາກຕາເວັນຕົກສຽງເໜືອທີ່ດັງກ້ອງກັງວານເຮັດໃຫ້ມີຄວາມຕື້ນຕັນໃຈໃນເວລາຢືນຟັງເພງຢູ່ຕາມກຳແພງເມືອງເປັນຄັ້ງທຳອິດ;ບາງຄົນໄດ້ໄປຮອດແຂວງເຊສວນແລະໄດ້ຊົມທິດທັດທຳມະຊາດອັນສວຍສົດງົດງາມຂອງແຫຼ່ງທ່ອງທ່ຽວ ຈີວໄຈ້ໂກ່ວ.ສ່ວນບ່ອນສຸດທ້າຍໃນການເດີນທາງຂອງເຂົາເຈົ້າເທື່ອນີ້ກໍແມ່ນນະຄອນຫຼວງປັກກິ່ງ,ແນ່ນອນແລ້ວກໍຕ້ອງໄດ້ໄປປີນກຳແພງຍັກແລະທ່ຽວພະລາຊະວັງບູຮານ.
ສອງຝັ່ງຊ່ອງແຄບຫ່າງຈາກກັນພຽງແຕ່300ກວ່າໄມທະເລເທົ່ານັ້ນ,ແຕ່ຍ້ອນມູນເຫດຕ່າງໆ,ຊາວໜຸ່ມໄຕ້ຫວັນບໍ່ໄດ້ຊອກຮູ້ແຜ່ນດິນໃຫຍ່ຫຼາຍປານໃດ.ທ້າວວາງເຈິ້ງ ນັກສຶກສາປີສາມຂອງມະຫາວິທະຍາໄລສ້າງຄູໄຕ້ຫວັນເວົ້າວ່າ,ໃນຍາມນ້ອຍ,ລາວມັກອ່ານປຶ້ມປະຫວັດບູຮານຂອງຈີນ,ເທື່ອນີ້ມາຮອດແຜ່ນດິນໃຫຍ່,ເຮັດໃຫ້ລາວຮັບຮູ້ວັດທະນະທຳຈີນຫຼາຍກວ່າເກົ່າ.ທ້າວວາງເຈິ້ງເວົ້າວ່າ,
ເມື່ອພວກເຮົາຢືນຢູ່ໜ້າສຸສານຮວງຕີ້,ຢູ່ໜ້າຮູບປັ້ນທະຫານແລະມ້າສຸສານຊິງສີຮົງເຕ,ພວກເຮົາໄດ້ສຳຜັດກັບປະຫວັດສາດອັນຍາວນານຂອງຈີນ.ແຕ່ກ່ອນຢູ່ໄຕ້ຫວັນ,ພວກເຮົາພຽງແຕ່ອ່ານປຶ້ມແບບຮຽນເທົ່ານັ້ນ,ດຽວນີ້ພວກເຮົາໄດ້ມາເຫັນກັບຕາແລ້ວ,ຈຶ່ງຮັບຮູ້ເຖິງປະຫວັດສາດ5000ປີແລະວັດທະນະທຳຫຼາຍເຄົ້າຂອງຈີນ,ເຊິ່ງໄດ້ກວມຫຼາຍສິ່ງຫຼາຍຢ່າງ.
ໃນເວລາຢູ່ແຜ່ນດິນໃຫຍ່,ສະມາຊິກຄ້າຍລະດູຮ້ອນບໍ່ພຽງແຕ່ໄປທ່ຽວທັດສະນີຍະ ພາບແລະບູຮານສະຖານຕ່າງໆເທົ່ານັ້ນ,ເຂົາເຈົ້າຍັງໄດ້ເຮັດວຽກຄືກັບເປັນນາຍຊ່າງ.ໃນມື້ໜຶ່ງ,ສະມາຊິກຄ້າຍລະດູຮ້ອນໄດ້ມາຮອດ"ໄບກົ່ງຝັງ"ຄືຄຸ້ມນາຍຊ່າງທີ່ຢູ່ພາກໃຕ້ຂອງປັກກິ່ງ.ຄຳວ່າ"ໄບກົ່ງ"ແມ່ນຊື່ລວມຂອງນາຍຊ່າງຜູ້ເກັ່ງໃນພື້ນເມືອງສະໄໝບູຮານຂອງຈີນ.ຢູ່ແຫ່ງນີ້,ເຂົາເຈົ້າໄດ້ເຫັນເຄື່ອງສິລະປະກຳອັນເປັນມູນເຊື້ອ,ຄື ເຄື່ອງລົງຢາ ເຄື່ອງສະຫຼັກຢົກແລະເຄື່ອງສະຫຼັກດ້ວຍງາຊ້າງເປັນຕົ້ນ.ເມື່ອທ່ຽວໄປໝົດແລ້ວ,ເຂົາເຈົ້າໄດ້ແບ່ງເປັນຫຼາຍຈຸ,ຮຽນຕັດຮູບເຈ້ຍ,ຮຽນປັ້ນຮູບຄົນດ້ວຍດິນແລະຖັກສານຂອດເຊືອກຈີນເປັນຕົ້ນ.ໃນຍາມທຳມະດາ,ຊາວໜຸ່ມເຫຼົ່ານີ້ເຄີຍລຶ້ງແຕ່ຈັບປາກກາແລະຫຼິ້ນຄີບອດ,ສະນັ້ນເມື່ອໄດ້ມາເຮັດຕົວຈິງງານຝີມືແບບງ່າຍດາຍແບບນີ້,ເຂົາເຈົ້າເລີຍຮັບມືບໍທັນ,ເຈ້ຍສີທີ່ຖືກຕັດຢ່າງບໍ່ເປັນລະບຽບງາມຕາ,ເຊືອກແດງທີ່ຂັດກັນ,ດິນທີ່ບໍ່ໄດ້ປັ້ນເປັນຮູບກໍຢັ່ງຢາຍຢູ່ທົ່ວທີບ.ດັ່ງນັ້ນ,ສະມາຊິກຂອງຄ້າຍຈຶ່ງເຄົາລົບນັບຖືຝີມືອັນເກັ່ງກ້າຂອງນາຍຊ່າງພື້ນເມືອງແທ້ໆ.
ມາແຜ່ນດິນໃຫຍ່ເປັນເທື່ອທຳອິດພຽງແຕ່ທ່ຽວຫຼິ້ນຊື່ໆກໍພໍແລ້ວບໍ່?ແນ່ນອນມັນບໍ່ພໍ.ຊາວໜຸ່ມທີ່ມີອາຍຸຊ່ຳກັນ ຢູ່ໃນແຜ່ນດິນໃຫຍ່ສົນໃຈນຳຂ່າວຄາວທັນສະໄໝຄືກັນກັບຕົນເອງຫຼືບໍ່,ຈັດວາງແຜນການແນວໃດໃນຊີວິດ,ທັງໝົດເຫຼົ່ານີ້ລ້ວນແຕ່ແມ່ນຫົວຂໍ້ທີ່ຊາວໜຸ່ມໄຕ້ຫວັນຢາກຊອກຮູ້.ສະນັ້ນ,ການໄປ ແລກປ່ຽນຄວາມຄິດຄວາມເຫັນກັບນັກສຶກສາຢູ່ໂຮງຮຽນຊັ້ນສູງຕ່າງໆຂອງແຜ່ນດິນໃຫຍ່,ກໍໄດ້ກາຍເປັນເນື້ອໃນສຳຄັນໃນກິດຈະກຳເທື່ອນີ້.
ຢູ່ມະຫາວິທະຍາໄລຊົນເຜົ່າສູນກາງທີ່ຢູ່ພາກຕາເວັນຕົກຂອງປັກກິ່ງ,ສະມາຊິກຄ້າຍໄດ້ຮັບການຮັບຕ້ອນດ້ວຍຮູບການພິເສດ.
ຂ້ອຍຊື່ປາເຄອີຈາດີ, ຂ້ອຍຊື່ຮາຊີເຕຍ.ພວກເຮົາແມ່ນຊົນເຜົ່າກາຊັກຂອງເຂດຊິ່ນຈ່ຽງ.ຍິນດີຕ້ອນຮັບພວກເຈົ້າມາຢາມມະຫາວິທະຍາໄລຊົນເຜົ່າສູນກາງ.ນີ້ແມ່ນຮີດເຜົ່າກາຊັກພວກເຮົາ,ຖ້າວ່າໄດ້ຢິບຫຼືຍາດໄດ້ເມັດນ້ຳຕານກ້ອນນີ້,ກໍໝາຍຄວາມວ່າເຈົ້າຈະມີໂຊກດີແລະຂໍໃຫ້ເຈົ້າຈົ່ງສົມປາຖະໜາ.
ມະຫາວິທະຍາໄລຊົນເຜົ່າສູນກາງແມ່ນໂຮງຮຽນຊັ້ນສູງແຫ່ງໜຶ່ງທີ່ມີຊື່ສຽງຢູ່ແຜ່ນດິນໃຫຍ່ຈີນເຊິ່ງຮັບເອົານັກສຶກສາຊົນເຜົ່າສ່ວນໜ້ອຍເປັນຕົ້ນຕໍ,ສ່ວນສະມາຊິກຄ້າຍພັກແຮມລະດູຮ້ອນທີ່ມາຢາມເທື່ອນີ້ສ່ວນຫຼາຍກໍແມ່ນຊົນເຜົ່າສ່ວນໜ້ອຍຂອງໄຕ້ຫວັນ.ແຕ່ໃດມາ,ຊົນເຜົ່າສ່ວນໜ້ອຍກໍມີຊື່ສຽງຍ້ອນຟ້ອນລຳທຳເພງເກັ່ງ,ຊາວໜຸ່ມທີ່ມັກຮອງມັກຟ້ອນເຫຼົ່ານີ້ພົບກັນແລ້ວ,ຮູບການແລກປ່ຽນທີ່ດີທີ່ສຸດກໍແມ່ນດົນຕີແລະການ ຟ້ອນນັ້ນເອງ.
ທ້າວຫູເຈິ້ງກຸ້ຍ ນັກສຶກສາຊົນເຜົ່າສ່ວນໜ້ອຍຂອງໄຕ້ຫວັນແມ່ນຜູ້ທີ່ຫ້າວຫັນກວ່າໝູ່ໃນການເດີນທາງ.ລາວເວົ້າວ່າ,ຢູ່ບ້ານເກີດຂອງລາວມີເພງໜຶ່ງຊື່ ນ້າຫຼູວ່ານ ໄດ້ສືບທອດກັນມາທຸກຮຸ່ນຄົນ.ທຳນອງເພງນີ້ມີຊີວິດຊີວາແລະເບີກບານມ່ວນຊື່ນ,ສະນັ້ນລາວໄດ້ພາຫຼາຍຄົນຢືນອ້ອມເປັນວົງ,ທັງຮ້ອງທັງຟ້ອນ.ໂດຍມີການນຳພາຂອງທ້າວຫູເຈິ້ງກຸ້ຍ,ທຸກຄົນກໍເກາະແຂນກັນຮ້ອງເພງ ນ້າຫຼູວ່ານ.
ຢູ່ໂຮງຮຽນແຫ່ງນີ້,ສະມາຊິກຄ້າຍຍັງໄດ້ທ່ຽວຫໍພິພິທະພັນຊົນເຜົ່າ.ເມື່ອຊົມເຄື່ອງວາງສະແດງຂອງຊົນເຜົ່າສ່ວນໜ້ອຍຂອງແຜ່ນດິນໃຫຍປະເທດຊາດເປັນຄັ້ງທຳອິດ, ເຂົາເຈົ້າທັງຮູ້ສຶກແປກໃຈທັງຖ່າຍຮູບເອົາຢ່າງນັບບໍ່ຖ້ວນ.ຢູ່ນີ້,ເຂົາເຈົ້າຍັງໄດ້ສັງເກດເຫັນຢ່າງງຶດງໍ້ວ່າມີຫ້ອງວາງສະແດງວັດຖຸບູຮານຂອງຊົນເຜົ່າສ່ວນໜ້ອຍໄຕ້ຫວັນໂດຍສະເພາະ.ເມື່ອໄດ້ເຫັນວັດຖຸບານຮານເຫຼົ່ານີ້ໄດ້ຮັກສາແລະວາງສະແດງເປັນຢ່າງດີຢູ່ແຜ່ນດິນໃຫຍ່ປະເທດຊາດ,ເຂົາເຈົ້າຮູ້ສຶກພູມໃຈທີ່ສຸດ.
ນັກສຶກສາໄຕ້ຫວັນຫຼາຍຄົນມາແຜ່ນດິນໃຫຍ່ເທື່ອນີ້,ບໍ່ພຽງແຕ່ແມ່ນເຫັນກັບຕາເທົ່ານັ້ນ,ແຕ່ຍັງສຶກສາໄປພ້ອມ.ຕົວຢ່າງວ່າ,ເຂົາເຈົ້າຫຼາຍຄົນຮຽນວິຊາການປົກຄອງ,ພໍລົງຍົນປັບ,ຫຼາຍຄົນກໍເລີ່ມສຶກສາແຜນຜັງເມືອງປັກກິ່ງ,ເຂົາເຈົ້າກໍເຄີຍປຶກສາກັນກ່ຽວກັບເສດຖະກິດແຜ່ນດິນໃຫຍ່ເປັນຫຍັງຈຶ່ງສາມາດຈະເລີນຂຶ້ນຢ່າງວ່ອງໄວໃນເວລາສັ້ນໆ,ຊາວໜຸ່ມໄຕ້ຫວັນເຫຼົ່ານີ້ບໍ່ພໍໃຈປານໃດທີ່ເປັນພຽງຜູ້ສັງເກດຢູ່ຂ້າງນອກຂອງຂະບວນການພັດທະນາຂອງແຜ່ນດິນໃຫຍ່.ທ້າວວາງເຈິ້ງຂອງມະຫາວິທະຍາໄລສ້າງຄູໄຕ້ຫວັນເວົ້າວ່າ,ລາວມີໝູ່ຫຼາຍຄົນຢູ່ໄຕ້ຫວັນກໍຫວັງຢາກມາຮຽນແລະເຮັດວຽກຢູ່ແຜ່ນດິນໃຫຍ່,ສ່ວນລາວເອງແມ່ນເອົາໃຈໃສ່ຫຼາຍທີ່ສຸດນຳງານກິລາໂອລິມປິກທີ່ຈະຈັດຂຶ້ນຢູ່ປັກກິ່ງ.ລາວເວົ້າວ່າ,
ງານກິລາໂອລິມປິກປັກກິ່ງປີ2008ໃກ້ຈະມາຮອດແລ້ວ,ຂ້ອຍເຫັນວ່າມີສອງຈຸດຕ້ອງເພີ່ມທະວີການກໍ່ສ້າງໂດຍດ່ວນ,ຄືໜຶ່ງຕ້ອງປັບປຸງການເດີນທາງຢູ່ປັກກິ່ງ,ອີກຢ່າງໜຶ່ງແມ່ນຕ້ອງເພີ່ມການອົບຮົມພາສາຕ່າງປະເທດ.
|
|
|
