|
|
 |
| (GMT+08:00)
2006-09-14 17:30:05
|
 |
|
ໄປທ່ຽວ"ທະເລໄມ້ໄຜ່"ຢູ່ແຂວງກຸ້ຍໂຈ່ວ(ສຽງ)
cri
Author: da
|
ເມື່ອເວົ້າເຖິງ"ທະເລໄມ້ໄຜ່",ທ່ານອາດຈະຄຶດເຖິງໃນຮູບເງົາເລື່ອງ"ເສືອເຊື່ອງລາຍ,ມັງກອນຊ້ອນເລັບ" ຫຼືຄຣຸດຊິງໄທເກີ,ຮິດເດີນ ດຣາກອນ,ຜູ້ຫຼິ້ນກັງຟູເກັ່ງນຸ່ງເສື້ອສີຂາວ ຕໍ່ສູ້ກັນຢູ່ໃນທະເລໄມ້ໄຜ່ທີ່ກວ້າງໃຫຍ່.ມື້ນີ້ ດາລາວັນຈະແນະນຳ"ທະເລໄມ້ໄຜ່"ແຫ່ງໜຶ່ງຢູ່ແຂວງກຸ້ຍໂຈ່ວ ພາກຕາເວັນຕົກສຽງໃຕ້ຂອງຈີນ,ພາທ່ານໄປສຳຜັດຊີວິດທີ່ລຽບງ່າຍ.
ຢູ່ເຂດເມືອງພານຊ່ານ,ມີປ່າໄມ້ໄຜ່ທີ່ກວມເນື້ອທີ່ປະມານ 2 ພັນເຮັກຕາ,ຖືກເອີ້ນເປັນ"ທະເລໄມ້ໄຜ່"ຫຼາວສາງ.ປ່າໄມ້ໄຜ່ແຫ່ງນີ້ຢູ່ເທິງພູທີ່ສູງກວ່າລະດັບນ້ຳທະເລ 1700 ແມັດ,ມີປະຫວັດ 300 ກວ່າປີແລ້ວ.ຮູບເງົາເລື່ອງ"ເສືອເຊື່ອງລາຍ,ມັງກອນຊ້ອນເລັບ"ເຖິງວ່າບໍ່ໄດ້ເລືອກຖ່າຍທຳຢູ່ແຫ່ງນີ້ກໍຕາມ,ແຕ່"ທະເລໄມ້ໄຜ່"ຫຼາວສາງກໍງຽບສະຫງົບເໝືອນດັ່ງທະເລໄມ້ໄຜ່ໃນຮູບເງົາ,ທັງມີອາກາດອົບອຸ່ນ.ໄມ້ໄຜ່ເຕັມທົ່ວພູ,ຂຽວອຸ່ມທຸ່ມ.ໃນເວລາຍ່າງຜ່ານປ່າໄມ້ໄຜ່,ຈະຮູ້ສຶກເຢັນສະບາຍ; ເມື່ອລົມພັດ ຈະໄດ້ກິ່ນຫອມຂອງໄມ້ໄຜ່.
ເມື່ອຍ່າງຕາມທາງນ້ອຍ,ຈະເຫັນໄມ້ໄຜ່ຕົ້ນເກົ່າຕົ້ນໃໝ່ທີ່ຂຽວອຸ່ມທຸ່ມແລະໜໍ່ໄມ້ຂຽວອ່ອນຢູ່ທຸກແຫ່ງຫົນ.ໃນເວລາຝົນຕົກໃສ່,ຖ້າຕັ້ງໃຈຟັງ,ຈະໄດ້ຍິນສຽງດັງປັອກແປັກ ປັອກແປັກ.ນ້ຳຫ້ວຍຫຼາຍສາຍໄຫຼຜ່ານຜາຊັນແລະຮອຍແຜ່ນຫີນລົງມາ,ເມື່ອໄຫຼຜ່ານການກັ່ນຕອງຂອງຊັ້ນດິນແລະຮາກໄມ້ໄຜ່ຢູ່"ທະເລໄມ້ໄຜ່",ກໍກາຍເປັນ"ນ້ຳຮາກໄມ້ໄຜ່"ທີ່ຫວານເຢັນ.
"ນ້ຳຮາກໄມ້ໄຜ່"ແມ່ນສິ່ງຍອດຍິ່ງຂອງ"ທະເລໄມ້ໄຜ່"ຫຼາວສາງ,ນ້ຳດື່ມທີ່ມີທາດແຮ່ຕ່ຳຫຼາຍຊະນິດນີ້,ຕາມເລົ່າກັນວ່າສາມາດປ້ອງກັນແລະຕ້ານພະຍາດມະເຮັງ,ພ້ອມທັງເສີມຄວາມງາມໄດ້ອີກດ້ວຍ.ຄົນທ້ອງຖິ່ນເວົ້າວ່າ,ໃຊ້"ນ້ຳຮາກໄມ້ໄຜ່"ຊົງຊາດື່ມ,ຈະຫວານຫຼາຍ;ໃຊ້ມາດອງເຫຼົ້າ,ຈະຫອມຫຼາຍ;ໃຊ້ຕົ້ມເຂົ້າແຕ່ງອາຫານ,ຈະແຊບຫຼາຍ;ໃຊ້ປຸງແຕ່ງເຕົ້າຮູ້,ເຕົ້າຮູ້ຈະຂາວຄືຢົກ,ອ່ອນນຸ້ມຫຼາຍ,ແຕ່ບໍ່ເປື່ອຍ.ສະນັ້ນ,ຜູ້ທີ່ມາຮອດ"ທະເລໄມ້ໄຜ່",ລ້ວນແຕ່ມັກຊີມລົດຊາດຫວານເຢັນຂອງ"ນ້ຳຮາກໄມ້ໄຜ່",ແລ້ວໃຊ້ນ້ຳນີ້ສວ່າຍໜ້າ.
 ໃນເວລາຍ່າງຜ່ານ"ທະເລໄມ້ໄຜ່",ຖ້າວ່າໂຊກດີ,ຍັງຈະພົບເຫັດທີ່ປະເສີດປະເພດໜຶ່ງ,ຊື່ວ່າ"ຈູຊຸ່ນ".ເຫັດ"ຈູຊຸ່ນ"ເກີດຢູ່ເທິງຮາກໄມ້ໄຜ່ເກົ່າ,ມີຄັນຕົ້ນໄມ້ຂຽວແກ່ແລະກ້ານເຫັດທີ່ຂາວຈູ່ນພູ່ນ.ຍ້ອນມີຮູບສວຍງາມແລະເປັນສິ່ງປະເສີດ,ສະນັ້ນຈຶ່ງຖືກເອີ້ນເປັນ"ດອກໄມ້ເຫັດ"ແລະ"ລາຊີນີເຫັດ"."ຈູຊຸ່ນ"ມີລົດຊາດແຊບຫວານ,ອ່ອນກອບ,ຫອມຫຼາຍ,ກິນແລ້ວຍັງລົດຄວາມອ້ວນແລະເສີມຄວາມງາມໄດ້.ນາງຈຽງເຢ້ຈູງ ຮອງເຈົ້າເມືອງພານຊ່ານແນະນຳວ່າ,ຍ້ອນສາເຫດພູມສັນຖານແລະເງື່ອນໄຂທຳມະຊາດ,"ຈູຊຸ່ນ"ທີ່ຜະລິດຢູ່"ທະເລໄມ້ໄຜ່"ຫຼາວສາງດີຫຼາຍ,ໃຊ້ມາຕົ້ມເປັນແກງ,ຈະຫອມຫຼາຍ ຕ່າງກັບເຫັດອື່ນ.ນາງເວົ້າວ່າ:
"ຈູຊຸ່ນທີ່ແຫ່ງອື່ນຜະລິດບໍ່ແຊບຄືກັບ"ທະເລໄມ້ໄຜ່"ເຮົາ,ເພາະວ່າດິນຟ້າອາກາດແລະນ້ຳຢູ່ແຫ່ງນີ້ດີຫຼາຍ,ບໍ່ມີສິ່ງເປັນພິດ,ທັງສູງກວ່າລະດັບນ້ຳທະເລຫຼາຍ,ຊັບພະຍາກອນນ້ຳກໍອຸດົມສົມບູນ,ຈູຊຸ່ນຂອງພວກເຮົາແມ່ນຄັກກວ່າຂອງແຫ່ງອື່ນຫຼາຍ."
ຢູ່"ທະເລໄມ້ໄຜ່" ບໍ່ພຽງແຕ່ເກັບເຫັດຈູຊຸ່ນໄດ້,ຍັງຈະເຫັນກະຮອກເຕັ້ນໄປເຕັ້ນມາຢູ່ຕາມປ່າໄມ້ໄຜ່,ໜ້າຮັກອີ່ຫຼີ.ສັດນ້ອຍທີ່ມີຕາໃຫຍ່ປະເພດນີ້,ດຳລົງຊີວິດຢູ່ໃນປ່າໄມ້ໄຜ່,ກິນຮາກແລະໜໍ່ໄມ້,ດື່ມນ້ຳບໍ່.ໃນເວລາເຫັນນັກທ່ອງທ່ຽວ,ກະຮອກກໍ່ຍັງກ້າອອກມາຫຼິ້ນນຳຄົນ.
ໃນປ່າໄມ້ໄຜ່ຫຼາວສາງ,ມີໂຮງຜະລິດເຈ້ຍທີ່ເກົ່າແກ່ແຈກຢາຍລຽງລາຍກັນ.ຢູ່ໂຮງເຫຼົ່ານີ້ແມ່ນໃຊ້ໄມ້ໄຜ່ເປັນວັດຖຸດິບ, ໃຊ້ກຳມະວິທີດັ້ງເດີມ ຜະລິດເຈ້ຍບູຊາ ສົ່ງໄປຂາຍຢູ່ອາຊີອາຄະເນ.ປະຈຸບັນ,ລຸງຕົງຮວາມິງທີ່ເຮັດອາຊີບດັ່ງກ່າວມາຫຼາຍປີແລ້ວເວົ້າວ່າ,ສິ່ງທີ່ເຮັດໃຫ້ນັກທ່ອງທ່ຽວສົນໃຈນັ້ນແມ່ນປະຫວັດການຜະລິດເຈ້ຍ.ທ່ານເວົ້າວ່າ,ປະຫວັດການຜະລິດເຈ້ຍແມ່ນຍາວສ່ຳກັບໄມ້ໄຜ່ຢູ່ແຫ່ງນີ້.
"ເຊັ່ນ ບັນພະບຸລຸດພວກເຮົາພຸ້ນ ເພິ່ນກໍເລີ່ມຜະລິດເຈ້ຍແລ້ວ,ມີປະຫວັດມາຕັ້ງ 300 ກວ່າປີ.ຂ້ອຍເລີ່ມຜະລິດເຈ້ຍໃນຍາມຂ້ອຍອາຍຸ 17-18 ປີ,ດຽວນີ້ອາຍຸ 70 ປີແລ້ວ."
ທ່ານຜູ້ຟັງທີ່ເຄົາລົບ,ທີ່ຟັງມານັ້ນແມ່ນສຽງຕຳໄມ້ໄຜ້.ນາງຟ່າງພິງທີ່ເຮັດວຽກຢູ່ໃນໂຮງຜະລິດເຈ້ຍແນະນຳວ່າ,ການເລືອກເອົາໄມ້ໄຜ່ອ່ອນ ແລ້ວຕຳໃຫ້ເປັນປ່ຽງນ້ອຍ,ແມ່ນຂັ້ນຕອນທີໜຶ່ງ.
"ການຜະລິດເຈ້ຍຕ້ອງການຫຼາຍຂັ້ນຕອນ,ທຳມະດາຕ້ອງມີ 72 ຂັ້ນຕອນຈຶ່ງໄດ້ເຈ້ຍໃບໜຶ່ງ.ເລີ່ມແຕ່ການຕຳໄມ້ໄຜ່ ຕ້ອງໃຊ້ເວລາສອງເດືອນປາຍຈຶ່ງສຳເລັດເປັນເຈ້ຍໄດ້."
ວິທີຜະລິດເຈ້ຍທີ່ມີເຖິງ 72 ຂັ້ນຕອນທີ່ນາງຟ່າງພິງເວົ້ານັ້ນຖືກເອີ້ນເປັນ"ວິທີຜະລິດເຈ້ຍໄຊ້ລຸນ".ຄົນທັງຫຼາຍຮູ້ວ່າ,ວິທີຜະລິດເຈ້ຍໄຊ້ລຸນ ແມ່ນຄົນຈີນປະດິດສ້າງ.ທ່ານຖານໂປ່ ຄົນທ້ອງຖິ່ນແນະນຳວ່າ,ໃນໂຮງຜະລິດເຈ້ຍຢູ່ຫຼາວສາງ,ເຕັກນິກຜະລິດເຈ້ຍດ້ວຍວິທີເກົ່າແກ່ດັ່ງກ່າວຍັງຖືກຮັກສາຢ່າງເຄັ່ງຄັດ.
"ເອົາໄມ້ໄຜ່ອ່ອນ,ທຸບໃຫ້ແຕກອອກແລ້ວ,ເອົາແຊ່ໃນສະນ້ຳ,ວາງເປັນຊັ້ນໆ,ແລ້ວເອົານ້ຳປູນຖອກໃສ່ໃຫ້ຖ້ວມ.ນ້ຳປູນມີທາດດັ່ງ,ຈະພາໃຫ້ໃຍໄມ້ໄຜ່ອ່ອນ,ຕ້ອງແຊ່ປະມານເດືອນສອງເດືອນ,ແລ້ວຕົ້ມຈົນມັນອ່ອນ.ທາວອອກມາລ້າງໃນນ້ຳສະອາດ,ແລ້ວຕຳໃຫ້ມຸ່ນ,ໃຍກໍອ່ອນແລະລະອຽດກວ່າເກົ່າ,ແລ້ວຕຳອີກຈົນເປັນນ້ຳເຈ້ຍ.ຕໍ່ມາກໍເອົາກະແຕະໄປຊ້ວນເອົາຂຶ້ນມາຕາກ,ໃນເວລາທີ່ຍັງບໍ່ທັນແຫ້ງຄັກກໍ່ຄ່ອຍໆແກະອອກ,ແລ້ວເອົາມາໃສ່ເທິງຝາໂຄ່ງທີ່ມີໄຟທາງໃນ,ຢ້າງໃຫ້ແຫ້ງແລ້ວກໍກາຍເປັນເຈ້ຍເລີຍ."
ເຈ້ຍປະເພດທີ່ໃຊ້ໄມ້ໄຜ່ເປັນວັດຖຸດິບເຮັດດ້ວຍກຳມະວິທີພື້ນບ້ານນີ້,ເປັນສີຂາວງາມ,ໝັ້ນ ບໍ່ຂາດງ່າຍ,ທັງມີກິ່ນຫອມຂອງໄມ້ໄຜ່.ຖ້າທ່ານໄປທ່ຽວຊົມໂຮງຜະລິດເຈ້ຍດັ່ງກ່າວ,ຍັງລົງມືເຮັດຕາມການຊີ້ນຳຂອງຊ່າງໄດ້,ເຊື່ອວ່າ ທ່ານຈະສາມາດສຳຜັດສະເໜພິເສດຂອງວັດທະນະທຳທີ່ຜະລິດເຈ້ຍທີ່ເກົ່າແກ່ຂອງຈີນ.
|
|
|
