|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ. ງານແຂ່ງຂັນບານບ້ວງເພດຊາຍລະດັບສູງສຸດຂອງໂລກ ຄື ງານແຂ່ງຂັນບານບ້ວງເພດຊາຍຊີງຊະນະເລີດໂລກໄດ້ຈັດຂຶ້ນຢູ່ຍີ່ປຸ່ນແຕ່ວັນທີ 19 ສິງຫາເຖິງວັນທີ 3 ກັນຍາ. ໃນການແຂ່ງຂັນຮອບ 16 ທີມສຸດທ້າຍໃນວັນທີ 27 ສິງຫາ, ທີມບານບ້ວງເພດຊາຍຈີນເສຍໃຫ້ທີມເກຼັກ ແຊມປຽນເອີລົບດ້ວຍຄະແນນ 64 ຕໍ່ 95, ເລີຍບໍ່ໄດ້ເຂົ້າຮອບ 8 ທີມສຸດທ້າຍ. ແຕ່ວ່າ ນ້ຳໃຈສູ້ຊົນຂອງນັກກິລາຈີນໃນການແຂ່ງຂັນນັ້ນ ໄດ້ຮັບຄວາມຍ້ອງຍໍສັນລະເສີນຈາກເວທີບານບ້ວງສາກົນ, ແລະສະແດງໃຫ້ຄົນທັງຫຼາຍໄດ້ເຫັນຄວາມຫວັງຂອງບານບ້ວງຈີນໃນງານກິລາໂອລິມປິກປັກກິ່ງປີ 2008. ຕໍ່ໄປເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ບານບ້ວງຈີນກະກຽມເພື່ອງານກິລາໂອລິມປິກປີ 2008 ຢ່າງເຕັມທີ່.
ງານແຂ່ງຂັນບານບ້ວງເພດຊາຍຊີງຊະນະເລີດໂລກປີນີ້ໄດ້ຈັດຂຶ້ນຢູ່ 5 ຕົວເມືອງຂອງຍີ່ປຸ່ນ, ມີ 24 ທີມເຊິ່ງລວມທັງທີມຈີນ ທີມອາເມລິກາແລະທີມອາກຊັງຕິນເປັນຕົ້ນໄດ້ເຂົ້າຮ່ວມ. ໃນການແຂ່ງຂັນໃນວັນທີ 24 ສິງຫາ, ທີມຈີນໄດ້ເອົາຊະນະທີມເຊເນການແລະ ທີມສະໂລເວນີ ແລ້ວໄດ້ເຂົ້າຮອບ 16 ທີມສຸດທ້າຍ, ນີ້ກໍ່ແມ່ນຜົນງານທີ່ດີທີ່ສຸດຂອງທີມບານບ້ວງຈີນໃນງານແຂ່ງຂັນບານບ້ວງເພດຊາຍຊີງຊະນະເລີດໂລກແຕ່ປີ 1994 ເປັນຕົ້ນມາ.
ໃນການແຂ່ງຂັນນັດສຸດທ້າຍ, ທີມຈີນແຂ່ງຂັນກັບທີມສະໂລເວນີທີ່ເປັນທີ 6 ຂອງງານແຂ່ງຂັນບານບ້ວງເພດຊາຍຊີງຊະນະເລີດເອີລົບ, ໃນເວລາຫົວລ້ຽວຫົວຕໍ່ ຄື ມີແຕ່ຕ້ອງຊະນະຈຶ່ງຈະໄດ້ເຂົ້າຮອບ 16 ທີມສຸດທ້າຍນັ້ນ, ທີມຈີນສູ້ຢ່າງເອົາເປັນເອົາຕາຍ, ໃນທີ່ສຸດ ທ້າວຫວາງຊຶເຜິງ ນັກກິລາຈີນທີ່ເປັນກອງຫຼັງໂຍນລູກສຸດທ້າຍເຂົ້າບ້ວງໄດ້ 3 ຄະແນນໃນວິນາທີສຸດທ້າຍ, ທີມຈີນໄດ້ເອົາຊະນະທີມສະໂລເວນີແບບຫວຸດຫວິດ ຄື 78 ຕໍ່ 77. ຫຼັງການແຂ່ງຂັນສິ້ນສຸດລົງແລ້ວ, ທ້າວຫວາງຊຶເຜິງເວົ້າວ່າ:
ຂ້າພະເຈົ້າຮູ້ສຶກວ່າ ແຂ່ງກັບທີມແຂງເຫຼົ່ານີ້, ການເອົາຊະນະເຂົາເຈົ້າຈະສ້າງຄວາມໝັ້ນໃຈໃຫ້ແກ່ພວກເຮົາ, ນີ້ຈະສ້າງພື້ນຖານອັນໝັ້ນແກ່ນໃຫ້ແກ່ພວກເຮົາໃນການສ້າງຕົນເອງໃຫ້ເປັນທີມທີ່ແຂງແກ່ນ ແລະຊີງໄດ້ຜົນງານດີເດັ່ນໃນງານກິລາໂອລິມປິກປີ 2008, ຂ້າພະເຈົ້າເຫັນວ່າ ພວກເຮົາຈະເປັນທີມແຂງແກ່ນຢ່າງແນ່ນອນ.
ໃນການແຂ່ງຂັນໃນສາຍ 5 ນັດ, ທ້າວຢາວໝິງ ນັກກິລາຈີນທີ່ເປັນກອງກາງ ປັດຈຸບັນຫຼິ້ນຢູ່ທີມຣ໋ອກເກັດໂຮສ໌ຕອນຂອງ NBA ໄດ້ 28,4 ຄະແນນສະເລ່ຍຕາມນັດ, ເປັນທີໜຶ່ງໃນບັນດານັກກິລາທີ່ເຂົ້າຮ່ວມການແຂ່ງຂັນ. ນອກນີ້ ລາວຍັງຍາດໄດ້ບານຢູ່ກ້ອງບ້ວງ 9,2 ລູກສະເລ່ຍຕາມນັດ ເປັນທີ 3 ໃນສະຖິຕິເຕັກນິກດັ່ງກ່າວ, ສາມາດເວົ້າໄດ້ວ່າ ແມ່ນນັກກິລາທີ່ມີການສະແດງດີເລີດກວ່າໝູ່ໃນການແຂ່ງຂັນໃນສາຍ. ໃນການແຂ່ງຂັນກັບທີມບານບ້ວງອາເມລິກາທີ່ຖືກເອີ້ນເປັນ "ທີມແຫ່ງຄວາມຝັນ" ນັ້ນ, ທ້າວຢາງໝິງໂຍນໄດ້ 21 ຄະແນນ ຍາດໄດ້ບານຢູ່ກ້ອງບ້ວງ 10 ລູກ, ຫຼັງການແຂ່ງຂັນ, ທ່ານໄມໂຄ ຄຼະຊີເຊຟສະກີ ຄູຝຶກໃຫຍ່ທີມອາເມລິກາໄດ້ຕີລາຄາສູງຕໍ່ທ້າວຢາວໝິງ, ທ່ານເວົ້າວ່າ:
ທ້າວຢາວໝິງແມ່ນນັກກິລາແກນກາງທີ່ມີລັກສະນະຕັດສິນ, ລາວກ້າຫານທີ່ສຸດ, ບໍ່ເຫັນແກ່ຕົວ, ລາວແມ່ນຜູ່ນຳທີ່ດີທີ່ສຸດໃນທີມ, ລາວເຮັດໃຫ້ຜູ່ອື່ນໃນທີມຈີນຫຼິ້ນໄດ້ດີກວ່າເກົ່າ. ຂ້າພະເຈົ້າຍັງຮູ້ວ່າລາວຫາກໍ່ຟື້ນຈາກອາການເຈັບຂາ, ໄດ້ຫຼິ້ນຮ່ວມກັບທີມເປັນເວລາສັ້ນ, ແຕ່ກໍ່ຢູ່ໃຕ້ສະພາບການຄືແນວນີ້ ລາວກໍ່ມີການສະແດງອອກທີ່ດີສົມຄວນ, ຂ້າພະເຈົ້ານັບຖືທີ່ສຸດ.
ເຖິງວ່າໄດ້ເຂົ້າພຽງແຕ່ຮອບ 16 ທີມສຸດທ້າຍກໍ່ຕາມ, ແຕ່ການເສຍໄຊໃນການແຂ່ງຂັນເຂົ້າຮອບ 8 ທີມສຸດທ້າຍເຮັດໃຫ້ທີມບານບ້ວງເພດຊາຍຈີນໄດ້ເຫັນຈຸດບົກຜ່ອງຂອງຕົນເມື່ອທຽບກັບທີມແຂງອັນດັບໜຶ່ງຂອງໂລກ. ຫຼັງການແຂ່ງຂັນລະຫວ່າງທີມຈີນກັບທີມເກຼັກສິ້ນສຸດລົງແລ້ວ, ທ່ານຫູເຈຍສື ຮອງປະທານສະມາຄົມບານບ້ວງຈີນກ່າວວ່າ, ໃນເວລາແຂ່ງຂັນກັບທີມແຂງ, ທີມຈີນມີບັນຫາຫຼາຍສົມຄວນ, ເມື່ອກັບຄືນປະເທດແລ້ວ, ທີມຈີນຕ້ອງຕັ້ງໜ້າສະຫຼຸບ ຖອດຖອນບົດຮຽນ, ເພື່ອກະກຽມງານກິລາໂອລິມປິກປີ 2008.
ທ່ານໂຈນາສ ກາສລາວສະກາສ ຄູຝຶກໃຫຍ່ຂອງທີມຈີນເຫັນວ່າ, ເຖິງວ່າບານບ້ວງຈີນມີນັກກິລາເກັ່ງຄືທ້າວຢາວໝິງກໍ່ຕາມ, ແຕ່ຖ້າຢາກຊີງໄດ້ຜົນງານດີກວ່າເກົ່າໃນງານກິລາໂອລິມປິກປັກກິ່ງປີ 2008, ທີມບານບ້ວງເພດຊາຍຈີນຕ້ອງຍົກລະດັບເຕັກນິກລວມຂອງທີມໃຫ້ສູງຂຶ້ນ, ສ່ວນວິທີທີ່ໃຫ້ໄດ້ຜົນໄວກວ່າໃນປັດຈຸບັນກໍແມ່ນສົ່ງນັກກິລາໄປຫຼິ້ນຢູ່ຕ່າງປະເທດ. ທ່ານໂຈນາສກ່າວວ່າ:
ເປັນອັນຈະແຈ້ງແລ້ວວ່າ, ສະມາຊິກທີມບານບ້ວງຂອງພວກເຮົາຍັງຂາດປະສົບການແຂ່ງຂັນລະດັບສູງສຸດຂອງໂລກ, ເພື່ອປີ 2008, ຂ້າພະເຈົ້າເຫັນວ່າວິທີທີ່ໄດ້ຜົນກວ່າໝູ່ໃນປັດຈຸບັນແມ່ນສົ່ງເຂົາເຈົ້າໄປເຂົ້າຮ່ວມການແຂ່ງຂັນລະດັບສູງຢູ່ເອີລົບ, ໃຫ້ເຂົາເຈົ້າໄດ້ປະສົບການຂອງການປ້ອງກັນທີ່ເຂັ້ມແຂງຂອງທີມເກຼັກ ທີມອີຕາລີແລະທີມແອສປາຍ, ນີ້ຈະມີຜົນດີຕໍ່ການຖອດຖອນບົດຮຽນຂອງພວກເຂົາເຈົ້າ.
ອາຍຸສະເລ່ຍຂອງທີມບານບ້ວງຈີນຊຸດນີ້ແມ່ນ 22,4 ປີ, ໜຸ່ມກວ່າທຸກທີມທີ່ເຂົ້າຮ່ວມງານແຂ່ງຂັນບານບ້ວງຊີງຊະນະເລີດໂລກເທື່ອນີ້. ໃນການແຂ່ງຂັນກັບທີມແຂງຂອງໂລກ, ທີມຈີນທີ່ຍັງໜຸ່ມນ້ອຍໄດ້ຖອດຖອນເອົາບົດຮຽນ, ແລະກໍ່ໄດ້ເຫັນຈຸດບົກຜ່ອງຂອງຕົນ. ຫວັງວ່າໃນ 2 ປີຂ້າງໜ້ານີ້, ເຂົາເຈົ້າຈະຍົກລະດັບໃຫ້ສູງຂຶ້ນໂດຍໄວ, ແລະມີການບຶນໃນງານກິລາໂອລິມປິກປີ 2008.
|
