|
|
(GMT+08:00)
2006-09-14 14:32:39
|
|
ຈີນມີເຈດຈຳນົງໃຫ້ເພີ່ມທະວີການເຈລະຈາ ເພີ່ມຄວາມໄວ້ເນື້ອເຊື່ອໃຈກັນໃຫ້ຫຼາຍຂຶ້ນໃນບັນຫານິວເຄຼຍຂອງແຫຼມເກົາຫຼີ
cri
Author: cai
ຕາມຂ່າວສານຊີນຮວາ:ວັນທີ 13 ກັນຍາ,ກອງປະຊຸມຄະນະກຳມະການບໍລິຫານງານອົງການພະລັງງານປະລະມານູສາກົນທີ່ຈັດຂຶ້ນຢູ່ວຽນໄດ້ພິຈາລະນາບັນຫານິວເຄຼຍຂອງແຫຼມເກົາຫຼີ,ທ່ານຖາງກົວຊຽງ ຜູ້ຕາງໜ້າຈີນປະຈຳສຳນັກງານສະຫະປະຊາຊາດທີ່ວຽນແລະອົງການຈັດຕັ້ງສາກົນອື່ນໆໄດ້ກ່າວຄຳປາໄສໃນກອງປະຊຸມ,ທ່ານກ່າວເນັ້ນວ່າ,ຈີນມີເຈດຈຳນົງຢາກໃຫ້ເພີ່ມທະວີການເຈລະຈາ ເພີ່ມຄວາມໄວ້ເນື້ອເຊື່ອໃຈກັນແລະຫຼຸດຄວາມລະແວງສົງໄສໃຫ້ໜ້ອຍລົງໃນບັນຫານິວເຄຼຍຂອງແຫຼມເກົາຫຼີ.
ທ່ານຖາງກົວຊຽງເວົ້າວ່າ,ນັບແຕ່ທ້າຍປີກາຍມານີ້,ສະຖານະການແຫຼມເກົາຫຼີໄດ້ເກີດມີປັດໄຈທີ່ສັບສົນອັນໃໝ່ຄືບັນຫາການເງິນກ່ຽວກັບສ.ປ.ປ.ເກົາຫຼີແລະບັນຫາລູກສອນໄຟນຳວິຖີຂອງສ.ປ.ປ.ເກົາຫຼີເປັນຕົ້ນ,ເຮັດໃຫ້ການເຈລະຈາ 6 ຝ່າຍກ່ຽວກັບບັນຫານິວເຄຼຍຂອງແຫຼມເກົາຫຼີໄດ້ຕົກຢູ່ໃນສະພາບຢຸດສະງັກ.ທັງນີ້ສະແດງໃຫ້ເຫັນຢ່າງຈະແຈ້ງວ່າ,ປະເທດທີ່ກ່ຽວຂ້ອງມີຄວາມເຫັນຂັດແຍ່ງກັນແລະບໍ່ຕິດຕໍ່ພົວພັນກັນເປັນເວລາດົນນານ,ຈຶ່ງເຮັດໃຫ້ຂາດຄວາມໄວ້ເນື້ອເຊື່ອໃຈກັນຢ່າງໜັກໜ່ວງ.
ທ່ານຖາງກົວຊຽງຊີ້ອອກວ່າ,ການເຈລະຈາ 6 ຝ່າຍຍັງຄົງແມ່ນກົນໄກທີ່ບັງເກີດຜົນກວ່າໝູ່ໃນການແກ້ໄຂບັນຫານິວເຄຼຍຂອງແຫຼມເກົາຫຼີ.ຝ່າຍຈີນຫວັງໃຫ້ຝ່າຍຕ່າງໆທີ່ກ່ຽວຂ້ອງຈົ່ງໃຈເຢັນແລະຮັກສາຄວາມອົດກັ້ນໄວ້,ສະແດງຄວາມຄ່ອງແຄ້ວ,ປ້ອງກັນບໍ່ໃຫ້ສະຖານະການສັບສົນຂຶ້ນອີກ,ພະຍາຍາມໃຫ້ຟື້ນຟູການເຈລະຈາ 6 ຝ່າຍໂດຍໄວເທົ່າທີ່ຈະໄວໄດ້.
|
|
|