|
|
 |
| (GMT+08:00)
2006-09-14 21:47:29
|
 |
|
ງານກິລາໂອລິມປິກປັກກິ່ງສີຂຽວຈະໃຊ້ລົດທີ່ໃຊ້ແຕ່ໄຟຟ້າເປັນພະລັງງານ(ສຽງ)
cri
Author: shuo
|
"ງານກິລາໂອລິມປິກສີຂຽວ"ແມ່ນໜຶ່ງໃນທັດສະນະຄະຕິສາມຂໍ້ຂອງງານກິລາໂອລິມປິກປັກກິ່ງປີ2008.ອຳນາດການປົກຄອງນະຄອນປັກກິ່ງເອົາໃຈໃສ່ໃນລະດັບສູງຕໍ່ການສ້າງ ສາແລະອະນຸລັກສິ່ງແວດລ້ອມ.ໃນນັ້ນ,ການຫຼຸດການລະບາຍມົນລະພິດຂອງລົດໃຫ້ໜ້ອຍລົງແມ່ນມາດຕະການສຳຄັນອັນໜຶ່ງ,ຫວ່າງມໍ່ໆນີ້,ນັກຂ່າວໄດ້ຊາບຈາກພາກສ່ວນທີ່ກ່ຽວ ຂ້ອງວ່າ,ລົດທີ່ໃຊ້ໃນງານກິລາໂອລິມປິກປັກກິ່ງປີ2008ລ້ວນແຕ່ແມ່ນລົດທີ່ອະນຸລັກສິ່ງແວດລ້ອມທັງໝົດ,ໃນນັ້ນ,ລົດທີ່ໃຊ້ແຕ່ໄຟຟ້າເປັນພະລັງງານທີ່ຈີນຄົ້ນຄວ້າຜະລິດເອງນັ້ນຍ້ອນບໍ່ມີສິ່ງເຊື່ອມພິດເດັດຖານຈະເປັນສັນຍະລັກທີ່ໂຄສະນາທັດສະນະຄະຕິ"ງານກິ ລາໂອລິມປິກສີຂຽວ"ຂອງປັກກິ່ງ.
ໃນສິບປີມານີ້,ຄວັນຈາກລົດແມ່ນໃດ້ສ້າງມົນລະພິດທາງອາກາດໃຫ້ປັກກິ່ງຮ້າຍແຮງກວ່າໝູ່,ນັບມາຮອດທ້າຍເດືອນມິຖຸນາປີນີ້,ລົດຍົນຂອງນະຄອນຫຼວງປັກກິ່ງມີ2ລ້ານ7ແສນ3ໝື່ນຄັນ,ຄາດວ່າຮອດທ້າຍປີນີ້ຈະສູງເຖິງ3ລ້ານຄົນ.ຄະນະກຳມະການຈັດຕັ້ງ ງານກິລາໂອລິມປິກປັກກິ່ງເຄີຍໃຫ້ຄຳໝັ້ນສັນຍາຢ່າງເດັດດ່ຽວວ່າ,ຈະຄວບຄຸມປະລິ ມານຂອງຄວັນລົດແລະການລະບາຍມົນລະພິດອື່ນໆຢ່າງເຂັ້ມງວດ,ແລະຮັບປະກັນວ່າ ເຖິງແມ່ນຈະມີສະພາບອາກາດທີ່ບໍ່ດີກໍຕາມ,ກໍຈະພະຍາຍາມເຮັດໃຫ້ຄຸນນະພາບອາ ກາດຂອງປັກກິ່ງບັນລຸໄດ້ຕາມມາດຖາມທີ່ຄະນະກຳມະການງານກິລາໂອລິມປິກສາກົນວາງໄວ້.ຍ້ອນຄວາມຮັບຜິດຊອບດັ່ງກ່າວ,ປັກກິ່ງຈຶ່ງຈຳເປັນຕ້ອງພັດທະນາລົດປອດມົນ ລະພິດແບບໃໝ່.ອີງຕາມທ່ວງທ່າພັດທະນາໃນໂລກປະຈຸບັນ,ລົດທີ່ໃຊ້ໄຟຟ້າເປັນພະລັງງານ,ໂດຍສະເພາະແມ່ນລົດທີ່ໃຊ້ແຕ່ໄຟຟ້າເປັນພະລັງງານຢ່າງດຽວທີ່ບໍ່ມີຄວັນພິດຈັກ ໜ້ອຍນັ້ນໄດ້ກາຍເປັນການເລືອກອັນດັບໜຶ່ງຂອງນະຄອນປັກກິງ.
ໃນງານກິລາໂອລິມປິກຫຼາຍຄັ້ງກ່ອນ ເຊັ່ນງານກິລາໂອລິມປິກແອັດລັນຕາອາເມລິກາ ງານກິລາໂອລິມປິກຊິດນີອົສຕຼາລີ ພ້ອມດ້ວຍງານກິລາໂອລິມປິກອາແຕນເກຼັກກໍ່ໄດ້ໃຊ້ລົດທີ່ໃຊ້ແຕ່ໄຟຟ້າເປັນພະລັງງານຄືກັນ.ຍ້ອນມັນມີລັກສະນະພິເສດທີ່ອະນຸລັກສິ່ງແວດລ້ອມ,ລົດແບບນີ້ໄດ້ກາຍເປັນພາຫະນະຕົ້ນຕໍຂອງຕົວເມືອງທີ່ຈັດງານກິລາໂອລິມປິກໃຊ້ມາໂຄສະນາຫົວຂໍ້ສີຂຽວ.
ນະຄອນປັກກິ່ງທີ່ຖືການຈັດງານກິລາໂອລິມປິກສີຂຽວເປັນເປົ້າໝາຍນັ້ນຍ່ອມຈະນ້ອຍໜ້າເມືອງອື່ນບໍ່ໄດ້.ທ່ານເຈີ້ງຈີຊຸ່ນ ຫົວໜ້າຄະນະກຳມະການວິທະຍາສາດເຕັກນິກນະຄອນປັກກິ່ງທີ່ຮັບຜິດຊອບຄົ້ນຄວ້າພັດທະນາລົດທີ່ໃຊ້ໄຟຟ້າເປັນພະລັງງານນັ້ນໄດ້ ແນະນຳແຜນການໃຊ້ລົດຂອງງານກິລາໂອລິມປິກປັກກິ່ງປີ2008,ທ່ານເວົ້າວ່າ:"ຕາມການຊາບຈາກຄະນະກຳມະການຈັດຕັ້ງງານກິລາໂອລິມປິກປັກກິ່ງ,ໃນໄລຍະງານກິລາໂອລິມປິກປີ2008ຈະໃຊ້ລົດ1ພັນ5ຮ້ອຍຄັນ.ຕາມຄວາມຮຽກຮ້ອງ,ລົດ1500ຄັນນີ້ຕ້ອງແມ່ນລົດທີ່ອະນຸລັກສິ່ງແວດລ້ອມທັງໝົດ.ລົດທີ່ອະນຸລັກສິ່ງແວດລ້ອມມີຫຼາຍຊະນິດ,ເຊິ່ງ ລວມທັງລົດທີ່ໃຊ້ນ້ຳມັນເປັນພະລັງງານ ລົດທີ່ໃຊ້ນ້ຳມັນແລະໄຟຟ້າເປັນພະລັງງານປົນກັນແລະລົດທີ່ໃຊ້ແຕ່ໄຟຟ້າເປັນພະລັງງານ.ລົດທີ່ບໍລິການງານກິລາໂອລິມປິກໂດຍກົງຕ້ອງຕອບສະໜອງຕາມເງື່ອນໄຂຂອງງານກິລາໂອລິມປິກ ຄື ຕ້ອງຊ່ອຍອະນຸລັກສິ່ງແວດລ້ອມ.ສັງເກດຈາກສະພາບການໃນຫຼາຍປີມານີ້ ຄື ອຳນາດການປົກຄອງນະຄອນປັກກິ່ງສະໜັບສະໜູນການຄົ້ນຄວ້າພັດທະນາລົດເມໃຫຍ່ທີ່ໃຊ້ແຕ່ໄຟຟ້າເປັນພະລັງ ງານຢ່າງດຽວນັ້ນເຫັນໄດ້ວ່າ,ຮອດປີ2008,ພວກເຮົາສາມາດເອົາລົດເມໃຫຍ່ທີ່ໃຊ້ແຕ່ໄຟ ຟ້າເປັນພະລັງງານປະມານ50ຄັນບໍລິການໃນເຂດໃຈກາງຂອງງານກິລາໂອລິມປິກ.ລົດເຫຼົ່ານີ້ແມ່ນກາຈີນແລະມີລິຂະສິດຊັບສິນທາງປັນຍາຂອງຕົນຢ່າງສົມບູນ."
ລົດທີ່ໃຊ້ໄຟຟ້າເປັນພະລັງງານໝາຍເຖິງລົດທີ່ໃຊ້ພະລັງງານໄຟຟ້າສ່ວນໜຶ່ງ ຫຼືໃຊ້ແຕ່ພະລັງງານໄຟຟ້າເປັນແມ່ແຮງ,ອີງຕາມຫຼັກມູນແລະທິດພັດທະນາຂອງລົດຍົນ,ໃນໂລກປະຈຸບັນ,ລົດທີ່ໃຊ້ໄຟຟ້າເປັນພະລັງງານທີ່ໃຊ້ໄດ້ຢ່າງແທ້ຈິງແບ່ງເປັນສອງປະເພດ ຄືລົດທີ່ໃຊ້ແຕ່ໄຟຟ້າເປັນພະລັງງານພຽງຢ່າງດຽວແລະລົດທີ່ໃຊ້ໄຟຟ້າແລະນ້ຳມັນເປັນພະລັງງານປົນກັນ.ໃນສອງປະເພດນີ້,ລົດທີ່ໃຊ້ໄຟຟ້າແລະນ້ຳມັນເປັນພະລັງງານປົນກັນນັ້ນໄດ້ຖືກນຳໃຊ້ຫຼາຍກວ່າໝູ່,ເພາະວ່າມັນໃຊ້ສອງແມ່ແຮງ ຄື ພະລັງໄຟຟ້າແລະນ້ຳ ມັນ,ຍ້ອນໃຊ້ນ້ຳມັນຈຶ່ງບໍ່ມີຂໍ້ຂາດຕົກບົກຜ່ອງຄືລົດທີ່ໃຊ້ແຕ່ໄຟຟ້າ ແລ່ນບໍ່ໄກປານໃດ ແລະແລ່ນຊ້າເປັນຕົ້ນ.ແຕ່ຍ້ອນວ່າມັນໃຊ້ນ້ຳມັນເປັນພະລັງງານ,ຍ່ອມຈະລະບາຍຄວັນພິດອອກມາໜ້ອຍໜຶ່ງ.
ສ່ວນລົດທີ່ໃຊ້ແຕ່ໄຟຟ້າເປັນພະລັງງານນັ້ນ,ມັນຈະບໍ່ມີຄວັນພິດເລີຍ,ແມ່ນລົດທີ່ອະນຸລັກສິ່ງແວດລ້ອມຢ່າງແທ້ຈິງ.ແຕ່ຍ້ອນວ່າເຕັກນິກຍັງບໍ່ສູງ,ລົດທີ່ໃຊ້ແຕ່ໄຟຟ້າເປັນພະລັງງານຢ່າງດຽວຍັງມີຂໍ້ຂາດຕົກບົກຜ່ອງຫຼາຍອັນ,ເຊັ່ນ ແລ່ນບໍ່ໄດ້ໄກປານໃດແລະສາກໄຟຍາກເປັນຕົ້ນ.ແຕ່ວ່າເມື່ອໄດ້ປັບປຸງຫຼາຍເທື່ອແລ້ວ,ເຕັກນິກທຸກຂໍ້ຂອງລົດທີ່ໃຊ້ແຕ່ໄຟຟ້າເປັນພະລັງງານທີ່ຄະນະກຳມະການວິທະຍາສາດເຕັກນິກປັກກິ່ງຈັດຕັ້ງຄົ້ນຄວ້າພັດທະນານັ້ນໄດ້ດີຂຶ້ນຫຼາຍ.ທ່ານເຈີ້ງຈີຊຸ່ນເວົ້າວ່າ:"ເຕັກນິກຂອງພວກເຮົາແມ່ນນຳໜ້າໃນຈີນ,ກໍໄດ້ບັນລຸລະດັບກ້າວໜ້າໃນໂລກ.ປະຈຸບັນນີ້,ລວມທັງລົດທີ່ໄດ້ໃຊ້ໃນງານກິລາໂອລິມປິກທຸກຄັ້ງທີ່ຜ່ານມາ,ເຂົາເຈົ້າລ້ວນແຕ່ໃຊ້ໝໍ້ໄຟຊືນກົດ,ແຕ່ລົດທີ່ໃຊ້ແຕ່ໄຟຟ້າເປັນພະລັງງານຂອງພວກເຮົາໃຊ້ໝໍ້ໄຟອີອົງລິຕຽມ,ໝໍ້ໄຟປະເພດນີ້ບໍ່ເຄີຍໃຊ້ຈັກເທື່ອໃນຈີນ ກໍຄືປະເທດອື່ນ."
ປະຈຸບັນນີ້,ຄະນະກຳມະການວິທະຍາສາດເຕັກນິກນະຄອນປປັກກິ່ງໄດ້ສຳເລັດການອອກແບບ ພັດທະນາແລະກວດກາຢັ້ງຢືນຄຸນນະພາບຂອງລົດຫຼາຍແບບຕາມລຳດັບ,ໄດ້ຮັບໝາກຜົນດ້ານວິທະຍາສາດເຕັກນິກຕ່າງໆແລະມີລິຂະສິດຊັບສິນທາງປັນຍາຂອງຕົນ.ພາຍຫຼັງຄະນະກຳມະການພັດທະນາແລະປະຕິຮູບແຫ່ງລັດຈີນພິຈາລະນາອະນຸມັດແລ້ວ,ຈະທົດລອງແລ່ນເຄິ່ງປີ,ຈຶ່ງຈະອະນຸມັດໃຫ້ນຳໃຊ້ຢ່າງເປັນທາງການ.ທ່ານເຈີ້ງຈີຊຸ່ນກ່າວວ່າ,ເຂົາເຈົ້າໄດ້ຮັບໝາກຜົນຄົ້ນຄວ້າໄວ້ແນວນີ້,ກໍ່ຍ້ອນມີການຊີ້ນຳແລະ ສະໜັບສະໜູນຂອງອຳນາດການປົກຄອງນະຄອນປັກກິ່ງແລະຂອງລົດຢ່າງໃກ້ຊິດ.ທ່ານເວົ້າວ່າ:"ລັດສຸດທີ່ເອົາໃຈໃສ່ນຳການຄົ້ນຄວ້າລົດທີ່ໃຊ້ໄຟຟ້າເປັນພະລັງງານ,ໃນແຜນພັດທະນາຫ້າປີຄັ້ງທີ10,ກະຊວງວິທະຍາສາດເຕັກນິກກໍໄດ້ເລີ່ມປະຕິບັດແຜນການພັດທະນາລົດທີ່ໃຊ້ໄຟຟ້າເປັນພະລັງງານ.ນະຄອນປັກກິ່ງຮັບຜິດຊອບການຄົ້ນຄວ້າພັດທະນາລົດເມໃຫຍ່ທີ່ໃຊ້ແຕ່ໄຟຟ້າເປັນພະລັງງານ,ກໍເປັນການສະໜັບສະໜູນການບັນລຸຈຸດປະສົງທີ່ຈັດງານກິລາໂອລິມປິກປັກກິ່ງເປັນງານກິລາໂອລິມປິກສີຂຽວແລະງານກິລາໂອລິມປິກທີ່ມີວິທະຍາສາດເຕັກນິກສູງ.ນະຄອນປັກກິ່ງໄດ້ລົງທຶນເກືອບ200ລ້ານຢວນ ເຂົ້າໃນການຄົ້ນຄວ້າພັດທະນາລົດທີ່ໃຊ້ໄຟຟ້າເປັນພະລັງງານ."
ຕາມທ່ານເຈີ້ງຈີຊຸ່ນເວົ້າສູ່ຟັງວ່າ,ຜ່ານການຕິດຕໍ່ພົວພັນລະຫວ່າງຄະນະກຳມະການວິທະຍາສາດເຕັກນິກນະຄອນປັກກິ່ງກັບຄະນະກຳມະການຈັດງານກິລາໂອລິມປິກປັກກິ່ງ, ສອງຝ່າຍໄດ້ຕົກລົງໃນຂັ້ນພື້ນຖານວ່າ,ລົດທີ່ໃຊ້ແຕ່ໄຟຟ້າເປັນພະລັງງານພຽງຢ່າງດຽວ ທີ່ຄົ້ນຄວ້າພັດທະນາໂດຍຄະນະກຳມະການວິທະຍາສາດເຕັກນິກນະຄອນປັກກິ່ງນັ້ນຈະບໍລິການໃນບ້ານນັກກິລາ ບ້ານນັກຂ່າວ ພ້ອມດ້ວຍເສັ້ນທາງຕ່າງໆທີ່ຈາກບ້ານນັກກິລາ ໄປຮອດສະໜາມກິລາສຳຄັນ.ຄາດວ່າ,ຮອດເວລານັ້ນ,ລົດທີ່ໃຊ້ໄຟຟ້າເປັນພະລັງງານທີ່ ຮັບໃຊ້ໃຫ້ນັກກິລາ ເຈົ້າໜ້າທີ່ແລະນັກຂ່າວນັ້ນຈະມີ50ຄັນ.ເຊື່ອໝັ້ນວ່າ,ເມື່ອຮອດເວລາຈັດງານກິລາໂອລິມປິກປັກກິ່ງປີ2008,ລົດທີ່ໃຊ້ແຕ່ໄຟຟ້າເປັນພະລັງງານຈະກາຍເປັນ ພາບທີ່ສວຍງາມໃນຖະໜົນຂອງນະຄອນຫຼວງປັກກິ່ງ.
|
|
|
