|
ທີ່ນີ້, ວິທະຍຸສາກົນແຫ່ງປະເທດຈີນ, ສະບາຍດີ, ທ່ານຜູ້ຟັງທີ່ເຄົາລົບ, ຫວ່າງມໍ່ໆນີ້, ຢູ່ຫໍວິຈິດຕະກຳຢຽນຮວງປັກກິ່ງໄດ້ຈັດງານວາງສະແດງທີ່ໃຫ້ຊື່ວ່າ " ສິ່ງມະຫັດສະຈັນ——ສິລະປະອາຊຽນ". ເຄື່ອງວິຈັດຕະກຳທີ່ມີສີສັນພິເສດຕ່າງໆຂອງ 10 ປະເທດອາຊຽນໃນງານວາງສະແດງໄດ້ດູດດຶງຜູ້ຊົມຢ່າງຫຼວງຫຼາຍ. ໃນລາຍການ"ຈີນກັບອາຊຽນ" ພາກນີ້, ຜູ້ດຳເນີນລາຍການຈະພາທ່ານໄປຊົມງານວາງສະແດງພິເສດເທື່ອນີ້, ຕໍ່ໄປ, ເຊີນຟັງບົດແຈ້ງຂ່າວທີ່ກ່ຽວຂ້ອງ.
ທ່ານຜູ້ຟັງ, ເມື່ອຍ່າງຂຶ້ນໄປຮອດຊັ້ນທີ 2 ຂອງຫໍວິຈິດຕະກຳ, ພວກເຮົາກໍໄດ້ເຫັນ, ຫໍວາງສະແດງໄດ້ແບ່ງອອກເປັນຫ້ອງວາງສະແດງ 10 ຫ້ອງສຳລັບ 10 ປະເທດອາຊຽນ, ຫ້ອງວາງສະແດງຈັດລຽງລຳດັບຕາມພະຍັນຊະນະພາສາອັງກິດ. ທ່ານຢິນເພິງ ທີ່ຮັບຜິດຊອບສູນງານວາງສະແດງສິລະປະຕໍ່ຕ່າງປະເທດຂອງຈີນ ເຊິ່ງເປັນອົງການທີ່ຮັບຜິດຊອບການວາງສະແດງເທື່ອນີ້ແນະນຳວ່າ:
"ງານວາງສະແດງເທື່ອນີ້ໄດ້ໂຮມເອົາເຄື່ອງວິຈິດຕະກຳທີ່ມີລັກສະນະແລະສີສັນພິເສດຂອງວັດທະນະທຳ 10 ປະເທດອາຊຽນມາວາງສະແດງ. ແຕ່ລະປະເທດຕ່າງກໍມີຫ້ອງວາງສະແດງຫ້ອງໜຶ່ງ. ເທື່ອນີ້ແມ່ນເທື່ອທຳອິດທີ່ຫໍວິຈິດຕະກຳອຽນຮວງຈັດງານວາງສະແດງເຄື່ອງວິຈິດຕະກຳອາຊີຂະໜາດໃຫຍ່ປານນີ້."
ງານວາງສະແດງເທື່ອນີ້ຈັດວາງໄດ້ດີຫຼາຍ, ພວກເຮົາໄດ້ເຫັນລະຫວ່າງຫ້ອງວາງສະແດງຂອງຫວຽດນາມແລະລາວ, ໄດ້ໃຊ້ຮູບຈຳລອງຕ່າງໆ, ເຊັ່ນ, ກໍໄຜ່, ຂົວໄມ້, ແລະເຮືອນຕູບເປັນຕົ້ນສັບຫວ່າງ, ບວກກັບເຄື່ອງວິຈິດຕະກຳອັນລຽບງ່າຍຂອງເຂົາເຈົ້າ, ປະກອບເປັນຮູບພາບຂອງບ້ານນາຜຳສຸກອັນສວຍງາມໜ້າຊົມ. ສ່ວນຫ້ອງວາງສະແດງຂອງອິນໂດເນເຊຍ, ກຳປູເຈຍແລະໄທ, ໄດ້ຕົບແຕ່ງດ້ວຍແສງໄຟແລະແຜ່ນພາບແຕ້ມທີ່ມີຮູບພະທາດແລະວັດວາເກົ່າແກ່ບູຮານ, ເພື່ອສະແດງໃຫ້ເຫັນເຖິງມູນເຊື້ອອັນເລິກເຊິ່ງແຫ່ງວັດທະນະທຳພຸດທະສາສະໜາຂອງປະເທດທີ່ມີອາລະຍະທຳເກົ່າແກ່ດັ່ງກ່າວ. ຮູບຄວັດຫົວສິງຫາງປາທີ່ສູງໃຫຍ່ຕັ້ງສະຫງ່າຢູ່ໜ້າຫ້ອງວາງສະແດງຂອງສິງກະໂປນັ້ນ, ເຮັດໃຫ້ຄົນທັງຫຼາຍຍັງບໍ່ທັນເຂົ້າຊົມເທື່ອກໍ່ໄດ້ມີຄວາມຮູ້ສຶກເຖິງວັດທະນະທຳຫຼາຍເຊື້ອຊາດຂອງສິງກະໂປເຊິ່ງເປັນປະເທດລັດຖະນະຄອນນີ້ແລ້ວ. ຍັງມີຮູບຊ້າງທີ່ປະຊາຊົນອາຊີອາຄະເນຮັກແພງຫຼາຍ, ເມື່ອໄດ້ຕົບແຕ່ງເປັນພິເສດແລ້ວ, ໄດ້ກາຍເປັນຕູ້ໂຊທີ່ວາງສະແດງເຄື່ອງວິຈິດຕະກຳຂອງໄທແລະລາວ. ສິ່ງທີ່ມີຫົວຄິດປະດິດສ້າງກວ່າໝູ່ແມ່ນແສງໄຟສີຟ້າລະຫວ່າງ 10 ຫ້ອງວາງສະແດງ, ເບິ່ງເໝືອນດັ່ງແມ່ນ້ຳສາຍໜຶ່ງໄຫຼຜ່ານຫຼາຍປະເທດອາຊຽນ, ສະແດງໃຫ້ເຫັນຄວາມໝາຍອັນເລິກເຊິ່ງທີ່ວ່າ, ບັນດາປະເທດອາຊຽນມີມູນເຊື້ອວັດທະນະທຳຕັ້ງແຕ່ບູຮານນະການ, ມີສາຍພູສາຍນ້ຳຕິດຈອດກັນແລະເກາະແຂນຮ່ວມມືກັນ.
ຕໍ່ໄປ, ຜູ້ດຳເນີນລາຍການຈະນຳທ່ານໄປຊົມການວາງສະແດງອັນດີເລີດຂອງບາງປະເທດ.ທ່ານຜູ້ຟັງ, ທີ່ທ່ານພວມຟັງຢູ່ນີ້ແມ່ນສຽງລະນາດເຊິ່ງເປັນເຄື່ອງເສບພື້ນເມືອງຂອງຫວຽດນາມ, ດຽວນີ້, ຜູ້ຈັດລາຍການພວມໄດ້ນຳທ່ານມາຊົມຢູ່ຫ້ອງວາງສະແດງຂອງຫວຽດນາມ, ສຽງລະນາດອັນມ່ວນຫູຈາກຫ້ອງນີ້ໄດ້ດຶງດູດຜູ້ຊົມຢ່າງຫຼວງຫຼາຍ.
ຕໍ່ໄປ, ແມ່ນຫ້ອງວາງສະແດງຂອງໄທ, ການສະແດງຫຸ່ນກະບອກທີ່ມີສີສັນພິເສດຂອງໄທນັ້ນໄດ້ດູດດຶງຜູ້ຊົມຫຼາຍສົມຄວນ. ທ່ານນາງດາຣຸນີ ທຳໂພດົນ, ນັກວິຊາການວັດທະນະທຳພົວພັນກັບຕ່າງປະເທດຂອງກະຊວງວັດທະນະທຳຂອງໄທແນະນຳວ່າ:
"ເຄື່ອງວິຈິດຕະກຳທີ່ພວກຂ້າພະເຈົ້ານຳມາຮ່ວມງານວາງສະແດງເທື່ອນີ້, ບໍ່ວ່າຄັນຮົ່ມ, ເຄື່ອງປັ້ນດິນເຜົາຫຼືວ່າແມ່ນແພແສ່ວ, ກໍມີສີສັນພິເສດຂອງໄທ. ຫຸ່ນກະບອກຂອງພວກເຮົາແມ່ນເຄື່ອງວາງສະແດງທີ່ພົ້ນເດັ່ນ, ມີຄົນສະແດງສະເພາະ, ມັນມີສີສວຍງາມຕົບແຕ່ງ, ປານີດ, ມີເອກະລັກຊົນເຜົ່າເຂັ້ມຂຸ້ນແລະໜ້າຊົມຫຼາຍ."
ຜູ້ເຂົ້າຮ່ວມງານວາງສະແດງຂອງຝ່າຍມາເລເຊຍແນະນຳວ່າ:
"ເຄື່ອງວິຈິດຕະກຳທີ່ພວກເຮົາເລືອກມາວາງສະແດງເທື່ອນີ້ແມ່ນຫາຍາກ, ມີຄ່າສູງ, ແລະໄດ້ສະແດງໃຫ້ເຫັນຫັດຖະກຳດັ້ງເດີມຂອງພວກເຮົາທັງໝົດ."
ເຄື່ອງວາງສະແດງຂອງ 10 ປະເທດອາຊຽນຕ່າງມີຈຸດພິເສດຂອງໃຜມັນ, ທັງເຊື່ອມໂຍງເປັນອັນໜຶ່ງອັນດຽວກັນ. ບໍ່ພຽງແຕ່ໄດ້ສະແດງໃຫ້ເຫັນລັກສະນະພິເສດແລະມີຫຼາຍຮູບແບບສິລະປະຂອງບັນດາປະເທດອາຊຽນ, ຍັງໄດ້ສະແດງໃຫ້ເຫັນເຖິງຈຸດຄືກັນຂອງວັດທະນະທຳພາກພື້ນ.
ຫຸ່ນເຊີດພື້ນເມືອງຂອງອິນໂດເນເຊຍມ່ວນຊື່ນແລະໜ້າຮັກ, ໜ້າກາກຄວັດດ້ວຍໄມ້ໜ້າຕາປະຫຼາດແລະເລິກລັບ, ພະພຸທະຮູບຂອງກຳປູເຈຍໄດ້ຊາບຊຶມໄປດ້ວຍຜົນສະທ້ອນຂອງສິລະປະອິນເດຍ, ທັງມີລັກສະນະໜ້າຕາຂອງຄົນຂະເມນ. ຮູບແກະສະຫຼັກໄມ້ຂອງລາວມີລວດລາຍສະຫຼັບສັບຊ້ອນ, ສີມືປານີດ; ເຄື່ອງນຸ່ງຂອງຖື, ເຄື່ອງແສ່ວດ້ວຍລູກປັດຂອງວັດທະນະທຳດັ້ງເດີມຂອງຊາວຈີນສິງກະໂປໄດ້ສ່ອງແສງໃຫ້ເຫັນແຫຼ່ງວັດທະນະທຳຈີນແລະການຮັບເອົາຮີດຄອງປະເພນີທ້ອງຖິ່ນຂອງຊາວຈີນສິງກະໂປ; ຍັງມີຫັດຖະກຳຫວາຍຂອງຟິລິບປີນແລະມາເລເຊຍ, ເຄື່ອງດິນເຜົາຂອງໄທແລະຫວຽດນາມ, ລ້ວນແຕ່ມີທຳນອງຊົນຊາດອັນເຂັ້ມຂຸ້ນ. ພ້ອມກັນນັ້ນ, ປະເທດຕ່າງໆທີ່ເຂົ້າຮ່ວມງານວາງສະແດງຍັງໄດ້ເອົາເຄື່ອງຖັກແສ່ວ, ເຄື່ອງນຸ່ງຂອງຖືແລະສິລະປະຍ້ອມດ້ວຍໄຂສີທີ່ມີສີສັນລວດລາຍສວຍງາມພິເສດນັ້ນມາວາງສະແດງ. ນັກສິລະປະຂອງມາເລເຊຍແລະສິງກະໂປຍັງໄດ້ສາທິດການຖັກແສ່ວຢູ່ກັບບ່ອນ.
ທ່ານນາງເຈີ້ງເວີນຮຸ້ຍ ຫົວໜ້າຫໍວິຈິດຕະກຳຢຽນຮວງກໍໄດ້ໄປຊົມການວາງສະແດງ, ເພິ່ນຕີລາຄາວ່າ:
"ຂ້າພະເຈົ້າຍ້ອງຍໍເຄື່ອງສິລະປະເຫຼົ່ານີ້ທີ່ສຸດ, ງາມຫຼູຫຼາແທ້ໆ. ນີ້ແມ່ນງານວາງສະແດງສິລະປະແລະຊົນຊາດ, ໄດ້ສະແດງໃຫ້ເຫັນສະພາບພັດທະນາຂອງວັດທະນະທຳ, ປະຫວັດສາດ, ເສດຖະກິດແລະມະນຸດສາດຂອງແຕ່ລະຊົນຊາດ. ແຕ່ລະຊົນຊາດຕ່າງກໍມີຈຸດພິເສດຂອງໃຜລາວ, ຈຸດພິເສດເຫຼົ່ານີ້ໄດ້ປະກອບເປັນວັດທະນະທຳດຽວກັນທັງມີຫຼາຍເຄົ້າຂອງອາຊີພວກເຮົາ."
ປີນີ້ແມ່ນຈີນກັບອາຊຽນສ້າງຕັ້ງການພົວພັນເປັນປະເທດຄູ່ເຈລະຈາຄົບຮອບ 15 ປີ, ພ້ອມທັງເປັນປີຮ່ວມມືມິດຕະພາບຈີນອາຊຽນ. ເພື່ອສະຫຼອງເຫດການສຳຄັນດັ່ງກ່າວ, ໃນງານສິລະປະອາຊີຄັ້ງທີ 8 ທີ່ໄດ້ອັດລົງໃນວັນທີ 6 ກັນຍາ, ກໍໄດ້ສຸມສາຍຕາໃສ່ວັດທະນະທຳອາຊຽນ, ໄດ້ຈັດໃຫ້ມີກິດຈະກຳຕ່າງໆທີ່ສະແດງໃຫ້ເຫັນວັດທະນະທຳອາຊຽນ. "ສິ່ງມະຫັດສະຈັນອາຊີ——ງານວາງສະແດງສິລະປະອາຊຽນ" ກໍແມ່ນເນື້ອໃນສຳຄັນອັນໜຶ່ງ. ງານວາງສະແດງສິລະປະມີຈຸດປະສົງເປີດປ່ອງຢ້ຽມມໍລະດົກວັດທະນະທຳອັນອຸດົມສົມບຸນຂອງບັນດາປະເທດອາຊຽນ, ໃຫ້ຊາວຈີນນັບມື້ນັບເຂົ້າໃກ້ອາຊຽນຫຼາຍກວ່າເກົ່າ, ເຂົ້າໃຈວັດທະນະທຳອາຊຽນທີ່ມີຫຼາຍສີຫຼາຍສັນ, ທັງຫວັງໃຫ້ການຮ່ວມມືມິດຕະພາບລະຫວ່າງຈີນກັບອາຊຽນຍິ່ງໝັ້ນຄົງຂະໜົງແກ່ນ.
ໃນເວລາໃຫ້ສຳພາດຕໍ່ນັກຂ່າວCRIພວກເຮົາ, ທ່ານອົງເຄັງຢົງ ເລຂາທິການໃຫຍ່ອາຊຽນທີ່ເຂົ້າຮ່ວມງານວາງສະແດງສິລະປະອາຊຽນກ່າວວ່າ:
"ດ້ວຍຮູບການແລກປ່ຽນຄືງານວາງສະແດງສິລະປະວິຈິດຕະກຳອາຊຽນຄັ້ງນີ້, ເຮັດໃຫ້ພວກເຮົາໄດ້ມາເຕົ້າໂຮມກັນ, ຖອດຖອນບົດຮຽນແລະຮ່ຳຮຽນເຊິ່ງກັນແລະກັນ, ພ້ອມກັນປະດິດສ້າງ. ຈາກງານສິລະປະອາຊີເທື່ອນີ້, ພວກເຮົາສາມາດສ້າງໃຫ້ສິລະປະອາຊີບັນລຸເຖິງລະດັບສຸດຍອດ. ພວກເຮົາຖືງານນີ້ເປັນຈຸດເລີ່ມຕົ້ນ, ຫວັງວ່າງານສິລະປະອາຊຽນໃນອະນາຄົດຄົງຈະເປັນເວທີສະແດງວັດທະນະທຳອາຊຽນ, ແລະເປັນເວທີແລກປ່ຽນວັດທະນະທຳກັບຈີນຍິ່ງຫຼາຍກວ່າເກົ່າ."
ທ່ານຜູ້ຟັງທີ່ເຄົາລົບ, ທີ່ຟັງມານັ້ນ, ແມ່ນບົດແຈ້ງຂ່າວທີ່ພາດຫົວເລື່ອງວ່າ: ງານວາງສະແດງສິລະປະອາຊຽນເຮັດໃຫ້ຊາວຈີນເຂົ້າໃນອາຊຽນຫຼາຍກວ່າເກົ່າ. ລາຍການຈີນກັບອາຊຽນພາກນີ້ຂໍຈົບລົງພຽງທໍ່ນີ້, ຂອບໃຈທ່ານທີ່ຮັບຟັງ, ສະບາຍດີ.
|
