|
ທຸກຄົນຄົງຈະຮູ້ແລ້ວວ່າຖ້າອາຫານການກິນບໍ່ຖືກຕ້ອງອາດຈະພາໃຫ້ເປັນພະຍາດທີ່ຮ້າຍແຮງ, ແຕ່ພັດຍັງປະໝາດຄວາມຊິຍເຄີຍນ້ອຍບາງຢ່າງຫຼັງກິນເຂົ້າແລ້ວ. ທ່ານຮູ້ບໍ່ວ່າ, ຄວາມຊິນເຄີຍອັນບໍ່ດີບາງຢ່າງ, ອາດຈະເປັນຜົນຮ້າຍຕໍ່ສຸຂະພາບຂອງທ່ານ. ໃນລາຍການມື້ນີ້, ພວກເຮົາຈະແນະນຳຄວາມຊິນເຄີຍ8ຢ່າງທີ່ຈະເປັນຜົນຮ້າຍຕໍ່ສຸຂະພາບຂອງຄົນເຮົາ, ຄິດວ່າຄວາມຮູ້ເຫຼົ່ານີ້ຄົງຈະມີຜົນດີຕໍ່ຊີວິດການເປັນຢູ່ຂອງທ່ານ.
1, ຫຼັງຈາກກິນເຂົ້າແລ້ວບໍ່ຄວນກິນໝາກໄມ້ໂລດ. ຄົນສ່ວນຫຼາຍເມື່ອກິນເຂົ້າແລ້ວກໍກິນໝາກໄມ້ໂລດ, ເພາະບໍ່ຮູ້ວ່າ, ນີ້ແມ່ນຄວາມຊິນເຄີຍທີ່ຜິດພາດຢ່າງໜຶ່ງ. ພາຍຫຼັງກິນອາຫານແລ້ວ, ກະເພາະຕ້ອງການເວລາປະມານຊົ່ວໂມງໜຶ່ງເພື່ອລະລາຍອາຫານ. ຖ້າກິນເຂົ້າແລ້ວກໍກິນໝາກໄມ້ທັນທີ, ໝາກໄມ້ກໍຈະໄປຄ້າງໃນທ້ອງ, ເພາະວ່າອາຫານທີ່ກິນເຂົ້າໄປກ່ອນຍັງບໍ່ຍ່ອຍເທື່ອ, ເມື່ອເປັນແນວນີ້ດົນແລ້ວ, ກໍຈະພາໃຫ້ຍື່ງທ້ອງຫຼືຖອກທ້ອງ.
2, ເມື່ອກິນເຂົ້າແລ້ວບໍ່ຄວນດື່ມາປຸກ. ເພາະວ່າຖ້າກິນເຂົ້າແລ້ວດື່ມນ້ຳຊາ, ຈະເຮັດໃຫ້ນ້ຳກະເພາະຈາງລົງ, ກະທົບກະເທືອນການລະລາຍອາຫານ. ນອກນີ້, ໃນໃບຊາຍັງມີທາດກົດຕານນິກຢ່າງຫຼວງຫຼາຍ, ທາດກົດຕານນິກຖ້າໄປປະສົມກັບໂປຼຕິນທີ່ຍັງບໍ່ທັນລະລາຍໃນກະເພາະກໍຈະກາຍເປັນຕະກອນທີ່ລະລາຍຍາກ, ກະທົບກະເທືອນການດູດຊຶມເອົາທາດໂປຼຕິນ. ໃບຊາຍັງກີດຂວາງການດູດຊຶມເອົາທາດເຫຼັກ, ຖ້າເປັນແນວນີ້ເລື້ອຍໆ, ກໍຈະພາໃຫ້ເລືອດຈາງຍ້ອນຂາດທາດເຫຼັກ.
3, ບາງຄົນມັກສູບຢາຫຼັງຈາກກິນເຂົ້າ. ສູບຢາຫຼັງຈາກກິນເຂົ້າ, ຜົນຮ້າຍຂອງມັນຍັງແຮງກວ່າສູບຍາມທຳມະດາ10ເທົ່າ! ນີ້ແມ່ນຍ້ອນວ່າເມື່ອກິນເຂົ້າແລ້ວເລືອດໃນຊ່ອງລະລາຍອາຫານໄຫຼໝູນວຽນຫຼາຍຂຶ້ນ, ຈິ່ງດູດຊຶມເອົາທາດມີພິດໃນຢາຢ່າງຫຼວງຫຼາຍ, ເປັນໂທດຕໍ່ຕັບ, ສະໝອງແລະເສັ້ນເລືອດຫົວໃຈ, ແລ້ວພາໃຫ້ເປັນພະຍາດໃນອະໄວຍະວະເຫຼົ່ານີ້.
4, ບາງຄົນກິນເຂົ້າແລ້ວກໍອາບນ້ຳໂລດ. ນີ້ກໍແມ່ນຄວາມຊິນເຄີຍທີ່ບໍ່ຖືກຕ້ອງ. ຖ້າກິນເຂົ້າແລ້ວກໍອາບນ້ຳໂລດ, ຈະເຮັດໃຫ້ເລືອດໄຫຼຢູ່ຕາມຊັ້ນຜິວໜັງຫຼາຍຂຶ້ນ, ພ້ອມນີ້, ກໍຈະພາເລືອດທີ່ໄຫຼຕາມກະເພາະລຳໄສ້ໜ້ອຍລົງ, ແລ້ວພາໃຫ້ລະບົບລະລາຍອາຫານອ່ອນລົງ, ອາຫານຈິ່ງບໍ່ຍ່ອຍ.
5, ໃນເວລາກິນເຂົ້າ, ບາງຄົນຍ້ອນກິນຫຼາຍໂພດຈົນຮູ້ສຶກຄັດທ້ອງ, ແລ້ວມັກຍະສາຍແອວອອກ. ເຮັດແນວນີ້ເຖິງວ່າຮູ້ສຶກທ້ອງສະບາຍແດ່, ແຕ່ອາດຈະເຮັດໃຫ້ຄວາມກົດດັນໃນໂຜ້ງທ້ອງເບົາລົງ, ແລ້ວພາໃຫ້ກະເພາະຢ່ອນ, ເປັນແນວນີ້ດົນແລ້ວກະເພາະກໍຈະຢ່ອນອີ່ຫຼີ.
6, ບາງຄົນກິນເຂົ້າແລ້ວມັກໄປຍ່າງຫຼິ້ນ. ຄົນຈີນມີຄຳພັງເພີຍວ່າ: ກິນເຂົ້າແລ້ວຍ່າງຮ້ອຍກ້າວ, ອາຍຸຈະຍືນຮອດ99ປີ. ແຕ່ວ່າມີຫຼັກອ້າງອີງທາງວິທະຍາສາດຢັ້ງຢືນວ່າ, ກິນເຂົ້າແລ້ວຍ່າງຮ້ອຍກ້າວ, ບໍ່ພຽງແຕ່ບໍ່ອາດມີອາຍຸຍື່ນຮອດ99ປີເທົ່ານັ້ນ, ຍັງຍ້ອນອອກກຳລັງກາຍບໍ່ເໝາະສົມກະທົບກະເທືອນຊ່ອງຍ່ອຍອາຫານດູດຊຶມເອົາທາດບຳລຸງ. ໂດຍສະເພາະແມ່ນຜູ້ເຖົ້າຜູ້ແກ່, ປະສິດທິພາບຂອງຫົວໃຈອ່ອນລົງ, ເສັ້ນເລືອດແຂງເຂົ້າ, ຖ້າກິນເຂົ້າແລ້ວຍ່າງຫຼິ້ນສ່ວນຫຼາຍຈະມີປະກົດການທີ່ຄວາມດັນເລືອດຕ່ຳລົງ.
7, ການກິນເຂົ້າແລ້ວກໍ່ໄປຮ້ອງເພງຄາລາໂອເຄໂລດກໍບໍ່ດີ. ຄົນຈີນມີຄຳພັງເພີຍວ່າເປົ່າປີ່ຫຼັງກິນອີ່ມຮ້ອງເພງເມື່ອທ້ອງເປົ່າ. ຄຳເວົ້າຄຳນີ້ແມ່ນຖືກຕ້ອງ, ເພາະເມື່ອກິນອີ່ມແລ້ວກະເພາະຈະຕື່ນຂຶ້ນ, ຝາກະເພາະຈິ່ງບາງ, ເລືອດໄຫຼວຽນເພີ່ມຂຶ້ນ. ຖ້າຮ້ອງເພງໃນຂະນະນີ້ຈະເຮັດໃຫ້ຝາພື້ນເອິກຕ່ຳລົງ, ຄວາມກົດດັນໃນໂຜ້ງທ້ອງແຮງຂຶ້ນ, ຖ້າອາການເບົາກະເພາະລະລາຍອາຫານບໍ່ດີ, ຖ້າເປັນໜັກກະເພາະລຳໄສ້ຈະຮູ້ສຶກບໍ່ສະບາຍຫຼືເປັນພະຍາດແນວອື່ນ.
8, ໂຊເຟີ້ລົດຖ້າກິນເຂົ້າແລ້ວກໍຂັບລົດທັນທີຈະມີຄວາມອັນຕະລາຍທີ່ຈະເກີດອຸບັດເຫດໄດ້ງ່າຍ. ນີ້ແມ່ນຍ້ອນວ່າກິນເຂົ້າແລ້ວເລືອດຈະສຸ້ມໄປໃສ່ກະເພາະລຳໄສ້ເພື່ອລະລາຍອາຫານ, ໃນຂະນະນີ້ສະໝອງຈະຂາດເລືອດຊົ່ວຄາວ, ພາໃຫ້ເຫງົານອນ, ຈິ່ງອັນຕະລາຍທີ່ສຸດ.
ຂ່າວສຸຂະພາບປະຈຳອາທິດ: ການຄົ້ນຄວ້າຂອງອາເມລິກາສະແດງໃຫ້ເຫັນວ່າການແຕ່ງງານປົວສຸຂະພາບທາງຈິດໃຈຂອງຄົນໃຫ້ດີຂຶ້ນໄດ້
ທ່ານຜູ້ຟັງ, ຜົນການຄົ້ນຄວ້າຫຼ້າສຸດຂອງອາເມລິກາສະແດງໃຫ້ເຫັນວ່າ, ເວົ້າສຳລັບຊາຍໂສດຫຼືຍິງໂສດທີ່ຮູ້ສຶກໝອງໃຈນັ້ນ, ການແຕ່ງງານອາດຈະປົວໃຫ້ຈິດໃຈຂອງເຂົາເຈົ້າມີສຸຂະພາບດີຂຶ້ນ.
ຫວ່າງມໍ່ໆນີ້ມີສື່ຂ່າວລາຍງານວ່າ, ການຄົ້ນຄວ້າລາຍໜຶ່ງຂອງຜູ້ຊ່ຽວຊານມະຫາວິທະຍາໄລລັດໂອໄຮໂອອາເມລິກາສະແດງໃຫ້ເຫັນວ່າ, ເວົ້າສຳລັບຜູ້ທີ່ມີຈິດໃຈເສົ້າໝອງນັ້ນແລ້ວ, ການແຕ່ງງານມີຜົນປິ່ນປົວຢ່າງເດັ່ນຊັດ, ຜົນການຄົ້ນຄວ້າດັ່ງກ່າວແມ່ນນັກຄົ້ນຄວ້າທັງຫຼາຍບໍ່ໄດ້ຄາດຄຶດມາກ່ອນ. ຜູ້ຊ່ຽວຊານຊີ້ອອກວ່າ, ແຕ່ເດີມພວກເພິ່ນນຶກວ່າ, ຜູ້ທີ່ມີຈິດໃຈເສົ້າໝອງຖ້າແຕ່ງງານໄປແລ້ວອາດຈະມີຜົນສະທ້ອນທາງລົບອັນໜັກໜ່ວງ, ແຕ່ຜົນສຸດທ້າຍພັດໄດ້ປະກົດເຫັນວ່າ, ການແຕ່ງງານສາມາດຊ່ອຍຜູ້ເປັນພະຍາດຜ່ອນຄາຍຈິດໃຈເສົ້າໝອງ.
ຜູ້ຊ່ຽວຊານທີ່ກ່ຽວຂ້ອງໄດ້ສຳຫຼວດປະຫວັດພະຍາດເສົ້າໝອງຂອງ3066ຄົນ, ອາການຂອງພວກເຂົາເຈົ້າລວມມີການນອນບໍ່ຫຼັບແລະຫງ່ວມເຫງົາ, ຜູ້ຊ່ຽວຊານຍັງໄດ້ປຽບທຽບຈິດໃຈອາລົມຂອງພວກເຂົາເຈົ້າກ່ອນແລະຫຼັງແຕ່ງງານ. ຜູ້ຊ່ຽວຊານສັງເກດເຫັນວ່າ, ການແຕ່ງງານສາມາດຊ່ອຍແກ້ອາການອຸກອັ່ງໝອງໃຈຂອງເຂົາເຈົ້າໄດ້, ອັດຕາເກີດມີອາການພະຍາດຂອງຜູ້ປ່ວຍໄດ້ໜ້ອຍລົງກວ່າກ່ອນແຕ່ງງານ.
ຜູ້ຊ່ຽວຊານກ່າວວ່າ, ຜູ້ທີ່ມີຈິດໃຈເສົ້າໝອງອາດຈະຕ້ອງການຄວາມສະໜິດສະສະໝົມແລະເອົາອົກເອົາໃຈຈາກຄົນອື່ນເປັນພິເສດ, ພໍດີແມ່ນການແຕ່ງງານນີ້ເອງຈະໃຫ້ຄວາມສະໜິດສະໜົມແກ່ເຂົາເຈົ້າໄດ້.
|
