|
ທ່ານຜູ່ຟັງທີ່ໂຄລົບ, ຈີນມີພົນລະເມືອງ 1 ຕື້ 300 ລ້ານຄົນ, ໃນນັ້ນ, ມີ 800 ລ້ານກວ່າຄົນຢູ່ເຂດຊົນນະບົດ, ສະນັ້ນ, ລັດຖະບານຈີນໄດ້ຖືກະສິກຳແລະຍົກສູງລະດັບຊີວິດການເປັນຢູ່ຂອງຊາວນາເປັນວຽກງານຈຸດໜັກຂອງ ໂດຍຕະຫຼອດ. ໃນຫຼາຍປີຜ່ານມາ, ຄຽງຄູ່ກັບຂໍ້ມູນຂ່າວສານຂອງຈີນໄດ້ມີການພັດທະນາຢ່າງບໍ່ຢຸດຢັ້ງ, ກໍ່ໄດ້ສົ່ງຜົນສະທ້ອນຕໍ່ການພັດທະນາຂອງຊົນນະບົດເທື່ອລະກ້າວ, ໃນລາຍການແຈ້ງຂ່າວເສດຖະກິດຈີນພາກນີ້, ພວກເຮົາຈະສະເໜີສະພາບການທີ່ກ່ຽວຂ້ອງສູ່ທ່ານຟັງ.
ທ້າຍປີກາຍນີ້, ນະຄອນປັກກິ່ງໄດ້ເລີ່ມສ້າງໂຄງການຂໍ້ມູນຂ່າວສານເວບໄຊອ້າຍໂນງຊີ້ນຊີອີ້ຈ້ານເພື່ອຍົກສູງລະດັບຂໍ້ມູນຂ່າວສານຂອງຊົນນະບົດຊານເມືອງ. ຕາມໂຄງການດັ່ງກ່າວນີ້ຈະສ້າງສະຖານນີຫຼືຈຸດບໍລິການຂໍ້ມູນຂ່າວສານປະມານ 300 ແຫ່ງຢູ່ຕາແສງຊານເມືອງປັກກິ່ງ, ສະໜອງຂໍ້ມູນຂ່າວສານເວບໄຊໃຫ້ແກ່ຊາວນາ. ການສ້າງສຳເລັດແລະເລີ່ມໃຊ້ເວບໄຊ ອ້າຍໂນງຊີ້ນຊີອີ້ຈັ້ນນັ້ນຈະນຳຄວາມສະດວກຢ່າງຫຼວງຫຼາຍໃຫ້ແກ່ຊີວິດການເປັນຢູ່ຂອງຊາວນາປັກກິ່ງ. ນາງລີວກຸ້ຍຢີງ ຊາວນາບ້ານຊຽງເຈີ້ນເມືອງພີງກູປັກກິ່ງບອກນັກຂ່າວວ່າ, ປັດຈຸບັນ, ຊາວນາທະແນມແຕ່ເຄາະເມົ້າສ໌ຢູ່ຄອມພິວເຕີຄ່ອຍໆກໍຈະໄດ້ຮັບຂໍ້ມູນຂ່າວສານຕ່າງໆທີ່ມີຜົນດີຕໍ່ການຜະລິດແລະການທຸລະກິດຈາກອິນເຕີເນັດ: "ສຳລັບການຜະລິດ, ຕົວຢ່າງ, ຊາວນາຂາຍໝາກຄາຍ, ເມື່ອມີຂ່າວໃນດ້ານນີ້ແລ້ວກໍອາດຈະນຳປະສິດທິຜົນທາງເສດຖະກິດມາໃຫ້. ເວບໄຊຊີ້ນຊີອີ້ຈ້ານນີ້ຈະລາຍງານລາຄາຕະຫຼາດໃຫ້ຊາວນາຮູ້ໂດຍຜ່ານອິນເຕີເນັດ, ຊາວນາຮູ້ແລ້ວຈະຕົກລົງລາຄາ. ອາດຈະແພງກວ່າທີ່ຄິດໄວ້ໃນຕອນທຳອິດ. ຖ້າຊາວນາຜູ້ໃດຢາກຊື້ອຸປະກອນປຸງແຕ່ງ, ກໍ່ໃຫ້ເຂົ້າອິນເຕີເນັດໂລດເພາະມີຂ່າວໃນດ້ານນີ້ແນ່ນອນ."
ນາງລີວກຸ້ຍຢີງຍັງບອກນັກຂ່າວວ່າ, ເວບໄຊຊີ້ນຊີອີ້ຈ້ານຍັງໄດ້ຈັດຊຸດອົບຮົມວິຊາຕ່າງໆເປັນປະຈຳ, ປະກອບຊອຟແວການສອນວິຊາຈຳນວນໜຶ່ງໃສ່ຄອມພິວເຕີເພື່ອໃຫ້ຊາວນາຮຽນ, ນີ້ໄດ້ເສີມຂະຫຍາຍບົດບາດຊຸກຍູ້ການພັດທະນາຂອງທ້ອງຖິ່ນນັ້ນ.
ບໍລິສັດເຮີງຊີ້ນທ່ອງປັກກິ່ງບໍລິການໂທລະຄົມຈຳກັດແມ່ນວິສາຫະກິດຮັບເໝົາສ້າງເວບໄຊອ້າຍໂນງຊີ້ນຊີອີ້ຈ້ານຢູ່ເຂດຊານເມືອງປັກກິ່ງ, ປັດຈຸບັນນີ້, ພວກເຂົາເຈົ້າໄດ້ສ້າງສະຖານນີຢູ່ 36 ບ້ານເຂດຊານເມືອງປັກກິ່ງ, ຊາວນາຈະຊອກຫາແລະຊົມໃຊ້ຂໍ້ມູນຂ່າວສານຈາກອິນເຕີເນັດຢູ່ສະຖານນີໂດຍບໍ່ຕ້ອງເສຍຄ່າດ້ວຍການຊ່ວຍເຫຼືອຂອງພະນັກງານ. ທ່ານຟູ້ປີນ ຜູ້ຊ່ອຍການຜູ້ອຳນວຍການໃຫຍ່ຂອງບໍລິສັດດັ່ງກ່າວເວົ້າຕໍ່ນັກຂ່າວວ່າ, ໂດຍຜ່ານການໃຊ້ເວບໄຊຊີ້ນຊີອີ້ຈ້ານ, ກໍໄດ້ຕັດຂອດກາງໃນການຂາຍຜະລິດຕະພັນກະສິກຳ, ນີ້ຈະເພີ່ມລາຍໄດ້ຂອງຊາວນາຂຶ້ນໃນລະດັບໃດໜຶ່ງ.
ທ່ານເວົ້າວ່າ, " ພວກຂ້າພະເຈົ້າຊ່ວຍຊາວນາຂາຍສິນຄ້າ, ສະໜອງຂໍ້ມູນຂ່າວສານແລະຕະຫຼາດໃຫ້ເຂົາເຈົ້າ. ຂ້າພະເຈົ້າຢາກສະໜອງລະບົບເວບໄຊທີ່ຂາຍໂດຍກົງ, ໃຫ້ເຂົາເຈົ້າແລະເອົາຂໍ້ມູນນີ້ມາຈັດຕັ້ງການຂາຍ."
ຍ້ອນປັກກິ່ງເປັນຕະຫຼາດໃຫຍ່, ສະນັ້ນ, ວິສາຫະກິດຊົນນະບົດຢ່າງຊານເມືອງປັກກິ່ງຈິ່ງໄດ້ມີເງື່ອນໄຂພັດທະນາເປັນຢ່າງດີ. ໃນຫຼາຍປີຜ່ານມານີ້, ໃນເວລາເປີດກວ້າງຂອບເຂດການທຸລະກິດນັ້ນ, ເຂົາເຈົ້ານັບມື້ນັບສົນໃຈນຳຜົນສະທ້ອນຂອງຍີ່ຫໍ້. ໂດຍແນ່ໃສຈິດຕະສາດດັ່ງກ່າວຂອງວິສາຫະກິດຊົນນະບົດ, ບໍລິສັດຈຳນວນໜຶ່ງໄດ້ຄົ້ນຄວ້າລະບົບຈຳແນກຍີ່ຫໍ້ຂອງຜະລິດຕະພັນ. ໂດຍຜ່ານລະບົບດັ່ງກ່າວນີ້, ຜູ້ບໍລິໂພກແລະຜູ້ກວດກາຄຸນນະພາບສາມາດຊອກຮູ້ວິສາຫະກິດຜະລິດຢ່າງງ່າຍໆ, ທັງນີ້ບໍ່ພຽງແຕ່ຈະເຮັດໃຫ້ຜູ້ບໍລິໂພກຊື້ສິນຄ້າຢ່າງໄວ້ວາງໃຈທໍ່ນັ້ນ, ຍັງມີຜົນດີຕໍ່ການປ້ອງກັນຊື່ສຽງ ຍີ່ຫໍ້ຂອງວິສາຫະກິດດີອີກດ້ວຍ. ທ່ານນາງເວີ້ຍເຫວີຍ ຜູ້ອຳນວຍການບໍລິສັດເຕັກນິກໂຈງຊືປັກກິ່ງຈຳກັດໄດ້ສະເໜີລະບົບຊອກຮູ້ຂໍ້ມູນຂ່າວສານກ່ຽວກັບອາຫານຊຸດໜຶ່ງຂອງບໍລິສັດເຂົາເຈົ້າ.
ນາງເວົ້າວ່າ, " ເຊັ່ນ, ໝູ, ໃນເວລາໝູເກີດອອກມາແລ້ວກໍປະທັບກາຢູ່ຫູຂອງມັນ, ຈັ່ງຊັ້ນ, ຕະຫຼາດຂະບວນການເຕີບໃຫຍ່ ຄື, ສະພາບການເຕີບໃຫຍ່ ເຈັບປ່ວຍແລະຖືກຂ້າຈົນປຸງແຕ່ງເປັນສິນຄ້າສຳເລັດຮູບໃນໂຮງງານລ້ວນແຕ່ຈະບັນທຶກຢູ່ໃນລະບົບຄອມພິວເຕີ, ຊອກຮູ້ສະພາບຍ້ອນຫຼັງຂອງມັນໃນລະບົບນີ້, ຂອດໃດມີບັນຫາແລ້ວກໍຈະຊອກຮູ້ໃນລະບົບນີ້ໄດ້."
ນອກຈາກສະໜອງຂໍ້ມູນຂ່າວສານຄວາມຕ້ອງການຜະລິດຕະພັນທີ່ຊາວນາຕ້ອງການນັ້ນແລ້ວ, ວິສາຫະກິດເຕັກໂນໂລຢີຈຳນວນໜຶ່ງຍັງເປີດກວ້າງຂໍ້ມູນຂ່າວສານຂອງຜະລິດຕະພັນທີ່ມູນຄ່າເພີ່ມຫຼາຍ. ບໍລິສັດເຮີງຊີ້ນທ່ອງຍັງຮ່ວມມືກັບບໍລິສັດຊົນນະບົດປັກກິ່ງໃນດ້ານການທ່ອງທ່ຽວຮີດຄອງປະເພນີ, ພວກເຂົາເຈົ້າສະໜອງຂໍ້ມູນຂ່າວສານຕ່າງໆ, ໂດຍຜ່ານອີນເທີເນັດແລະຂໍ້ຄວາມສັ້ນໂທລະສັບມືຖືເປັນຕົ້ນໃຫ້ແກ່ຊາວເມືອງປັກກິ່ງ.
ທ່ານຫວ່າງເຟີງລຸຍ ຜູ້ອຳນວຍການພະແນກການທຸລະການຂອງບໍລິສັດດັ່ງກ່າວເວົ້າວ່າ, " ພວກຂ້າພະເຈົ້າສະໜອງຂໍ້ມູນຂ່າວສານທ່ອງທ່ຽວຢູ່ຊົນນະບົດໃຫ້ຄົນໃນເມືອງ, ຄົນໃນເມືອງໄປບໍລິໂພກຢູ່ທ້ອງຖິ່ນນັ້ນ, ເມື່ອເປັນແນວນີ້, ໃຫ້ຊາວນາມີແຫຼ່ງຜູ້ທ່ອງທ່ຽວ, ລາຍໄດ້ຂອງຊາວນາກໍເພີ່ມແລ້ວ."
ຕາມໄດ້ຊາບ, ໃຕ້ການສະໜັບສະໜູນຂອງເຕັກນິກຂໍ້ມູນຂ່າວສານ, ການທ່ອງທ່ຽວຮີດຄອງປະເພນີປັກກິ່ງໄດ້ຮັບການພັດທະນາຢ່າງວ່ອງໄວ. ຕົ້ນປີນີ້, ຊາວນາໄດ້ໂຄສະນາແຫຼ່ງທ່ອງທ່ຽວຮີດຄອງປະເພນີສອງແຫຼ່ງຢູ່ເມືອງຟິງກູປັກກິ່ງຢູ່ໃນອິນເຕີເນັດ, ໃນໄລຍະພັກວັນກຳມະກອນສາກົນ 1 ພຶດສະພາລວມ 7 ມື້, ເຂົາເຈົ້າໄດ້ຕ້ອນຮັບນັກທ່ອງທ່ຽວເກືອບ 9 ພັນເທື່ອຄົນ, ລາຍໄດ້ຫຼາຍກວ່າ 2 ແສນ 4 ໝື່ນຢວນ.
ໃນຂະບວນການຫັນເປັນຂໍ້ມູນຂ່າວສານຫຼືໄອທີຢູ່ຊົນນະບົດຈີນ, ການອົບຮົມຊາວນາແມ່ນວຽກສຳຄັນອັນໜຶ່ງ, ເປົ້າໝາຍແມ່ນເຮັດໃຫ້ຊາວນາກຳເຕັກນິກຂໍ້ມູນຂ່າວສານ, ປັບປຸງການຜະລິດແລະການທຸລະກິດໃຫ້ດີຂຶ້ນ. ທ່ານຢາງປາວຈູ້ ຜູ້ຊ່ຽວຊານສູນຄົ້ນຄວ້າເຕັກນິກກິດຈະການຂໍ້ມູນຂ່າວສານກະສິກຳແຫ່ງ ຊາດຈີນເວົ້າວ່າ, ປັດຈຸບັນ, ລະດັບຄວາມຮູ້ຂອງຊາວນາຊົນນະບົດບໍ່ສູງປານໃດ, ຂະບວນການຂໍ້ມູນຂ່າວສານຕ້ອງຮ່ວມຊຸກຍູ້ໂດຍຜ່ານຊ່ອງທາງຕ່າງໆ.
ທ່ານເວົ້າວ່າ, " ແຕ່ການຜະລິດກະສິກຳເລື່ອນຂັ້ນເປັນວິສາຫະກິດກະສິກຳ, ສະໜອງຂໍ້ມູນຂ່າວສານຕ່າງກັນໂດຍຜ່ານຊ່ອງທາງຕ່າງກັນ, ຕົວຢ່າງຄື, ເຄືອຄ່າຍຄອມພິວເຕີ ເຄືອຄ່າຍໂທລະສັບ ເຄືອຄ່າຍໂທມະຄົມແລະອື່ນໆ, ເພື່ອບໍລິການລູກຄ້າຕ່າງກັນ, ເມື່ອເປັນແນວນີ້,ໄດ້ສະໜັບສະໜູນການສ້າງສາຊົນນະບົດໃໝ່ຢ່າງຮອບດ້ານ."
ທ່ານຢາງປາວຈູ້ເວົ້າວ່າ, ໃນ 5 ປີຂ້າງໜ້າ, ຈີນຈະລົງທຶນຫຼາຍຕື້ຢວນຢູ່ຊົນນະບົດ, ເພື່ອສ້າງໂຄງລ່າງພື້ນຖານຂໍ້ມູນຂ່າວສານແລະອົບຮົມນັກວິຊາການ. ທ່ານເຜີຍໃຫ້ຮູ້ວ່າ, ໃນອະນາຄົດ, ຊົນນະບົດຈີນຈະທົດລອງເປັນເທື່ອລະກ້າວ, ໃຊ້ເຕັກນິກຂໍ້ມູນຂ່າວສານມາຊຸກຍູ້ການພັດທະນາກະສິກຳ ຍົກລະດັບວິທະຍາສາດເຕັກນິກຢູ່ຊົນນະບົດຈົນກະທັ້ງດຳເນີນການປົກຄອງຢ່າງປະຊາທິປະໄຕຢູ່ຊົນນະບົດ.
|
