|
|
 |
| (GMT+08:00)
2006-09-20 18:29:25
|
 |
|
ເຈົ້າຂອງລິຂະສິດການປະພັນໃນວົງການຕ່າງໆຂອງຈີນອອກສຽງສະຫນັບສະຫນູນກິດຈະກຳຕໍ່ຕ້ານການລັກລອກແບບ
cri
ຫວ່າງມໍ່ໆນີ້ ເຈົ້າຂອງລິຂະສິດການປະພັນໃນວົງການຕ່າງໆຂອງຈີນໄດ້ລົງລາຍເຊັນຮ່ວມກັນຢູ່ປັກກິ່ງ, ອອກສຽງສະຫນັບສະຫນູນລັດ ຖະບານຈີນທີ່ຈັດໃຫ້ມີກິດຈະກຳຕ້ານການລັກລອກແບບເປັນເວລາຮ້ອຍມື້ຢ່າງຂະຫນາດໃຫຍ່ຢູ່ໃນຂອບເຂດທົ່ວປະເທດ.
ກິດຈະກຳຕ້ານການລັກລອກແບບທີ່ພວມດຳເນີນຢູ່ໃນທົ່ວປະເທດຈີນແມ່ນກົມພິມຈຳຫນ່າຍແລະຖະແຫລງຂ່າວຈີນ ກົມລິຂະສິດແຫ່ງຊາດຈີນ ກະຊວງປ້ອງກັນຄວາມສະຫງົບ ກົມອຸດສາຫະກຳການຄ້າແຫ່ງຊາດຈີນແລະພາກ ສ່ວນອື່ນໆຮ່ວມກັນຈັດຂຶ້ນແຕ່ວັນທີ 15 ກໍລະກົດຫາວັນທີ 25 ຕຸລາປີນີ້, ຈຸດປະສົງຕົນຕໍແມ່ນເພື່ອຕໍ່ຕ້ານເຄື່ອງສຽງແລະຊອຟແວຄອມພິວເຕີທີ່ລັກລອກແບບ.ລັດຖະບານຈີນເຮັດວຽກຕໍ່ຕ້ານເຄື່ອງລັກລອກແບບມາຫລາຍປີແລ້ວ, ແຕ່ລະປີກໍ່ໄດ້ຈັດກິດຈະກຳຕໍ່ຕ້ານຢ່າງຂະຫນາດໃຫຍ່,ກິດຈະກຳເທື່ອນີ້ແມ່ນມີຂະຫນາດໃຫຍ່ແລະແຮງກວ່າຫມູ່.
ວັນທີ 16 ສິງຫາ, ເຈົ້າຂອງລິຂະສິດການປະພັນ ອົງການຈັດຕັ້ງຂອງເຈົາຂອງລິຂະສິດສະມາຄົມຂະແຫນງການແລະຜູ່ຕາງຫນ້າວິສາຫະກິດທີ່ກ່ຽວຂ້ອງໄດ້ຈັດກິດຈະກຳລົງລາຍເຊັນຢູ່ປັກກິ່ງ, ຮຽກຮ້ອງໃຫ້ວົງການຕ່າງໆແລະມວນຊົນປົກປ້ອງສິດຊັບສິນປັນຍາ,ຕໍ່ຕ້ານການກະທຳລ່ວງລ້ຳສິດແລະລັກລອກແບບຢ່າງເດັດດ່ຽວ.ໃນກິດຈະກຳລົງລາຍເຊັນ, ນາງຈ່ຽງຫລິງ ຜູ່ອຳນວຍການໃຫຍ່ບໍລິສັດດົນຕີເຈິ້ງຕ້າສາກົນໄດ້ແນະນຳປະສົບການຂອງຂະແຫນງການເຮັດແຜ່ນ CD ໃນການຕ້ານການລັກລອກແບບໃນຫລາຍປີມານນີ້,ນາງເວົ້າວ່າ:
ຂ້າພະເຈົ້າຍັງຈື່ໄດ້ວ່າ,ເມື່ອຫລາຍປີກ່ອນ, ບໍລິສັດແຜ່ນ CD ນ້ອຍ 12 ແຫ່ງໄດ້ຮ່ວມກັນຈັດກິດຈະກຳຕ້ານການລັກລອກແບບ,ເພື່ອປົກປ້ອງສິດຢູ່ສະຫນາມກິລາ.ມື້ນີ້, ລັດຖະບານໄດ້ຢືນຢູ່ແຖວຫນ້າ,ນຳພາພວກຂ້າພະເຈົ້າມາປົກປ້ອງສິດຊັບສິນທາງປັນຍາ, ແລະສົ່ງເສີມການປະດິດສ້າງໃຫມ່,ເພື່ອສະກັດກັ້ນການກະທຳຜິດກົດຫມາຍທີ່ລ່ວງລ້ຳສິດແລະລັກລອກແບບ, ພວກຂ້າພະເຈົ້າກໍ່ຮູ້ສຶກວ່າມີກຳລັງໃຈຫລາຍ.ເພາະວ່າພວກຂ້າພະເຈົ້າແມ່ນຕົວແທນໃນວົງການນີ້, ເຮັດວຽກຢູ່ແນວຫນ້າຂອງຂະແຫນງການນີ້, ພວກຂ້າພະເຈົ້າຮູ້ດີວ່າກໍລະນີໃດໄດ້ລ່ວງລ້ຳສິດຂອງພວກຂ້າພະເຈົ້າແທ້.ພວກຂ້າພະເຈົ້າຍັງສັງເກດເຫັນທ່າອ່ຽງຂອງການຂະຫຍາຍຕົວໃຫມ່ຂອງການລ່ວງລ້ຳສິດດ້ານຕ່າງໆແລະມີຄວາມຍິນດີທີ່ຈະທຳການສຳຫລວດກວດກາ,ແລະປະກອບເປັນຫມູ່ຄະນະເພື່ອຮ່ວມກັນສ້າງກິດຈະກຳໃຫຍ່ອັນນີ້.
ນາງຊີຄຸນ ນັກປະພັນທີ່ມີຊື່ສຽງກໍ່ຢູ່ໃນຖັນແຖວຜູ່ລົງລາຍເຊັນ.ນາງຊີຄຸນແມ່ນນັກປະພັນເພດຍິງທີ່ມີຊື່ສຽງໃນເວທີວັນນະຄະດີຈີນ,ນາງໄດ້ຂຽນນະວະນິຍາຍຫລາຍເລື່ອງແລະໄດ້ພິມຈຳຫນ່າຍແລ້ວ, ບົດປະພັນຈຳນວນຫນຶ່ງຂອງນາງຖືກແປເປັນພາສາຍີ່ປຸ່ນ ພາສາອັງກິດແລະພາສາເຢຍລະມັນ.ໃນເວລາໃຫ້ສຳພາດຕໍ່ນັກຂ່າວ, ນາງຊີຄຸນໄດ້ກ່າວເຖິງຄວາມຮູ້ສຶກທີ່ຕົນເອງປະເຊີນຫນ້າກັບການກະທຳທີ່ລັກລອກແບບ.ນາງເວົ້າວ່າ:
ພວກຂ້າພະເຈົ້າມັກປະສົບກັບການລັກລອກແບບເລື້ອຍໆ,ເວົ້າສຳລັບຕົວເອງແລ້ວ, ກໍ່ຮູ້ສຶກວ່າຈົນປັນຍາຫລາຍ. ເທື່ອນີ້ ຜ່ານການຈັດກິດຈະ ກຳດ້ວຍລັດຖະບານຢ່າງມີການຈັດຕັ້ງ, ແມ່ນມີຜົນດີຫລາຍຕໍ່ພວກຂ້າພະເຈົ້າ.ພວກຂ້າພະເຈົ້າສະຫນັບສະຫນູນທີ່ສຸດ.ຫວັງວ່າລັດຖະບານຈະເພີ່ມທະວີການຕໍ່ຕ້ານເພື່ອປົກປ້ອງສິດຊັບສິນທາງປັນຍາຢ່າງແທ້ຈິງ,ກໍ່ຈະເຮັດໃຫ້ຄວາມຫ້າວຫັນໃນການປະດິດຄິດສ້າງຂອງພວກຂ້າພະເຈົ້າໄດ້ຮັບການຍົກສູງຂຶ້ນ.
ກິດຈະກຳຕ້ານການລັກລອກແບບທີ່ໃຊ້ເວລາຮ້ອຍມື້ແມ່ນເຄື່ອງມີຂອງລັດຖະບານຈີນເພື່ອຕໍ່ຕ້ານການກະທຳລ່ວງລ້ຳສິດບົນພື້ນຖານການປັບປຸງ ຢ່າງສືບເນື່ອງເປັນເວລາຫລາຍປີ.ຕາມການສຳຫລວດຂອງຫລາຍຕົວເມືອງໃຫຍ່ຂອງຈີນຄື ນະຄອນປັກກິ່ງ ນະຄອນນານກິ່ງແລະນະຄອນກວາງໂຈວເປັນຕົ້ນ, ເດືອນກໍລະກົດປີນີ້, ປະລິມານຈຳຫນ່າຍເຄື່ອງພາບແລະສຽງທີ່ມີລິຂະສິດນັ້ນໄດ້ເພີ່ມຂຶ້ນຫລາຍກວ່າໄລຍະດຽວກັນຂອງປີກາຍ 10%.ໃນໄລຍະນີ້, ແຫ່ງຕ່າງໆທົ່ວປະເທດຈີນໄດ້ຍຶດເອົາເຄື່ອງທີ່ລ່ວງລ້ຳສິດນັ້ນ 8 ລ້ານກວ່າເຄື່ອງ,ພ້ອມກັນນັ້ນ, ແຫ່ງຕ່າງໆຍັງໄດ້ສືບສວນຄະດີໃຫຍ່ 200 ກວ່າລາຍ,ໄດ້ຕໍ່ຕ້ານການກະທຳລັກລອກແບບຢ່າງແຂງແຮງ.
ກຸ່ມເລໂນໂວ(Le Novel) ແມ່ນວິສາຫະກິດ IT ທີ່ມີຊື່ສຽງຂອງຈີນ.ໃນກິດຈະກຳລົງລາຍເຊັນອອກສຽງສະຫນັບສະຫນູນການຕ້ານການລັກລອກແບບຮ້ອຍມື້,ນາງປາຍຮຸ້ຍມິນ ຮອງປະທານກຸ່ມເລໂນໂວເວົ້າວ່າ, ວິສາຫະກິດທີ່ກ່ຽວຂ້ອງມີຫນ້າທີ່ເພີ່ມທະວີວຽກງານຕ້ານການລັກລອກແບບໃນຂົງເຂດຊອຟແວຄອມພິເຕີ.ນາງເວົ້າວ່າ:
ແຕ່ເດືອນມັງກອນຫາເດືອນມິຖຸນາປີນີ້,ພວກຂ້າພະເຈົ້າໄດ້ຈຳຫນ່າຍລະບົບການເຮັດວຽກຂອງໄມໂຄຼຊອຟ 2 ລ້ານກວ່າຊຸດແລ້ວ,ມັນເພີ່ມຂຶ້ນຫລາຍສິບກວ່າເທົ່າຂອງແຕ່ກ່ອນ.ພ້ອມກັນນັ້ນ, ພວກຂ້າພະເຈົ້າກໍ່ດີໃຈຫລາຍທີ່ໄດ້ເຫັນມີໂຮງງານຜະລິດຄອມພິວເຕີນັບມື້ນັບຫລາຍພວມໃຊ້ການກະທຳຢ່າງຕັ້ງຫນ້າ,ອັດຕາຕິດຕັ້ງລະບົບເຮັດວຽກທີ່ໃຊ້ຂອງແທ້ຂອງຄອມພິວເຕີຫຍີ່ຫໍ້ຕົ້ນຕໍໃນຕະຫລາດຈີນກໍ່ສູງຂຶ້ນຢ່າງຫລວງ.ຫລາຍວິສາຫະກິດພວກຂ້າພະເຈົ້າຍ່ອມຈະຕັ້ງຫນ້າຕອບສະຫນອງຄວາມຮຽກຮ້ອງຂອງລັດ ຖະບານ, ປະຕິບັດຕາມນະໂຍບາຍແລະກົດຂໍ້ກຳນົດຢ່າງເປັນເຈົ້າການ, ພ້ອມກັບພາກສ່ວນລັດຖະບານເພື່ອສ້າງບັນຍາກາດທາງສັງຄົມອັນດີງາມທີ່ຕິດຕັ້ງຊອຟແວຂອງແທ້,ຂາຍຂອງແທ້ແລະໃຊ້ຂອງແທ້,ທຳຄວາມພະຍາ ຍາມຢ່າງບໍ່ລົດລະ.
ໃນກິດຈະກຳລົງລາຍເຊັນ,ເຈົ້າຂອງລິຂະສິດການພັນແລະຜູ່ຕາງຫນ້າວິສາຫະກິດຕ່າງໆກ່າວວ່າ, ຢາກຈະສ້າງສະພາບແວດລ້ອມປົກປ້ອງລິຂະສິດທີ່ດີງາມແລະປອດໃສ,ຍັງຈະຕ້ອງທຳຄວາມພະຍາຍາມຢ່າງຫລວງ ຫລາຍ.ນາງໂກຈ້ຽນເຟີນ ນັກແຕ່ງນົດເພງທີ່ມີຊື່ສຽງແມ່ນຜູ່ປົກປ້ອງສິດທີ່ມີຊື່ສຽງຂອງຈີນ.ນາງເຄີຍປະກອບຄຳຄິດຄຳເຫັນດ້ານປົກປ້ອງລິຂະສິດຫລາຍເທື່ອຕໍ່ພາກສ່ວນລັດຖະບານ.ນາງເວົ້າວ່າ:
ເວົ້າສຳລັບກິດຈະກຳຕ້ານການລັກລອກແບບຮ້ອຍມື້ແລ້ວ,ຂ້າພະເຈົ້າໄດ້ເຂົ້າຮ່ວມຫລາຍເທື່ອແລ້ວ,ການເວົ້າວ່າຜົນງານທີ່ໄດ້ຮັບໃນການປົກປ້ອງລິຂະສິດໄດ້ກ້າວຫນ້າຫລາຍນັ້ນຍັງໄວໂພດ. ກິດຈະກຳນີ້ຈະຕ້ອງດຳເນີນຕໍ່ໄປ,ຮຽກຮ້ອງໃຫ້ຄົນເຂົ້າຮ່ວມຫລາຍກວ່າເກົ່າ,ແລ້ວຈັດກິດຈະກຳນີ້ຕໍ່ໄປ,ບໍ່ພຽງແຕ່ຮ້ອຍມື້,ແຕ່ຈະເນພັນມື້,ຫມື່ນມື້,ຂ້າພະເຈົ້າຫວັງວ່າຈະໄດ້ເຮັດທຸກປີ, ມີແຕ່ເຮັດແນວນີ້, ມວນຊົນຈິ່ງຈະມີສະຕິບໍ່ໃຊ້ຂອງປອມ.
ທ່ານຫລົງຊິນມິນ ຫົວຫນ້າກົມພິມຈຳຫນ່າຍແລະຖະແຫລງຂ່າວຂອງຈີນ ຫົວຫນ້າກົມລິຂະສິດແຫ່ງຊາດຈີນເຫັນວ່າ, ການເຮັດວຽກງານປົກປ້ອງລິຂະສິດໃຫ້ດີ,ຍັງຕ້ອງການຝ່າຍຕ່າງໆເຊິ່ງລວມທັງເຈົ້າຂອງລິຂະສິດການປະພັນພະຍະຍາມຊ່ອຍກັນ.ທ່ານເວົ້າວ່າ:
ຍ້ອນວ່າປະຫວັດສາດທີ່ຈີນສ້າງຕັ້ງລະບົບປົກປ້ອງລິຂະສິດຍັງ ໃຫມ່ຢູ່,ສະຕິຂອງມວນຊົນດ້ານກົດຫມາຍລິຂະສິດນັ້ນຍັງບອບບາງຫລາຍ, ບວກກັບການລັກລອກແບບມີກຳໄລສູງ,ສະນັ້ນ,ຢູ່ບາງແຫ່ງຍັງມີສະພາບການລ່ວງລ້ຳສິດແລະລັກລອກແບບຢ່າງຫນັກຫນ່ວງ.ໃຕ້ເງື່ອນໄຂທີ່ລະ ບອບກົດຫມາຍວ່າດ້ວຍລິຂະສິດການປະພັນຂອງປະເທດພວກຂ້າພະເຈົ້າໄດ້ຮັບການປັບປຸງໃຫ້ສົມບູນຂຶ້ນ, ການສົ່ງເສີມບົດບາດອັນຕັ້ງຫນ້າຂອງເຈົ້າຂອງລິຂະສິດການປະພັນແລະອົງການຈັດຕັ້ງຂອງເຈົ້າຂອງລິຂະສິດຢ່າງເຕັມສ່ວນ, ດຳເນີນກິດຈະກຳຕ້ານການລັກລອກແບບແລະປົກປັກຮັກສາສິດທິປະເພດຕ່າງໆ, ສົ່ງເສີມສ້າງກົນໄກປົກປ້ອງຕະຫລາດລິຂະສິດຂອງບົດປະພັນຊະນິດຕ່າງໆນັ້ນ,ຈະມີຄວາມຫມາຍສຳຄັນທີ່ສຸດຕໍ່ການປົກປ້ອງການປະດິດສ້າງ,ສົ່ງເສີມການແຜ່ຂະຫຍາຍແລະປົກປ້ອງສິດຊັບສິນທາງປັນຍາ.
|
|
|
