|
ສະບາຍດີທ່ານຜູ່ຟັງທີ່ໂຄລົບ, ນະຄອນຫຼວງປັກກິ່ງຈະຈັດງານກິລາໂອລິມປິກປີ 2008, ໃນຖານເປັນເຈົ້າພາບ, ວົງການກິລາຈີນສຸດທີ່ເອົາໃຈໃສ່ນຳວຽກງານຕ້ານຢາກະຕຸ້ນປະສາດຢູ່ພາຍໃນປະເທດ. ການທີ່ພະຍາຍາມເຮັດໃຫ້ນັກກິລາຈີນບໍ່ເກີດຄະດີໃຊ້ຢາກະຕຸ້ນປະສາດຈັກຄົນໃນງານກິລາໂອລິມປິກປັກກິ່ງນັ້ນ, ແມ່ນເປົ້າໝາຍຂອງວົງການກິລາຈີນ. ໃນຫຼາຍປີມານີ້, ວຽກງານຕ້ານຢາກະຕຸ້ນປະສາດຂອງຈີນກໍ່ມີຄວາມຄືບໜ້າຫຼາຍຢ່າງແທ້ຈິງ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ຈີນມີຄວາມກ້າວໜ້າຫຼາຍໃນຂົງເຂດຕ້ານຢາກະຕຸ້ນປະສາດ.
ໃນກອງປະຊຸມຕ້ານຢາກະຕຸ້ນປະສາດລະຫວ່າງລັດຖະບານປະເທດພາກພື້ນອາຊີຄັ້ງທີສອງທີ່ຈັດຂຶ້ນຢູ່ທີ່ປັກກິ່ງໃນຫວ່າງມໍ່ໆນີ້, ທ່ານສືຄາງເສິງ ຮອງເລຂາທິການຄະນະກຳມະການໂອລິມປິກຈີນ ຫົວໜ້າຫ້ອງການຄະນະກຳມະການຕ້ານຢາກະຕຸ້ນປະສາດຂອງ ໂອລິມປິກຈີນໄດ້ໃຫ້ສຳພາດຕໍ່ນັກຂ່າວວ່າ, ໃນ 5 ປີມານີ້, ວຽກງານຕ້ານຢາກະຕຸ້ນປະສາດຂອງຈີນໄດ້ມີຄວາມກ້າວໜ້າຫຼາຍ, ໄດ້ສະແດງໃຫ້ເຫັນໃນຫຼາຍດ້ານ ເຊັ່ນ ໃນງານກິລາໂອລິມປິກຊິດນີແລະງານກິລາໂອລິມປິກອາແຕນ, ນັກກິລາຈີນບໍ່ມີຈັກຄົນໃຊ້ຢາກະຕຸ້ນປະສາດ; ຈຳນວນການກວດກາແລະຄຸນນະພາບກວດກາຢູ່ພາຍໃນປະເທດຈີນໄດ້ສູງຂຶ້ນເລື້ອຍໆ; ອັດຕາກວດພົບໝາຍບວກຕ່ຳລົງ; ເມື່ອເດືອນມັງກອນປີ 2004, ລັດຖະບານຈີນໄດ້ປະກາດໃຊ້ "ກົດຂໍ້ກຳນົດຕ້ານຢາກະຕຸ້ນປະສາດ" ນີ້ໄດ້ປ້ອງກັນບໍ່ໃຫ້ຢາເກືອດຫ້າມໄຫຼເຂົ້າຕະຫຼາດຢ່າງຜິດກົດໝາຍ.
ທ່ານສືຄາງເສິງເວົ້າຕໍ່ນັກຂ່າວວ່າ: ເມື່ອປີ 1990, ຈີນເລີ່ມກວດກາຢາກະຕຸ້ນປະສາດໃນທົ່ວປະເທດຢ່າງເປັນທາງການ, ໃນປີນັ້ນ ໄດ້ກວດການັກກິລາ 165 ຄົນ, ປີ 1999 ໄດ້ກວດກາ 3500 ຄົນ, ປີ 2004 ໄດ້ເພີ່ມຂຶ້ນຮອດ 5000 ກວ່າຄົນ, ອັດຕາກວດພົບໝາຍບວກໄດ້ຫຼຸດຈາກ 1,8% ເມື່ອປີ 1990 ລົງຮອດ 0,4% ໃນປີ 2004.
ທ່ານສືຄາງເສິງກ່າວວ່າ, ໃນສະເພາະໜ້ານີ້, ໂດຍສະເລ່ຍແລ້ວ ອັດຕາກວດພົບໝາຍບວກຂອງໂລກແມ່ນ 1,6%, ເມື່ອສັງເຫດຈາກຕົວເລກແລ້ວເຫັນໄດ້ວ່າ, ໃນສະເພາະໜ້ານີ້ ອັດຕາກວດພົບໝາຍບວກຢູ່ຈີນຕ່ຳກວ່າລະດັບສະເລ່ຍຂອງໂລກຕັ້ງຫຼວງຫຼາຍ, ຈາກນີ້ກໍ່ໄດ້ເຫັນຜົນງານຂອງຈີນແລ້ວ. ນອກນີ້, ໃນງານແຂ່ງຂັນສຳຄັນສາກົນ, ເຊິ່ງລວມທັງງານເອຊຽນເກມທີ່ປູຊານປີ 2002 ແລະງານແຂ່ງຂັນລາຍສະເພາະຊິງຊະນະເລີດໂລກທີ່ຈັດຂຶ້ນໃນຫຼາຍປີມານີ້, ເມື່ອໄດ້ກວດນັກກິລາຈີນແລ້ວເຫັນວ່າບໍ່ມີຜູ່ໃດໃຊ້ຢາກະຕຸ້ນປະສາດ.
ທ່ານສືຄາງເສິງກ່າວເນັ້ນວ່າ, ອັດຕາກວດພົບໝາຍບວກຢູ່ຈີນຕ່ຳນັ້ນ ແມ່ນຍ້ອນຈີນກວດກາຢາກະຕຸ້ນປະສາດຢ່າງເຄັ່ງຄັດເປັນປະຈຳ, ໃນປີ 2003 ແລະປີ 2004, ຈີນໄດ້ກວດ 5000 ກວ່າຄົນຕໍ່ປີ, ໃນນັ້ນມີ 60% ບໍ່ໄດ້ແຈ້ງໃຫ້ນັກກິລາຊາບກ່ອນລ່ວງໜ້າ. ກໍ່ຍ້ອນໃຊ້ພາຫະນະດັ່ງກ່າວ, ການກວດກາຢາກະຕຸ້ນປະສາດຈິ່ງໄດ້ເສີມຂະຫຍາຍບົດບາດທີ່ມີອິດທິພົນໄດ້.
ຊູ່ມື້ນີ້, ຢູ່ຈີນບໍ່ພຽງແຕ່ກວດກາຢາກະຕຸ້ນປະສາດເປັນປະຈຳທໍ່ນັ້ນ, ລະດັບກວດກາກໍ່ສູງສົມຄວນ, ເຕັກນິກກວດກາຢາກະຕຸ້ນປະສາດຂອງຈີນໄດ້ມີລະດັບກ້າວໜ້າຂອງໂລກແລ້ວ, ສະນັ້ນ ການກວດກາຢາກະຕຸ້ນປະສາດຂອງຈີນແມ່ນມີຄວາມຮັບປະກັນແລະເຊື່ອໃຈໄດ້. ທ່ານຈາງສາງຈິວ ອະດີດຫົວໜ້າສະຖາບັນຄົ້ນຄວ້າແພດສາດດ້ານການກິລາຂອງກົມໃຫຍ່ກິລາແຫ່ງຊາດຈີນ ປະທານຄະນະກຳມະການຕ້ານຢາກະຕຸ້ນປະສາດຂອງສະຫະພັນແພດສາດອາຊີສະເໜີວ່າ, ຕັ້ງແຕ່ຄະນະກຳມະການໂອລິມປິກສາກົນຮັບຮອງສູນກວດກາຢາກະຕຸ້ນປະສາດຈີນໃນ 1989 ມານີ້, ສູນດັ່ງກ່າວໄດ້ຜ່ານການກວດສອບຢ່າງເຂັ້ມງວດຂອງຄະນະກຳມະການໂອລິມປິກໃນ 15 ປີລຽນຕິດ. ທ່ານຈາງສາງຈິວເວົ້າວ່າ: ຄະນະກຳມະການໂອລິມປິກສາກົນມີໜ່ວຍກວດກາຢາກະຕຸ້ນປະສາດໃນການແຂ່ງຂັນ, ຮັບຜິດຊອບການຕິດຕາມແລະກວດກາວຽກກວດກາຢາກະຕຸ້ນປະສາດໃນງານກິລາໂອລິມປິກ. ໜ່ວຍກວດກາດັ່ງກ່າວປະກອບດ້ວຍຜູ່ຊ່ຽວຊານສາມທ່ານ, ໃນນັ້ນຈີນກໍ່ມີຜູ່ໜຶ່ງ. ໃນໄລຍະງານກິລາໂອລິມປິກອາແຕນປີ 2004, ຜູ່ຊ່ຽວຊານກວດກາຢາກະຕຸ້ນປະສາດຈີນ 6 ຄົນໄດ້ຮັບການເຊື້ອເຊີນຈາກອົງການຕ້ານຢາກະຕຸ້ນປະສາດໂລກ, ເຂົ້າຮ່ວມວຽກງານກວດກາຢາກະຕຸ້ນປະສາດງານກິລາໂອລິມປິກ.
ທ່ານສືຄາງເສິງສະເໜີວ່າ, ໃນຫຼາຍປີມານີ້, ຈີນໄດ້ສະກັດກັ້ນບໍ່ໃຫ້ຢາກະຕຸ້ນປະສາດແຜ່ຜາຍໃນວົງການກິລາຈີນຢ່າງສຳເລັດຜົນ, ຍັງມີຈຸດໜຶ່ງສຳຄັນອີກ ນັ້ນກໍ່ຄື ໄດ້ວາງມາດຕະການລົງໂທດຢ່າງເຂັ້ມງວດທີ່ສຸດ, ປະຈຸບັນ ມາດຕະການລົງໂທດຫຼາຍໆຂໍ້ຂອງຈີນຍັງເຂັ້ມງວດກວ່າຕ່າງປະເທດ.
ເມື່ອເດືອນມັງກອນປີ 2004, ລັດຖະບານຈີນໄດ້ປະກາດ "ກົດຂໍ້ກຳນົດຕ້ານຢາກະຕຸ້ນປະສາດ", ຈີນເປັນປະເທດທີສາມເຊິ່ງຖັດຈາກຝຣັ່ງແລະອີຕາລີທີ່ໄດ້ສ້າງກົດໝາຍສະເພາະກ່ຽວກັບບັນຫາຢາກະຕຸ້ນປະສາດ .
ທ່ານເດວິດ ໂຮມານ ຜູ່ອຳນວຍການໃຫຍ່ອົງການຕ້ານຢາກະຕຸ້ນປະສາດໂລກທີ່ມາເຂົ້າຮ່ວມກອງປະຊຸມຕ້ານຢາກະຕຸ້ນປະສາດລະຫວ່າງລັດຖະບານປະເທດພາກພື້ນອາຊີຄັ້ງທີສອງທີ່ຈັດຂຶ້ນຢູ່ທີ່ປັກກິ່ງໃນຫວ່າງມໍ່ໆນີ້ ໄດ້ຕີລາຄາສູງຕໍ່ຜົນສຳເລັດທີ່ຈີນໄດ້ຮັບໃນຂົງເຂດຕ້ານຢາກະຕຸ້ນປະສາດໃນຫຼາຍປີມານີ້,, ທ່ານເວົ້າວ່າ: ຂໍຂອບອົກຂອບໃຈນຳຈີນທີ່ໄດ້ໃຫ້ການສະໜັບສະໜູນແກ່ອົງການຕ້ານຢາກະຕຸ້ນປະສາດໂລກ, ພວກຂ້າພະເຈົ້າຮູ້ສຶກດີໃຈທີ່ໄດ້ເຫັນວ່າ ຜົນສຳເລັດທີ່ຈີນໄດ້ຮັບໃນຂົງເຂດຕ້ານຢາກະຕຸ້ນປະສາດພວມເປີດກວ້າງອອກເລື້ອຍໆ, ພວກຂ້າພະເຈົ້າໄດ້ສົນໃຈວ່າ, ຈຳນວນເທື່ອຄົນທີ່ຜ່ານການກວດກາຢາກະຕຸ້ນປະສາດຢູ່ພາຍໃນປະເທດຈີນເພີ່ມຂຶ້ນເລື້ອຍໆ, ລະດັບການກວດກາກໍ່ສູງຂຶ້ນຢ່າງບໍ່ຢຸດຢັ້ງ, ຍິ່ງສຳຄັນກວ່ານັ້ນແມ່ນ ລັດຖະບານຈີນໄດ້ໃຫ້ຄຳໝັ້ນສັນຍາຢ່າງຈິງຈັງໃນບັນຫາຕໍ່ສູ້ຕ້ານຢາກະຕຸ້ນປະສາດ.
ທ່ານສືຄາງເສິງສະເໜີວ່າ, ຈີນຈະສ້າງຫ້ອງທົດລອງຢາກະຕຸ້ນປະສາດແຫ່ງໃໝ່ກ່ອນງານກິລາໂອລິມປິກປີ 2008, ຫ້ອງທົດລອງນີ້ຈະກ້າວໜ້າກວ່າຫ້ອງທົດລອງຢາກະຕຸ້ນປະສາດ 3 ແຫ່ງທີ່ມີຢູ່ໃນປະຈຸບັນ; ຄະນະກຳມະການໂອລິມປິກຈີນຍັງຈະຮ່ວມມືກັບອົງການຕ້ານຢາກະຕຸ້ນປະສາດໂລກຄົ້ນຄວ້າວິທະຍາສາດແລະການສຶກສາຂອງການຕ້ານຢາກະຕຸ້ນປະສາດ; ເລີ່ມແຕ່ປີ 2006 ເປັນຕົ້ນໄປ, ຈີນຈະຍົກຈຳນວນເທື່ອຄົນກວດກາຢາກະຕຸ້ນປະສາດຢູ່ພາຍໃນປະເທດໃຫ້ເພີ່ມຂຶ້ນ 60%. ໃນງານກິລາທົ່ວປະເທດຄັ້ງທີ 10 ທີ່ຈະຈັດຂຶ້ນຢູ່ເມືອງໜານກິ່ງ ທາງພາກຕາເວັນອອກຂອງຈີນໃນເດືອນຕຸລາປີນີ້, ຈີນຍັງຈະເຊື້ອເຊີນຄະນະຜູ່ແທນອົງການຕ້ານຢາກະຕຸ້ນປະສາດໂລກມາສັງເກດວຽກກວດກາຢາກະຕຸ້ນປະສາດໃນງານກິລາດັ່ງກ່າວ.
|
