|
|
 |
| (GMT+08:00)
2006-09-21 17:40:11
|
 |
|
ຜູ້ໄດ້ລາງວັນໂນແບນແລກປ່ຽນຊີວະວິທະຍາກັບນັກວິທະຍາສາດຈີນ(ສຽງ)
cri
Author: shuo
|
ໃນຫຼາຍມື້ຜ່ານມາ,ເລື່ອງທີ່ເຮັດໃຫ້ນັກວິທະຍາສາດຂອງຈີນຮູ້ສຶກດີໃຈຫຼາຍນັ້ນແມ່ນຜູ້ໄດ້ລາງວັນໂນແບນຂອງວົງການຊີວະວິທະຍາ5ຄົນໄດ້ມາຢ້ຽມຢາມປັກກິ່ງ.ຜູ້ໄດ້ລາງວັນໂນແບນ5ຄົນນີ້ແມ່ນທ່ານລູອິສ ອິກນາໂຣ ທ່ານເຟລິດ ມູຣາດຂອງອາເມລິກາ ທ່ານໂລເບີດ ຮູເບີ ທ່ານຮາດມຸດ ແມໂຄຂອງເຢຍລະມັນພ້ອມດ້ວຍທ່ານອາລົນ ຊີຊາໂນເວີຂອງອິດສະລະແອນ.ໃນເວທີປາໄສທີ່ຈັດຂຶ້ນຢູ່ທີ່ປັກກິ່ງ,ອາຈານໃຫຍ່5ຄົນນີ້ພ້ອມກັບຜູ້ຮ່ວມຂະແໜງງານຂອງຈີນໄດ້ແລກປ່ຽນຄວາມເຫັນກ່ຽວກັບຊີວະວິທະຍາແລະສຸຂະພາບຂອງມະນຸດ.
ຂົງເຂດທີ່ຜູ້ໄດ້ລາງວັນໂນແບນຄົ້ນຄວ້ານັ້ນມີລັກສະນະວິຊາສະເພາະ,ສາມັນຊົນເຂົ້າໃຈຍາກຫຼາຍ.ແຕ່ວ່າ,ຜູ້ໄດ້ລາງວັນໂນແບນທີ່ມາກ່າວປາຖະກະຖາຢູ່ປັກກິ່ງ5ຄົນນີ້ໄດ້ໃຊ້ໝາກຜົນຄົ້ນຄວ້າຂອງຕົນມາແກ້ພະຍາດຂອງມະນຸດທີ່ປົວຍາກ,ເຮັດໃຫ້ສາມັນຊົນເຂົ້າໃຈໄດ້ງ່າຍ.
"ການກິນດື່ມຖືກສຸຂະອານາໄມພ້ອມກັບການຫັດຮ່າງກາຍຈະປ້ອງກັນແລະປິ່ນປົວພະ ຍາດເສັ້ນເລືອດແລະຫົວໃຈໄດ້"ນີ້ແມ່ນທັດສະນະຂອງດອກເຕີລູອິສ ອິກນາໂຣ.ທ່ານພ້ອມກັບດອກເຕີເຟລິດ ມູລາດໄດ້ຮັບລາງວັນໂນແບນດ້ານແພດສາດໃນປີ1998ຍ້ອນໄດ້ຄົ້ນພົບບົດບາດພິເສດຂອງ nitrogen monosideທີ່ມີຕໍ່ລະບົບເສັ້ນເລືອດຫົວໃຈ.ປະຈຸບັນນີ້,ເລື່ອງທີ່ອາຈານໃຫຍ່ສອງທ່ານເອົາໃຈໃສ່ຫຼາຍກວ່າເກົ່າແມ່ນເຮັດແນວໃດເຮັດໃຫ້ການຄົ້ນພົບດັ່ງກ່າວກາຍເປັນອາວຸດທີ່ແຂງແຮງ,ມາຮັບມືກັບພະຍາດເສັ້ນເລືອດຫົວໃຈ ເຊິ່ງເປັນພະຍາດທີ່ພາໃຫ້ຄົນເຈັບປ່ວຍຫຼາຍກວ່າໝູ່ແລະພາໃຫ້ຄົນຕາຍຫຼາຍກວ່າໝູ່ໃນໂລກ.
ໃນເວທີປາໄສ,ທ່ານລູອິສ ອິກນາໂຣອະທິປາຍວ່າ,ການຂາດ nitrogen monoside ອາດຈະພາໃຫ້ເປັນພະຍາດເສັ້ນເລືອດຫົວໃຈແລະເບົາຫວານໄດ້,ຖ້າວ່າຮັບປະກັນໃຫ້ຮ່າງກາຍມີnitrogen monosideຢ່າງພຽງພໍ,ຈຶ່ງຈະປ້ອງກັນຫຼືປິ່ນປົວພະຍາດເຫຼົ່ານີ້ໃຫ້ເຊົາໄດ້.ທ່ານຍັງໄດ້ບອກຢາລະອຽດທີ່ປ້ອງກັນແລະປິ່ນປົວພະຍາດເສັ້ນເລືອດຫົວໃຈສູ່ຟັງ.ທ່ານເວົ້າວ່າ:"ຖ້າກິນໝາກໄມ້ແລະຜັກຫຼາຍເທົ່າໃດ,ໃນຮ່າງກາຍຈະມີທາດຍິ່ງຫຼາຍເທົ່ານັ້ນເພື່ອຕ້ານການເກີດການປ່ຽນແປງທາງເຄມີກັບອັອກຊີແຊນ,nitrogen monosideກໍຍາກທີ່ຈະຖືກທຳລາຍ.ນອກນີ້,ປາ ສຸກູເລັດດຳ ເຫຼົ້າແວງແລະນ້ຳໝາກໄມ້ຕ່າງໆລ້ວນແຕ່ແມ່ນອາຫານທີ່ດີຫຼາຍ,ມີທາດຕ້ານການເກີດການປ່ຽນແປງທາງເຄມີກັບອັອກຊີແຊນ ຫຼາຍ."
ຜົນການຄົ້ນຄວ້າຂອງທ່ານໂລເບີດ ຮູເບີກັບທ່ານຮາດມຸດ ແມໂຄໄດ້ແກ້ໄຂບັນຫາທີ່ວ່າ ຍ້ອນຫຍັງໃບໄມ້ຈຶ່ງເປັນສີຂຽວແລະບົດບາດຂອງສັງເຄາະແສງແມ່ນຫຍັງແທ້.ພວກເພິ່ນໄດ້ຮັບລາງວັນໂນແບນດ້ານເຄມີສາດໃນປີ1988ຍ້ອນໄດ້ຄົ້ນພົບອົງປະກອບສາມມິຕິຂອງທາດໂບຼຕີນໃນການປ່ຽນແປງຂອງບົດບາດສັງເຄາະແສງ.ພວກເພິ່ນກ່າວວ່າ,ການຄົ້ນພົບດັ່ງກ່າວມີຄວາມໝາຍສຳຄັນໃນດ້ານຄົ້ນຄວ້າພັດທະນາຢຸກຢາແລະການອະນຸລັກພືດຕ່າງໆ.ຕົວຢ່າງຄື,ຢາປະສົມຈຳນວນໜຶ່ງທີ່ປິ່ນປົວພະຍາດເບົາຫວານທີ່ຂາຍໃນຕະຫຼາດກໍແມ່ນຄົ້ນຄວ້າຜະລິດຕາມການຄົ້ນພົບຂອງສອງທ່ານ.
ຜູ້ຮ່ວມຂະແໜງການຂອງຈີນທີ່ໄດ້ຟັງການປາຖະກະຖາຂອງອາຈານໃຫຍ່ຕ່າງປະເທດກ່າວວ່າ,ເກືອບສິບກວ່າປີມານີ້,ອາຍຸສະເລ່ຍຂອງມະນຸດໄດ້ຍົກສູງຂຶ້ນຫຼາຍ,ທັງນີ້ກໍ່ມີການພົວພັນອັນສຳຄັນກັບການປະກອບສ່ວນຢ່າງໃຫຍ່ໃນຂົງເຂດຊີວະວິທະຍາຂອງຜູ້ໄດ້ລາງວັນໂນແບນ.ແຕ່ວ່າ,ສິ່ງທີ່ເຮັດໃຫ້ຄົນຮູ້ສຶກເສຍດາຍແມ່ນປະຈຸບັນນີ້ຍັງບໍ່ມີນັກວິ ທະຍາສາດຈີນຈັກຄົນໄດ້ລາງວັນນີ້.
ແຕ່ວ່າ,ຫຼາຍປີມານີ້,ລັດຖະບານຈີນໄດ້ລົງທຶນຫຼາຍກວ່າເກົ່າໃນດ້ານຊີວະວິທະຍາແລະເຕັກນິກຊີວະຊາດ,ແລະໄດ້ຮັບຄວາມຄືບໜ້າຈຳນວນໜຶ່ງ.ທ່ານຈ່າງຢາພີງ ບັນດິດສະພາບັນດິດວິທະຍາສາດຈີນເວົ້າວ່າ,ຄວາມຫ່າງລະຫວ່າງຈີນກັບຫົວກະທິດ້ານວິທະຍາສາດຂອງສາກົນນັບມື້ນັບໃກ້ແລ້ວ.ທ່ານເວົ້າວ່າ:"ຫຼາຍປີມານີ້,ຄວາມສາມາດປະດິດສ້າງຂອງປະເທດຂ້າພະເຈົ້າໃນຂົງເຂດຊີວະວິທະຍາແລະເຕັກນິກຊີວະຊາດໄດ້ຍົກສູງຂຶ້ນຢ່າງຫຼວງຫຼາຍ.ເມື່ອສັງເກດຈາກປະລິມານລິຂະສິດດ້ານເຕັກນິກຊີວະຊາດ,ປະລິມານລິຂະສິດທີ່ຈີນຮ້ອງຂໍໃນສາກົນໃນປີ2002ນັ້ນໄດ້ເປັນອັນດັບສອງໃນປະເທດພວມພັດທະນາ ຕ່າງໆ."
ພ້ອມກັນນັ້ນ,ການແລກປ່ຽນແລະການຮ່ວມມືກັນລະຫວ່າງວົງການວິທະຍາສາດຈີນກັບໂລກພວມກ້າວສູ່ລວງເລິກຢ່າງບໍ່ຢຸດຢັ້ງ.ປະຈຸບັນນີ້ຈີນພວມນຳພາການປະຕິບັດແຜນ ການຄົ້ນຄວ້າທາດໂບຼຕີນໃນຕັບຂອງຄົນ.ນອກນີ້,ໃນດ້ານພະຍາດຕິດແປດທີ່ເກີດໃໝ່,ນັກວິທະຍາສາດຈີນໄດ້ວິໄຈກົດເກນວິວັດທະນາການຂອງໂມເລກຸນເຊື້ອພະຍາດອັກເສບປອດຮຸນແຮງຫຼືຊາສ໌,ເຊິ່ງໄດ້ສ້າງຫຼັກອ້າງອີງດ້ານວິທະຍາສາດໃຫ້ການປ້ອງກັນແລະປິ່ນ ປົວພະຍາດນີ້.
ສິ່ງທີ່ຕ້ອງກ່າວເຖິງແມ່ນ,ຈີນຍັງໄດ້ເຂົ້າຮ່ວມແຜນການຄົ້ນຄວ້າຈຸແຊນມະນຸດສາກົນ ເຊິ່ງ ຖັດຈາກອາເມລິກາ ອັງກິດ ຍີ່ປຸ່ນແລະເຢຍລະມັນ,ແລະໄດ້ສຳເລັດວຽກງານວັດແທກລະ ບຽບການ1%ຂອງຈຸແຊນມະນຸດ.ທັງນີ້ໝາຍຄວາມວ່າ,ການຄົ້ນຄວ້າຈຸແຊນມະນຸດຂອງຈີນໄດ້ມີລະດັບເທົ່າທຽມກັບໂລກແລ້ວ.ທ່ານຢູຈຸ່ນທີ່ຄົ້ນຄວ້າຈຸແຊນມະນຸດເປັນເວລາຍາວນານບອກນັກຂ່າວວ່າ,ມີຫຼາຍພະຍາດໄດ້ພົວພັນກັບແຊນ ຄື ພະຍາດເລືອດດັນສູງ ພະ ຍາດເບົາຫວານແລະມະເຮັງເຕົ້ານົມເປັນຕົ້ນ.ການທີ່ເຮັດໃຫ້ສາມັນຊົນຂອງຈີນສາມາດໃຊ້ການວັດແທກແຊນມະນຸດມາປ້ອງກັນພະຍາດແມ່ນເປົ້າໝາຍແຫ່ງການຄົ້ນຄວ້າຂອງທ່ານແລະເພື່ອນຮ່ວມງານ.ທ່ານຢູຈຸ່ນເວົ້າວ່າ:"ໃນປີ1984,ຖ້າວັດແທກຈຸແຊນຂອງຄົນໜຶ່ງຕ້ອງເສຍເງິນ3ຕື້ໂດລາ,ຮອດປີ2004ເສຍ30ລ້ານໂດລາ,ປີ20061ລ້ານ5ແສນໂດລາ.ເປົ້າໝາຍຂອງພວກເຮົາແມ່ນໃນຫຼາຍປີຂ້າງໜ້າ,ເຮັດໃຫ້ການວັດແທກຈຸແຊນຂອງຄົນໜຶ່ງເສຍພຽງແຕ່1000ໂດລາ."
ໃນເວລາໃຫ້ສຳພາດຕໍ່ນັກຂ່າວ,ທ່ານໂລເບີດ ຮູເບີ ຜູ້ໄດ້ລາງວັນໂນແບນຂອງເຢຍລະມັນເວົ້າວ່າ,ທ່ານໄດ້ເຫັນຄວາມຄືບໜ້າຂອງຈີນໃນຂົງເຂດຊີວະວິທະຍາໃນຫຼາຍປີມານີ້,ແລະສະແດງຄວາມຊົມເຊີຍຕໍ່ຄວາມຄືບໜ້າເຫຼົ່ານີ້.ທ່ານເວົ້າວ່າ:"ໃນໄລຍະຍາວນານມານີ້,ຊີວະວິທະຍາແລະເຕັກນິກຊີວະຊາດຂອງຈີນຢູ່ລະດັບທີ່ອ່າວອ່ອນແອ,ຕ້ອງຮ່ຳຮຽນເຕັກນິກນຳປະເທດອື່ນ.ແຕ່ໄລຍະນັ້ນໄດ້ຜ່ານໄປແລ້ວ,ໃນຫ້າປີມານີ້,ຈີນໄດ້ຮັບຄວາມຄືບໜ້າຢ່າງຫຼວງຫຼາຍໃນດ້ານຊີວະວິທະຍາ.ປະຈຸບັນນີ້,ນັກຄົ້ນຄວ້າວິທະຍາສາດຂອງຈີນໄດ້ເລີ່ມການຄົ້ນຄວ້າທີ່ຢືນຢູ່ແນວໜ້າທີ່ສຸດ."
ມີນັກວິທະຍາສາດຈີນແລະຕ່າງປະເທດຈຳນວນໜຶ່ງຍັງຄາດຄະເນວ່າ,ໃນ15ຫາ20ປີຂ້າງໜ້າ,ຈີນຈະກ້າວເຂົ້າສູ່ຖັນແຖວຂອງປະເທດທີ່ເຂັ້ມແຂງດ້ານເຕັກນິກຊີວະຊາດຂອງໂລກ.
ຜູ້ຊ່ຽວຊານໃນຂົງເຂດຊີວະວິທະຍາຂອງຈີນແລະຕ່າງປະເທດໄດ້ສົ່ງສັນຍານອັນສຳຄັນຂໍ້ໜຶ່ງໃນເວທີປາໄສຄັ້ງນີ້,ນັ້ນກໍຄື ນັກຄົ້ນຄວ້າວິທະຍາສາດທັງຫຼາຍໃນຂົງເຂດຊີວະວິທະຍາພວມຄົ້ນຄວ້າວິທີປິ່ນປົວພະຍາດທີ່ປົວເຊົາຍາກຕ່າງໆ ຄື ພະຍາດເສັ້ນເລືອດຫົວໃຈ ພະຍາດເບົາຫວານແລະພະຍາດຊາສ໌ເປັນຕົ້ນ.ພວກເຮົາເຊື່ອໄດ້ວ່າ,ຄຽງຄູ່ກັບການພັດທະນາຂອງເຕັກນິກວິທະຍາສາດ,ມະນຸດເຮົາຈະນັບມື້ນັບສຸຂະພາບແຂງແຮງກວ່າເກົ່າ.
|
|
|
