|
ຕາມຂ່າວສານຊິນຮວາ: ວັນທີ 24 ກັນຍາ ທ່ານລາວໂຣ ບາຈາ ຜູ່ແທນຟິລິບປິນປະຈຳສະຫະປະຊາຊາດໄດ້ອອກຖະແຫຼງການກ່າວວ່າ, ໃນຖານະເປັນອົງການລັກສະນະພາກພື້ນ, ສະມາຄົມປະຊາຊາດອາຊີຕາເວັນອອກສຽງໄຕ້ ຫຼື ອາຊຽນໄດ້ຮ້ອງຂໍຢ່າງເປັນທາງການໃຫ້ເປັນນັກສັງເກດການຖາວອນຂອງສະຫະປະຊາຊາດ.
ກະຊວງການຕ່າງປະເທດຟິລິບປິນໄດ້ອອກຖະແຫຼງການດັ່ງກ່າວຢູ່ທີ່ນິວຢອກ, ຖະແຫຼງການຂຽນວ່າ, ວັນທີ 22 ກັນຍາເວລາທ້ອງຖິ່ນ ລັດຖະມົນຕີວ່າການກະຊວງການຕ່າງປະເທດຂອງບັນດາປະເທດອາຊຽນໄດ້ໄຂກອງປະຊຸມຢູ່ສຳນັກງານໃຫຍ່ສະຫະປະຊາຊາດ ໂດຍເປັນເອກະສັນກັນວ່າ, ອາຊຽນທີ່ເປັນອົງການພາກພື້ນຮ້ອງຂໍເປັນນັກສັງເກດການຖາວອນຂອງສະຫະປະຊາຊາດ.
ຖະແຫຼງການຂຽນວ່າ, ໃນຫຼາຍປີມານີ້ ຟິລິບປິນໄດ້ຕັ້ງໜ້າຊຸກຍູ້ການຮ້ອງຂໍດັ່ງກ່າວຂອງອາຊຽນໂດຍຕະຫຼອດ. ຟິລິບປິນເປັນປະເທດປະທານຝຽນຂອງອາຊຽນຊຸດປັດຈຸບັນ, ສະນັ້ນ ຈະຕາງໜ້າອາຊຽນຍື່ນຄຳຮ້ອງຂໍ, ຄາດວ່າ ສະມັດຊາໃຫຍ່ສະຫະປະຊາຊາດຄັ້ງທີ 61 ຈະອະນຸມັດການຮ້ອງຂໍດັ່ງກ່າວ.
ອາຊຽນແມ່ນອົງການພາກພື້ນພຽງແຕ່ອົງການດຽວທີ່ຍັງບໍ່ມີຖານະນັກສັງເກດການໃນສະຫະປະຊາຊາດ. ຖ້າການຮ້ອງຂໍໄດ້ຮັບການອະນຸມັດ, ຜູ່ແທນອາຊຽນຈະສາມາດເຂົ້າຮ່ວມກອງປະຊຸມຕ່າງໆຢູ່ໃນສະຫະປະຊາຊາດ.
|
