|
ທີ່ນີ້,ວິທະຍຸສາກົນແຫ່ງປະເທດຈີນ,ສະບາຍດີ,ທ່ານຜູ້ຟັງທີ່ເຄົາລົບ,
ຍິນດີຕ້ອນຮັບທ່ານເຂົ້າສູ່ລາຍການ"ເພື່ອນມິດຜູ້ຟັງ".ໃນລາຍການມື້ນີ້,ພວກເຮົາຈະຕອບຄຳຖາມຂອງນ້ອງສຸລິນ ໄຊຍະສອນ ທີ່ກອງບັນຊາການທະຫານເມືອງຮຸນ ແຂວງອຸດົມໄຊໃນຈົດໝາຍທີ່ຝາກມາຍັງພວກເຮົາ.ຂຽນວ່າ,"ຢູ່ໃນໂລກນີ້ແມ່ນຄົນປະເທດໃດຕິດເຊື້ອໂຣກເອດຫຼາຍກວ່າໝູ່?ປະຈຸບັນນີ້,ມີຢາປິ່ນປົວໂຣກເອດໃຫ້ຫາຍຂາດໄດ້ແລ້ວບໍ່？ແລະຢາດັ່ງກ່າວແມ່ນທ່ານໝໍປະເທດໃດເປັນຜູ້ຄົ້ນຄວ້າຜະລິດອອກມາແລະໄດ້ທົດລອງຢູ່ໃສ,ໄດ້ຜົນດີແນວໃດ?"
ເມື່ອໄດ້ອ່ານຄຳຖາມດັ່ງກ່າວທີ່ນ້ອງສຸລິນຖາມມາໃນຈົດໝາຍ,ພວກເຮົາຮູ້ສຶກວ່າ,ອາດຈະຍັງມີຫຼາຍຄົນ ຄືກັນກັບນ້ອງສຸລິນ ທີ່ຢາກຮູ້ກ່ຽວກັບພະຍາດເອດແລະວິທີປິ່ນປົວ,ເພື່ອປ້ອງກັນຕົນເອງໃຫ້ດີກວ່າເກົ່າ.ຕໍ່ໄປ,ພວກເຮົາກໍ່ຂໍແນະນຳບາງບັນຫາກ່ຽວກັບພະຍາດເອດສູ່ທ່ານຟັງ.(ດົນຕີຂັ້ນ) ທ່ານຜູ້ຟັງທີ່ເຄົາລົບ,ກ່ອນອື່ນໝົດ,ພວກເຮົາມາຊອກຮູ້ການແຜ່ລະບາດຂອງພະຍາດເອດຢູ່ທົ່ວໂລກໃນປັດຈຸບັນນີ້ກ່ອນ. ຕົວເລກສະຖິຕິຫຼ້າສຸດສະແດງໃຫ້ເຫັນວ່າ,ນັບແຕ່ປີ1981,ຜູ້ຕິດເຊື້ອເອຈ໌ໄອວີຜູ້ທຳອິດໃນໂລກຖືກພົບຢູ່ອາເມລິກາ,ມາຮອດດຽວນີ້ພະຍາດເອດໄດ້ເຮັດໃຫ້25ລ້ານຄົນເສຍຊີວິດໃນທົ່ວໂລກ,ກາຍເປັນພະຍຸລະບາດທີ່ບໍ່ຄ່ອຍເຫັນໃນປະຫວັດສາດຂອງນະມຸດ.ປີ2005,ໃນໂລກມີ3ລ້ານ1ແສນຄົນເສຍຊີວິດຍ້ອນເອດ,ໃນນັ້ນ5ແສນ7ໝື່ນຄົນແມ່ນເດັກນ້ອຍ.ປີນີ້,ຜູ້ຕິດເຊື້ອເອຈ໌ໄອວີໃນໂລກໄດ້ເພິ່ມຂຶ້ນ4ລ້ານ9ແສນຄົນ,ຈົນເຮັດໃຫ້ຍອດຈຳນວນຜູ້ຕິດເຊື້ອເອຈ໌ໄອວີໃນທົ່ວໂລກເພິ່ນຂຶ້ນຮອດ40ລ້ານ3ແສນຄົນ,ເປັນລະດັບສູງສຸດໃນປະຫວັດສາດ. ເມື່ອເບິ່ງຈາກການແຜ່ລະບາດຂອງຜູ້ຕິດເຊື້ອເອຈ໌ໄອວີແລ້ວເຫັນວ່າ,ເຂດອາຟຼິກາທີ່ຢູ່ເຂດໃຕ້ທະເລຊາຍຊາຮາລາຍັງແມ່ນເຂດທີ່ມີຜູ້ຕິດເຊື້ອ ຫຼາຍກວ່າໝູ່.ປີ2005,ຜູ້ຕິດເຊື້ອເຂດດັ່ງກ່າວໄດ້ເພິ່ມຂຶ້ນ3ລ້ານ2ແສນຄົນ,ຍອດຈຳນວນຜູ້ຕິດເຊື້ອພະຍາດດັ່ງກ່າວໄດ້ມີ25ລ້ານ8ແສນຄົນແລ້ວ. ຢູ່ອາຊີ ທີ່ມີປະຊາກອນຫຼວງຫຼາຍ,ສະພາບພະຍາດເອດກໍ່ມີທ່ວງທ່າແຜ່ລະບາດຢ່າງວ່ອງໄວຄືກັນ.ປັດຈຸບັນ,ຢ່ໃນູທົ່ວໂລກ,ໃນຜູ້ຕິດພະຍາດເອດແຕ່ລະ5ຄົນໃດກໍ່ມີຢູ່ອາຊີໜຶ່ງຄົນ.ປີ2005,ຜູ້ຕິດເອດຂອງອາຊີໄດ້ເພິ່ມຂຶ້ນ1ລ້ານ1ແສນຄົນ,ເຮັດໃຫ້ຍອດຈຳນວນຜູ້ຕິດພະຍາດເອດເພິ່ມຂຶ້ນຮອດ8ລ້ານ3ແສນຄົນ.ພຽງແຕ່ຢູ່ອິນເດຍ,ປັດຈຸບັນ,ກໍ່ມີຜູ້ຕິດHIV5ລ້ານ1ແສນ3ໝື່ນຄົນ,ເປັນທີ1ໃນອາຊີແລະເປັນທີ2ໃນທົ່ວໂລກ.ເມື່ອທຽບກັບ2ປີກ່ອນ,ຜູ້ຕິດເຊື້ອHIVໃນອາຊີຕາເວັນອອກໄດ້ເພິ່ມຂຶ້ນ20%,ສ່ວນຢູ່ເຂດເອີລົບຕາເວັນອອກ,ຄວາມໄວຂອງການແຜ່ລະບາດກໍ່ເຮັດໃຫ້ຄົນທັງຫຼາຍເປັນຫ່ວງນຳ,ປີນີ້,ຜູ້ເສຍຊີວິດຍ້ອນພະຍາດເອດຢູ່ເຂດນີ້ແມ່ນ1ເທົ່າຂອງ2ປີກ່ອນ. ປັດຈຸບັນ,ແມ່ຍິງແລະຊາວໜຸ່ມເຍົາວະຊົນໄດ້ກາຍເປັນກຸ່ມຄົນທີ່ຕ້ອງເອົາໃຈໃສ່ໃນວຽກງານປ້ອງກັນປິ່ວປົວພະຍາດເອດ.ໃນຜູ້ຕິດເຊື້ອHIV40ລ້ານ3ແສນຄົນໃນທົ່ວໂລກ,ຜູ້ຂິງມີ17ລ້ານ5ແສນຄົນ,ເດັກນ້ອຍທີ່ບໍ່ຮອດອາຍຸ15ປີມີ2ລ້ານ3ແສນຄົນ,ໃນຜູ່ຕິດເຊື້ອພະຍາດທີ່ເພິ່ມຂຶ້ນໃນປີນີ້,ຜູ້ທີ່ມີອາຍຸແຕ່15ປີຫາ24ປີກວມເຄິ່ງໜຶ່ງຂຶ້ນໄປ,ເດັກນ້ອຍທີ່ອາຍຸບໍ່ຮອດ15ປີມີ7ແສນຄົນ. ເພື່ອເຮັດໃຫ້ປະຊາຊົນມີຄວາມຮູ້ຫຼາຍຂຶ້ນຕໍ່ຜົນຮ້າຍຂອງພະຍາດເອດ,ໃນເດືອນມັງກອນປີ1988,ອົງການອະນາໄມໂລກໄດ້ກຳນົດເອົາວັນທີ1ທັນວາຂອງທຸກປີເປັນວັນຕ້ານເອດຂອງໂລກ,ຮຽກຮ້ອງໃຫ້ປະເທດຕ່າງໆຈັດກິດຈະກຳຕ່າງໆໃນມື້ນັ້ນ,ເພື່ອໂຄສະນາແລະເຜີຍແຜ່ຄວາມຮູ້ກ່ຽວກັບການປ້ອງກັນພະຍາດເອດ.ວັນຕ້ານເອດຂອງໂລກທຸກເທື່ອກໍ່ມີຫົວຂໍ້ແຕກຕ່າງກັນ.(ດົນຕີຂັ້ນ)
ພະຍາດເອດແມ່ນເກີດຂຶ້ນຍ້ອນອາການພູມຄຸ້ມກັນພະຍາດຂອງຮ່າງກາຍບົກຜ່ອງ.ຖ້າຕິດເຊື້ອພະຍາດຊະນິດນີ້ຈະຢູ່ໃນຮ່າງກາຍຄົນເຮົາຕະຫຼອດຊີວິດ,ມັນຈະທຳລາຍພູມຄຸ້ມກັນຂອງມະນຸດ,ເຮັດໃຫ້ຮ່າງກາຍຂອງຄົນເສຍຄວາມສາມາດຕ້ານທານພະຍາດຊະນິດຕ່າງໆ.ຊ່ອງທາງຕິດຕໍ່ຂອງເຊື້ອເອຈ໌ໄອວີມີ4ທາງ ຄືທາງເລືອດ,ທາງເພດສຳພັນ,ເສບຢາເສບຕິດ(ຄື,ຜູ້ເສບຢາເສບຕິດໃຊ້ເຂັມສັກຢາຮ່ວມກັນ)ແລະການຕິດຕໍ່ຈາກແມ່ສູ່ລູກ(ຄື,ແມ່ທີ່ມີເຊື້ອເອຈ໌ໄອວີຈະແຜ່ເຊື້ອໃຫ້ລູກ).ຈົນຮອດປັດຈຸບັນ,ວົງການແພດສາດສາກົນຍັງບໍ່ມີຢາແລະທີ່ສາມາດປິ່ນປົວພະຍາດນີ້ໃຫ້ໄດ້ເທື່ອ.ສະນັ້ນ,ພະຍາດເອຈຶ່ງຖືກເອີ້ນເປັນຊຸບເປີ"ມະເຮັງ"ແລະ"ຄາຕະກອນໃນສະຕະວັດ".
ປັດຈຸບັນ,ວິທີປິ່ນປົວພະຍາດເອດມີຫຼາຍຢ່າງ,ປະເທດຕ່າງໆກໍ່ມີວິທີຕ່າງກັນ.ຮອດດຽວນີ້,ວິທີປິ່ນປົວພະຍາດເອດທີ່ໄດ້ຜົນກວ່າໝູ່ນັ້ນອາດຈະຍັງແມ່ນ"ວິທີປິ່ນປົວແບບເຫຼົ້າຄັອກເທວ",ວິທີປິ່ນປົວນີ້ຖືກຮັບຮູ້ນຳກັນວ່າແມ່ນເຕັກນິກຂັດກວາງການໂຈມຕີຂອງເຊື້ອເອຈ໌ໄອວີທີ່ໄດ້ຜົນດີກວ່າໝູ່ ທ່ານໂຮ ແດວິດ （Ho David）ນັກວິທະຍາສາດອາເມລິກາເຊື້ອສາຍຈີນໄດ້ຄົ້ນຄວ້າມາຫຼາຍປີແລ້ວ,ຈຶ່ງໄດ້ປະດິດສ້າງວິທີດັ່ງກ່າວ. ກ່ຽວກັບເຫຼົ້າຄັອກເທວ,ຄົນທັງຫຼາຍອາດຈະຮູ້ຢູ່ແລ້ວ,ນີ້ແມ່ນເຫຼົ້າຊະນິດໜຶ່ງທີ່ຄົນຕາເວັນຕົກມັກທີ່ສຸດ,ເອົາເຫຼົ້າທີ່ມີລົດຊາດຕ່າງກັນຫຼາຍຢ່າງປະສົມກັນ,ເມື່ອກິນແລ້ວກໍ່ມີລົດຊາດພິເສດ.ສາດສະດາຈານ ໂຮ ແດວິດຕັ້ງຊື່ໃຫ້ວິທີປິ່ນປົວຊະນິດນີ້ເປັນ"ວິທີປິ່ນປົວເຫຼົ້າຄັອກເທວ"ກໍ່ມີຄວາມໝາຍຄ້າຍຄືກັນ,ອັນນັ້ນກໍ່ຄື:ໃຊ້ຢາ3-4ຊະນິດໃນຂະນະດຽວກັນ,ຢາທຸກຊະນິດກໍ່ແນໃສ່ເຊື້ອພະຍາດເອຈ໌ໄອວີໃນຂອດຕ່າງກັນໃນໄລຍະແຜ່ພັນ,ແລ້ວບັນລຸເປົ້າໝາຍສະກັດກັ້ນຫຼືຂ້າເຊື້ອພະຍາດ.ການທີ່ປິ່ນປົວພະຍາດເອດຍາກຫຼາຍ,ສາເຫດອັນສຳຄັນຂໍ້ໜຶ່ງກໍ່ແມ່ນເຊື້ອເອຈ໌ໄອວີປັບຕົວ,ໃນຂະບວນການແຜ່ລະບາດແລະຕິດຕໍ່ຕະຫຼອດ,ເຊື້ອພະຍາດມັກປ່ຽນໃນດ້ານອົງປະກອບແລະປະສິດທິພາບເລື້ອຍໆ,ເມື່ອເປັນແນວນັ້ນ,ເຖິງວ່າໃຊ້ຢາທີ່ມີຜົນດີຊ່ຳເກົ່າແຕ່ເວລານີ້ພັດບໍ່ໄດ້ພົນອີກແລ້ວ,ຈຶ່ງພາໃຫ້ເຊື້ອພະຍາດສາມາດແຜ່ເຊື້ອຕໍ່ໄປຢ່າງຫຼວງຫຼາຍ.ແຕ່ການໃຊ້"ວິທີປິ່ນປົວແບບເຫຼົ້າຄັອກເທວ"ທີ່ເອົາຢາ3-4ຢ່າງປົນກັນປິ່ນປົວນັ້ນ,ເນື່ອງຈາກແນໃສ່ຂອດຕ່າງໆຂອງການເຜີຍແຜ່ເຊື້ອໂຣກເອດ,ຜົນການປິ່ນປົວກໍ່ໄດ້ສູງຂຶ້ນຢ່າງຫຼວງຫຼາຍ.ເຮັດແນວນີ້ສາມາດເຮັດໃຫ້ການຕ້ານຢາທີ່ເກີດຂຶ້ນຍ້ອນໃຊ້ຢາຊະນິດດຽວນັ້ນຫຼຸດໜ້ອຍລົງ,ແລະສະກັດກັ້ນບໍ່ໃຫ້ເຊື້ອພະຍາດແຜ່ເຊື້ອຢ່າງຮຸນແຮງ,ພາໃຫ້ລະບົບພູມຄຸ້ມກັນທີ່ຖືກທຳລາຍນັ້ນຟື້ນຟູປະສິດທິພາບສ່ວນໜຶ່ງຫຼືທັງໝົດ,ແລ້ວເຮັດໃຫ້ພະຍາດຂະຫຍາຍຕົວຊ້າລົງ,ສາມາດແກ່ຍາວຊີວິດຂອງຄົນເຈັບແລະເຮັດໃຫ້ສຸຂະພາບຂອງພວກເຂົາເຈົ້າດີຂຶ້ນ.ວິທີປິ່ນປົວດ້ວຍເຫຼົ້າຄັອກເທວສາມາດຫຼຸດອັດຕາການຕາຍຂອງຜູ້ເປັນພະຍາດເອດລົງຮອດ20%.ປະສິທິຜົນໃນການປິ່ນປົວນີ້ກໍ່ເຮັດໃຫ້ຄົນເຮົາມີກຳລັງໃຈຫຼາຍຄື:ເມື່ອໄດ້ປິ່ນປົວຫຼາຍອາທິດແລ້ວ,ໃນຄົນເຈັບ10ຄົນ,ມີ7ຄົນອາການດີຂຶ້ນຢ່າງເດັ່ນຊັດ,ອາການເປັນໄຂ້ແຕ່ອຸນຫະພູມບໍ່ສູງເກີດໄປເວລາຍາວນານນັ້ນຫາຍໄປ,ການເປັນເຫດເປື່ອຍກໍ່ບໍ່ມີ,ກຳລັງວັງຊາກໍ່ດີຂຶ້ນ,ສິ່ງທີ່ເປັນຕາມະຫັດສະຈັນນັ້ນແມ່ນໃນເລືອດກວດບໍ່ເຫັນເຊື້ອເອຈ໌ໄອວີອີກ. ໃນເວລາປິ່ນປົວພະຍາດເອດ,ວິທີປິ່ວປົວແບບເຫຼົ້າຄັອກເທວໄດ້ເສີມຂະຫຍາຍບົດບາດອັນສຳຄັນຢ່າງສູງຄື,ຢ່າງໜ້ອຍກໍ່ໄດ້ເຮັດໃຫ້ເວລາເປັນພະຍາດຂອງຜູ້ຕິດເຊື້ອເອຈ໌ໄອວີແກ່ຍາວຫຼາຍປີ,ໃນຫຼາຍປີມໍ່ໆມານີ້,ອັດຕາການຕາຍຂອງພະຍາດເອດຢູ່ອາເມລິກາຕ່ຳລົງກໍ່ໄດ້ຢັ້ງຢືນເລື່ອງນີ້.ແຕ່ວິທີ ປິ່ນປົວດັ່ງກ່າວກໍ່ມີລັກສະນະຈຳກັດຄືຜົນການປິ່ນປົວບໍ່ແມ່ນ100%,ຄົນເຈັບຕ້ອງກິນຢາເປັນເວລາຍາວນານທີ່ອາດຈະເຮັດໃຫ້ເກີດມີຜົນທາງລົບຕ່າງໆ,ໃນນັ້ນ,ທີ່ຮ້າຍແຮງກວ່າໝູ່ກໍ່ແມ່ນຕັບອ່ອນເພັຍແລະພະຍາດເບົາຫວານ.ນອກນີ້,ລາຄາຢາກໍ່ແພງໂພດ,ຄືຕ້ອງໃຊ້ເຖິງປະນາມ1ໝື່ນ2ພັນໂດລາຕໍ່ປີຕໍ່ຄົນ,ອັນນີ້ເຮັດໃຫ້ຄົນເຈັບສ່ວນຫຼາຍບໍ່ສາມາດຊື້ໄດ້.(ດົນຕີຂັ້ນ) ພະຍາດເອດໄດ້ກາຍເປັນບັນຫາຈຸດສຸມສຳຄັນໃນດ້ານສາທາລະນະສຸກແລະສັງຄົມທີ່ທົ່ວໂລກສົນໃຈນຳ,ເຖິງວ່າໃນປັດຈຸບັນຍັງບໍ່ມີຢາປິ່ນປົວ ມີປະສິດທິຜົນແລະວັກແຊງເພື່ອປ້ອງກັນກໍ່ຕາມ,ແຕ່ພະຍາດເອດສາມາດປ້ອງກັນໄດ້.ດ້ວຍການດຳລົງຊີວິດທີ່ປອດໃສຊື່ສັດ. ເອົາລະ,ທ່ານຜູ້ຟັງທີ່ເຄົາລົບ,ກ່ຽວກັບບັນຫາພະຍາດເອດ,ພວກເຮົາກໍ່ຂໍແນະນຳພຽງທໍ່ນີ້,ເຖິງວ່າອາດຍັງບໍ່ທັນລະອຽດຄົບຖ້ວນປານໃດ,ແຕ່ກໍ່ຫວັງວ່າຄົງຈະເປັນປະໂຫຍດຕໍ່ທ່ານບໍ່ຫຼາຍກໍໜ້ອຍ.ໃນຕອນທ້າຍລາຍການມື້ນີ້,ພວກເຮົາມາຟັງເພງໜຶ່ງທີ່ຊື່ວ່າ"ແຖບຜ້າສີແດງ" ເຊິ່ງແມ່ນເພງສັນຍາລັກ"ວັນຕ້ານເອດຂອງໂລກ",ແຖບຜ້າສີແດງແມ່ນເຄື່ອງໝາຍສາກົນທີ່ທົ່ວໂລກປ້ອງກັນປິ່ນປົວພະຍາດເອດ,ມັນມີຄວາມໝາຍເຮັດໃຫ້ປະຊາຊົນທົ່ວໂລກຮ່ວມມືກັນຢ່າງແໜ້ນແຟ້ນ,ພ້ອມກັນຕ້ານພະຍາດເອດ,ມັນກໍ່ເປັນສັນຍະລັກສະແດງໃຫ້ເຫັນຄົນທັງຫຼາຍເອົາໃຈໃສ່ແລະເຫັນໃຈໃຫ້ກຳລັງໃຈຜູ້ຕິດເຊື້ອ.ສະນັ້ນ,ພວກເຮົາຈົ່ງພ້ອມກັນກັບທົ່ວໂລກຕ້ານພະຍາດເອດນຳກັນ,ຫຼຸດໄພຂົ່ມຂູ່ຂອງພະຍາດເອດຕໍ່ມວນມະນຸດໃຫ້ໜ້ອຍລົງ.ມາຮອດນີ້ຂໍອວຍພອນໃຫ້ຜູ້ຟັງທຸກທ່ານທີ່ພວມຟັງລາຍການຢູ່ໃນຂະນະນີ້ຈົ່ງມີສຸກຂະພາບເຂັ້ມແຂງ.ຂອບໃຈທ່ານທີ່ຮັບຟັງລາຍການ"ເພື່ອນມິດຜູ້ຟັງ",ພົບກັບສັງຂານ ຈູມຄຳພັນໄດ້ໃໝ່ໃນວັນສຸກໜ້າ,ສະບາຍດີ.
|
