|
ຫວ່າງມໍ່ໆນີ້,ໃນເວັບໄຊໃຫຍ່ຕ່າງໆຂອງຈີນ,ມີບົດໜຶ່ງຈັດໄວ້ຢູ່ບ່ອນທີ່ເດັ່ນຕໍ່ສາຍຕາຍ້ອນມີຄົນອ່ານ.ຫຼາຍບົດນີ້ໄດ້ສະເໜີກ່ຽວກັບປະທານເໝົາເຈີຕົ່ງ ຜູ້ນຳອັນຍິ່ງໃຫຍ່ຂອງຈີນທີ່ເປັນຄົນອົງອາດກ້າຫານແຕ່ເຄີຍໄຫ້ຈົນອອກສຽງຫຼາຍເທື່ອໃນເວລາເຄື່ອນທັບທາງຍຸດທະສາດໃນ70ກວ່າປີກ່ອນ.ການເຄື່ອນທັບທາງຍຸດທະສາດທີ່ເຮັດໃຫ້ຜູ້ນຳຍິ່ງໃຫຍ່ເຖິງກັບຮ້ອງໄຫ້ອອກມານັ້ນກໍແມ່ນການເດີນທັບທາງໄກທີ່ຊາວໂລກຮູ້ດີ.ເຖິງວ່າປະຊາຊົນຈີນໄດ້ດຳລົງຊີວິດໃນສັນຕິພາບແລະຄວາມສະຫງົບມາ50ກວ່າປີແລ້ວກໍຕາມ,ແຕ່ການເດີນທັບທາງໄກໃນ70ກວ່າປີກ່ອນນັ້ນຄົງຈະບໍ່ຈາງຫາຍໄປຈາກຄວາມຊົງຈຳຂອງຊາວຈີນຈັກເທື່ອ.ພັກກຳອຳນາດມັກຄິດເຖິງເຫດການນີ້ເລື້ອຍໆ,ປະຊາຊົນກໍໄດ້ເວົ້າເຖິງໃນເວລາໃຫ້ກຳລັງໃຈແກ່ ກັນ,ມັນໄດ້ສ່ອງແສງໃຫ້ເຫັນນ້ຳໃຈທີ່ຖືຜົນປະໂຫຍດລວມຂອງຊາດເປັນສິ່ງສຳຄັນກວ່າໝູ່ນັ້ນໄດ້ກະຕຸ້ນໃຈແລະໃຫ້ກຳລັງໃຈແກ່ປະເທດພວກເຮົາຕະຫຼອດໄປ.ໃນທ້ອງຖິ່ນຕ່າງໆຂອງຈີນ,ເລື່ອງລາວອັນອັດສະຈັນທີ່ກ່ຽວຂ້ອງກໍໄດ້ເລົ່າສືບທອດກັນມາປາກຕໍ່ປາກຕະຫຼອດ.ການເດີນທັບທາງໄກແມ່ນການເຄື່ອນທັບທາງຍຸດທະສາດແນວໃດ?ໃນນັ້ນມີເລື່ອງລະອິດລະອ້ຽວແລະຈັບໃຈຄົນແນວໃດ?ໄດ້ສະແດງໃຫ້ເຫັນນ້ຳໃຈແນວໃດຂອງຊາວຈີນ?
ເວົ້າໂດຍຫຍໍ້ແລ້ວ,ແຕ່ປີ1934ຮອດປີ1936,ເພື່ອຕໍ່ຕ້ານຍີ່ປຸ່ນຜູ້ຮຸກຮານແລະຫຼີກລຽງບໍ່ໃຫ້ເກີດສົງຄາມທີ່ບໍ່ຈຳເປັນລະຫວ່າງກຳລັງທະຫານພາຍໃນປະເທດ,ກອງທັບທີ່ນຳໂດຍພັກກອມມູນິດຈີນ,ເຊິ່ງຕໍ່ມາແມ່ນກອງທັບແດງທີ່ຊື່ສຽງດົ່ງດັງນັ້ນ,ຢູ່ພາຍໃນເວລາສອງປີ,ໄດ້ເຄື່ອນທັບໄປ14ແຂວງຂອງຈີນ,ໄລຍະທາງທັງໝົດ1ໝື່ນ2000ກວ່າກິໂລແມັດ,ປະເຊີນກັບການໂຈມຕີຂອງສັດຕູແລະເງື່ອນໄຂທຳມະຊາດອັນສຸດໂຫດຮ້າຍ,ໄດ້ເຄື່ອນກຳລັງທະຫານອັນສຳຄັນສາມແງ່ຈາກລ້ອງແມ່ນ້ຳຢາງເຊໄປສູ່ເຂດພາກຕາເວັນຕົກສຽງເໜືອທີ່ປອດໄພ,ເຊິ່ງໄດ້ສ້າງເງື່ອນໄຂໃຫ້ແກ່ການດຳເນີນສົງຄາມຕໍ່ຕ້ານຍີ່ປຸ່ນແລະພັດທະນາພາລະກິດປະຕິວັດຂອງຈີນ.ຂະບວນການດັ່ງກ່າວຊາວຈີນກໍເອີ້ນເປັນ"ການເດີນທັບທາງໄກ".
ໄຊຊະນະຂອງການເດີນທັບທາງໄກໄດ້ຮັບນາມມະຍົດເປັນສິ່ງມະຫັດສະຈັນໃນປະຫວັດສາດຂອງມະນຸດ,ແຕ່ໃນສາຍຕາຂອງທ່ານລົວຕົ່ງຈິ້ນ ອະດີດພົນໂທຂອງກອງທັບປຶນໃຫຍ່ທີສອງຂອງກອງທັບປົດປ່ອຍປະຊາຊົນຈີນ,ສິ່ງມະຫັດສະຈັນດັ່ງກ່າວມີຈຸດປະສົງເພື່ອຫຼີກເວັ້ນເສິກກາງເມືອງ ຮັກສາກຳລັງຕົວຈິງແລະຕໍ່ຕ້ານຜູ້ຮຸກຮານຂອງຕ່າງປະເທດ,ແມ່ນກຳເນີດຂຶ້ນໃນແປວໄຟສົງຄາມແລະເງື່ອນໄຂທຳມະຊາດອັນສຸດໂຫດຮ້າຍ,ແລະຕ້ອງທົດແທນດ້ວຍລາຄາແພງຫຼາຍ,ນັ້ນຄືມີຄົນຫຼວງຫຼາຍໄດ້ເສຍສະຫຼະ.ເຖິງວ່າແມ່ນຖືກບັງຄັບກະທຳແບບນີ້,ແຕ່ມັນກໍສ່ອງແສງໃຫ້ເຫັນນ້ຳໃຈອັນສູງສົ່ງ.ທ່ານເວົ້າວ່າ,
ການເດີນທັບທາງໄກໄດ້ສ່ອງແສງໃຫ້ເຫັນຄວາມມຸ່ງຫວັງອັນແຮງກ້າຂອງພັກກອມມູນິດຈີນເຮົາແລະນັກປະຕິວັດລຸ້ນເກົ່າ,ຄືເຮັດແນວໃດກໍຕ້ອງສ້າງຕັ້ງປະເທດທີ່ບໍ່ມີການກົດຂີ່ຂູດຮີດແລະປະຊາຊົນເປັນເຈົ້າ.ເພື່ອອຸດົມຄະຕິດັ່ງກ່າວເຂົາເຈົ້າຍອມເສຍສະຫຼະທຸກສິ່ງທຸກຢ່າງ.ຄິດເບິ່ງແມ້,ເມື່ອການເດີນທັບເລີ່ມຕົ້ນມີຈຳນວນພົນເກືອບ2ແສນຄົນ,ເມື່ອສຳເລັດພາລະກິດ,ກອງທັບແດງກໍເຫຼືອພຽງແຕ່2ໝື່ນ,3ໝື່ນຄົນ,ສ່ວນໃຫຍ່ໄດ້ເສຍຊີວິດໄປແລ້ວ,ເຂົາເຈົ້າໄດ້ຜ່ານຜ່າສະພາບຄວາມໂຫດຮ້າຍຈົນຍາກທີ່ຈະພັນລະນາໄດ້.
ເປັນຫຍັງຈຶ່ງມີຄວາມເສຍຫາຍຢ່າງໜັກໜ່ວງຄືແນວນີ້?ການສູ້ລົບທຸກໆມື້ແມ່ນມູນເຫດຕົ້ນຕໍອັນໜຶ່ງ.ທ່ານຮວງເຄິ້ເຊີງ ນາຍພົນຜູ້ໜຶ່ງຜູ້ສ້າງຕັ້ງປະເທດຈີນໃໝ່,ໃນໄລຍະການເດີນທັບທາງໄກ,ເຄີຍອາໄສສົບຂອງເພື່ອນນັກລົບມາຊີ້ນຳທິດກ້າວໄປໜ້າ,ນາງຮວງເມີຍ ລູກສາວຂອງທ່ານເວົ້າວ່າ,
ພໍ່ເວົ້າວ່າ,ໃນຕອນຕົ້ນຂອງການເດີນທັບທາງໄກ,ບໍ່ມີເຄື່ອງນຸ່ງຂອງກິນ,ທຸກໆມື້ກໍຕ້ອງສູ້ລົບກັບສັດຕູແລະຕ້ອງເຄື່ອນທັບທຸກໆມື້.ເພິ່ນເວົ້າວ່າ,ກໍແມ່ນກ້າວໄປໜ້າຕາມສົບຂອງເພື່ອນນັກລົບ.
ເຖິງແມ່ນແນວນີ້ກໍຕາມ,ກອງທັບຂອງພັກກອມມູນິດຈີນໂດຍສະເພາະແມ່ນຈອມທັບໃນຄາວນັ້ນໄດ້ໃຊ້ສີນລະປະຍຸດຍຸດທະວິທີອັນຄ່ອງແຄ້ວພ້ອມດ້ວຍຄວາມສະຫຼາດແລະຄວາມກ້າຫານຊານໄຊ,ສູ້ລົບກັບສັດຕູຢູ່ເຂດກວ້າງຂວາງຂອງພາກຕາເວັນຕົກສຽງໃຕ້ແລະພາກຕາເວັນຕົກສຽງເໜືອ,ໄດ້ຕີຖອຍສັດຕູນັບເປັນລ້ານຄົນ,ຂ້າມພູຫິມະທີ່ມີອາກາດເບົາບາງ,ຍ່າງຜ່ານຫ້ວຍໜອງຄອງບຶງແລະດິນຫຍ້າທີ່ບໍ່ມີຄົນອາໄສຢູ່,ເຊິ່ງໄດ້ສ້າງບັ້ນລົບທີ່ລືຊາຫຼາຍເທື່ອໃນປະຫວັດການທະຫານຂອງຈີນກໍຄືຂອງໂລກ.
ໃນຖັນແຖວຂອງການເດີນທັບທາງໄກ,ມີທັງຜູ້ເຖົ້າເກືອບ60ປີ,ແລະກໍມີທັງເດັກນ້ອຍພຽງແຕ່9ປີ,ຍັງມີນັກລົບເພດຍິງຈຳນວນຫຼວງຫຼາຍພ້ອມດ້ວຍຜູ້ທີ່ຈົງຮັກພັກດີຕໍ່ລັດທິກອມມູນິດຫຼາຍຄົນຂອງເກົາຫຼີ ຫວຽດນາມແລະເຢຍລະມັນ.ໃນຂະບວນການເດີນທັບທາງໄກ,ຜູ້ນຳຊັ້ນສູງ ຈອມທັບ ນັກສືບຂ່າວຂອງພັກກອມມູນິດຈີນກໍຄືກັນກັບນັກລົບທຳມະດາ,ໃສ່ເກີບຫຍ້າ,ຂາດເຂີນອາຫານ,ນາຍແລະພົນທະຫານໄດ້ຮ່ວມທຸກຮ່ວມສຸກນຳກັນ.ພາຍຫຼັງພັກກອມມູນິດຈີນກຳອຳນາດແລ້ວກໍຍັງສືບຕໍ່ສົ່ງເສີມແບບແຜນແນວນີ້.
ລຸງລິວເຈ່ຍຊິນໄດ້ມີອາຍຸ94ປີແລ້ວ,ລຸງເຄີຍເຂົ້າຮ່ວມການເດີນທັບທາງໄກ,ຈົນຮອດດຽວນີ້,ທ່ານຍັງກ່າວເນັ້ນວ່າ,ໃນຂະບວນການເດີນທັບທາງໄກ,ອຸດົມການເພື່ອສ່ວນລວມແມ່ນຢູ່ເໜືອຜົນປະໂຫຍດສ່ວນຕົວຢ່າງຂາດຕົວ,ລຸງເວົ້າວ່າ,
ບໍ່ວ່າຈະເປັນເຈົ້ານາຍຫຼືບໍ່,ຂໍແຕ່ສາມາດເຮັດວຽກເພື່ອການປະຕິວັດກໍໄດ້ກໍພໍແລ້ວ.
ເມື່ອຫວນຄືນເຖິງການເດີນທັບທາງໄກໃນ70ປີກ່ອນ,ປະຕິເສດບໍ່ໄດ້ວ່າ,ໃນຄາວນັ້ນ,ພັກກອມມູນິດຈີນທີ່ຍັງອ່ອນນ້ອຍນັ້ນເຄີຍເຮັດຜິດພາດໃນດ້ານການວາງນະໂຍບາຍແລະສັບຊ້ອນບຸກຄະລາກອນເປັນຕົ້ນ,ຈົນເຖິງຂັ້ນພາໃຫ້ເສຍໄຊແລະປະສົບຜົນເສຍຫາຍອັນໜັກໜ່ວງ.ແຕ່ວ່າການເດີນທັບເປັນເວລາສອງປີກໍເປັນຂະບວນການທີ່ພັກກອມນິດຈີນແກ້ໄຂຄວາມຜິດພາດຂອງຕົນໄປພ້ອມ.ໃນສາຍຕາຂອງພົນຕີລິວໄທ້ຮາງ ຮອງຫົວໜ້າສະຖາບັນບັນຊາກອງທັບອາກາດປັກກິ່ງ,ນີ້ກໍແມ່ນຈຸດດີເດັ່ນຂອງພັກກອມມູນິດຈີນ.ທ່ານເວົ້າວ່າ,
ຂ້າພະເຈົ້າເຫັນວ່າ,ບໍ່ວ່າແມ່ນພັກການເມືອງຫຼືສ່ວນບຸກຄົນ,ບໍ່ມີຄວາມຜິດພາດຈັກໜ້ອຍແມ່ນສິ່ງທີ່ເປັນໄປບໍ່ໄດ້,ຈຸດດີເດັ່ນກວ່າໝູ່ຂອງພັກກອມມູນິດຈີນບໍ່ແມ່ນຢູ່ນຳການເຮັດຜິດຫຼືບໍ່,ຫາກຢູ່ນຳທ່າທີຂອງພັກທີ່ມີຕໍ່ຄວາມຜິດພາດນີ້,ພະຍາຍາມວິເຄາະວິໄຈເພື່ອແກ້ຄວາມຜິດພາດ.ສະນັ້ນຂ້າພະເຈົ້າຮູ້ສຶກວ່າພັກກອມມູນິດຈີນຍິ່ງໃຫຍ່ທີ່ສຸດ,ເພາະວ່າສາມາດຊອກເຫັນແລ້ວແກ້ຄວາມຜິດພາດຂອງຕົນໄດ້ໄວທີ່ສຸດ.
ຍ້ອນການເດີນທັບທາງໄກມີຄວາມຍິ່ງໃຫຍ່ທີ່ສຸດ,ຈຶ່ງບໍ່ພຽງແຕ່ສ້າງກຳລັງຈິດໃຈຢ່າງຫຼວງຫຼາຍໃນໃຫ້ແກ່ປະຊາຊົນຈີນເທົ່ານັ້ນ,ແຕ່ຍັງປຽບເໝືອນເທບນິຍາຍສະຫງ່າງາມແລະອົງອາດທີ່ສຸດ,ຊື່ສຽງໄດ້ໂດ່ງຂ້າມທຸກຍຸກສະໄໝແລະເຜີຍແຜ່ຢ່າງກວ້າງຂວາງໄປໃນທົ່ວໂລກ.ຈົນກະທັ້ງໄດ້ດຶງດູດຊາວຈີນແລະຊາວຕ່າງປະເທດນັບມື້ນັບຫຼາຍເດີນຕາມທາງເດີນທັບໃນເມື່ອກ່ອນເພື່ອໄປສຳຜັດກັບນ້ຳໃຈແລະຮ່ອງຮອຍທີ່ຈົງຮັກພັກດີຕໍ່ອຸດົມການ,ໄປຊອກຮູ້ເລື່ອງທີ່ກະຕຸ້ນໃຈຄົນທັງຫຼາຍ.
|
