|
ທ່ານຜູ່ຟັງທີ່ໂຄລົບ, ໃນພາສາອັງກິດເອິ້ນຈີນວ່າ, ເປັນດິນແດນແຫ່ງເຄື່ອງປັ້ນດິນເຜົາ, ທົ່ວໂລກໄດ້ຮູ້ຈັກຈີນໂດຍຜ່ານເຄື່ອງປັ້ນດິນເຜົາ. ສຳລັບເຄື່ອງປັ້ນດິນເຜົາທີ່ຜະລິດຢູ່ແຫ່ງຕ່າງໆຂອງຈີນນັ້ນ, ເຄື່ອງທີ່ຜະລິດຢູ່ເມືອງຈີງເຕີເຈີ້ນມີຊື່ສຽງດົງດັງກວ່າໝູ່, ໄດ້ຮັບຄວາມນິຍົມຊົມເຊີຍອັນກວ້າງຂວາງຍ້ອນຄຸນນະພາບ. ຫວ່າງແລ້ວນນີ້, ນັກຂ່າວວິທະຍຸພວກເຮົາໄດ້ໄປເອົາຂ່າວຢູ່ເມືອງນ້ອຍທີ່ມີປະຫວັດຜະລິດມາເປັນພັນປີແລ້ວ. ສະນັ້ນ, ໃນລາຍການແຈ້ງຂ່າວເສດຖະກິດຈີນມື້ນີ້, ພວກເຮົາຈະພາທ່ານໄປຮູ້ຈັກກັບເມືອງຈີງເຕີເຈີ້ນທີ່ກ້າວຂຶ້ນສູ່ເສັ້ນທາງພັດທະນາໃໝ່.
ທ່ານຜູ້ຟັງ, ເມື່ອໄດ້ຍິນດົນຕີນີ້, ທ່ານອາດຈະຄິດວ່າ, ນີ້ກໍ່ເປັນພຽງດົນຕີພື້ນເມືອງທຳມະດາຂອງຈີນເທົ່ານັ້ນ, ແຕ່ຖ້າເຮົາບອກທ່ານວ່າ, ເຄື່ອງເສບດົນຕີດັ່ງກ່າວນີ້ລ້ວນແຕ່ແມ່ນເຄື່ອງປັ້ນດິນເຜົາ, ທ່ານອາດຈະຮູ້ສຶກປະຫຼາດໃຈຂຶ້ນມາທັນທີ. ຢູ່ເມືອງຈີງເຕີເຈີ້ນ, ພວກເຮົາໄດ້ເຫັນວັດທະນະທຳເຄື່ອງປັ້ນດິນເຜົາໄດ້ຊຶມເລິກເຂົ້າໃນທຸກສິ່ງທຸກຢ່າງຂອງວິຖີຊີວິດເມືອງນີ້. ປະຊາຊົນຢູ່ເມືອງນີ້ເອກອ້າງທະນົງຕົວຍ້ອນຕົນເປັນຄົນເມືອງຈີງເຕີເຈີ້ນ, ສ່ວນເສດຖະກິດຂອງເມືອງບູຮານທີ່ມີປະຫວັດສາດພັນປີນີ້ກໍ່ພັດທະນາໂດຍປິ່ນອ້ອມເຄື່ອງປັ້ນດິນເຜົາເມືອງຈີງເຕີເຈີ້ນ ເຊິ່ງເປັນຍີ່ຫໍ້ທີ່ມີຊື່ສຽງໂດ່ງ ດັງ.
ເມືອງຈີງເຕີເຈີ້ນຕັ້ງຢູ່ເຂດຕາເວັນອອກສຽງເໜືອແຂວງຈຽງຊີຢູ່ພາກກາງຂອງຈີນ, ຂີ້ດິນຢູ່ທີ່ແຫ່ງນັ້ນເໝາະສຳລັບການຜະລິດເຄື່ອງດິນເຄືອບ. ນອກຈາກນີ້, ເມືອງນີ້ອ້ອມໂດຍພູຜາທີ່ຂຽວສົດງົດງາມ, ຢູ່ເຖິງພູເຕັມໄປດ້ວຍຕົ້ນແປກຂຽວສະອຸ່ມ. ໃນຕົ້ນແປກມີນ້ຳມັນແປກທີ່ໃຊ້ເປັນເຊື້ອໄຟ, ຄວາມຮ້ອນຂອງໄຟໃນເຕົາທີ່ເຜົາເຄື່ອງດິນເຄືອບນັ້ນສູງເຖິງ 1 ພັນ 300 ກວ່າອົງສາ, ຈະເຜົາເຄື່ອງດິນກ້ຽງລະອຽດທີ່ມີວັດຖຸເຄືອບສິຂາວຢູ່ໜ້າເຄື່ອງ, ໃນນັ້ນ, ເຄື່ອງດິນເຄືອບຊີງຮວາທີ່ມີລາຍດອກສີຟ້າເປັນສິ່ງຍອດຢ້ຽມທີ່ສຸດ. ເງື່ອນໄຂທຳມະຊາດດີລື່ນໝູ່ທຳມະຊາດໄດ້ສ້າງພື້ນຖານທາງວັດຖຸດິບອັນດີແກ່ການຜະລິດເຄື່ອງປັ້ນດິນເຜົາ. ກ່ອນນີ້ພັນກວ່າປີ, ໃນສະໄໝລາຊະວົງຊົ້ງຂອງຈີນມີເຈົ້າຊີວິດອົງໜຶ່ງເຫັນເຄື່ອງປັ້ນດິນເຜົາອັນໜຶ່ງທີ່ຜະລິດຢູ່ນີ້ມີສີສັນລວດລາຍງາມລຽບໆແລະວັດຖຸທີ່ເຄືອບກໍ່ກ້ຽງລະອຽດດີ, ພະອົງມັກຈົນບໍ່ຢາກວາງ, ເລີຍຕັ້ງຊື່"ຈີງເຕີ" ຊື່ປີຂອງເຈົ້າຊີວິດອົງນີ້ເປັນຊື່ຂອງເຄື່ອງປັ້ນດິນເຜົາຊະນິດທີ່ຜະລິດຢູ່ເມືອງນີ້, ນີ້ກໍ່ແມ່ນຄວາມເປັນມາຂອງເມືອງຈີງເຕີເຈີ້ນ ເມືອງເຄື່ອງປັ້ນດິນເຜົາພັນປີ.
ແຕ່ນັ້ນມາ, ເຄື່ອງປັ້ນດິນເຜົາເມືອງຈີງເຕີເຈີ້ນໄດ້ມີຊື່ສຽງດົ່ງດັງຂຶ້ນ, ມັນບໍ່ພຽງແຕ່ເປັນເຄື່ອງໃຊ້ທີ່ຟຸມເຟືອຫຼູຫຼາສະຈຳເພາະຂອງຂຸນນາງທຸກລາຊະວົງຂອງຈີນທໍ່ນັ້ນ, ແຕ່ຫາກຍັງກາຍເປັນສິນຄ້າຂາຍດິບຂາຍດີໃນການຄ້າຕາມທາງສາຍໄໝຢູ່ເທິງທະເລໃນສະໄໝບູຮານ. ປັດຈຸບັນ, ຢູ່ໃນຫໍພິພິດທະພັນໃຫຍ່ແຫ່ງຕ່າງໆຂອງໂລກ, ທ່ານກໍ່ຈະໄດ້ເຫັນເຄື່ອງປັ້ນດິນເຜົາເມືອງຈີງເຕີເຈີ້ນອັນປານີດ.
ແຕ່ໃນບໍ່ເທົ່າໃດປີມານີ້, ກໍ່ຄືກັນກັບຜະລິດຕະພັນຍີ່ຫໍ້ເກົ່າຫຼວງຫຼາຍຂອງຈີນ, ການຜະລິດເຄື່ອງປັ້ນດິນເຜົາເມືອງຈີງເຕີເຈີ້ນກໍ່ໄດ້ຖືກກະທົບແລະທ້າທາຍ, ເກີດມີບັນຫາຕ່າງໆ, ຄື, ເອົາໃຈໃສ່ຕໍ່ຍີ່ຫໍ້ຫຼາຍປານໃດ, ຊະນິດຂອງຜະລິດຕະພັນໜ້ອຍໂພດແລະການຫຸ້ມຫໍ່ມັກງ່າຍໂພດເປັນຕົ້ນ, ໃນນັ້ນ, ສິ່ງທີ່ຮ່າຍແຮງກວ່າໝູ່ນັ້ນແມ່ນສິນຄ້າປອມແປງແລະສິນຄ້າລັກລອກແບບມີຢູ່ທົ່ວທີບ.
ໃນເວລາເວົ້າເຖິງສະພາບການດັ່ງກ່າວ, ທ່ານຮວາງຄາງມິງ ຫົວໜ້າຂະແໜງເຄື່ອງປັ້ນດິນເຜົາເມືອງຈິງເຕີເຈີ້ນຮູ້ສຶກເສຍໃຈທີ່ສຸດ.ທ່ານເວົ້າວ່າ, " ໃນບໍ່ເທົ່າໃດປີຜ່ານມາ, ພວກຂ້າພະເຈົ້າຮູ້ສຶກເສຍອົກເສຍໃຈຍ້ອນລະບຽບຕະຫຼາດສັບສົນ ສິນຄ້າປອມແປງແລະລັກລອກແບບມີຢູ່ທົ່ວທີບ. ແຕ່ປີ 2001 ມານີ້, ຢູ່ຕ່າງປະເທດໄດ້ຈັດໃຫ້ມີງານວາງສະແດງຊື້ຂາຍເຄື່ອງປັ້ນດິນເຜົາເມືອງຈິງເຕີເຈີ້ນຫຼວງຫຼາຍທີ່ບໍ່ເປັນລະບຽບ. ແຕ່ເຄື່ອງປັ້ນດິນເຜົາທີ່ວາງສະແດງແລະຂາຍໃນງານວາງສະແດງດັ່ງກ່າວນີ້ຊ້ຳພັດບໍ່ແມ່ນເຄື່ອງປັ້ນດິນເຜົາທີ່ຜະລິດຢູ່ເມືອງຈິງເຕີເຈີ້ນ, ແຕ່ໃສ່ຊື່ຂອງເມືອງຈິງເຕີເຈີ້ນ. ການເຮັດແນວນີ້ໄດ້ທຳລາຍຊື່ສຽງຂອງເຄື່ອງປັ້ນດິນເຜົາເມືອງຈີງເຕີເຈີ້ນຢ່າງໜັກໜ່ວງ."
ສຳລັບການກະທຳລ່ວງລ້ຳສິດເຫຼົ່ານີ້, ເມືອງຈິງເຕີເຈີ້ນໄດ້ມີການເຄື່ອນໄຫວແລ້ວ, ຄື, ໃນຫຼາຍປີມານີ້, ຂະແໜງການຄຸ້ມຄອງອຸດສາຫະກຳແລະການຄ້າແລະຂະແໜງຍຸດຕິທຳຂອງເມືອງນີ້ໄດ້ຮ່ວມມືໃຊ້ກົດໝາຍເພື່ອແກ້ໄຂການກະທຳຜິດໃນການປອມແປງແລະລັກລອກແບບຂອງເຄື່ອງປັ້ນດິນເຜົາເມືອງຈິງເຕີເຈີ້ນ. ສານຂອງເມືອງດັ່ງກ່າວໄດ້ຕັ້ງຄະນະ"ສານປົກປັກຮັກສາສິດຊັບສິນທາງປັນຍາ"ໂດຍສະເພາະ. ໃນ 5 ປີຜ່ານມາ, ໄດ້ຕັດສິນຄະດີລ່ວງລ້ຳສິດຂອງເຄື່ອງປັ້ນດິນເຜົາຂອງເມືອງຈິງເຕີເຈີ້ນ 200 ກວ່າຄະດີ, ເຮັດໃຫ້ການຕະຫຼາດຫັນເຂົ້າສູ່ລະບຽບ.
ໄລຍະຊຸມປີ 1990 ແມ່ນໄລຍະທີ່ການພັດທະນາຂອງເຄື່ອງປັ້ນດິນເຜົາເມືອງຈິງເຕີເຈີ້ນຕົກຕ່ຳທີ່ສຸດ. ໃນຄາວນັ້ນ, ວິສາຫະກິດສ່ວນຫຼາຍລ້ວນແຕ່ຜະລິດເຄື່ອງປັ້ນດິນເຜົາຂອງຍີ່ຫໍ້ຊື່ດັງຂອງຕ່າງປະເທດ, ຕິດຍີ່ຫໍ້ຂອງເຂົາເຈົ້າ, ໝາຍຄວາມວ່າ, ບໍ່ມີຍີ່ຫໍ້ຂອງຕົນ. ມູນຄ່າເພີ່ມຂອງຜະລິດຕະພັນຕ່ຳທີ່ສຸດ, ຜົນກຳໄລຂອງວິສາຫະກິດກໍ່ຕົກຕ່ຳ. ເພື່ອປ່ຽນແປງສະພາບດັ່ງກ່າວນີ້, ກ່ອນນີ້ຫຼາຍປີ, ໂຮງງານຜະລິດເຄື່ອງປັ້ນດິນເຜົາຂະໜາດອ່າວໃຫຍ່ 5 ໂຮງງານຢູ່ເມືອງຈິງເຕີເຈີ້ນໄດ້ຮ່ວມສຳພັນກັນສ້າງຕັ້ງບໍລິສັດເຄື່ອງປັ້ນດິນເຜົາຫຸ້ນສ່ວນຈຳກັດໃຫຍ່ກວ່າໝູ່ໃນເມືອງນັ້ນ. ບໍລິສັດຕົກລົງຜະລິດເຄື່ອງປັ້ນດິນເຜົາທີ່ໃຊ້ໃນຊີວິດປະຈຳວັນຊັ້ນສູງພ້ອມທັງຄົ້ນຄວ້າອອກແບບຜະລິດເຄື່ອງປັ້ນດິນເຜົາທີ່ມີລວດລາຍສີສັນ. ເວລານັ້ນເປັນຕົ້ນມາ, ບໍ່ຜະລິດເຄື່ອງປັ້ນດິນເຜົາຂອງຍີ່ຫໍ້ຕ່າງປະເທດອີກ, ແຕ່ຜະລິດເຄື່ອງປັ້ນດິນເຜົາຍີ່ຫໍ້ຕົນເອງສົ່ງຂາຍຢູ່ຕ່າງປະເທດ.
ເມື່ອເວົ້າເຖິງການສ້າງຍີ່ຫໍ້, ທ່ານຢຸຍກົວຊີ້ງ ເຈົ້າເມືອງຈິງເຕີເຈີ້ນໄດ້ສະແດງຄວາມຮູ້ສຶກວ່າ, " ພຶດຕິກຳໄດ້ຢັ້ງຢືນໃຫ້ເຫັນວ່າ, ການຍືດໜັ້ນຍີ່ຫໍ້ຢ່າງໝັ້ນຄົງນັ້ນມີຜົນດີຕໍ່ວິສາຫະກິດຍົກສູງຄວາມສາມາດໃນການແຂ່ງຂັນຢູ່ໃນຕະຫຼາດຢ່າງບໍ່ຢຸດຢັ້ງ, ມີຜົນດີຕໍ່ວິສາຫະກິດໃນການຍົກສູງຄຸນນະພາບຂອງຜະລິດຕະພັນແລະຊື່ສຽງຂອງວິສາຫະກິດຢ່າງບໍ່ຢຸດຢັ້ງ, ພ້ອມກັນນັ້ນ, ຍັງມີຜົນດີຕໍ່ຜູ້ບໍລິໂພກອັນໄພສານໃນການປົກປ້ອງຜົນປະໂຫຍດຂອງຕົນຕາມກົດໝາຍ."
ແຕ່ວ່າ, ມີຍີ່ຫໍ້ແລ້ວຍັງບໍ່ພໍ້ເທື່ອ, ຖ້າຢາກຊະນະໃນການແຂ່ງຂັນຕະຫຼາດອັນດຸເດືອນັ້ນ, ສຳຄັນກວ່າໝູ່ຍັງຕ້ອງອາໄສຄຸນນະພາບຂອງຜະລິດຕະພັນ. ເພື່ອເຮັດໃຫ້ຜະລິດຕະພັນໄດ້ມາດຖານສາກົນໃນປັດຈຸບັນ, ວິສາຫະກີດທີ່ຜະລິດເຄື່ອງປັ້ນດິນເຜົາຢູ່ເມືອງຈີງເຕີເຈີ້ນໄດ້ຄົ້ນຄວ້າເຕັກໂນໂລຊີຜະລິດຊະນິດໃໝ່ຊະນິດໜຶ່ງ. ເຕັກໂນໂລຊີໃໝ່ນີ້ຈະເຮັດໃຫ້ເຄື່ອງປັ້ນດິນເຜົາບໍ່ພຽງແຕ່ຮັກສາສີງາມສົດໃສທໍ່ນັ້ນ, ຍັງບໍ່ມີສານເຄມີທີ່ມີຜົນຮ້າຍຕໍ່ຄົນອີກດ້ວຍ.
ເມື່ອເວົ້າເຖິງການປະດິດສ້າງໃໝ່ດັ່ງກ່າວນີ້, ທ່ານຫວາງຢ້າວ ຜູ້ອຳນວຍ ການໃຫຍ່ບໍລິສັດເຄື່ອງປັ້ນດິນເຜົາເມືອງຈິງເຕີເຈີ້ນຫຸ້ນສ່ວນຈຳກັດເວົ້າວ່າ, " ປັດຈຸບັນ, ສຳລັບເຄື່ອງປັ້ນດິນເຜົາທີ່ນຳເຂົ້ານັ້ນ, ສະຫະພາບເອີລົບໄດ້ຍົກສູງມາດຕະຖານຄຸນນະພາບ, ໃນນ້ຳລະລາຍແຕ່ລະລິດ, ປະລິມານທາດຊືນຕ້ອງຕ້ອງຕ່ຳກວ່າ 0,2 ມີລີກຼາມ, ສ່ວນປະລິມານຊືນທີ່ຢູ່ໃນເຄື່ອງປັ້ນດິນເຜົາກາໃບໄມ້ແດງຂອງພວກເຮົາມີພຽງ 0,01 ມີລີກຼາມທໍ່ນັ້ນ. ຕ່ຳກວ່າມາດຖານຂອງສະຫະພາບເອີລົບຢ່າງຫຼວງຫຼາຍ. ສະນັ້ນ, ເວົ້າໄດ້ວ່າ, ໃນດ້ານຄວາມປອດໄພຂອງເຄື່ອງປັ້ນດິນເຜົາ, ພວກເຮົາເຮັດໄດ້ດີແລ້ວ."
ນອກຈາກເຄື່ອງປັ້ນດິນເຜົາທີ່ໃຊ້ໃນຊີວິດປະຈຳວັດທີ່ຜະລິດຢ່າງຊຳນີຊຳນານແລ້ວ, ຜະລິດຂອງເມືອງຈິງເຕີເຈີ້ນໄດ້ປະດິດສ້າງຢ່າງບໍ່ຢຸດຢັ້ງ, ເລີ່ມເຂົ້າສູ່ຂົງເຂດຕ່າງໆທີ່ຕະຫຼາດຕ້ອງການຫຼາຍກວ່າແລະອະນາຄົດກວ້າງກວ່າ ຄື, ເຄື່ອງປັ້ນດິນເຜົາທີ່ໃຊ້ເປັນວັດສະດຸກໍ່ສ້າງແລະສິລະປະເປັນຕົ້ນ. ນອກນັ້ນ, ເຄື່ອງຊະນິດໃໝ່ກໍ່ຄົ້ນຄວ້າອອກມກ, ເຊັ່ນ, ເຄື່ອງປັ້ນດິນເຜົາ ກັນຄວາມຮ້ອນຢູ່ໃຊ້ຜະລິດຍານອາວະກາດບັນທຸກຄົນເຊີນໂຈວເລກ 6 ເຄື່ອງປັ້ນດິນເຜົາປ້ອງກັນລະເມີດລູກປືນແລະເຄື່ອງປັ້ນດິນເຜົາເຮັດເປັນເຄື່ອງດົນຕີເປັນຕົ້ນ.
ຢູ່ເມືອງຈິງເຕີເຈີ້ນມີໂຮງຮຽນຊັ້ນສູງແຫ່ງໜຶ່ງທີ່ມີນັກສຶກສາເກືອບໝື່ນຄົນ, ຊື່ວ່າ, ສະຖາບັນເຄື່ອງປັ້ນດິນເຜົາເມືອງຈິງເຕີເຈີ້ນ, ໄດ້ສ້າງຜູ້ມີຄວາມຮູ້ຄວາມສາມາດວິຊາສະເພາະໃຫ້ແກ່ວິສາຫະກິດຜະລິດເຄື່ອງປັ້ນດິນເຜົາແຫ່ງຕ່າງໆຂອງຈີນຢ່າງຫຼວງຫຼາຍ. ວິສາຫະກິດຜະລິດເຄື່ອງປັ້ນດິນ ເຜົາເມືອງຈິງເຕີເຈີ້ນບໍ່ພຽງແຕ່ຈະເລືອກເອົາຜູ້ມີຄວາມຮູ້ຄວາມສາມາດທີ່ຖືກໃຈທໍ່ນັ້ນ, ຫາກຍັງຫັນໝາກຜົນການຄົ້ນຄວ້າທາງວິທະຍາສາດຂອງສະຖາບັນເປັນຜະລິດຕະພັນຢ່າງວ່ອງໄວອີກດ້ວຍ. ທ່າແຮງນີ້ໄດ້ເຮັດໃຫ້ພວກເຮົາຈະໄດ້ເຫັນອຸດສາຫະກຳຜະລິດເຄື່ອງປັ້ນດິນເຜົາຂອງເມືອງຈິງເຕີເຈີ້ນມີ ອະນາຄົດອັນຈົບດີກວ່າເກົ່າ.
|
