|
ທີ່ນີ້,ວິທະຍຸສາກົນແຫ່ງປະເທດຈີນ,ສະບາຍດີ,ທ່ານຜູ້ຟັງທີ່ເຄົາລົບ,ຍິນດີຕ້ອນຮັບທ່ານເຂົ້າສູ່ລາຍການ"ຂົວທາງອາກາດ",ມື້ນີ້ດວງພະຈັນເປັນຜູ້ດຳເນີນລາຍການ.
ຫວ່າງມໍ່ໆນີ້,ພວກເຮົາໄດ້ຮັບຈົດໝາຍຈາກວັດອົງຕື້ມະຫາວິຫານ ເມືອງຈັນທະບູລີ ນະຄອນຫຼວງວຽງຈັນ,ຜູ້ຂຽນຈົດໝາຍສະບັບນີ້ແມ່ນພະສົງໃນວັດແຫ່ງນີ້ທີ່ມີຊື່ວ່າພະພູມມະລິນ ທຳມະວົງ.ໃນຈົດໝາຍ,ເພິ່ນຂຽນວ່າ: ອາດຕະມາໄດ້ຕິດຕາມຮັບຟັງລາຍການຕ່າງໆຈາກສະຖານີວິທະຍຸກະຈາຍສຽງສາກົນແຫ່ງປະເທດຈີນພາກພາສາລາວມາເປັນເວລາຫຼາຍປີແລ້ວ,ໃນນັ້ນ,ລາຍການທີ່ອາດຕະມາສົນໃຈເປັນພິເສດແມ່ນລາຍການສອນພາສາຈີນ,ລາຍການສອນພາສາຈີນຂອງພວກທ່ານແມ່ນດີຫຼາຍ,ເພາະວ່າການທີ່ສາມາດຮັບຮູ້ພາສາໃດໜຶ່ງໄດ້ແມ່ນເຮົາຈະສາມາດຮັບຮູ້ເລິກເຊິ່ງເຖິງຂະໜົບທຳນຽມ ຮີດຄອງປະເພນີຕະຫຼອດຮອດວັດທະນະທຳອັນດີງາມນຳອີກດ້ວຍ,ຍ້ອນຄວາມຈຳເປັນດັ່ງກ່າວຈຶ່ງເຮັດໃຫ້ອາດຕະມາສົນໃຈຟັງລາຍການສອນພາສາຈີນເປັນພິເສດ.ດັ່ງນັ້ນ,ອາດຕາມາຈຶ່ງຢາກໄດ້ຄຳແນະນຳຈາກພວກທ່ານເປັນພິເສດກ່ຽວກັບການຮຽນພາສາຈີນແລະພິເສດໄປກວ່ານັ້ນແມ່ນຢາກຮຽນຮູ້ຄຳສັບພາສາຈີນກ່ຽວກັບທາງດ້ານສາດສະໜາແລະວັດວາອາຮາມ."
ໃນເວລາຄົ້ນຄວ້າຫຼັກທຳຢູ່ໃນວັດ,ພະພູມມະລິນ ທຳມະວົງຍັງຕິດຕາມຮັບຟັງລາຍການຂອງພວກເຮົາໂດຍຕະຫຼອດ,ແລະສົນໃຈນຳວັດທະນະທຳຈີນແລະພາສາຈີນ,ເຮັດໃຫ້ພວກເຮົາຮູ້ສຶກດີໃຈຫຼາຍ.ໂດຍຜ່ານຈາກການຮັບຟັງລາຍການ"ສອນພາສາຈີນ"ຂອງພວກເຮົາ,ເຊື່ອວ່າທ່ານຈະສາມາດຮຽນຮູ້ການອອກສຽງພື້ນຖານຂອງພາສາຈີນ,ເມື່ອໄດ້ມີພື້ນຖານນີ້ແລ້ວ,ຍັງຕ້ອງລົມກັບຄົນຈີນເລື້ອຍໆ,ຟັງໃຫ້ຫຼາຍ,ແລະຝຶກເວົ້າເລື້ອຍໆ,ຈິ່ງຈະສາມາດມີຄວາມກ້າວໜ້າເວົ້າພາສາຈີນເກັ່ງ,ຮຽນພາສາໃດກໍ່ຕ້ອງເອົາໃຈໃສ່ບັນຫາຄືກັນ.ສ່ວນຄຳສັບທາງພຸດທະສາດສະໜາໃນພາສາຈີນນັ້ນ,ພວກເຮົາຈະພະຍາຍາມຮຽບຮຽງໂດຍໄວ,ເພື່ອຕອບສະໜອງຄວາມຕ້ອງການຂອງທ່ານ.
ໃນຕອນທ້າຍລາຍການມື້ນີ້,ພວກເຮົາມາຟັງເພັງມ່ວນໆເພັງໜຶ່ງທີ່ຂັບຮ້ອງໂດຍທ່ານລີວເຕີຮວາ ດາລາຮ້ອງເພງແລະຮູບເງົາຂອງຮົງກົງຈີນ,ເພງນີ້ຊື່ວ່າ"ກວນຊື້ອິ່ນ",ແປວ່າ"ພະໂພທິສັດ",ເຊີນຟັງໄດ້ເລີຍ.
|
