|
ເມື່ອມາຮອດຕອນຄ່ຳແນວນີ້,ລາຍການ"ຂົວທາງອາກາດ"ໄດ້ວຽນມາພົບກັບທ່ານອີກຕາມເຄີຍ,ພວກເຮົາມາລົມມາຟັງເພງມ່ວນໆນຳກັນ,ຫວັງວ່າຄົງຈະເຮັດໃຫ້ທ່ານຢອນອາລົມຫຼັງເຮັດວຽກຕະຫຼອດມື້ໄດ້. ຫວ່າງມໍ່ໆນີ້,ນ້ອງສົມຫວັງ ອູຄຳຫຼ້າ ທີ່ໂຮງຮຽນມັດທະຍົມສົມບູນ ເທດສະບານແຂວງຫຼວງນ້ຳທາໄດ້ຝາກຈົດໝາຍມາຍັງພວກເຮົາໂດຍຂຽນ່ວ່າ,"ປີ 1990,ແມ່ນປີທີ່ນ້ອງໄດ້ຮັບສັນຍານຄື້ນວິທະຍຸຈາກ CRI ຄັ້ງທຳອິດ.ເວລານັ້ນ,ອາຍຸຂອງນ້ອງກໍ່ໄດ້ 10 ຂວບພໍດີແລະນ້ອງຫາກໍ່ຮຽນຢູ່ຊັ້ນປະຖົມປີທີ 3,ໃນຍາມຮ້ອນ,ນ້ອງມັກໄປນັ່ງຕາກອາກາດນຳພໍ່ຢູ່ນອກເຮືອນແລະກໍ່ມັກຟັງວິທະຍຸໄປນຳ.ເມື່ອໝູນຄື້ນວິທະຍຸໄປມາກໍ່ໄດ້ຍິນສຽງເວົ້າພາສາລາວຈ້ອຍໆ,ຄິດວ່າແມ່ນສະຖານີວິທະຍຸວຽງຈັນ,ເມື່ອຟັງໄປຟັງມາກໍໄດ້ຍິນປະກາດປິດສະຖານີວ່າ,ແມ່ນວິທະຍຸສາກົນແຫ່ງປະເທດຈີນພາກພາສາລາວ.ນ້ອງຍັງລົມກັບພໍ່ວ່າຕ້ອງແມ່ນຄົນລາວຍົກຍ້າຍໄປຢູ່ຈີນຫຼືວ່າໄປເຮັດວຽກຢູ່ຈີນເປັນຜູ້ຈັດລາຍການ,ເພາະວ່າຟັງສຽງຄືຄົນລາວອ້ອຍຕ້ອຍ,ບໍ່ນຶກບໍ່ຝັນເລີຍວ່າ,ພວກອ້າຍເອື້ອຍຄົນຈີນຈະເວົ້າພາສາລາວເກັ່ງປານນີ້.ມາເຖິງປະຈຸບັນກໍ່ເປັນເວລາເກືອບ 10 ປີແລ້ວທີ່ນ້ອງໄດ້ເປັນມິດລາຍການຂອງ CRI,ສິ່ງໜຶ່ງທີ່ໜ້າປະທັບໃຈທີ່ສຸດແມ່ນການສອນພາສາຈີນຂອງ CRI,ເມື່ອຮຽນແລ້ວ,ກໍ່ສາມາດເວົ້າພາສາຈີນຖາມສະບາຍດີກັບເພື່ອນຄົນຈີນທີ່ໄປເຮັດວຽກຢູ່ບ້ານຂອງນ້ອງໄດ້." ໃນຈົດໝາຍ,ນ້ອງສົມຫວັງໄດ້ເລົ່າປະຫວັດການທີ່ນ້ອງຮັບຟັງລາຍການຂອງCRI,ຂອບໃຈນ້ອງຫຼາຍໆທີ່ຕິດຕາມຮັບຟັງລາຍການຂອງພວກເຮົາມາໂດຍຕະຫຼອດ,ແລະໄດ້ຕີລາຄາສູງຕໍ່ລາຍການຂອງພວກເຮົາ.
ອີງຕາມຄວາມຕ້ອງການກ່ຽວກັບຮຽນພາສາຈີນຂອງຜູ້ຟັງທັງຫຼາຍ,ໃນຕໍ່ໜ້າ,ພວກເຮົາຍັງຈະເຮັດລາຍການສອນພາສາຈີນຊຸດໃໝ່,ເພື່ອຖືກກັບຄວາມນິຍົມຊົມຊອບຂອງທ່ານ. ເອົາລະ,ໃນຕອນທ້າຍລາຍການມື້ນີ້,ພວກເຮົາຂໍຈັດເພງມ່ວນໆເພງໜຶ່ງມອບໃຫ້ນ້ອງສົມຫວັງແລະຜູ້ຟັງທຸກທ່ານທີ່ພວມຟັງລາຍການຢູ່ໃນຂະນະນີ້
,ເພງນີ້ມີຊື່ວ່າ"ເຈ້ປູ້ຕ້ຽວ",ແປວ່າ"ລະຖິ້ມບໍ່ໄດ້",ແລະກໍ່ຫວັງວ່າມິດລາຍການຄົງຈະບໍ່ປະຖິ້ມພວກເຮົາຕະຫຼອດໄປ.
|
