|
ກ່ອນຄິດຕະສັງກາດ 475 ປີ, ຈີນເລີ່ມກ້າວເຂົ້າສູ່ສະໄໝຈ້ານໂກ. ກໍ່ແມ່ນເລີ່ມແຕ່ປີນີ້ເປັນຕົ້ນໄປ, ປະຫວັດສາດຈີນເລີ່ມກ້າວເຂົ້າສູ່ສັງຄົມສັກດິນາ. ໃນສະໄໝຈ້ານໂກ, ຊົນຊັ້ນເຈົ້າທີ່ດິນທີ່ປະກົດຕົວໃໝ່ມີອິດທິພົນດ້ານເສດຖະກິດນັບມື້ນັບໃຫຍ່. ພວກເຂົາເຈົ້າຮຽກຮ້ອງໃຫ້ຍຸບສິດພິເສດຂອງຂຸນນາງເຈົ້າທາດ, ພັດທະນາເສດຖະກິດສັກດິນາ, ສ້າງຕັ້ງພະເດັດການຂອງຊົນຊັ້ນເຈົ້າທີ່ດິນ. ລັດຕ່າງໆໃນຄາວນັ້ນກໍຄິດຢາກດຳເນີນການປະຕິຮູບ, ເພື່ອເຮັດໃຫ້ລັດຕົນເອງເຂັ້ມແຂງ. ໃຕ້ການຊຸກຍູ້ຂອງຊົນຊັ້ນເຈົ້າທີ່ດິນ, ລັດຕ່າງໆໄດ້ດຳເນີນການປະຕິຮູບທີ່ມີລັກສະນະການປະຕິຮູບການເມືອງຂອງຊົນຊັ້ນເຈົ້າທີ່ດິນ. ໃນນັ້ນ ການປະຕິຮູບຊ່າງຢ່າງຂອງລັດສິນແມ່ນການປະຕິຮູບຄັ້ງໜຶ່ງທີ່ດຳເນີນຢ່າງເຖິງກົກເຖິງຮາກສົມຄວນ.
ລັດສິນຕັ້ງຢູ່ແຖບແຂວງສານຊີ່ຂອງຈີນໃນທຸກວັນນີ້, ມີປະຊາກອນໜ້ອຍ, ເສດຖະກິດກໍ່ຫຼ້າຫຼັງກວ່າລັດອື່ນໆ. ໃນເວລາສິນຊ້ຽວກົ່ງຂຶ້ນເປັນລາຊາລັດສິນ, ພະອົງບຸກບຶນສູ້ຊົນ, ແລະຊົງຕັດສັ່ງໃຫ້ຊອກຫາຜູ່ມີຄວາມຮູ້ຄວາມສາມາດ.
ຊ່າງຢ່າງແມ່ນຂຸນນາງທີ່ຊຸດໂຊມລົງແລ້ວຂອງລັດເວິ້ຍ ອີກລັດໜຶ່ງໃນຄາວນັ້ນ. ຍ້ອນຊ່າງຢ່າງຢູ່ລັດເວິ້ຍບໍ່ໄດ້ຖືກແຕ່ງຕັ້ງໃຫ້ດຳລົງຕຳແໜ່ງສຳຄັນ, ເມື່ອໄດ້ຮູ້ວ່າລາຊາລັດສິນຊອກຫາຜູ່ມີຄວາມຮູ້ຄວາມສາມາດ, ເພິ່ນເລີຍໄປຮອດລັດສິນ. ສິນຊ້ຽວກົ່ງ ລາຊາລັດສິນໄດ້ພົບປະກັບຊ່າງຢ່າງ, ແລະຫາລືກັບຊ່າງຢ່າງກ່ຽວກັບວິທີສ້າງສາໃຫ້ລັດຮັ່ງມີໃຫ້ກອງທັບເຂັ້ມແຂງ, ສິນຊ້ຽວກົ່ງຫາລືກັບຊ່າງຢ່າງຫຼາຍມື້ກໍ່ບໍ່ຮູ້ສຶກອິດເມື່ອຍ, ພະອົງຊົງເຫັນດີນຳແນວທາງການປະຕິຮູບຂອງຊ່າງຢ່າງທີ່ສຸດ. ສິນຊ້ຽວກົ່ງຮຽກໂຮມເສນາບໍດີທັງຫຼາຍເພື່ອປຶກສາຫາລືດຳເນີນການປະຕິຮູບ, ແຕ່ເສນາບໍດີທີ່ຕາງໜ້າໃຫ້ອິດທິກຳລັງຂຸນນາງຄອງເດີມໄດ້ເດັດດ່ຽວຄັດຄ້ານການປະຕິຮູບ, ເຂົາເຈົ້າເຫັນວ່າ ປະຕິບັດຕາມລະບອບເກົ່າແລະຮັກສາຮີດຄອງເກົ່າ, ຈຶ່ງຈະບໍ່ມີການກະທຳຜິດ. ຊ່າງຢ່າງຊີ້ອອກວ່າ: ການປົກຄອງລັດບໍ່ແມ່ນວ່າຕ້ອງໃຊ້ວິທີດຽວສະເໝີໄປ, ທະແນມແຕ່ມີຜົນດີຕໍ່ລັດ, ກໍ່ບໍ່ຈຳເປັນຕ້ອງປະຕິບັດຕາມຄອງເກົ່າບູຮານ. ສິນຊ້ຽວກົ່ງໄວ້ວາງໃຈນຳຊ່າງຢ່າງ, ແລະເດັດດ່ຽວສະໜັບສະໜູນຊ່າງຢ່າງ. ຊ່າງຢ່າງຈຶ່ງດຳເນີນການປະຕິຮູບຕາມແຜນຂອງຕົນໄດ້.
ກ່ອນເລີ່ມດຳເນີນການປະຕິຮູບ, ຊ່າງຢ່າງເປັນຫ່ວງວ່າສາມັນຊົນບໍ່ເຊື່ອດຳລັດທີ່ເພິ່ນປະກາດ, ຈຶ່ງສັ່ງໃຫ້ປັກເສົາໄມ້ສູງ 10 ກວ່າແມັດຢູ່ປະຕູໃຕ້ຂອງເມືອງຫຼວງ, ແລະອອກຄຳສັ່ງວ່າ: ໃຜສາມາດຍ້າຍທ່ອນໄມ້ນີ້ໄປຮອດປະຕູເໜືອຂອງເມືອງຫຼວງໄດ້, ຈະໃຫ້ລາງວັນເປັນຄຳ 5 ກິໂລ. ໃນຫົວທີ ຄົນທັງຫຼາຍມີແຕ່ຢືນເບິ່ງຢູ່ຊື່ໆ, ບໍ່ມີໃຜໄປລອງຍ້າຍ. ຊ່າງຢ່າງສັ່ງໃຫ້ເພີ່ມລາງວັນຂຶ້ນຮອດ 25 ກິໂລ. ໃນທີ່ສຸດ ມີຜູ່ໜຶ່ງຄຶດວ່າໄປເຮັດລອງເບິ່ງດູ ແລະຍ້າຍທ່ອນໄມ້ໄປຮອດປະຕູເໜືອຂອງເມືອງຫຼວງໄດ້ອີ່ຫຼີ, ຕໍ່ມາ ເຂົາໄດ້ຮັບລາງວັນເປັນຄຳ 25 ກິໂລແທ້. ເມື່ອໄດ້ສ້າງຂ່າວດັ່ງກ່າວອອກມາແລ້ວ, ເມື່ອຊ່າງຢ່າງອອກດຳລັດໃດ, ຄົນທັງຫຼາຍກໍ່ເຊື່ອໝົດ.
ກ່ອນຄິດຕະສັງກາດ 356 ປີ, ສິນຊ້ຽວກົ່ງແຕ່ງຕັ້ງຊ່າງຢ່າງເພື່ອໃຫ້ດຳເນີນການປະຕິຮູບ. ຊ່າງຢ່າງອອກດຳລັດໂດຍກຳນົດໄວ້ວ່າ: ທັບມ້າງຄັນໄຮ່ຄັນນາຖິ້ມ, ລັດຮັບຮອງທີ່ດິນເປັນຂອງເອກະຊົນ, ອະນຸຍາດໃຫ້ຄ້າຂາຍຢ່າງເສລີ; ຜູ່ໃດຜະລິດທັນຍາຫານຫຼືຜ້າໄໝໄດ້ຫຼາຍ, ຈະຍົກເລີກພັນທະເກນເປັນທະຫານໃຫ້ຜູ່ນັ້ນ; ຜູ່ໃດສ້າງຄຸນງາມຄວາມດີຍິ່ງຫຼາຍໃນສົງຄາມ ກໍແຕ່ງຕັ້ງຍົດຖາບັນດາສັກຍິ່ງສູງໃຫ້ຜູ່ນັ້ນ, ແລະກໍ່ມອບເຮືອນແລະໄຮ່ນາໃຫ້ຫຼາຍຂຶ້ນ; ຕັ້ງ 31 ເມືອງໃນທົ່ວລັດ, ໃຫ້ລາຊາລັດແຕ່ງຂຸນນາງໄປປົກຄອງໂດຍກົງ.
ການປະຕິຮູບຂອງຊ່າງຢ່າງໄດ້ຊຸກຍູ້ໃຫ້ລັດສິນພັດທະນາ, ແຕ່ຍ້ອນການປະຕິຮູບດັ່ງກ່າວໄດ້ຕັດຮອນສິດພິເສດຂອງຂຸນນາງຄອງເດີມ, ຈຶ່ງຖືກອິດທິກຳລັງຂຸນນອງຄອງເດີມຄັດຄ້ານຢ່າງຮຸນແຮງ. ໃຕ້ການສະໜັບສະໜູນຂອງສິນຊ້ຽວກົ່ງ ລາຊາລັດສິນ, ຊ່າງຢ່າງໄດ້ລະງັບການຄັດຄ້ານຂອງພວກຂຸນນາງຄອງເດີມ, ແລະເພີ່ມທະວີການປົກຄອງດ້ານແນວຄິດ, ການປະຕິຮູບໄດ້ດຳເນີນຕໍ່ໄປ.
ຜ່ານການປະຕິຮູບຂອງຊ່າງຢ່າງ, ເສດຖະກິດສັກດິນາຂອງລັດສິນໄດ້ມີການພັດທະນາ, ກຳລັງສູ້ລົບຂອງກອງທັບໄດ້ເພີ່ມຂຶ້ນ, ລັດສິນກາຍເປັນລັດສັກດິນາທີ່ເຂັ້ມແຂງກວ່າໝູ່ໃນທ້າຍຍຸກສະໄໝຈ້ານໂກ. ກ່ອນຄິດຕະສັງກາດ 221 ປີ, ຄື ຈິນຊີ່ຮ້ອງເຕ້ຄອງອຳນາດລັດສິນນັ້ນ ໄດ້ດັບສູນ 6 ລັດອື່ນ, ເປັນການສິ້ນສຸດສະພາບການຕ່າງເຮັດສົງຄາມກັນຢ່າງວຸ້ນວາຍໃນສະໄໝຈ້ານໂກ, ແລະທ້ອນໂຮມຈີນເຂົ້າເປັນເອກະພາບກັນ. ລາຊະວົງສິນກາຍເປັນລາຊະວົງສັກດິນາທຳອິດທີ່ທ້ອນໂຮມຈີນເຂົ້າເປັນເອກະພາບກັນ.
|
