|
|
 |
| (GMT+08:00)
2006-09-28 17:20:51
|
 |
|
ເມືອງຕ້າລຽນທີ່ຢູ່ແຄມທະເລ
cri
Author: da
ທີ່ນີ້,ວິທະຍຸສາກົນແຫ່ງປະເທດຈີນ,ສະບາຍດີທ່ານຜູ້ຟັງທີ່ໂຄລົບ,ຍິນດີຕ້ອນຮັບທ່ານເຂົ້າສູ່ລາຍການ"ທ່ຽວເມືອງຈີນ"ໃນທຸກໆວັນພຸດ.ໃນລາຍການພາກນີ້,ດາລາວັນຈະແນະນຳເມືອງຕ້າລຽນ ເມືອງແຄມທະເລທາງພາກເໜືອຂອງຈີນສູ່ທ່ານຟັງ.ເມືອງຕ້າລຽນບໍ່ພຽງແຕ່ແມ່ນເມືອງທີ່ມີນ້ຳພຸຫຼາຍກວ່າໝູ່ແລະມີສະໜາມຫຼາຍກວ່າໝູ່ຢູ່ຈີນທໍ່ນັ້ນ,ຫາກຍັງຖືກສະຫະປະຊາຊາດປະກວດເປັນເມືອງທີ່ໜ້າຢູ່ທີ່ສຸດເມືອງໜຶ່ງຂອງໂລກ.
ເມືອງຕ້າລຽນຕັ້ງຢູ່ທິດໃຕ້ຂອງແຫຼມໜຶ່ງຢູ່ພາກເໜືອຂອງຈີນ,ມີທະເລຫ້ອມລ້ອມຢູ່ທັງ3ທິດ.ທ້ອງຟ້າສີຄາມ ທະເລຂຽວສະອາດ ຫາດຊາຍສີຂາວ ດອນດຳແມ່ນພາບວິວທິວທັດຢູ່ແຄມທະເລທີ່ສວຍງາມທີ່ສຸດ.ເມືອງຕ້າລຽນ ສະອາດງາມຕາຫຼາຍ,ຜືນຫຍ້າລຽນກັນຍາວຢຽດ,ຢູ່ຕາມຖະໜົນທຸກສາຍມີຕົ້ນໄມ້ຢືນລຽງລາຍໃຫ້ຄວາມຮົ່ມເຢັນດີແທ້ໆ,ເມື່ອເບິ່ງອອກໄປໄກກໍ່ຈະເຫັນທະເລໂລດ.
ເສັ້ນທາງເມືອງຕ້າລຽນຂຶ້ນເນີນລົງຄ້ອຍ,ຈິ່ງເຮັດໃຫ້ຕ້າລຽນກາຍເປັນເມືອງໜຶ່ງທີ່ມີລົດຖີບໜ້ອຍທີ່ສຸດຢູ່ຈີນ,ແຕ່ນີ້ພັດໄດ້ອຳນວຍຄວາມສະດວກໃຫ້ແກ່ນັກທ່ອງທ່ຽວຂີ່ລົດຖີບເລາະທ່ຽວ.ຈະຂີ່ໄປຜູ້ດຽວກໍ່ໄດ້,ຫຼືຈະພ້ອມກັບໝູ່ເຊົ່າລົດຖີບແບບ2ຄົນຂີ່ໄປກໍ່ໄດ້,ເພື່ອເລາະລຽບໄປຕາມເສັ້ນທາງແຄມທະເລ,ບໍ່ພຽງແຕ່ເປັນການອອກກຳລັງກາຍເທົ່ານັ້ນ,ທັງໄດ້ທ່ຽວຊົມທິວທັດໄປພ້ອມ.
ສະໜາມຫຼວງແຄມທະເລແມ່ນຈຸດພິເສດອັນໜຶ່ງຂອງເມືອງຕ້າລຽນ.ສະໜາມຫຼວງຊິ່ງໄຫຫວັ່ນແລະສະໜາມຫຼວງໄຫຈື່ຢຸ້ນຕັ້ງຢູ່ໃກ້ແຄມທະເລ,ຢູ່ທີ່ນັ້ນ ສາມາດເບິ່ງທະເລແລະຮູບຄວັດຢູ່ແຄມທະເລໄດ້; ຢູ່ສະໜາມຫຼວງຊ່ານປ່າ ທ່ານຈະເຫັນລົດລາງໄຟຟ້າ.ສະໜາມຫຼວງຫຼາຍສິບແຫ່ງແລະສວນດອກໄມ້ເກືອບ100ແຫ່ງໄດ້ແຈກຢາຍຢູ່ທຸກມຸມເມືອງ,ຫຍ້າຂຽວ ດອກໄມ້ ນົກກາງແກຂາວ ນ້ຳພຸ ຮູບຄວັດ,ບວກກັບສິ່ງກໍ່ສ້າງແບບຍິ່ປຸ່ນແລະຣັດເຊຍ,ດູດດຶງໃຈໃຫ້ນັກທ່ອງທ່ຽວບີບກ້ອງຖ່າຍຮູບບໍ່ເຊົາ.ທ້າວຈັ່ງເຟີ່ງທີ່ເຕີບໃຫຍ່ຢູ່ເມືອງຕ້າລຽນເວົ້າວ່າ:
"ສະໜາມຫຼວງຊິ່ງໄຫຫວັ່ນກວມເນື້ອທີ່ 1 ລ້ານ 7 ແສນ 6 ໝື່ນຕາແມັດ,ເວົ້າໄດ້ວ່າແມ່ນສະໜາມທີ່ໃຫຍ່ກວ່າໝູ່ຢູ່ຈີນ.ຈາກແຈນີ້ເບິ່ງໄປຫາແຈນັ້ນຂອງສະໜາມ,ແມ່ນນ້ຳພຸຮູບດອກຕາເວັນ,ເບິ່ງໄປຕໍ່ອີກຈະເຫັນຫຼັກເມືອງ,ແລະຍາວໄປຮອດແຄມທະເລ.ຢູ່ຕໍ່ໜ້າຍັງມີຮູບຄວັດທອງແດງທີ່ສະແດງໃຫ້ເຫັນການພັດທະນາຂອງເມືອງຕ້າລຽນໃນ100ປີມານີ້,ຮູບຄວັດນີ້ແມ່ນສ້າງຂຶ້ນໃນເວລາສ້າງເມືອງຕ້າລຽນເມື່ອ100ປີກ່ອນ."
ຫໍພິພິທະພັນຍຸກປະຈຸບັນຂອງເມືອງຕ້າລຽນຕັ້ງຢູ່ສະໜາມຫຼວງຊິ່ງໄຫຫວັ່ນ,ມີລັກສະນະທັນສະໄໝ,ນັກທ່ອງທ່ຽວມັກໄປທ່ຽວຊົມ.ທ່ານລິວເຈີ້ນເຫວີຍ ຫົວໜ້າຫໍພິພິທະພັນຍຸກປະຈຸບັນແນະນຳວ່າ:
"ຫໍພິພິທະພັນຍຸກປະຈຸບັນໄດ້ບັນທຶກການປ່ຽນແປງຂອງເມືອງຕ້າລຽນຢູ່ລະຫວ່າງປີ 1899 ຮອດປະຈຸບັນປະມານ 100 ປີ,ໂດຍສະເພາະແມ່ນສະພາບການພັດທະນາໃນດ້ານອຸດສາຫະກຳ ກະສິກຳແລະການທ່ອງທ່ຽວເປັນຕົ້ນຂອງເມືອງຕ້າລຽນໃນ 20 ປີນັບແຕ່ປະຕິຮູບແລະໄຂປະຕູສູ່ພາຍນອກມານີ້.ຫໍນີ້ກວມເນື້ອທີ່ 3 ໝື່ນ 400 ຕາແມັດ,ເນື້ອທີ່ວາງສະແດງມີ 1 ໝື່ນ 5 ພັນຕາແມັດ."
ຫໍພິພິທະພັນຍຸກປະຈຸບັນແມ່ນສິ່ງກໍ່ສ້າງທີ່ເຮັດດ້ວຍເຫຼັກກ້າ,ປ່ອງຢ້ຽມແກ້ວແຈ້ງສະຫວ່າງ.ການວາງສະແດງໃນຫໍດັ່ງກ່າວມີ 4 ຫົວຂໍ້ໃຫຍ່ຄື:ໂສມໜ້າຕົວເມືອງ ເສດຖະກິດທີ່ຈະເລີນ ເມືອງທີ່ມີສະເໜ່ ຫວນຄືນອະດີດແລະການເບິ່ງໄປຂ້າງໜ້າ. ຢູ່ຂ້າງຕູ້ວາງສະແດງເມືອງຕ້າລຽນເກົ່າ,ແມ່ນຕູ້ວາງສະແດງເມືອງຕ້າລຽນໃໝ່.ສອງເຂດວາງສະແດງດັ່ງກ່າວ ໄດ້ສ່ອງແສງໃຫ້ເຫັນການປ່ຽນແປງຂອງຊີວິດການເປັນຢູ່ຂອງຊາວຕ້າລຽນຢ່າງຈະແຈ້ງ.ທ່ານລິວເຈີ້ນເຫວີຍ ຫົວໜ້າຫໍພິພິທະພັນເວົ້າວ່າ,ໃນຍາມເລີ່ມຕົ້ນທົດລອງເປີດຫໍພິພິທະພັນຍຸກປະຈຸບັນ,ກໍໄດ້ຮັບການຊົມເຊີຍຈາກນັກທ່ອງທ່ຽວຈີນແລະຕ່າງປະເທດ.
"ສະເລ່ຍແລ້ວ ແຕ່ລະມື້ມີນັກທ່ອງທ່ຽວພັນກວ່າຄົນທີ່ມາຈາກອາເມລິກາ ຍີ່ປຸ່ນແລະອາຟຼີກາເປັນຕົ້ນ,ເມື່ອທ່ຽວຊົມແລ້ວ,ເຂົາເຈົ້າເວົ້າວ່າ,ເມື່ອເຂົ້າຊົມຫໍພິພິທະພັນ,ກໍເໝືອນດັ່ງໄດ້ທ່ຽວທົ່ວເມືອງຕ້າລຽນ."
ສຽງທີ່ທ່ານໄດ້ຍິນນີ້ແມ່ນສຽງຮ້ອງຂອງສິງທະເລຢູ່ໃນຫໍທະເລເຂດຂົ້ວໂລກຫຼ້າວຫູຖ່ານທີ່ໃຫຍ່ໂຕມະໂຫລານຂອງຕ້າລຽນ. ຫໍທະເລເຂດຂົ້ວໂລກຫຼ້າວຫູຖ່ານທີ່ເປີດໃນປີ2002,ໄດ້ຕັ້ງຫໍວາງສະແດງທັນທະໄໝສາກົນທີ່ຖືເຂດຂົ້ວໂລກເປັນຈຸດສຳຄັນແຫ່ງທຳອິດຢູ່ຈີນ,ໄດ້ຍ້າຍສັດຢູ່ເຂດຂົ້ວໂລກເຊັ່ນ ນົກເພັນຄວິນຂົ້ວໂລກໃຕ້ ປາວານຂົ້ວໂລກເໜືອເປັນຕົ້ນມາຢູ່ເມືອງຕ້າລຽນເປັນເທື່ອທຳອິດ.ສັດທະເລຊະນິດຕ່າງໆຢູ່ຢ່າງສະບາຍຫຼາຍຢູ່ໃນຫໍ.ນາງຫຼີໄອ້ຢິ່ງ ພະນັກງານໃນຫໍທະເລເຂດຂົ້ວໂລກໄດ້ຊີ້ໄປທີ່ປາວານໂຕໜຶ່ງແລະເວົ້າວ່າ,ນີ້ແມ່ນສັດຕົວແທນສັດເຂດຂົ້ວໂລກໃນຫໍ.ນາງເວົ້າວ່າ:
"ນີ້ແມ່ນປາວານ ເຊິ່ງເປັນສັດສິລິມຸງຄຸນ,ໜ້າຮັກຫຼາຍ.ມັນດຳລົງຊີວິດຢູ່ເຂດມະຫາສະໝຸດກຼາດຊຽນອາກຕິກ,ຕົນໂຕເປັນສີຂາວ.ມັນທັກທາຍຄົນເປັນ,ຍັງງຶກຫົວແລະຍີ້ມແຍ້ມເປັນອີກ.ມັນມີຈຸດພິເສດອັນໜຶ່ງທີ່ຕ່າງກັບປາວານຊະນິດອື່ນແມ່ນ ຄໍມັນເໜັງຕິງຢ່າງວ່ອງໄວໄດ້.ມັນຍັງມີຊື່ໜຶ່ງເປັນ "ນົກຈອກຂົນເຫຼືອງໃນທະເລ",ມັນສາມາດອອກສຽງໄດ້ຫຼາຍສອງ,ຟັງແລ້ວມ່ວນຫຼາຍ."
ຫໍທະເລເຂດຂົ້ວໂລກກວມເນື້ອທີ່ 3 ໝື່ນ 6 ພັນຕາແມັດ.ເຂດວາງສະແດງທີໜຶ່ງແມ່ນເຂດສັດຂົ້ວໂລກ,ຕົ້ນຕໍແມ່ນສັດທະເລຢູ່ຂົ້ວໂລກໃຕ້ແລະຂົ້ວໂລກເໜືອ,ນັກທ່ອງທ່ຽວຈະເຫັນປາວານ ໝີຂົ້ວໂລກເໜືອ ນົກເພັນຄວິນແລະໝາທະເລລວມ 10 ກວ່າຊະນິດ;ເຂດວາງສະແດງທີສອງແມ່ນການສະແດງຂອງສັດທະເລເຂດຂົ້ວໂລກ,ຢູ່ໂຮງສະແດງທີ່ສາມາດບັນຈຸຜູ້ຊົມ 2 ພັນກວ່າຄົນ,ຄົນທັງຫຼາຍສາມາດເບິ່ງການສະແດງຂອງປາວານ ປາໂລມາແລະສິງທະເລເປັນຕົ້ນ; ເຂດວາງສະແດງທີສາມແມ່ນການສະແດງຂອງປາສະຫຼາມ,ໃນຕູ້ສະແດງຊ່ອງທາງໃຕ້ນ້ຳສູນກາງຂະໜາດໃຫຍ່,ຄົນທັງຫຼາຍສາມາດຊົມປາສະຫຼາມຫຼາຍສິບຊະນິດ,ຍັງສາມາດເບິ່ງຮູບຄົນກັບປາສະຫຼາມຟ້ອນນຳກັນທີ່ເປັນໜ້າງຶດງໍ້.ເຂດວາງສະແດງທີສີ່ແມ່ນສຳຜັດເຂດຂົ້ວໂລກ,ຢູ່ໃນຫ້ອງຫິມະທີ່ມີອຸນຫະພູມລົບ 40 ອົງສາ,ນັກທ່ອງທ່ຽວສາມາດສຳຜັດສະເໜ່ຂອງຂົ້ວໂລກເໜືອແລະຂົ້ນໂລກໃຕ້ທີ່ເຕັມໄປດ້ວຍນ້ຳກ້ອນແລະຫິມະ.
ນອກນີ້,ງານສະແດງອາພອນເພດຊົງຕ້າລຽນ ງານມະຫະກຳສິນຄ້າຂາອອກຕ້າລຽນ ງານດອກໄມ້ຕ້າລຽນ ງານແຂ່ງຂັນແລ່ນມາລາທອນສາກົນຕ້າລຽນ ງານຮັບຕ້ອນບຸນກຸດຈີນດ້ວຍໝາກກະໂພກແລະໄຟດອກຕ້າລຽນທີ່ຈັດຂຶ້ນປີລະເທື່ອ ກໍໄດ້ດູດດຶງນັກທ່ອງທ່ຽວຈີນແລະຕ່າງປະເທດນັບເປັນພັນເປັນໝື່ນ.ໃນເວລາຮອດບຸນດັ່ງກ່າວ,ສິລະປິນພື້ນເມືອງທີ່ນຸ່ງຊຸດສີຕ່າງໆຂອງຍີ່ປຸ່ນ ສປປເກົາຫຼີແລະຣັດເຊຍໄດ້ພ້ອມກັນກັບຊາວເມືອງຕ້າລຽນຟ້ອນລຳທຳເພງຢູ່ຕາມຖະໜົນຫົນທາງ,ເຊິ່ງໄດ້ເພີ່ມບັນຍາກາດສາກົນຫຼາຍຍິ່ງຂຶ້ນໃຫ້ແກ່ເມືອງຕ້າລຽນ.ທ່ານຫຼີຫົງ ນັກທ່ອງທ່ຽວທີ່ມາທ່ຽວຕ້າລຽນເທື່ອທຳອິດເວົ້າວ່າ:
"ຂ້ອຍຮູ້ສຶກ ເມືອງຕ້າລຽນມ່ວນຫຼາຍ,ມາເທື່ອທຳອິດ ກໍຫຼິ້ນຢູ່ແຄມທະເລຢ່າງດົນນານ.ຢູ່ໃນເມືອງມີສະໜາມຫຼວງຫຼາຍແຫ່ງ,ສິ່ງກໍ່ສ້າງບາງແຫ່ງງາມຫຼາຍ.ແຕ່ເສຍດາຍວ່າບໍ່ມີເວລາດົນນານມາຢູ່ເມືອງນີ້,ຫວັງວ່າຈະມີໂອກາດມາທ່ຽວອີກ."
ທ່ານຜູ້ຟັງທີ່ໂຄລົບ,ຟັງແລ້ວເປັນແນວໃດ,ຖ້າມີໂອກາດມາທ່ຽວຈີນ,ຕ້ອງໄປທ່ຽວເມືອງຕ້າລຽນເດີ້.ໄປທ່ຽວຕ້າລຽນ ສະດວກຫຼາຍ,ຂີ່ຍົນ ລົດໄຟແລະລົດເມທາງໄກລ້ວນແຕ່ໄປຮອດໄດ້. ຕ້າລຽນໃນລະດູຕ່າງກັນກໍ່ມີທິວທັດບັນຍາກາດຕ່າງກັນ.ພ້ອມກັນນັ້ນກໍ່ຄວນຊີມອາຫານແຊບໆຂອງຕ້າລຽນ,ເຊັ່ນແກງໝີ່ໃສສັດທະເລ ແກງປູໃສ່ເບຍ.ຖ້າວ່າກິນອາຫານດັ່ງກ່າວຢູ່ຮ້ານຕາມແຄມຖະໜົນ,ລາຄາຈະຖືກຫຼາຍ,ຄົນໜຶ່ງເສຍ 50 ຢວນກໍກິນແຊບແລະອີ່ມໄດ້ແລ້ວ.
|
|
|
