|
|
 |
| (GMT+08:00)
2006-09-29 16:47:42
|
 |
|
ຄົນຈີນໃນກອງຕຳຫຼວດຮັກສາສັນຕິພາບຂອງສະຫະປະຊາຊາດປະຈຳອັຟການີສະຖານ
cri
ສົງຄາມອັຟການີສະຖານໄດ້ສິ້ນສຸດລົງມາໄດ້4ປີແລ້ວ.ໃນ4ປີທີ່ຜ່ານມານີ້,ເມື່ອລັດຖະ ບານແລະປະຊາຊົນອັຟການີສະຖານພ້ອມກັນພະຍາຍາມແລ້ວ,ການສ້າງສັນຕິພາບຂອງອັຟການີສະຖານຄືນໃໝ່ໄດ້ຮັບຜົນງານອັນໃຫຍ່ຫຼວງ.ປະຊາຊົນອັຟການີສະຖານລືມບໍ່ໄດ້ວ່າ,ການໄດ້ຮັບຜົນງານດັ່ງກ່າວປາສະຈາກການສະໜັບສະໜູນແລະການຊ່ອຍເຫຼືອຂອງປະຊາຄົມໂລກບໍ່ໄດ້,ໂດຍສະເພາະແມ່ນກອງຕຳຫຼວດຮັກສາສັນຕິພາບຂອງສະຫະປະຊາຊາດໄດ້ເສີມຂະຫຍາຍບົດບາດອັນສຳຄັນໃນການຟື້ນຟູສັນຕິພາບໃນອັຟການີສະຖານ.ໃນນັ້ນ,ຕຳຫຼວດຂອງຈີນໄດ້ເຮັດໃຫ້ປະຊາຊົນອັຟການີສະຖານມີພາບປະທັບໃຈຢ່າງເລິກເຊິ່ງ.
ທ່ານອັບດູນຮາດີແມ່ນວິສາວະກອນຂອງກາບູນ,ໄດ້ຕີລາຄາໃນລະດັບສູງຕໍ່ຕຳຫຼວດຮັກສາສັນຕິພາບຂອງຈີນ.ທ່ານເວົ້າວ່າ,
ກອງທະຫານຮັກສາສັນຕິພາບຂອງສະຫະປະຊາຊາດມາຢູ່ອັຟການີສະຖານແມ່ນເພື່ອປ້ອງກັນຄວາມປອດໄພຢູ່ແຫ່ງນີ້,ເພາະວ່າຖ້າປະເທດເຮົາມີຄວາມປອດໄພແລ້ວ,ວຽກງານຕ່າງໆເຊິ່ງລວມທັງການສ້າງສາປະເທດຄືນໃໝ່ນັ້ນຈຶ່ງສາມາດດຳເນີນໄປຢ່າງສະດວກໄດ້.ຂ້າພະເຈົ້າເຫັນວ່າ,ໃນຕຳຫຼວດຮັກສາສັນຕິພາບຂອງສະຫະປະຊາຊາດນັ້ນ,ຕຳຫຼວດຈີນແມ່ນເກັ່ງທີ່ສຸດ.ບໍ່ຕ້ອງສົງໄສເລີຍວ່າ,ຕຳຫຼວດຮັກສາສັນຕິພາບຂອງຈີນພວມເສີມຂະຫຍາຍບົດບາດອັນຕັ້ງໜ້າແລະສຳຄັນທີ່ສຸດ.
ຫວ່າງກ່ອນນີ້ບໍ່ດົນ,ນັກຂ່າວວິທະຍຸCRIໄດ້ພົບເຫັນທ່ານຊິ່ວຊົງເຫວີນ ນາຍຕຳຫຼວດຂອງຈີນທີ່ເປັນທີ່ປຶກສາຂອງຕຳຫຼວດສະຫະປະຊາຊາດປະຈຳກາບູນ,ໃນລາຍການມື້ນີ້,ພວກເຮົາຈະເລົ່າເລື່ອງຂອງທ່ານຊິ່ວຊົງເຫວີນສູ່ທ່ານຟັງ.
ທ່ານຊິ່ວຊົງເຫວັນອາຍຸ30ກວ່າປີ,ຮູບຮ່າງບໍ່ສູງແຕ່ເບິ່ງແລ້ວຮູ້ສຶກເປັນຄົນອົງກາດກ້າຫານ, ນຸ່ງຊຸດຕຳຫຼວດຮັກສາສັນຕິພາບຂອງສະຫະປະຊາຊາດ,ຍິ່ງເຮັດໃຫ້ທ່ານສະຫງ່າຜ່າເຜີຍ. ທ່ານບອກນັກຂ່າວວ່າ,ໃນເດືອນພຶດສະພາປີ2005,ໂດຍຕອບສະໜອງກັບຄວາມຮ້ອງຂໍຂອງສະຫະປະຊາຊາດ,ກະຊວງປ້ອງກັນຄວາມສະຫງົບຈີນໄດ້ແຕ່ງທ່ານໄປເປັນທີ່ປຶກສາຂອງຕຳຫຼວດສະຫະປະຊາຊາດຢູ່ອັຟການີສະຖານ,ປະຕິບັດໜ້າທີ່ຮັກສາສັນຕິພາບເປັນເວລາໜຶ່ງປີ.ທ່ານບໍ່ແມ່ນເຮັດໜ້າທີ່ເປັນຕຳຫຼວດຮັກສາສັນຕິພາບເປັນເທື່ອທຳອິດ,ເຖິງວ່າໄດ້ລຶ້ງເຄີຍກັບບາດແຜແຫ່ງສົງຄາມແລະຄວາມທຸກຍາກທີ່ຕາມມາກໍຕາມ,ແຕ່ອັຟການີສະຖານທີ່ໄດ້ຜ່ານຄວາມໂຫດຮ້າຍຂອງສົງຄາມຫຼາຍປີນັ້ນກໍເຮັດໃຫ້ທ່ານຕົກໃຈ.ທ່ານເວົ້າວ່າ,
ເມື່ອເບິ່ງຈາກເຮືອບິນລົງໄປ,ທົ່ວປະເທດອັຟການີສະຖານຄືກັບເມືອງຮ້າງ,ເຕັມໄປດ້ວຍເນື້ອທີ່ເປົ່າແປນ.ເມື່ອເຮືອບິນບິນເຂົ້າໃນເຂດກາບູນແລ້ວ, ຂ້າພະເຈົ້າໄດ້ເຫັນວ່າ,ທົ່ວເມືອງກາບູນແມ່ນເຕັມໄປດ້ວຍຊາກສະຫຼັກຫັກພັງຂອງອາຄານ.ພໍໄປເຖິງກາບູນ,ຂ້າພະເຈົ້າກໍຮູ້ສຶກວ່າການພັດທະນາຂອງມະນຸດໄດ້ຖອຍຫຼັງຄືນໄປຫຼາຍສະຕະວັດ.
ໃນຖານະເປັນທີ່ປຶກສາຂອງຕຳຫຼວດສະຫະປະຊາຊາດ,ວຽກຕົ້ນຕໍຂອງທ່ານຊິ່ວຊົງເຫວີນກໍ່ແມ່ນຊ່ອຍປະຕິຮູບວຽກງານຕຳຫຼວດຂອງອັຟການີສະຖານ.ທ່ານເວົ້າວ່າ,
ການປະຕິຮູບວຽກງານຕຳຫຼວດກໍ່ແມ່ນພາກສ່ວນໜຶ່ງແຫ່ງການສ້າງການເມືອງຄືນໃໝ່,ກໍຄືກັນກັບການກໍ່ສ້າງດ້ານອື່ນໆ,ລ້ວນແຕ່ຕ້ອງຟື້ນຟູຄືນໃໝ່.ເມື່ອຜ່ານສົງຄາມຫຼາຍສິບປີມານີ້,ເວົ້າໄດ້ວ່າທຸກສິ່ງທຸກຢ່າງຢູ່ນີ້ໄດ້ຖືກທຳລາຍໝົດ,ລະບົບຍຸຕິທຳ ລະບົບປະຕິບັດກົດໝາຍໄດ້ຖືກທຳລາຍຢ່າງໜັກໜ່ວງ,ຈຶ່ງຕ້ອງເລີ່ມຈາກເລກສູນ.
ທ່ານບອກນັກຂ່າວວ່າ,ຖ້າຢາກສະໜອງສິ່ງແວດລ້ອມທີ່ສະຫງົບໃຫ້ແກ່ການສ້າງສາສັນຕິພາບຂອງອັຟການີສະຖານຄືນໃໝ່,ການປະຕິຮູບວຽກງານຕຳຫຼວດກໍເປັນວຽກດ່ວນທີ່ສຸດ.ຖ້າຢາກສ້າງລະບົບຕຳຫຼວດທີ່ມີກົງຈັກຄົບຖ້ວນ ບຸກຄະລາກອນໄດ້ມາດຖານແລະການຄຸ້ມຄອງມີປະສິດທິພາບ,ກໍຕ້ອງຊອກຮູ້ສະພາບປະຈຸບັນຂອງລະບົບວຽກງານຕຳຫຼວດອັຟການີສະຖານ.ທ່ານຊີ່ວຊົງເຫວີນບໍ່ສົນໃຈນຳຄວາມອັນຕະລາຍທີ່ປະສົບການໂຈມຕີແບບກໍ່ການຮ້າຍ,ທ່ານໄດ້ເດີນທາງໄປທົ່ວ4ແຂວງທີ່ທ່ານເອງຮັບຜິດຊອບຢູ່ພາກຕາເວັນອອກອັຟການີສະຖານ,ແລະລົງໄປສູ່ກອງຕຳຫຼວດແລະຈຸຕຳຫຼວດ10ກວ່າແຫ່ງ,ເມື່ອຊອກໄດ້ຂໍ້ມູນຂ່າວສານຢ່າງຫຼວງຫຼາຍແລ້ວ,ທ່ານກໍໄດ້ສະເໜີຂໍ້ສະເໜີທີ່ຕິດແທດຕົວຈິງແລະເປັນໄປໄດ້ຫຼາຍຢ່າງຕໍ່ລັດຖະບານອັຟການີສະຖານແລະສະຫະປະ ຊາຊາດ,ແລະຊ່ອຍເຫຼືອອົງການຕຳຫຼວດທ້ອງຖິ່ນຝຶກອົບຮົມຢ່າງຫຼວງຫຼາຍ.ເມື່ອມີການຊ່ອຍເຫຼືອຂອງທີ່ປຶກສາສະຫະປະຊາຊາດເຊິ່ງລວມທັງທ່ານຊີ່ວຊົງເຫວີນນັ້ນແລ້ວ, ການປະຕິຮູບແລະການສ້າງວຽກງານຕຳຫຼວດຄືນໃໝ່ຂອງອັຟການີສະຖານໄດ້ຮັບຄວາມຄືບໜ້າອັນໃຫຍ່ຫຼວງ.ກອງຕຳຫຼວດອັຟການີສະຖານທີ່ໄດ້ຜ່ານການປະຕິຮູບແລະປະ ກອບຄືນໃໝ່ນັ້ນໄດ້ເສີມຂະຫຍາຍບົດບາດອັນສຳຄັນໃນການສ້າງສາປະເທດຄືນໃໝ່. ທ່ານເວົ້າວ່າ,
ໃຕ້ການຊີ້ນຳແລະປະສານງານຂອງສະຫະປະຊາຊາດແລະປະເທດອື່ນໆທີ່ເຂົ້າຮ່ວມການປະຕິຮູບວຽກງານຕຳຫຼວດ,ອັຟການີສະຖານໄດ້ຮັບໝາກຜົນອັນພົ້ນເດັ່ນໃນການປະຕິຮູບວຽກງານຕຳຫຼວດ.ຕົວຢ່າງວ່າ,ໃນດ້ານຈຳນວນທີ່ຮັບສະໝັກ,ດຽວນີ້ໄດ້ມີເຖິງ5ໝື່ນ4000ຄົນ,ໄດ້ປະກອບເປັນກອງຕຳຫຼວດ.ຫຼາຍຄົນກໍໄດ້ຮັບການອົບຮົມວິຊາສະເພາະລະດັບຕ່າງໆ.ນອກນັ້ນໃນດ້ານອົງການຕຳຫຼວດ, ຈາກກະຊວງພາຍໃນຮອດອົງການຕຳຫຼວດຂັ້ນແຂວງລ້ວນແຕ່ໄດ້ຮັບການປັບປຸງເທື່ອລະກ້າວ.
ທ່ານຊີ່ວຊົງເຫວີນໄດ້ກ່າວເປັນພິເສດວ່າ,ໃນການເລືອກຕັ້ງລັດຖະສະພາອັຟການີສະຖານເມື່ອປີ2005,ກອງຕຳຫຼວດໄດ້ເສີມຂະຫຍາຍບົດບາດອັນສຳຄັນ.ໃນຂະບວນການເລືອກຕັ້ງ,ທ່ານຊີ່ວຊົງເຫວີນແລະທີ່ປຶກສາຕຳຫຼວດສະຫະປະຊາຊາດອື່ນໆໄດ້ໄປຢູ່ສະຖານທີ່ທີ່ຈັດການເລຶອກຕັ້ງ,ພ້ອມກັນກັບພາກສ່ວນຕຳຫຼວດທ້ອງຖິ່ນ ອົງການບໍລິຫານແລະກອງທັບໄດ້ຈັດໜ່ວຍບັນຊາການຮ່ວມ,ແລະໄດ້ແກ້ໄຂເຫດການກະທັນ ຫັນຢ່າງໄວວາແລະມີປະສິດທິພາບ.ຍ້ອນມີມາດຖານປ້ອງກັນທີ່ຖືກຕ້ອງ,ການຊີ້ນຳຢູ່ກັບບ່ອນຢ່າງບັງເກີດຜົນ,ຈຶ່ງໄດ້ຮັບປະກັນໃຫ້ການເລືອກຕັ້ງທົ່ວໄປດຳເນີນໄປຢ່າງສະດວກ.
ໃນຖານະເປັນນາຍຕຳຫຼວດຈີນທີ່ເປັນທີ່ປຶກສາຂອງກອງຕຳຫຼວດສະຫະປະຊາຊາດຢູ່ອັຟການີສະຖານ,ວຽກງານຂອງທ່ານຊີ່ວຊົງເຫວີນໄດ້ຮັບຄວາມຢືນຢັນຈາກລັດຖະບານອັຟການີສະຖານແລະພາກສ່ວນທີ່ກ່ຽວຂ້ອງຂອງສະຫະປະຊາຊາດ.ໃນເດືອນຕຸລາປີ2005, ສະຫະປະຊາຊາດໄດ້ມອບ "ຫຼຽນສັນຕິພາບສະຫະປະຊາຊາດ"ໃຫ້ແກ່ທ່ານຊີ່ວຊົງເຫວີນ.
ກໍຄືທ່ານລິວຈ້ຽນ ເອກອັກຄະລັດຖະທູດຈີນປະຈຳອັຟການີສະຖານໄດ້ກ່າວໄວ້ວ່າ,ໃນຂະບວນການສ້າງສາອັຟການີສະຖານຄືນໃໝ່,ການຊ່ອຍເຫຼືອຂອງຈີນໄດ້ຮັບຄວາມຢືນຢັນຢ່າງເຕັມສ່ວນຈາກປະຊາຊົນອັຟການີສະຖານ.ທ່ານເວົ້າວ່າ,
ຈີນໄດ້ຜ່ານຫຼາຍຊ່ອງທາງເຂົ້າຮ່ວມການສ້າງສາອັຟການີສະຖານຄືນໃໝ່,ແລະຈີນແມ່ນສະໜັບສະໜູນຢ່າງຈິງໃຈ.ອັຟການີສະຖານເຫັນວ່າການຊ່ອຍເຫຼືອຂອງຈີນແມ່ນໄລຍະຍາວນານ,ບໍ່ເຫັນແກ່ຕົວແລະທັງບໍ່ມີເງື່ອນໄຂຜູກມັດໃດໆ,ແລະຊອກຫາທຸກວິທີເພື່ອຊ່ອຍເຫຼືອເຂົາເຈົ້າ.ເຂົາເຈົ້າເຄີຍເວົ້າຄຳໜຶ່ງວ່າ:"ພວກເຮົາຮູ້ສຶກພູມໃຈທີ່ມີຈີນເປັນປະເທດບ້ານໃກ້ເຮືອນຄຽງ."
|
|
|
