|
ປັກກິ່ງຈະເປັນເຈົ້າພາບຈັດງານກິລາໂອລິມປິກປີ 2008, ເພື່ອສະແດງແບບແຜນມາລະຍາດແຫ່ງຊາດຈີນຕໍ່ໂລກ, ຈີນພວມຈັດກິດຈະກຳໃນທົ່ວປະເທດເພື່ອຍົກຄຸນສົມບັດຂອງນັກທ່ອງທ່ຽວຈີນ, ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວທີ່ພາດຫົວເລື່ອງວ່າ: ຈີນຍົກຄຸນສົມບັດຂອງນັກທ່ອງທ່ຽວປະເທດຕົນເພື່ອຕ້ອນຮັບງານກິລາໂອລິມປິກ.
ຢູ່ປັກກິ່ງແລະແຂວງອື່ນໆໃນທົ່ວປະເທດຈີນ ຊັບພະຍາກອນທ່ອງທ່ຽວອຸດົມສົມບູນ, ໄດ້ດຶງດູດນັກທ່ອງທ່ຽວຕ່າງປະເທດຕົວຢ່າງຄື ຢູ່ປັກກິ່ງມີພະລາຊະວັງກູ້ກົ່ງ ກຳແພງເມືອງຈີນແລະຫໍບວງສວງຟ້າເປັນຕົ້ນ. ການເປັນເຈົ້າພາບຈັດງານກິລາໂອລິມປິກ, ບໍ່ຕ້ອງສົງໄສເລີຍວ່າຈະເຮັດໃຫ້ປັກກິ່ງມີສະເໜຫຼາຍກວ່າເກົ່າ. ແຕ່ວ່າ ຢູ່ແຫຼ່ງທ່ອງທ່ຽວທີ່ດຶງດູດຄົນໄປທ່ຽວເຫຼົ່ານັ້ນ, ມັກຈະມີພາບທີ່ຄົນເຫັນແລ້ວຮູ້ສຶກບໍ່ສະບາຍໃຈ, ຕົວຢ່າງຄື ນັກທ່ອງທ່ຽວຈີນຖົ່ມນ້ຳລາຍຄາຍຂີ້ເທິແລະຖິ້ມເປືອກໝາກໄມ້ທົ່ວທີບ ຫຼືຂີດຕົວໜັງສືໃສ່ຝາພະໜັງຂອງຮ່ອງຮອຍບູຮານທີ່ລ້ຳຄ່ານັ້ນຕາມໃຈເປັນຕົ້ນ, ແຫຼ່ງທ່ອງທ່ຽວແມ່ນປ່ອງຢ້ຽມສະແດງໂສມໜ້າຂອງປະເທດໃດໜຶ່ງ, ການກະທຳທີ່ບໍ່ມີມາລະຍາດຂອງນັກທ່ອງທ່ຽວບາງຄົນ ໄດ້ທຳລາຍພາບພົດຂອງຈີນຢູ່ໜ້າເພື່ອນມິດຕ່າງປະເທດ ທີ່ພາໃຫ້ຫາງສຽງພາຍໃນແລະຕ່າງປະເທດສົນໃຈນຳແລະຕິຕຽນ.
ເພື່ອປ່ຽນແປງສະພາບດັ່ງກ່າວກ່ອນງານກິລາໂອລິມປິກປັກກິ່ງປີ 2008, ຫວ່າງມໍ່ໆນີ້ ພາກສ່ວນທີ່ກ່ຽວຂ້ອງຂອງຈີນໄດ້ດຳເນີນ "ກິດຈະກຳຍົກຄຸນສົມບັດຂອງນັກທ່ອງທ່ຽວຈີນ" ໃນທົ່ວປະເທດ. ກິດຈະກຳດັ່ງກ່າວແມ່ນຫ້ອງການອາລະຍະທຳສູນກາງ ກົມທ່ອງທ່ຽວແຫ່ງຊາດແລະພາກສ່ວນອື່ນໆຂອງຈີນ ຄື ພາກສ່ວນການຕ່າງປະເທດ ການຄ້າແລະຄົມມະນາຄົມເປັນຕົ້ນພ້ອມກັນຈັດຕັ້ງປະຕິບັດ, ດຳເນີນເປັນເວລາ 3 ປີ ເຊິ່ງເລີ່ມແຕ່ກາງເດືອນສິງຫາ, ແລະຕ້ອງໃຫ້ໄດ້ຮັບໝາກຜົນທີ່ມີລັກສະນະຂັ້ນຕອນກ່ອນຈັດງານກິລາໂອລິມປິກປີ 2008. ກິດຈະກຳດັ່ງກ່າວຈະແກ້ໄຂການກະທຳຕ່າງໆຂອງຄົນຈີນທີ່ບໍ່ມີມາລະຍາດໃນເວລາທ່ອງທ່ຽວ, ເຮັດໃຫ້ຄຸນສົມບັດໃນການທ່ອງທ່ຽວຂອງຄົນຈີນສູງຂຶ້ນຢ່າງຫຼວງຫຼາຍ.
ກ່ຽວກັບກິດຈະກຳດັ່ງກ່າວ, ຄົນຈີນຫຼວງຫຼາຍລ້ວນແຕ່ເຫັນວ່າມີຄວາມຈຳເປັນທີ່ສຸດ, ນາງຊົ້ງລີ້ທີ່ເຮັດວຽກຢູ່ບໍລິສັດຕ່າງປະເທດແຫ່ງໜຶ່ງທີ່ປັກກິ່ງມີຄວາມຮູ້ສຶກອັນເລິກເຊິ່ງ, ນາງເວົ້າວ່າ:
ຍ້ອນເຮັດວຽກຢູ່ບໍລິສັດຕ່າງປະເທດ, ສະນັ້ນໄດ້ໄປທ່ຽວນຳກັນກັບຄົນຕ່າງປະເທດເລື້ອຍໆ. ຢູ່ຫຼາຍບ່ອນໄດ້ເຫັນມີຄົນຈີນບາງຄົນບໍ່ລະວັງ, ມັກເວົ້າດ້ວຍສຽງດັງເກີນໄປ, ດື່ມນ້ຳໝົດແລ້ວມັກຖິ້ມຂວດເປົ່າທົ່ວທີບ. ຢູ່ເທີງຝາພະໜັງ ມັກຈະໄດ້ເຫັນມີຮອຍຂີດທີ່ເຂົາເຈົ້າຂີດໄວ້ທົ່ວທີບ. ເມື່ອຢູ່ນຳກັນກັບຄົນຕ່າງປະເທດແລ້ວ ຂ້າພະເຈົ້າຮູ້ສຶກວ່າຈັ່ງແມ່ນອັບອາຍຂາຍໜ້າແທ້ໆ, ເຫັນວ່າໄດ້ທຳລາຍພາບພົດຂອງຄົນຈີນພວກເຮົາ. ດຽວນີ້ໃກ້ຈະເຖິງມື້ຈັດງານກິລາໂອລິມປິກປີ 2008 ແລ້ວ, ຂ້າພະເຈົ້າເຫັນວ່າພວກເຮົາໝົດທຸກຄົນຄວນສ້າງຄວາມຊີນເຄີຍທີ່ດີ, ເພື່ອສະແດງໂສມໜ້າປັກກິ່ງໃໝ່ໃຫ້ທົ່ວໂລກໄດ້ເຫັນ.
ປັດຈຸບັນ, "ກິດຈະກຳຍົກຄຸນສົມບັດຂອງນັກທ່ອງທ່ຽວຈີນ" ໄດ້ດຳເນີນໄປຢ່າງກວ້າງຂວາງໃນທົ່ວປະເທດຈີນ, ຫວ່າງມໍ່ໆນີ້ ຫ້ອງການອາລະຍະທຳສູນກາງແລະກົມທ່ອງທ່ຽວແຫ່ງຊາດຈີນໄດ້ທ້ອນໂຮມ "ປະກົດການທີ່ບໍ່ມີມາລະຍະຍາດຂອງນັກທ່ອງທ່ຽວຈີນ" ແລະ "ຂໍ້ສະເໜີເພື່ອຍົກຄຸນສົມບັດຂອງນັກທ່ອງທ່ຽວຈີນ" ຕໍ່ທົ່ວສັງຄົມຢ່າງເປີດເຜີຍ, ແລະຈະຮຽບຮຽງເປັນຄູ່ມືສອງເຫຼັ້ມທີ່ຊື່ວ່າ "ຂໍ້ຜູກມັດການກະທຳໃນການທ່ອງທ່ຽວພາຍໃນປະເທດຂອງຄົນຈີນ" ແລະ "ຄຳແນະນຳການປະພຶດໃນການທ່ອງທ່ຽວຕ່າງປະເທດຂອງຄົນຈີນ" ອີງຕາມຂໍ້ສະເໜີແລະຄະດີທີ່ເປັນຕົວຢ່າງທີ່ທ້ອນໂຮມໄດ້, ແລະຈະແຈກໃຫ້ຄະນະທ່ອງທ່ຽວກ່ອນຈະເຖິງໄລຍະພັກ 7 ມື້ຂອງວັນຊາດ 1 ຕຸລາປີນີ້.
ຫວ່າງມໍ່ໆນີ້ ພະແນກທ່ອງທ່ຽວນະຄອນຫຼວງປັກກິ່ງຍັງກຳນົດວ່າ, ຕໍ່ໄປພາຍໜ້າ ກ່ອນຄະນະທ່ອງທ່ຽວອອກເດີນທາງ, ຈະໄດ້ຮັບການອົບຮົມດ້ານມາລະຍາດໃນການທ່ອງທ່ຽວກ່ອນ. ເນື້ອໃນມີດັ່ງນີ້ ຄື ສະຕິຕໍ່ອະນາໄມ ສະຕິຕໍ່ການໂຄລົບລະບຽບກົດໝາຍ ສະຕິຕໍ່ການອະນຸລັກສິ່ງແວດລ້ອມແລະອະນຸລັກວັດຖຸບູຮານ ແລະສະຕິຕໍ່ມາລະຍາດດ້ານກິລິຍາທ່າທີ. ກ່ຽວກັບຂໍ້ກຳນົດໃໝ່ດັ່ງກ່າວ, ນາງລິວຢຸນຮຸຍທີ່ເຮັດວຽກຢູ່ບໍລິສັດທ່ອງທ່ຽວຄ່າງຮຸ່ຍປັກກິ່ງໄດ້ເວົ້າຈາກມຸມການທ່ອງທ່ຽວແລະງານກິລາໂອລິມປິກວ່າ:
ກ່ຽວກັບການອົບຮົມດ້ານມາລະຍາດໃນການທ່ອງທ່ຽວ, ບໍລິສັດພວກຂ້າພະເຈົ້າເຫັນວ່າດີຫຼາຍ. ຄວາມຊີນເຄີຍບາງຢ່າງທີ່ເບິ່ງຄືວ່າແມ່ນເລື່ອງເລັກນ້ອຍ, ທີ່ຈິງແລ້ວຈະສະແດງເຖິງສະຕິຖືເບົາຕໍ່ການຮັກສາອະນາໄມແລະຂາດຄຸນສົມບັດ. ນີ້ບໍ່ແມ່ນບັນຫານ້ອຍ, ຫາກແມ່ນການກະທຳທີ່ທຳລາຍພາບພົດຂອງຊາດ. ຄົນທັງຫຼາຍລ້ວນແຕ່ຮູ້ແລ້ວວ່າ, ປັກກິ່ງຈະເປັນເຈົ້າພາບຈັດງານກິລາໂອລິມປິກປີ 2008, ນີ້ແມ່ນໂອກາດທີ່ຫາຍາກແລະກໍ່ແມ່ນໂອກາດທີ່ຈະສະແດງໂສມໜ້າຂອງປະຊາຊົນຈີນໃຫ້ຊາວຕ່າງປະເທດໄດ້ເຫັນ. ສະນັ້ນ ການສຶກສາອົບຮົມມາລະຍາດກ່ອນງານກິລາໂອລິມປິກແມ່ນສຳຄັນຫຼາຍ, ເໝືອນດັ່ງການປູກຈິດສຳນຶກດ້ານກິລາຍາມາລະຍາດໃຫ້ຄົນຈີນລ່ວງໜ້າ.
|
