|
ນາງໂຈທິງໆແມ່ນນັກຮ້ອງສຽງກາງ,ນາງມີນິດໄສທີ່ມັກເວົ້າກົງໄປກົງມາ,ລາເລີງເບີກບານໃຈ.ນາງໄດ້ຮ້ອງເພງມາເກືອບ20ປີແລ້ວ,ບົດຮຽນໃນການສະແດງອັນອຸດົມສົມບູນ, ການຫຼໍ່ຫຼອມເຝິກຝົນມາ ຫຼາຍປີໄດ້ເຮັດໃຫ້ນາງກາຍເປັນສິລະປິນຜູ່ດີເດັ່ນທີ່ເຂົ້າໃຈດົນດີໄດ້ຢ່າງດີ.ນາງເປັນຄົນທີ່ເຮັດຫຍັງກໍຕັ້ງໃຈເຮັດໃຫ້ດີໆ.ນາງຄຶດວ່າ,ຖ້າຍັງກະກຽມບໍ່ແລ້ວເທື່ອກໍບໍ່ຫ່ອນຈະອັດເພງອອກຈຳໜ່າຍແບບຫຼັບຫູຫຼັບຕາ.ເດືອນມິຖຸນາປີນີ້,ໃນທີ່ສຸດ,ນາງໂຈທິງໆກໍໄດ້ນຳເອົາຄວາມຕື່ນເຕັ້ນດີໃຈມາໃຫ້ຕົນເອງແລະທຸກຄົນທີ່ມັກດົນຕີ,ນັ້ນກໍຄືນາງໄດ້ອັດCDແຜ່ນທຳອິດຂອງຕົນ.
;ທີ່ທ່ານພວມຟັງຢູ່ນີ້ແມ່ນເພງ"ຄືນນີ້ລົມພັດເຊີຍມາ"
ທີ່ຂັບຮ້ອງໂດຍນາງໂຈທິງໆ.ເພງນີ້ໄດ້ວາດພາບ ລາຕີທີ່ງຽບສະຫງັດ, ທ່າມກາງສາຍລົມທີ່ອົບອຸ່ນ,ຄູ່ຮັກທີ່ຢູ່ຄົນລະຟາກຟ້າຫ່ວງໃຍແລະຄິດຮອດຄິດເຖິງກັນ.
ນາງໂຈທິງໆກ່າວວ່າ,ແຕ່ລະເພງໃນCDແຜ່ນນີ້,ນັບຕັ້ງແຕ່ການແຕ່ງທຳນອງກໍໄດ້ຕັ້ງໃຈບັນລະຍາຍຈິດໃຈອາລົມ,ນາງ ຢາກໃຫ້ຜູ່ຟັງຊາບຊຶມທຳນອງດົນຕີຂອງນາງດ້ວຍຄວາມຮັກແພງໃນສ່ວນເລິກຂອງຫົວໃຈ.ຕໍ່ໄປເຊີນຟັງເພງ"ວ່າວ"ທີ່ຂັບຮ້ອງໂດຍນາງໂຈທິງໆ.
ເພງ"ວ່າວ"ໄດ້ສະແດງໃຫ້ເຫັນ ຍິງສາວຜູ່ໜຶ່ງທີ່ ສະແຫວງຫາຄວາມຮັກຢ່າງບໍ່ລົດລະ.ເນື້ອເພງມີຢູ່ວ່າ:"ຂ້ອຍແມ່ນວ່າວອັນໜຶ່ງ, ຖືກຜູກມັດຢູ່ທ້ອງຟ້າຂອງເຈົ້າ, ຄຽງຂ້າງມີແຕ່ສຽງລົມ, ເພື່ອໃຫ້ເຈົ້າດີໃຈ.ຂ້ອຍຍິນຍອມຢຸດຄ້າງຢູ່ເທິງຟ້າ,ບໍ່ຢາກດິ້ນຫຼຸດອອກຈາກເຊືອກເສັ້ນນ້ອຍໆ.ຂ້ອຍກໍແມ່ນວ່າວຂອງເຈົ້າ,ບໍ່ຢາກໃຫ້ລົມເຊົາພັດຈັກເທື່ອ,ບໍ່ມີລົມ,ວ່າວກໍເສຍຄຸນປະໂຫຍດ,ບໍ່ມີເຈົ້າ,ຂ້ອຍບໍ່ອາດທຸ່ນທ່ຽງໄດ້."
ສຽງຂອງນາງໂຈທິງໆມີຈຸດພິເສດຄືສຽງເພງບູຮານ,ສຽງນວນແລະມີສະເໜຈັບໃຈ.ສຽງເພງອັນອ້ອຍອິ່ນຂອງນາງເຮັດໃຫ້ຜູ່ຟັງຊຶ້ງໃຈ ຢ່າງບໍ່ຮູ້ສຶກຕົວ,ລືມຄວາມນັນແຊວໃນຊີວິດຊົ່ວຄາວ,ຄ່ອຍໆສຳນຶກກຶກກອງຄວາມໂສກເສົ້າແລະຄວາມມ່ວນຊື່ນແຫ່ງຊີວິດ.ຕໍ່ໄປ,ເຊີນຟັງເພງ"ການຈາກກັນຈະດີງາມໄດ້ແນວໃດ"ເພງນີ້ມີລັກສະນະດົນຕີແຈສຢ່າງເຂັ້ມຂຸ້ນ,ສຽງເປຍໂນແມ່ນຈຸດຮຸ່ງຂອງດົນຕີປະສານໃນເພງ,ອັນເຮັດທຳນອງໂສກເສົ້າຈາງລົງ.
ເພງນີ້ແມ່ນນາງໂຈທິງໆເປັນຜູ່ແຕ່ງເນື້ອຮ້ອງ,ໃຊ້ຄວາມສະຫງ່າເຂົ້າແທນຄວາມ ເສົ້າໝອງໃນຍາມຈາກກັນ.ເນື້ອເພງມີຢູ່ວ່າ:"ໄດ້ເວົ້າມາພັນຄວາມໝື່ນຄວາມແລ້ວ,ຖ້າໃຫ້ຂ້ອຍເວົ້າອີກຄຳໜຶ່ງ,ຂ້ອຍຍັງຈະຊ້ຳຄວາມເກົ່າຄື ຂ້ອຍຮັກເຈົ້າ.
ສຽງເພງຂອງນາງໂຈທິງໆໄດ້ປຸກຄວາມຊົງຈຳທີ່ເກັບໄວ້ດົນນານແລ້ວ ຂອງຄົນທັງຫຼາຍ,ເຮັດໃຫ້ຄົນຫວນຄືນເຖິງຄວາມງາມແລະຄວາມເສົ້າໝອງໃນເມື່ອກ່ອນ.ສຽງຂອງນາງກະຕຸ້ນໃຈຄົນ,ເສົ້າໝອງ,ອ່ອນໂຍນ,ປະທັບໃຈ,ມີເອກະລັກທີ່ສຸພາບແບບດັ້ງເດີມ.
ທີ່ທ່ານພວມຟັງຢູ່ນີ້ແມ່ນເພງ"ຕົ້ນວິສທາເລຍ".ໃນເພງນີ້,ນາງກໍແມ່ນຜູ່ຍິງທີ່ສວຍງາມສູງສົ່ງ ອ່ອນໂຍນ.ຄວາມງາມຂອງນາງກໍເໝືອນດັ່ງຕົ້ນວິສທາເລຍທີ່ພວມອອກດອກສົ່ງກິ່ນຫອມຫວນ.
" ຍ່າງມາໃນຄວາມຝັນ"ທີ່ຂັບຮ້ອງໂດຍນາງໂຈທິງໆ.ເພງນີ້ ເຕັມໄປດ້ວຍບັນຍາກາດຄວາມອົບອຸ່ນແລະຄວາມຮັກຂອງແມ່,ວາດພາບທີ່ສວຍງາມພາບໜຶ່ງໃນຄວາມງຽບສະຫງັດ.ເໝືອນດັ່ງເດັກນ້ອຍນອນຢູ່ໃນຊວງເອິກຂອງແມ່,ເຕີບໃຫຍ່ໃນການຫຼໍ່ລ້ຽງແຫ່ງຄວາມຮັກຂອງແມ່.
"ແອນ້ອຍຂາວຜຸດຜ່ອງ,ຍ່າງມາໃນຄວາມຝັນ,ດັ່ງສາຍລົມເຢັນພັດເຊີຍ,ຍິ້ມງາມເໝືອນດອກບົວເບັ່ງບານ,ສົມດັ່ງຄວາມໝາຍປອງຂອງແມ່,ໂລກຈະຢູ່ຄຽງຂ້າງລູກ,ແມ່ຊົມເຊີຍລູກ."
|
