|
|
 |
| (GMT+08:00)
2006-10-09 16:49:36
|
 |
|
ງານສະແດງສິລະປະມິດຕະພາບລາວຈີນ——ສຽງບັນຍາກາດຂອງການສະແດງຂອງຄະນະສິລະປະແຫ່ງຊາດລາວຢູ່ຈີນ
cri
Author: min
|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີ, ທ່ານຜູ້ຟັງທີ່ເຄົາລົບ, ສົມບູນຜູ້ດຳເນີນລາຍການຍິນດີທີ່ໄດ້ພົບກັບທ່ານໃນລາຍການນັດພົບໃນວັນອາທິດ. ຄຶດວ່າ, ທ່ານຜູ້ຟັງຄົງຮູ້ດີແລ້ວຈາກການລາຍງານຂ່າວຂອງພວກເຮົາໃນສອງມື້ມານີ້ວ່າ, ໃນສະເພາະໜ້ານີ້, ງານສິລະປະອາຊີປີ 2006 ພວມຈັດຂຶ້ນຢ່າງຟົດຟື້ນຢູ່ນະຄອນປັກກິ່ງ. ໃນໂອກາດນີ້, ເພື່ອລະລຶກຈີນລາວສ້າງສາຍສຳພັນທາງການທູດຄົບຮອບ 45 ປີ, ຕອນຄ່ຳມື້ວານນີ້, ນັກສະແດງຂອງຄະນະສິລະປະແຫ່ງຊາດລາວທີ່ມາເຂົ້າຮ່ວມງານສິລະປະອາຊີໄດ້ຈັດງານສະແດງພິເສດຢູ່ໂຮງລະຄອນໄຫຕ້ຽນປັກກິ່ງ. ໃນລາຍການມື້ນີ້, ພວກເຮົາໄດ້ຈັດເອົາອັດສຽງລາຍການດີເດັ່ນໃນງານສະແດງດັ່ງກ່າວມາສູ່ທ່ານຟັງ.
ເວລາ 7 ໂມງເຄິ່ງໃນຕອນຄ່ຳວັນທີ 2 ກັນຍາເວລາປັກກິ່ງ, ໂຮງລະຄອນໄຫຕ້ຽນທີ່ກວ້າງໃຫຍ່ມີຜູ້ຊົມນັ່ງເຕັມໝົດ, ງານລາຕີຂອງຄະນະສິລະປະແຫ່ງຊາດລາວໄດ້ເປີກສາກໃນທ່າມກາງຄວາມຄອງຄອຍຂອງຜູ້ຊົມທັງຫຼາຍ. ນັກສະແດງລາວ 20 ກວ່າຄົນໄດ້ສະແດງລາຍການຟ້ອນມູນເຊື້ອ, ຮ້ອງເພງລາວແລະເພງຈີນ, ດ່ຽວແຄນ, ແລະຍັງມີການສະແດງອາພອນຊົງນານແບບບູຮານກັບແບບໃໝ່ຂອງລາວ, ວາດຟ້ອນອັນອ່ອນຊ້ອຍ, ແລະສຽງເພງອັນໄພເລາະເພາະຫູ, ໄດ້ສະແດງໃຫ້ເຫັນຮີດຄອງປະເພນີອັນດີງາມຂອງລາວ, ແລະສະແດງໃຫ້ເຫັນນ້ຳໃຈມິດຕະພາບອັນເລິກເຊິ່ງລະຫວ່າງປະຊາຊົນສອງຊາດລາວຈີນ.
ຖ້າບໍ່ແມ່ນເຫັນກັບຕາ, ຄົນຈີນທຸກຄົນອາດຈະນຶກວ່າສຽງເພງທີ່ຄຸ້ນຫູນີ້ຄົງຈະແມ່ນນັກຮ້ອງຈີນເປັນຜູ້ຂັບຮ້ອງ, ແຕ່ທີ່ຈິງແລ້ວ, ເພງນີ້ແມ່ນຂັບຮ້ອງໂດຍທ່ານຄຳພັນ ພົນທອງສີທີ່ໄດ້ຕັ້ງສະແດງສູ່ເພື່ອນຈີນຟັງເປັນພິເສດ:
ເປັນຫຍັງຂ້າພະເຈົ້າຈຶ່ງເລືອກເອົາເພງຈີນທີ່ຊື່ວ່າ "ເປັນເພື່ອນມິດຕະຫຼອດການ"ນັ້ນ, ເພາະວ່າເພງນີ້ເປັນເພງທີ່ມີເນື້ອໃນມີສາລະ, ແລະກຳລັງແທດເໝາະກັບຄວາມເປັນຈິງ, ໃນໄລຍະນີ້, ຕົກມາປີນີ້ກໍ່ແມ່ນວ່າລະຫວ່າງສາຍສຳພັນທາງການທູດລະຫວ່າງລາວຈີນຄົບຮອບ 45 ປີ, ແລ້ວເວົ້າສະເພາະກໍ່ແມ່ນປະຊາຊົນລາວກັບປະຊາຊົນຈີນເຄີຍມີມູນເຊື້ອຮັກແພງກັນແຕ່ດົນນານແລ້ວ, ສະນັ້ນ, ຢາກໃຫ້ຄວາມຮັກຄວາມແພງລະຫວ່າງປະຊາຊົນລາວກັບປະຊາຊົນຈີນແລະສາຍສຳພັນທາງການທູດໃຫ້ໝັ້ນຄົງຂະໜົງແກ່ນ, ຈົ່ງຊົ່ວຟ້າດິນສະຫຼາຍ, ຄືກັບເພງນີ້ໄດ້ບັນລະຍາຍເຖິງ.
ເຊັ່ນດຽວກັນກັບທ່ານຄຳພັນ ພົນທອງສີ, ນາງທອງຍົດ ນານພະລັງສີໄດ້ຮ້ອງເພງລາວຄືເພງ "ໂອ້ ດວງຈຳປາ" ແລະເພງຈີນ "ກຳແພງຍາວ"ສູ່ຟັງ, ດອກຈຳປາແມ່ນດອກໄມ້ປະຈຳຊາດຂອງລາວ, ກຳແພງຍາວແມ່ນສັນຍາລັກຂອງຈີນ, ສຽງເພງອັນໄພເລາະເພາະຫູຂອງນາງທອງຍົດໄດ້ປະທັບໃຈຜູ້ຊົມໝົດທຸກຄົນ.
ດົນຕີແມ່ນສິລະປະທີ່ບໍ່ມີພົມແດນ, ແມ່ນພາສາທີ່ບໍ່ຕ້ອງແປ. ງານລາຕີເທື່ອນີ້, ສິລະປິນທັງຫຼາຍນອກຈາກຮ້ອງເພງສັນລະເສີນມິດຕະພາບລາວຈີນແລ້ວ, ຍັງໄດ້ສະແດງລາຍການຟ້ອນທີ່ສ່ອງແສງຮີດຄອງປະເພນີອັນດີງາມແລະມີສະເໜຂອງລາວສູ່ຜູ້ຊົມຈີນທັງຫຼາຍ.
ທ່ານຜູ້ຟັງ, ທີ່ທ່ານຟັງຈົບລົງແມ່ນດົນຕີລາຍການຟ້ອນ "ສາວກໍ້ປັ່ນຝ້າຍ" ແລະເພງ "ເຢັນສະບາຍຊາວນາ".
ລາຍການທີ່ເຕັມໄປດ້ວຍບັນຍາກາດອັນມີສະເໜຂອງລາວນັ້ນໄດ້ຮັບສຽງຕົບມື້ຊົມເຊີຍອັນຟົດຟື້ນຈາກຜູ້ຊົມທັງຫຼາຍ. ທ່ານວາງເຊິນ ເຈົ້າໜ້າທີ່ກະຊວງການຕ່າງປະເທດຈີນທີ່ໄດ້ມາຊົມການສະແດງເວົ້ານຳນັກຂ່າວ CRI ພວກເຮົາດ້ວຍຄວາມດີອົກດີໃຈວ່າ:
ຄະນະສິລະປະແຫ່ງຊາດລາວທີ່ມາສະແດງຢູ່ຈີນເທື່ອນີ້, ມີແຕ່ 25 ຄົນ, ແຕ່ລາຍການຂອງພວກເພິ່ນຫຼາຍປານນີ້, ແລະໜ້າຊົມຫຼາຍ, ນີ້ແມ່ນການແລກປ່ຽນທາງດ້ານວັດທະນະທຳລະຫວ່າງປະຊາຊົນສອງຊາດລາວຈີນ, ແມ່ນຂອງຂວັນອັນລ້ຳຄ່າທີ່ປະຊາຊົນລາວມອບໃຫ້ປະຊາຊົນຈີນ.
ຄະນະສິລະປະແຫ່ງຊາດລາວທີ່ມາສະແດງຢູ່ຈີນເທື່ອນີ້ມີແຕ່ 25 ຄົນ, ແຕ່ລາຍການຂອງພວກເພິ່ນຫຼາຍປານນີ້ແລະໜ້າຊົມຫຼາຍ, ນີ້ແມ່ນການແລກປ່ຽນທາງດ້ານວັດທະນະທຳລະຫວ່າງປະຊາຊົນສອງຊາດລາວຈີນເທື່ອໜຶ່ງ, ແມ່ນຂອງຂວັນອັນລ້ຳຄ່າທີ່ປະຊາຊົນລາວມອບໃຫ້ປະຊາຊົນຈີນ.
ທ່ານບົວເງິນ ຊາພູວົງ ລັດຖະມົນຕີຊ່ອຍວ່າການກະຊວງຖະແຫຼງຂ່າວແລະວັດທະນະທຳລາວກໍຮູ້ສຶກເພິ່ງພໍໃຈຕໍ່ການສະແດງເທື່ອນີ້, ທ່ານເວົ້າວ່າ:
ຂ້າພະເຈົ້າມີຄວາມພາກພູມໃຈເປັນພິເສດທີ່ການສະແດງໃນຄ່ຳຄືນມື້ນີ້ທາງສອງຝ່າຍລາວແລະຈີນໄດ້ຮ່ວມກັນຈັດຕັ້ງການສະແດງເປັນຢ່າງດີ, ໄດ້ເຫັນເພື່ອນມິດຊາວຈີນເປັນຈຳນວນຫຼວງຫຼາຍທີ່ໄດ້ມາເບິ່ງມາຊົມ, ທຸກແບບຟ້ອນ, ທຸກເພງຮ້ອງໄດ້ຮັບສຽງຕົບມືຊົມເຊີຍຕ້ອນຮັບຈາກທ່ານຜູ້ຊົມເປັນຢ່າງຍິ່ງ, ເຫັນວ່າອາລົມຂອງນັກສະແດງແລະທ່ານຜູ້ຊົມໄດ້ມີອັນຮ່ວມກັນ, ນັ້ນກໍຄືຄວາມສາມັກຄີມິດຕະພາບຂອງສອງຊາດພວກເຮົາຈະເລີນງົດງາມຂຶ້ນໄປ, ຂ້າພະເຈົ້າມີຄວາມພາກພູມໃຈຫຼາຍ. ຂ້າພະເຈົ້າຄິດວ່າ, ການມາສະແດງຂອງຄະນະສິນລະປະກອນຂອງພວກເຮົາໃນຄັ້ງນີ້ຈະເປັນຢາດນ້ຳຢາດນ້ອຍໆຢາດໜຶ່ງທີ່ຈະເພີ່ມພູນຄຸນສ້າງໃຫ້ແກ່ຄວາມສາມັກຄີມິດຕະພາບລາວຈີນພວກເຮົາໝັ້ນຄົງຂະໜົງແກ່ນ, ຊົ່ວຟ້າດິນສະຫຼາຍ.
ການມາສະແດງຂອງຄະນະສິນລະປະກອນຈະເປັນຢາດນ້ຳນ້ອຍໆຢາດໜຶ່ງຂອງຄວາມໃນປະຫວັດສາດແຫ່ງມິດຕະພາບລະຫວ່າງຈີນກັບລາວ. ຈັ່ງແມ່ນການອຸປະມາອັນຖືກຕ້ອງແທ້ໆ, ມິດຕະພາບຈີນລາວມີມາແຕ່ສະໄໝບູຮານ, ເມື່ອທຽບໃສ່ກັນແລ້ວ, ງານລາຕີເພື່ອລະລຶກຈີນລາວສ້າງສາຍສຳພັນການທູດຄົບຮອບ 45 ປີຂອງຄະນະສິລະປະແຫ່ງຊາດລາວເທື່ອນີ້ອາດເວົ້າໄດ້ວ່າແມ່ນນ້ຳຢາດໜຶ່ງໃນສາຍນ້ຳມິດຕະພາບລາວຈີນ, ແຕ່ມັນໄດ້ສ້າງພາບປະທັບໃຈອັນເລິກເຊິ່ງໄວ້ກັບຜູ້ຊົມຈີນ. ຕໍ່ໄປ, ເຊີນຟັງເພງ"ຈົ່ງກົວ-ລາວອົວ ລາວອົວ-ຈົ່ງກົວ" ແປວ່າ "ຈີນ-ລາວ ລາວ-ຈີນ", ພວກເຮົາຈົ່ງພ້ອມກັນອວຍພອນໃຫ້ມິດຕະພາບສອງຊາດຈີນລາວຈົ່ງໄຫຼພຸ່ງໄປໜ້າເໜືອນດັ່ງນະທີໃຫຍ່, ແລະບໍ່ມີວັນເຫືອດແຫ້ງຈົນເທົ່າໃດໆ.
"ຈີນລາວ, ລາວຈີນ,ມີສາຍພູສາຍແລະແມ່ນ້ຳຕິດຈອດກັນ, ດອກໄມ້ແຫ່ງມິດຕະພາບບານເຮື່ອເຮືອງຢູ່ທຸກແຫ່ງຫົນ, ຈີນລາວ, ລາວຈີນ, ມິດຕະພາບລະຫວ່າງສອງຊາດພວກເຮົາໝັ້ນຄົງຂະໜົງແກ່ນ, ຊົ່ວຟ້າດິນສະຫຼາຍ"
ທ່ານຜູ້ຟັງທີ່ຮັກແພງ, ໃນທ່າມກາງສຽງເພງ "ຈົ່ງກົວລາວອົວ" ນີ້, ອັດສສຽງງານລາຕີຂອງຄະນະສິລະປະແຫ່ງຊາດລາວທີ່ສະແດງຢູ່ຈີນເທື່ອນີ້ຂໍ້ຈົບລົງພຽງທໍ່ນີ້, ສົມບູນແລະກຸຫຼາບຜູ້ຮຽບຮຽງຂໍຂອບໃຈທ່ານທີ່ຮັບຟັງ, ພົບກັນໃໝ່ໃນອາທິດໜ້າ, ສະບາຍດີ!
|
|
|
