|
ຍ້ອນເປັນອົງການທີ່ມີບົດບາດກອບກູ້ຊ່ອຍເຫຼືອທາງສັງຄົມ,ສະພາກາແດງໄດ້ຈັດການເຄື່ອນໄຫວຊ່ອຍເຫຼືອຊາວອົບພະຍົບແລະບໍລິຈາກເງິນໃຫ້ຜູ້ປະສົບໄພໂດຍຕະຫຼອດ,ແລະຕັ້ງໜ້າເຂົ້າຮ່ວມການຊ່ອຍເຫຼືອແບບມະນຸດສະທຳ.ສະພາກາແດງຈີນສ້າງຕັ້ງຂຶ້ນໃນ ປີ1904,ປະຈຸບັນນີ້,ມີ31ສາຂາລະດັບແຂວງແລະ2ສາຂາເຂດບໍລິຫານພິເສດ ຄື ຮົງກົງແລະມາກາວ.ນອກນີ້,ສະພາກາແດງຈີນຍັງມີສາຂາຍ່ອຍຂັ້ນຮາກຖານອີກ7ໝື່ນກວ່າອົງ ການ.
ຢູ່ເມືອງນ້ອຍຈິນຊ້າງ ນະຄອນຊືຊື່ແຂວງຟູຈ້ຽນທີ່ຕັ້ງຢູ່ແຄມທະເລພາກຕາເວັນອອກສຽງໃຕ້ຂອງຈີນ,ມີສາຂາສະພາກາແດງຂັ້ນຮາກຖານແຫ່ງໜຶ່ງ,ຈັດຕັ້ງຂຶ້ນໂດຍປະຊາຊົນທີ່ມີຄວາມຈູບຈ້າວຕໍ່ການກຸສົນ,ອົງການນີ້ໄດ້ຮັບຄວາມໄວ້ເນື້ອເຊື່ອໃຈແລະຄວາມໂຄລົບນັບ ຖືຈາກປະຊາຊົນຍ້ອນໄດ້ຈັດການເຄື່ອນໄຫວບໍລິຈາກເພື່ອການກຸສົນທີ່ເປັນເງິນແລະວັດ ຖຸ.
ເມືອງຈິນຊ້າງຂອງນະຄອນຊືຊື່ແມ່ນເມືອງນ້ອຍແຄມທະເລແຫ່ງໜຶ່ງ,ມີປະຊາກອນບໍ່ ຮອດ1ໝື່ນຄົນ,ແຕ່ເຂົາເຈົ້າຍັງມີຍາດພີ່ນ້ອງທີ່ໄປດຳລົງຊີວິດຢູ່ຕ່າງປະເທດເຖິງ1ໝື່ນກວ່າຄົນ,ລາຍໄດ້ສະເລ່ຍຕໍ່ຫົວຄົນຂອງປະຊາຊົນໃນເມືອງນີ້ປີໜຶ່ງມີ8ພັນຢວນ.ແຕ່ຢູ່ບ່ອນທີ່ເສດຖະກິດອ່າວພັດທະນາແລະຊີວິດການເປັນຢູ່ອ່າວຮັ່ງມີບ່ອນນີ້,ຍັງມີຄົນຈຳ ນວນໜຶ່ງຕົກຢູ່ໃນສະພາບຫຍຸ້ງຍາກຍ້ອນເກີດພະຍາດຫຼືປະສົບໄພ,ຕ້ອງການຄວາມຊ່ອຍເຫຼືອແລະຄວາມເອົາໃຈໃສ່ຈາກສັງຄົມ.
ໃນມື້ໜຶ່ງຂອງປີ1999,ທ່ານອູສີຊ່າງ ເຈົ້າຂອງຮ້ານພິມເອກະສານແຫ່ງໜຶ່ງໄດ້ພົບພໍ້ເລື່ອງໜຶ່ງ ຄື ມີຊາວບ້ານທີ່ທຸກຍາກຜູ້ໜຶ່ງຂໍໃຫ້ທ່ານຊ່ອຍຂຽນຈົດໝາຍໄປຍັງພີ່ນ້ອງທີ່ດຳລົງຊີ ວິດຢູ່ຟິລິບປິນ,ຂໍໃຫ້ພີ່ນ້ອງຝາກເງິນມາຊ່ອຍປິ່ນປົວພະຍາດໃຫ້ແມ່ຂອງລາວ.ທ່ານອູສີຊ່າງສອບຖາມນຳຊາວບ້ານຜູ້ອື່ນແລ້ວຈຶ່ງຮູ້ວ່າ,ຊາວບ້ານຜູ້ນີ້ທຸກຍາກທີ່ສຸດຈົນບໍ່ມີເງິນຊື້ຕະກຽງມາໄຕ້.ເລື່ອງນີ້ເຮັດໃຫ້ທ່ານອູສີຊ່າງເກີດຄວາມຄິດທີ່ປະດິດສ້າງກອງທຶນຄວາມຮັກ.ທ່ານເວົ້າວ່າ:"ຂ້ອຍໄດ້ພົບພໍ້ຜູ້ເຖົ້າຫຼາຍຄົນ,ພວກເພິ່ນຂໍໃຫ້ຂ້ອຍຊ່ອຍຂຽນຈົດໝາຍໄປຟິລິບປິນ ໄປຮົງກົງ,ຂໍໃຫ້ພີ່ນ້ອງຂອງພວກເພິ່ນຝາກເງິນມາໜ້ອຍໜຶ່ງຊ່ອຍພວກເພີ່ນ ຜ່ານຜ່າຄວາມຫຍຸ້ງ ຍາກດ້ານເສດຖະກິດ.ມີບາງຄົນແມ່ນຍ້ອນເກີດພະຍາດ ຍັງມີບາງຄົນແມ່ນຍ້ອນປະສົບໄພທຳມະຊາດ.ໃນຕອນນັ້ນ,ຂ້ອຍຈຶ່ງຮູ້ວ່າ,ຢູ່ເຂດທີ່ເສດຖະກິດພັດ ທະນາ,ຍັງມີປະຊາຊົນຈຳນວນໜຶ່ງທີ່ຍັງທຸກຍາກຫຼາຍແລະຕ້ອງການຄວາມຊ່ອຍເຫຼືອ ຈາກຜູ້ອື່ນ."
ຄວາມຄິດຂອງທ່ານອູສີຊ່າງພໍດີຄືກັນກັບຄວາມຄິດຂອງທ່ານຊິ່ວອີຊ້າງ ນັກລົບທີ່ໄດ້ອອກບຳນານແລ້ວຂອງເມືອງຈິນຊ້າງ.ເມື່ອໄດ້ທຳຄວາມພະຍາຍາມແລະກະກຽມໄລຍະໜຶ່ງແລ້ວ,ໃນວັນທີ17ມັງກອນປີ2001,ສະພາກາແດງເມືອງຈິນຊ້າງໄດ້ສ້າງຕັ້ງຂຶ້ນຢ່າງເປັນທາງການ.ໃນເວລາບໍ່ດົນພາຍຫຼັງສະພາກາແດງສ້າງຕັ້ງຂຶ້ນແລ້ວ,ພວກເພິ່ນກໍໄດ້ດຳເນີນວຽກງານບໍລິຈາກເພື່ອການກຸສົນທີ່ມວນຊົນໃນເມືອງຮັບຮູ້ດີ.
ຢູ່ເມືອງຈິນຊ້າງມີເດັກຊາຍຜູ້ໜຶ່ງ,ຄື ທ້າວຊິ່ວຢູ້ຢູ້.ໃນຍາມລາວ7ປີ,ໃນເວລາກວດສຸຂະ ພາບ,ນາຍໝໍກວດພົບວ່າ ໝາກຫົວໃຈຂອງເດັກຜູ້ນີ້ຍ້າຍໄປຂ້າງຂວາແລະມີຫຼາຍພະຍາດເກີດພ້ອມກັນ.ຍ້ອນຄອບຄົວທຸກຍາກ,ພະຍາດຂອງເດັກຜູ້ນີ້ບໍ່ໄດ້ຮັບການປິ່ນປົວ.
ພາຍຫຼັງຮັບຮູ້ເລື່ອງນີ້ແລ້ວ,ທ່ານຊິ່ວອີຊ້າງແລະທ່ານອູສີຊ່າງພ້ອມດ້ວຍທ່ານອື່ນໆໄດ້ຖືອາຫານບຳລຸງສຸຂະພາບຖົງໜຶ່ງໄປເຮືອນຂອງທ້າວນ້ອຍຊິ່ວຢູ້ຢູ້ທີ່ພວມນອນຢູ່ເທິງຕຽງຫາຍໃຈແບບອິດອ່ອນ ໃກ້ຈະເສຍຊີວິດແລ້ວ,ພໍ່ແມ່ຂອງລາວເຝົ້າຢູ່ທາງຂ້າງ ນ້ຳຕາໄຫຼບໍ່ເຊົາ.
ເມື່ອອອກຈາກເຮືອນຂອງທ້າວນ້ອຍຊິ່ວຢູ້ຢູ້ແລ້ວ,ທຸກຄົນເວົ້າວ່າ,ຕ້ອງຊອກຫາວິທີຊ່ອຍຊີ ວິດເດັກຜູ້ນີ້.ຕອນຄ່ຳມື້ນັ້ນ,ສະພາກາແດງຂອງເມືອງຈິນຊ້າງໃຫ້ໄຂກອງປະຊຸມດ່ວນ,ກຳ ມະການບໍລິຫານງານ30ກວ່າທ່ານຂອງສະພາກາແດງນີ້ຮີບມາເຂົ້າຮ່ວມກອງປະຊຸມຈາກບ້ານຕ່າງໆ,ເມື່ອຮັບຮູ້ອາການພະຍາດຂອງທ້າວນ້ອຍຊິ່ວຢູ້ຢູ້ແລ້ວ,ກຳມະການ30ກວ່າທ່ານນີ້ພາກັນນຳໜ້າບໍລິຈາກເງິນ,ແລ້ວໄປຂໍບໍລິຈາກເງິນຈາກສະມາຊິກສະພາກາແດງ,ແລະຖືຫີບບໍລິຈາກເງິນໄປເລາະຂໍເງິນບໍລິຈາກຢູ່ບ້ານຕ່າງໆ.ໃນທີ່ສຸດ,ພວກເພິ່ນໄດ້ເງິນບໍລິຈາກ1ແສນ3ໝື່ນຢວນ.
ເມື່ອມີເງິນແລ້ວ,ທ້າວນ້ອຍຊິ່ວຢູ້ຢູ້ກໍໄປປິ່ນປົວພະຍາດຢູ່ໂຮງໝໍໃຫຍ່ເຂດທະຫານຟູໂຈ່ວ.ເມື່ອປົວພະຍາດສີ່ເດືອນແລ້ວ,ສຸຂະພາບລາວຄືນສູ່ປົກກະຕິແລະກັບຄືນໂຮງຮຽນ,ກັບຄືນສູ່ອ້ອມກອດຂອງຄູສອນແລະເພື່ອນຮ່ວມຫ້ອງຮຽນ.
ເດັກຍິງຊິ່ວຢຸນອິ່ງຂອງເມືອງຈິນຊ້າງອາຍຸ6ປີ,ໃນຮ່າງກາຍຂອງນາງເກີດມີຊີ້ນປົ່ງທີ່ໃຫຍ່ສ່ຳໄຂ່ໄກ່10ກວ່າໜ່ວຍ,ຄວາມເຈັບປ່ວຍພາໃຫ້ນາງນອນບໍ່ໄດ້ຕະຫຼອດມື້ຕະຫຼອດຄືນ. ທ່ານຊິ່ວອີຊ້າງພ້ອມກັບທ່ານອື່ນໄປຂໍເງິນບໍລິຈາກຢູ່ແຫ່ງຕ່າງໆ,ເພື່ອໃຫ້ນາງນ້ອຍຊິ່ວ ຢຸນອິ່ງມີເງິນໄປຜ່າຕັດ.
ທ່ານຊິ່ວອີຊ້າງເວົ້າວ່າ:"ນາງນ້ອຍຊິ່ວຢຸນອິ່ງບໍ່ມີເງິນໄປຜ່າຕັດ,ນາຍບ້ານມາຫາຂ້ອຍ,ຂໍໃຫ້ສະພາກາແດງຊ່ອຍຂໍບໍລິຈາກເງິນຈາກມວນຊົນ.ທຳອິດ,ຂ້ອຍໄດ້ຮຽກໄຂກອງປະຊຸມ ຄະນະບໍລິຫານງານ,ເມື່ອຮູ້ເລື່ອງນີ້ແລ້ວ,ກຳມະການບໍລິຫານງານບາງຄົນບໍລິຈາກ300 ຢວນ ບາງຄົນບໍລິຈາກ400,500ຢວນ,ສະສົມໄດ້3ພັນກວ່າຢວນ.ຂ້ອຍຄິດວ່າ,ການຜ່າ ຕັດຕ້ອງການເງິນຫຼາຍ,ມີແຕ່3ພັນກວ່າຢວນບໍ່ພໍແນ່ນອນ,ສະນັ້ນ,ພວກເຮົາກໍໄປເລາະຂໍບໍລິຈາກເງິນຢູ່ຕາມຖະໜົນຫົນທາງ,ລະດົມສັງຄົມ.ຄົນທັງຫຼາຍຮູ້ເລື່ອງນີ້ແລ້ວ,ບາງຄົນບໍ ລິຈາກ200ຢວນ,ບາງຄົນບໍລິຈາກ100ຢວນ,ໃນທີ່ສຸດ,ລວມຮັບເງິນໄດ້1ແສນ1ໝື່ນ500ຢວນ."
ນາງນ້ອຍຊິ່ວຢຸນອິ່ງຖືກສົ່ງເຂົ້າໂຮງໝໍ,ໄດ້ຕັດຊີ້ນປົ່ງທີ່ເຮັດໃຫ້ນາງທົນທຸກທໍລະມານມາໄດ້3-4ປີນັ້ນອອກ.ແມ່ຂອງນາງນ້ອຍຊິ່ວຢຸນອິ່ງເວົ້າວ່າ,ພາຍຫຼັງຮັບການຜ່າຕັດແລ້ວ,ລູກນອນຫຼັບໄດ້,ໄປເຂົ້າຮຽນກໍໄດ້.ນາງຂອບອົກຂອບໃຈຢ່າງສຸດຊຶ້ງຕໍ່ຄວາມເອົາໃຈໃສ່ແລະການຊ່ອຍເຫຼືອຂອງສະພາກາແດງເມືອງ.
ແຕ່ປີ2001ເປັນຕົ້ນມາ,ສະພາກາແດງເມືອງຈິນຊ້າງຂໍບໍລິຈາກເງິນກອບກູ້ຊ່ອຍເຫຼືອໄດ້4ແສນກວ່າຢວນ,ກູ້ໄພແລະຊ່ອຍເຫຼືອຜູ້ທຸກຍາກ30ກວ່າເທື່ອ,ລວມມີ3ພັນກວ່າຄົນໄດ້ຮັບ ການຊ່ອຍເຫຼືອ.
ຄຽງຄູ່ກັບການພັດທະນາວຽກງານຂອງຕົນ,ສະມາຊິກຂອງສະພາກາແດງເມືອງຈິນຊ້າງໄດ້ເພີ່ມຈາກ37ຄົນໃນຫົວທີຂຶ້ນເປັນ212ຄົນໃນປະຈຸບັນ.ບໍ່ພຽງແຕ່ໃນ10ບ້ານຂອງເມືອງຈິນຊ້າງເປັນສະມາຊິກ,ຍັງຂະຫຍາຍໄປຮອດບ້ານແລະເມືອງທີ່ຢູ່ໃກ້ຄຽງ.ໃນສະມາຊິກເຫຼົ່ານີ້ມີຊາວກະສິກອນ,ເຈົ້າຂອງວິສາຫະກິດເອກະຊົນ,ກຳມະກອນ,ມີຄົນຮັ່ງມີ,ຄົນລະດັບກາງ.ແຕ່ວ່າລ້ວນແຕ່ຢາກອຸທິດຄວາມຮັກ.ທ່ານໄຊ້ເຊິ້ງລີ້ ນັກທຸລະກິດເອກະຊົນ ສະມາ ຊິກສະພາກາແດງເມືອງຈິນຊ້າງກ່າວວ່າ:"ຄວາມສາມາດຂອງສ່ວນບຸກຄົນບໍ່ພຽງພໍ,ຕ້ອງໂຮມສູນກຳລັງຂອງຄົນທັງຫຼາຍ,ຈຶ່ງສາມາດເຮັດວຽກເພື່ອສັງຄົມ.ມີແຕ່ອາໄສກຳລັງຂອງສະພາກາແດງເທົ່ານັ້ນຈຶ່ງມີວິທີຊ່ອຍເຫຼືອຜູ້ຕ້ອງການຄວາມຊ່ອຍເຫຼືອ."
ປະຈຸບັນນນີ້,ສະພາກາແດງທີ່ສ້າງຕັ້ງຂຶ້ນໂດຍປະຊາຊົນເອງໄດ້ມີຄະນະບໍລິຫານງານຂອງຕົນ,ຍັງມີລະບົບຄຸ້ມຄອງການເງິນແລະການປະຊຸມທີ່ເຂັ້ມງວດ,ຈັດກອງປະຊຸມສະ ມາຊິກຕາມເວລາກຳນົດ,ແລະດຳເນີນການຕາມກົດລະບຽບຂອງສະພາກາແດງ.ສະມາ ຊິກທັງຫຼາຍຂອງສະພາກາແດງເມືອງຈິນຊ້າງໄດ້ອຸທິດກຳລັງຂອງຕົນຢ່າງບໍ່ຮູ້ອິດຮູ້ເມື່ອຍເພື່ອອຸທິດໃຫ້ແກ່ວຽກງານນີ້ດ້ວຍໃຈຮັກ.
|
