ໃນຖານະທີ່ເປັນກິດຈະກຳສຳຄັນໃນປີຈີນອີຕາລີ 2006, ງານວາງສະແດງສິນລະປະວັດທະນະທຳອີຕາລີໄດ້ເປີດສາກຢູ່ຫໍວິຈິດຕະກຳຈີນໃນວັນທີ 9 ກັນຍາ, ແລະຈະດຳເນີນໄປເປັນເວລາຫນຶ່ງເດືອນ, ງານວາງສະແດງ ທີ່ໂຮມສູນການວາງສະແດງຮູບແຕ້ມ,ການອອກແບບ,ເສື້ອຜ້າອາພອນແລະສະແດງລາຍການສິນລະປະ,ຈະສະແດງໃຫ້ຜູ່ຊົມຈີນໄດ້ເຫັນສິ່ງຍອດຍິ່ງ ຂອງສິນລະປະວັດທະນະທຳອີຕາລີ,ແລະເຮັດໃຫ້ຄວາມເຂົ້າໃຈຕໍ່ອີຕາລີຂອງຜູ່ຊົມຈີນອຸດົມສົມບູນຂຶ້ນຮອບດ້ານ.
;ທີ່ທ່ານຟັງຢູ່ນີ້ແມ່ນດົນຕີໃນງານວາງສະແດງອາພອນຍີ່ຫໍ້ວາເລັນທີໂນ ທີ່ເປັນຍີ່ຫໍ້ອີຕາລີທີ່ມີຊື່ສຽງໃນໂລກ.ສິ່ງທີ່ເຮັດໃຫ້ຄົນງຶດງໍ້ນັ້ນແມ່ນເວທີສະແດງອາພອນແມ່ນສ້າງຂຶ້ນຢູ່ໃນຫໍວິຈິດຕະກຳຈີນທີ່ວາງສະແດງສິນລະປະວິຈິດຕະກຳ.ເວທີສະແດງສີຂາວທີ່ປະຈັກຕາຄົນປະສານກັບຫໍວິຈິດຕະກຳທີ່ມີສີສັນພິເສດຂອງສິ່ງກໍ່ສ້າງດັ້ງເດີມຂອງຈີນທີ່ລຽບງ່າຍ,ເຮັດໃຫ້ຄົນມີຄວາມຮູ້ສຶກແປກຫູແປກຕາ.ນາງແບບຈີນແລະຕ່າງປະເທດຫລາຍສິບຄົນໄດ້ນຸ່ງອາພອນຍີ່ຫໍ້ວາເລັນທີໂນເພື່ອສະແດງໃຫ້ຜູ່ຊົມ,ເມື່ອຊຸດລາຕີສີແດງຂອງວາເລັນທິໂນໄດ້ປະກົດຕໍ່ສາຍຕາຜູ່ຊົມ, ກໍ່ໄດ້ຣັບສຽງຕົບມືຢ່າງຟົພດສະຫນັ່ນ.ທ່ານຈີໂອວີນຸຍ.ດີ.ຊາຣໂວ ປະທານເຂດອາຊີປາຊິກຟິກຂອງບໍລິສັດວາເລັນທິໂນແນະນຳວ່າ, ສີແດງແມ່ນສີທີ່ເປັນສັນຍາລັກຂອງວາເລັນທິໂນ,ຊຸດລາຕີສີແດງ 25 ຊຸດທີ່ນຳມາສະແດງໃນມື້ນັ້ນເປັນການອອກແບບທີ່ດີກວ່າຫມູ່ຂອງວາເລັນທິໂນໃນເກືອບ 30 ປີມານີ້.ທ່ານເວົ້າວ່າ:
ສີແດງແມ່ນສີສຳຄັນໃນຊຸດເພດຍິງຂອງວາເລັນທິໂນ,ກໍ່ພໍດີຖືກກັບສີຂອງຈີນໃນສາກົນ,ຂ້າພະເຈົ້າຄິດວ່າບໍ່ມີສີຫຍັງຈະມີລັກສະນະຕົວແທນຄືສີແດງນີ້ອີກ,ຢູ່ຈີນ, ສີແດງສະແດງເຖິງຄວາມກະຕືລືລົ້ນແລະຄວາມຜາສຸກ, ການເດີນແບບສະແດງຊຸດສີແດງກໍ່ເປັນການເປີດສາກໃຫ້ພິທີໄຂງານວາງສະແດງສິນລະປະອີຕາລີ.
ຄຽງຄູ່ກັບການຈັດງານວາງສະແດງອາພອນວາເລັນທິໂນ,ງານວາງສະແດງທີ່ໃສ່ຊື່ວ່າສິນລະປະອີຕາລີແລະວັດທະນະທຳອີຕາລີກໍ່ໄດ້ເປີດສາກຂຶ້ນເຊັ່ນກັນ.ໃນງານວາງສະແດງສິນລະປະອີຕາລີໃນສັດຕະວັດທີ 20,ຜົນງານຂອງນັກແຕ້ມອີຕາລີທີ່ມີຊື່ລືນາມໃນປະຫວັດສາດວິຈິດຕະກຳສະໄຫມມໍ່ຂອງອີຕາລີນັ້ນເກືອບໄດ້ວາງສະແດງອອກຫມົດ,ອັນໄດ້ສ່ອງແສງເຖິງການຂະຫຍາຍຕົວຂອງການແຕ້ມຮູບຂອງອີຕາລີໃນສັດຕະວັດທີ 20 ຢ່າງແຈ່ມແຈ້ງ.ຫໍວາງສະແດງໃນງານວາງສະແດງການອອກແບບຂອງອີຕາລີໃນ 50 ປີມານີ້ກໍ່ປານກັບເຮືອນຢູ່ທີ່ຕົບແຕ່ງຢ່າງສວຍງາມ, ມີເຄື່ອງໃຊ້ສອຍປະຈຳວັນແລະເຄື່ອງປະດັບປະດາຊະນິດຕ່າງໆ,ອັນໄດ້ສ່ອງແສງໃຫ້ເຫັນການອອກແບບກັບເຕັກນິກອຸດສາຫະກຳຂອງອີຕາລີປະສົມປະສານກັນເປັນຢ່າງດີ.ງານວາງສະແດງສິນປະປະເຄື່ອງຄຳຂອງອາເລໂຈທີ່ມີຊື່ສຽງຂອງອີຕາລີກໍ່ຈະຈັດຂຶ້ນເຊັ່ນດຽວກັນ, ຈະວາງສະແດງເຄື່ອງເອ້ຄຳໃຊ້ສຳລັບປະດັບຫົວເມື່ອ 2600 ປີກ່ອນ,ຈົນເຖິງການອອກແບບອັນມະຫັດສະຈັນຊະນິດຕ່າງໆຂອງນັກແຕ້ມ ນັກແກະສະຫລັກ ວິສາວະກອນແລະຊ່າງອອກແບບເຄື່ອງອາພອນທີ່ມີຊື່ສຽງໃນສະໄຫມປະຈຸບັນ.ທ່ານໂຄໂຄຊິນສກີ ນັກສິນລະປິນຜູ່ມີຊື່ສຽງຂອງອີຕາລີກໍ່ຈະນຳເອົາຜົນງານຂອງຕົນເອງມາຈີນເປັນຄັ້ງທຳອິດ,ເພື່ອສະແດງໃຫ້ເຫັນຝີມືພິເສດຂອງທ່ານໃນດ້ານການຄວັດແກະ ການປະດັບປະດາແລະການແຕ້ມ.
ນັກຂ່າວໄດ້ເຫັນວ່າ,ຜູ່ຊົມຢ່າງຫລວງຫລາຍຍາດກັນຖ່າຍຮູບຢູ່ບ່ອນຈັດງານສະແດງຊຸດລາຕີສີແດງວາເລັນທິໂນ.ພາຍຫລັງຖ່າຍຮູບໄວ້ເປັນທີ່ລະລຶກແລ້ວ,ນາງຊຸນອີເຈບອກນັກຂ່າວວ່າ: ຍ້ອນວ່າວາເລັນທິໂນແມ່ນຍີ່ຫໍ້ດັງລະດັບໂລກ, ຜົນງານທີ່ສະແດງໃນມື້ນີ້ລ້ວນແຕ່ແມ່ນຜົນງານສຸດຍອດໃນ 20-30 ປີມານີ້,ຂ້ອຍຮູ້ສຶກວ່າເປັນໂອກາດຫາຍາກທີ່ໄດ້ເຂົ້າຊົມ,ສະນັ້ນຈິ່ງຖ່າຍຮູບໄວ້.ຂ້ອຍຄິດວ່າງານວາງສະແດງນີ້ໄດ້ເອົາຄວາມນິຍົມກັບສິນລະປະປະສົມປະສານກັນ, ເຜີຍແຜ່ສິນລະປະເຂົ້າສູ່ຫມູ່ປະຊາຊົນ,ເຮັດແນວນີ້ດີຫລາຍ, ຜ່ານຈາກວິທີທີ່ມວນຊົນຮັບເອົາໄດ້ແລະທັງນິຍົມ,ເພື່ອຊັກນຳຄົນທັງຫລາຍໄປສົນໃຈສິນລະປະ.
ການເອົາຄວາມດັ້ງເດີມກັບຄວາມທັນສະໄຫມຂອງອີຕາລີປະສົມປະສານກັນ,ແລະຢູ່ເຫນືອຄວາມຄາດຄິດໄວ້ຂອງຜູ່ຊົມຈີນ,ນີ້ແມ່ນຈຸດປະສົງອັນຫນຶ່ງໃນການຈັດງານວາງສະແດງເທື່ອນີ້,ເພື່ອເພີ່ມເນື້ອໃນໃຫ້ຄວາມຄາດຄິດຂອງປະຊາຊົນຈີນທີ່ມີຕໍ່ອີຕາລີ,ເຮັດໃຫ້ຄົນຈີນຊອກຮູ້ອີຕາລີໃນປັດຈຸບັນໃຫ້ຫລາຍຂຶ້ນ,ນີ້ກໍ່ແມ່ນຈຸດປະສົງຂອງປີຈີນອີຕາລີ 2006.ທ່ານກາບຼີເລ.ເມເນກາທິ ເອກອັກຄະລັດຖະທູດອີຕາລີປະຈຳຈີນບອກນັກຂ່າວວ່າ, ເມື່ອ 2 ພັນປີກ່ອນ, ຢູ່ລະຫວ່າງຈີນກັບໂຣມ ເຊິ່ງເປັນປະເທດອາລະຍະທຳເກົ່າແກ່,ເສັ້ນທາງສາຍໄຫມແມ່ນຂົວເຊື່ອມຕໍ່ທີ່ສຳຄັນແຫ່ງການແລກປ່ຽນກັນ, ສູ່ມື້ນີ້, ການແລກ ປ່ຽນດ້ານວັດທະນະທຳໄດ້ກາຍເປັນເສັ້ນທາງສາຍໄຫມເສັ້ນໃຫມ່ລະຫວ່າງຈີນກັບອີຕາລີ.ທ່ານເວົ້າວ່າ:
ການຈັດປີອີຕາລີຢູ່ຈີນ,ມີສອງຈຸດປະສົງຄືຫນຶ່ງ,ແມ່ນເຮັດໃຫ້ປະຊາຊົນຈີນຫລາຍກວ່າເກົ່າໄດ້ຮູ້ວັດທະນະທຳອັນເກົ່າແກ່ຂອງອີຕາລີ, ສອງແມ່ນເພື່ອໃຫ້ປະຊາຊົນຈີນຮູ້ສິນລະປະທັນສະໄຫມຂອງອີຕາລີ,ພວກເຮົາໄດ້ບັນລຸຈຸດປະສົງດັ່ງກ່າວສ່ວນຫນຶ່ງແລ້ວ. ທີ່ຈິງພວກເຮົາຍັງມີຈຸດປະສົງທີສາມ,ຄື ສ້າງການພົວພັນຖາວອນ, ໃຫ້ວົງການວັດທະນະທຳອີຕາລີແລະວົງການວັດທະນະທຳຈີນໄດ້ແລກປ່ຽນກັນຢ່າງຖາວອນ,ການເຄື່ອນໄຫວໃນສູ່ມື້ນີ້ໄດ້ທຳການແລກປ່ຽນກັນແບບນີ້ແລ້ວ, ພວກຂ້າພະເຈົ້າກໍ່ຢາກລົງເລິກຂະຫຍາຍການແລກປ່ຽນແລະຮ່ວມມືແບບນີ້ຕື່ມອີກ.ຢູ່ລະຫວ່າງປະເທດອາລະຍະທຳເກົ່າແກ່ສອງປະເທດນີ້,ເສັ້ນທາງສາຍໄຫມໃນເມື່ອກ່ອນໄດ້ເຮັດໃຫ້ພວກເຮົາມີຂົວເຊື່ອມຕໍ່ທີ່ສຳຄັນ,ດຽວນີ້ວັດທະນະທຳໄດ້ກາຍເປັນເສັ້ນທາງສາຍໄຫມເສັ້ນໃຫມ່ລະຫວ່າງພວກເຮົາ.
ທ່ານທູດ ກາບຼີເລ.ເມເນກາທິເວົ້າວ່າ,ຈີນໄດ້ເປີດປະຕູໃຫ້ແກ່ສິນລະປະອີຕາລີ, ອີຕາລີກໍ່ຍິນດີຕ້ອນຮັບສິນລະປະຈີນໄປອິຕາລີ.
ໃນຫນຶ່ງມື້ກ່ອນຈັດງານວາງສະແດງເທື່ອນີ້,ຈີນໄດ້ເຂົ້າຮ່ວມການວາງ ສະແດງສິ່ງກໍ່ສ້າງຄັ້ງທີ 10 ໃນງານວາງສະແດງເວນິສໃນນາມເປັນຫໍແຫ່ງຊາດ,ທ່ານຟ້ານດີອານ ຫົວຫນ້າຫໍວິຈິດຕະກຳຈີນແມ່ນຜູ່ອອກແບບການວາງສະແດງຂອງຈີນ,ພາຍໃນເວລາສອງມື້,ຂ້າມຜ່ານສອງປະເທດ,ເພື່ອໃຫ້ວັດທະນະທຳສິນລະປະຂອງຈີນແລະອີຕາລີແລກປ່ຽນກັນ.ໃນເວລາເປັນປະທານໄຂງານຢູ່ຫໍວິຈິດຕະກຳຈີນ,ທ່ານຟ້ານດີອານເວົ້າວ່າ:
ການໄປມາຫາສູ່ກັນດ້ານວັດທະນະທຳແລະສິນລະປະລະຫວ່າງຈີນກັບອີຕາລີມີປະຫວັດສາດອັນຍາວນານ,ງານວາງສະແດງ 5 ຮອບຂອງອີຕາລີເທື່ອນີ້ໄດ້ໄຂສັງກາດໃຫມ່ໃຫ້ແກ່ການແລກປ່ຽນແບບນີ້, ເມື່ອຫລາຍຊົ່ວໂມງກ່ອນ, ຂ້າພະເຈົ້າໄດ້ກັບມາຈາກເມືອງເວນິສ,ຢູ່ແຫ່ງນັ້ນພວມຈັດງານວາງ ສະແດງຮູບເງົາແລະງານວາງສະແດງສິ່ງກໍ່ສ້າງ, ສິນລະປະຂອງຈີນຄື ຮູບເງົາ ສິ່ງກໍ່ສ້າງແລະສິນລະປະດ້ານການຊົມໄດ້ຮັບຄວາມນິຍົມຊົມຊອບແລະຄວາມສົນໃຈຈາກເພື່ອນອີຕາລີທັງຫລາຍ, ພ້ອມກັນນີ້, ວັດທະນະທຳຂອງອີຕາລີຢູ່ແຫ່ງນີ້ກໍ່ຈະໃຫ້ວົງການສິນລະປະແລະປະຊາຊົນຈີນຊື່ນຊົມຢ່າງຈິງໃຈ.
|