|
ຕາມຂ່າວ CRI: ຕອນບ່າຍວັນທີ 14 ຕຸລາ ສະພາຄວາມໝັ້ນຄົງສະຫະປະຊາຊາດໄດ້ເປັນເອກະສັນກັນຮັບຮອງເອົາມະຕິເລກທີ 1718 ກ່ຽວກັບບັນຫາ ສປປ ເກົາຫຼີທົດລອງນິວເຄຼຍ.
ມະຕິກ່າວປະນາມ ສປປ ເກົາຫຼີທົດລອງນິວເຄຼຍ, ທວງໃຫ້ ສປປ ເກົາຫຼີປະລະອາວຸດນິວເຄຼຍແລະແຜນການນິວເຄຼຍ, ກັບຄືນສູ່ການເຈລະຈາ 6 ຝ່າຍໂດຍບໍ່ມີເງື່ອນໄຂໃນທັນທີ; ຕົກລົງໃຊ້ມາດຕະການລົງໂທດ ສປປ ເກົາຫຼີໃນຂົງເຂດທີ່ມີສ່ວນກ່ຽວຂ້ອງກັບອາວຸດລ້າງຜານຂະໜາດໃຫຍ່ ເຊັ່ນ ນິວເຄຼຍແລະລູກສອນໄຟນຳວິຖີເປັນຕົ້ນ; ມະຕິໄດ້ປັດປ່າຍຄວາມອາດເປັນໄປໄດ້ທີ່ມອບສິດໃຫ້ໃຊ້ກຳລັງອາວຸດ ບໍ່ລົງໂທດ ສປປ ເກົາຫຼີຢ່າງຮອບດ້ານ, ແລະກ່າວວ່າ ຈະປັບປຸງ ຢຸດຕິຊົ່ວຄາວຫຼືຍົກເລີກມາດຕະການລົງໂທດ ສປປ ເກົາຫຼີໂດຍອີງຕາມສະພາບການໂຄລົບມະຕິຂອງ ສປປ ເກົາຫຼີ.
ພາຍຫຼັງຮັບຮອງເອົາມະຕິດັ່ງກ່າວແລ້ວ ທ່ານປັກກິນຢົນ ເອກອັກຄະລັດຖະທູດ ສປປ ເກົາຫຼີປະຈຳສະຫະປະຊາຊາດກ່າວວ່າ, ສປປ ເກົາຫຼີປະຕິເສດບໍ່ຮັບເອົາມະຕິເລກທີ 1718 ຂອງສະພາຄວາມໝັ້ນຄົງສະຫະປະຊາຊາດ. ທ່ານຊີ້ອອກວ່າ, ສປປ ເກົາຫຼີມີອາວຸດນິວເຄຼຍແມ່ນເພື່ອປົກປັກຮັກສາອາທິປະໄຕແລະຜົນປະໂຫຍດຂອງປະເທດຕົນ, ມະຕິດັ່ງກ່າວໄດ້ເບິ່ງຂ້າມການຂົ່ມຂູ່ ສປປ ເກົາຫຼີດ້ວຍນິວເຄຼຍຂອງອາເມລິກາ.
ຫຼັງການລົງມະຕິ, ທ່ານຫວາງກ່ວງຢ້າ ຜູ່ແທນຈີນປະຈຳສະຫະປະຊາຊາດໄດ້ກ່າວຄຳປາໄສຊີ້ອອກວ່າ, ໂດຍເບິ່ງຈາກພາກສ່ວນໃຫຍ່ແຫ່ງການຊຸກຍູ້ໃຫ້ແຫຼມເກົາຫຼີປອດນິວເຄຼຍ ປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີແລະພາກພື້ນອາຊີຕາເວັນອອກສຽງເໜືອ, ຈີນເຫັນດີນຳສະພາຄວາມໝັ້ນຄົງທຳປະຕິກິລິຍາທີ່ມີອິດທິພົນແລະເໝາະສົມ.
ທ່ານບຸສ ປະທານາທິບໍດີອາເມລິກາຊົມເຊີຍການຮັບຮອງເອົາມະຕິ. ມື້ດຽວກັນ ໃນຄຳປາໄສທາງວິທະຍຸປະຈຳທຸກອາທິດ, ທ່ານບຸສໄດ້ກ່າວຢ້ຳວ່າ ອາເມລິກາຈະພະຍາຍາມແກ້ໄຂບັນຫານິວເຄຼຍຂອງແຫຼມເກົາຫຼີໂດຍຜ່ານຊ່ອງທາງການທູດ.
ວັນທີ 15 ຕຸລາ ໂຄສົກກະຊວງການຕ່າງປະເທດ ສ ເກົາຫຼີໄດ້ອອກຖະແຫຼງການວ່າ, ສ ເກົາຫຼີສະໜັບສະໜູນແລະຊົມເຊີຍມະຕິເລກທີ 1718 ທີ່ລົງໂທດ ສປປ ເກົາຫຼີຂອງສະພາຄວາມໝັ້ນຄົງສະຫະປະຊາຊາດ, ແລະຈະປະຕິບັດຕາມມະຕິດັ່ງກ່າວຢ່າງຈິງຈັງ.
|
