|
ຕາມຂ່າວ CRI: ມື້ນີ້ ຢູ່ທີ່ປັກກິ່ງ, ທ່ານເຈຍຊິ້ງຫຼິນ ປະທານສະພາປຶກສາການເມືອງປະຊາຊົນແຫ່ງຊາດຈີນໄດ້ພົບປະທ່ານໂອກີ ຊີຄາເກ ປະທານສະພາສູງຍີ່ປຸ່ນທີ່ມາຢ້ຽມຢາມ, ທ່ານເຈຍຊິ້ງຫຼິນກ່າວວ່າ, ຈີນຍີ່ປຸ່ນຄວນເພີ່ມທະວີການຢ້ຽມຢາມກັນລະຫວ່າງຜູ່ນຳຂັ້ນສູງ, ຖືຂົງເຂດປະຢັດພະລັງງານ ອະນຸລັກສິ່ງແວດລ້ອມແລະວິທະຍາສາດເຕັກໂນໂລຢີສູງເປັນຂົງເຂດຈຸດໜັກ, ວາງແຜນຮ່ວມມືດ້ານເສດຖະກິດໃນໄລຍະກາງແລະໄລຍະຍາວ. ພ້ອມກັນນັ້ນ ເພີ່ມທະວີການແລກປ່ຽນກັນໃນຂົງເຂດວັດທະນະທຳ ການສຶກສາ ການທ່ອງທ່ຽວແລະຊາວໜຸ່ມເປັນຕົ້ນຢ່າງແຂງແຮງ, ເພີ່ມທະວີການແລກປ່ຽນດ້ານການປ້ອງກັນປະເທດແລະການເຈລະຈາຄວາມປອດໄພລະຫວ່າງສອງປະເທດ, ເຈາະຈົງເພີ່ມທະວີການຮ່ວມມືໃນການປົກປັກຮັກສາສັນຕິພາບແລະສະຖຽນລະພາບຂອງພາກພື້ນອາຊີຕາເວັນອອກສຽງເໜືອ, ແລະຊຸກຍູ້ຂະບວນການເຊື່ອມໂຍງເຂົ້າກັນຂອງອາຊີ.
ທ່ານຊີຄາເກກ່າວວ່າ, ຍີ່ປຸ່ນຍິນດີພ້ອມກັນກັບຝ່າຍຈີນ, ເພີ່ມຄວາມໄວ້ເນື້ອເຊື່ອໃຈເຊິ່ງກັນແລະກັນ, ເປີດກວ້າງການແລກປ່ຽນໃນຂົງເຂດຕ່າງໆ, ແລະຊຸກຍູ້ໃຫ້ການພົວພັນລະຫວ່າງຍີ່ປຸ່ນກັບຈີນຂະຫຍາຍໄປສູ່ລະດັບສູງກວ່າເກົ່າ.
ຕອນຄ່ຳມື້ດຽວກັນ, ທ່ານເຈິ່ງຊິ້ງຫົງ ຮອງປະທານປະເທດຈີນກໍໄດ້ພົບປະທ່ານຊີຄາເກ. ທ່ານເຈິ່ງຊິ້ງຫົງກ່າວວ່າ, ຝ່າຍຈີນຫວັງໃຫ້ຈີນຍີ່ປຸ່ນທັງສອງປະເທດກາຍເປັນຄູ່ຂາທີ່ສຸມກຳລັງເຂົ້າໃນການພັດທະນາໂດຍສັນຕິ.
|
