ນ້ຳເອີກູນາໄຫຼກ້ຽວ ຢູ່ສົ້ນເໜືອຂອງດິນແດນຈີນ.ຝັ່ງເໜືອແມ່ນບ້ານຣັດເຊຍທີ່ງຽບສະຫງົບ.ຕອນແລງມື້ໜຶ່ງໃນລະດູໃບໄມ້ຫຼົ່ນ,ເມກສີແດງຢູ່ຂອບຟ້າຍາມຕາເວັນຄ້ອຍຄ່ຳໄດ້ຍ້ອມເດີ່ນຫ້າແລະປ່າໄມ້ທີ່ຢູ່ອ້ອມແອ້ມບ້ານໃຫ້ກາຍເປັນສີແດງ,ພວກເຮົາໄປຮອດ ຊືເວີຍຕົວ ເມືອງນ້ອຍສວຍງາມແຫ່ງໜຶ່ງທີ່ຢູ່ຝັ່ງໃຕ້ແມ່ນ້ຳເອີ ກູນາ.ແຫ່ງນີ້ກໍແມ່ນຕົວເມືອງນ້ອຍແຫ່ງໜຶ່ງທີ່ມີຊາວເຜົ່າຣັດເຊຍ ຂອງຈີນ.
ຊືເວີຍບໍ່ໃຫຍ່ປານໃດ,ຢູ່ໃສກໍຈະໄດ້ເຫັນດອກໄມ້ ເຮັດໃຫ້ຄົນຮູ້ສຶກສະບາຍຕາສະບາຍໃຈ,ກໍເໝືອນດັ່ງນ້ຳເອີກູນາທີ່ໄຫຼຢ່າງມິດງຽບ.ຍ່າງຕາມທາງນ້ອຍໃນບ້ານ,ເຮືອນຢູ່ແບບຣັດເຊຍທີ່ລ້ອມດ້ວຍຮົ້ວໄມ້ເບີສຄ່ອຍໆປະກົດສູ່ສາຍຕາພວກເຮົາ,ໃນທີ່ສຸດກໍມາຮອດເຮືອນຂອງປ້າໂຕເນຍ.
ເພິ່ນໄດ້ຕ້ອນຮັບພວກເຮົາດ້ວຍຄວາມອົບອຸ່ນ,ປ້າໂຕເນຍອາຍຸ50ກວ່າປີ,ມີໜ້າຕາຄືກັນກັບຊາວຣັດເຊຍ,ແຕ່ພັດປາກພາສາຈີນສຳນຽງພາກຕາເວັນອອກສຽງເໜືອອ້ອຍຕ້ອຍ.ຄວາມຜິດໂຕນກັນຢ່າງໃຫຍ່ລະຫວ່າງໂສມໜ້າກັບພາສາປາກເວົ້າໄດ້ສະແດງໃຫ້ເຫັນລັກສະນະດ້ານຊົນເຜົ່າອັນພິເສດ.ປ້າໂຕເນຍແມ່ນຊາວເຜົ່າຣັດເຊຍ,ເຜົ່າຣັດເຊຍແມ່ນຊົນເຜົ່າໜຶ່ງທີ່ມີປະຊາກອນໜ້ອຍຂອງຈີນ,ມີພຽງໝື່ນກວ່າຄົນເທົ່ານັ້ນ,ສ່ວນຫຼາຍແຈກຢາຍຢູ່ເຂດປົກຄອງຕົນເອງຊິນຈ່ຽງເຜົ່າອຸຍອູແລະເຂດປົກຄອງຕົນເອງມົງໂກໃນທີ່ບ້ານຂອງປ້າໂຕເນຍຕັ້ງຢູ່ນັ້ນ.
ຢູ່ຊືເວີຍ,ຊາວເຜົ່າຣັດເຊຍ ໄດ້ກວມອັດຕາຫຼາຍສົມຄວນ.ໃນໄລຍະຍາວນານມານີ້,ປະຊາຊົນສອງຊາດຈີນຣັດເຊຍທີ່ດຳລົງຊີວິດຢູ່ເຂດຊາຍແດນໄປມາຫາສູ່ກັນຢ່າງເປັນປົກກະຕິ.ຊາວຣັດເຊຍຈຳນວນໜຶ່ງແຕ່ງງານກັບຄົນຈີນ,ແລະຕັ້ງຖິ່ນຖານຢູ່ຈີນ,ແລ້ວຄ່ອຍໆຜັນປ່ຽນເປັນເຜົ່າຣັດເຊຍຂອງຈີນ.ເຜົ່າຣັດເຊຍ ໃຊ້ພາສາຈີນແລະຕົວໜັງສືຈີນໄດ້ຢ່າງຊຳນິຊຳນານ,ແລະໄດ້ຮັບຜົນສະທ້ອນຢ່າງເລິກເຊິ່ງຈາກສັງຄົມແລະວັດທະນະທຳຈີນ,ມີຄວາມຕ່າງກັນຫຼາຍກັບຊາວຣັດເຊຍທີ່ຢູ່ປະເທດຣັດເຊຍ.ແຕ່ວ່າ,ພວກເຂົາເຈົ້າກໍໄດ້ມີຈຸດພິເສດດ້ານໜ້າຕາແລະຍັງຮັກສາຮີດຄອງປະເພນີບາງຢ່າງຂອງຊາວຣັດເຊຍໄວ້.
ຍ່າແລະແມ່ເຖົ້າຂອງປ້າໂຕເນຍແມ່ນຄົນຣັດເຊຍ,ປູ່ແລະພໍ່ເຖົ້າແມ່ນຄົນຈີນ.ເຮືອນຂອງປ້າໂຕເນຍມີເອກະລັກຣັດເຊຍອັນເຂັ້ມຂຸ້ນ.ໃນເຮືອນໄມ້ທີ່ງາມແບບບູຮານ,ການຈັດວາງແລະຕົບແຕ່ງໃນເຮືອນໄດ້ສ່ອງແສງໃຫ້ເຫັນຈຸດພິເສດຂອງຣັດເຊຍ.ຢູ່ເທິງໂຕະຮູບສີ່ຫຼ່ຽມຍາວໄດ້ວາງຖານຕັ້ງທຽນແບບຣັດເຊຍ,ຢູ່ເທິງຝາທີ່ປະດັບລວດລາຍທີ່ສວຍງາມໄດ້ແຂວນຮູບຖ່າຍລວມໝົດຄອບຄົວ.ຢູ່ເທິງຂອບກ້ອງປ່ອງຢ້ຽມ,ດອກໄມ້ທີ່ບໍ່ຮູ້ຊື່ຫຼາຍໂຖສະດຸດຕາທີ່ສຸດໃນຍາມກາງຄືນ. ປ້າໂຕເນຍໄດ້ປະດັບປະດາຕົບແຕ່ງໃຫ້ເຮືອນຂອງຕົນສວຍງາມປານີດທີ່ສຸດ.
ໃນຕົ້ນເດືອນກໍລະກົດປີນີ້,ປ້າໂຕເນຍໄດ້ເຮັດ ທຸລະກິດທ່ອງທ່ຽວຢູ່ໃນເຮືອນຕົນ.ໃນເວລາພຽງສອງເດືອນ,ເຮືອນນ້ອຍທີ່ອົບອຸ່ນ ນີ້ໄດ້ຕ້ອນຮັບນັກທ່ອງທ່ຽວ200ກວ່າຄົນ,ປ້າໂຕເນຍກໍໄດ້ເງິນ2ໝື່ນກວ່າຢວນ.ການເລີ່ມຕົ້ນທີ່ດີເຮັດໃຫ້ປ້າ ເຕັມໄປດ້ວຍຄວາມໝັ້ນໃຈຕໍ່ອະນາຄົດ: "ຂ້ອຍເຫັນວ່າອະນາຄົດແມ່ນດີຢູ່,ປີໜ້າຈະດີກວ່າປີນີ້,ຂ້ອຍມີຄວາມໝັ້ນໃຈຫຼາຍ.ປີນີ້,ຂ້ອຍແມ່ນເຮັດທຸລະກິດຕ້ອນຮັບນັກທ່ອງທ່ຽວນຳຫຼັງໝູ່ໃນບ້ານເຮົາ,ແຕ່ກໍມີລາຍໄດ້ດີສົມຄວນ."
ຕັ້ງແຕ່ຕົວເມືອງນ້ອຍຊືເວີຍຖືກໂທລະພາບສູນກາງ ເຊິ່ງເປັນໂທລະພາບແຫ່ງຊາດຈີນປະກວດເປັນຕົວເມືອງນ້ອຍສະເໜ່ຂອງຈີນໃນປີ2005ມານີ້.ບ້ານທີ່ຢູ່ເຂດຊາຍແດນຈີນຣັດເຊຍແຫ່ງນີ້ໄດ້ດຶງດູດຊາວຈີນແຕ່ເໜືອຕະຫຼອດໃຕ້ໂດຍອາໄສທິວທັດທຳມະຊາດທີ່ສວຍສົດງົດງາມແລະຮີດຄອງປະເພນີຊົນເຜົ່າທີ່ມີເອກະລັກສະເພາະ.ທ່ານຈ້ານເຄີເສິງ ຮອງນາຍບ້ານບອກນັກຂ່າວວ່າ:ປັດຈຸບັນ,ຊາວບ້ານເຮົາທີ່ເຮັດທຸລະກິດທ່ອງທ່ຽວນັບມື້ນັບຫຼາຍຂຶ້ນ:
"ເພື່ອໃຫ້ຊາວເຜົ່າຣັດເຊຍຫຼຸດພົ້ນຈາກຄວາມທຸກຍາກແລ້ວຮັ່ງມືຂຶ້ນໂດຍໄວ,ທາງບ້ານໄດ້ອອກທຶນຊ່ອຍເຫຼືອເຂົາເຈົ້າພັດທະນາເສດຖະກິດ,ເມື່ອເບິ່ງຈາກສະພາບການໃນປີນີ້ແລ້ວເຫັນວ່າ,ນັບມາຮອດປັດຈຸບັນ,ຫຼາຍຄອບຄົວໄດ້ຜົນກຳໄລສູງເຖິງ6ໝື່ນ,7ໝື່ນຢວນຫຼືແສນຢວນກໍມີ." ກ່ອນພັດທະນາການທ່ອງທ່ຽວ,ຕົວເມືອງນ້ອຍຊືເວີຍທຸກຍາກຫຼາຍ,ລາຍໄດ້ສະເລ່ຍຕາມຫົວຄົນມີແຕ່ບໍ່ເທົ່າໃດຮ້ອຍຢວນຕໍ່ປີ.ຕັ້ງແຕ່ຊາວບ້ານພັດທະນາການທ່ອງທ່ຽວຕາມເງື່ອນໄຂຂອງຕົນໃນປີ2004ມານີ້,ສະພາບເສດຖະກິດຂອງເຂົາເຈົ້າໄດ້ຮັບການປົວແປງໃຫ້ດີຂຶ້ນເປັນກ້າວໆ.
ແມ່ເຖົ້າລີນາ ແມ່ຂອງປ້າໂຕເນຍ ປີນີ້ອາຍຸ80ກວ່າປີແລ້ວ,ເວົ້າສຳລັບແມ່ເຖົ້າແລ້ວ,ພວກລູກຫຼານມີຊີວິດ ດີ, ແມ່ເຖົ້າກໍຮູ້ສຶກວ່າມີຄວາມສຸກທີ່ສຸດ.
"ຊູ່ມື້ນີ້ດີຫຼາຍ,ພວກລູກຫຼານໂຊກດີທີ່ເກີດໃນຍຸກນີ້ທີ່ຊີວິດການເປັນຢູ່ດີກວ່າແຕ່ກ່ອນຫຼາຍ."
ເມື່ອລົມເຖິງຊີວິດອັນດີງາມໃນປັດຈຸບັນ,ປ້າໂຕເນຍກໍມ່ວນໃຈຫຼາຍ.ເພິ່ນຍັງໄດ້ຮ້ອງເພງຣັດເຊຍທີ່ຊື່ວ່າ"ກັດຕູຊາ"ສູ່ຟັງ.
ຜູ່ເສບດົນຕີປະສານໃຫ້ປ້າໂຕເນຍນັ້ນແມ່ນລຸງວາຊິລີ ອ້າຍກົກຂອງປ້າ.ລຸງເສບອັກກໍດີອົງໄດ້ດີກວ່າໝູ່ໃນຕົວເມືອງນ້ອຍຊືເວີຍ.ປີກາຍນີ້,ລຸງໄດ້ຕາງໜ້າ ຊືເວີຍໄປປັກກິ່ງເຂົ້າຮ່ວມການປະກວດຕົວເມືອງນ້ອຍສະເໜ່ຂອງໂທລະພາບສູງກາງຈີນ.ລຸງຂຶ້ນເວທີໂທລະພາບສູງກາງຈີນເປັນເທື່າທຳອິດ,ແຕ່ວ່າການສະແດງອັນພົ້ນເດັ່ນຂອງລູງໄດ້ຈັບໃຈຜູ່ຊົມໝົດທຸກຄົນ.
ການປະກວດຕົວເມືອງນ້ອຍສະເໜ່ໄດ້ເຮັດໃຫ້ ຊືເວີຍມີຊື່ສຽງຂຶ້ນກັບບາດ,ແລະກໍໄດ້ພາໃຫ້ມີຜູ່ທີ່ຮູ້ຈັກລຸງວາຊີລີຫຼາຍກວ່າເກົ່າ.ປ້າໂຕເນຍບອກນັກຂ່າວວ່າ,ປັດຈຸບັນ,ນັກທ່ອງທ່ຽວຈຳນວນໜຶ່ງໄດ້ເດີນທາງມາເພື່ອຟັງການເສບອັກກໍດີອົງຂອງລຸງວາຊີລີໂດຍສະເພາະ.ລູງມີລະດັບວັນນະຄະດີສູງ,ເມື່ອດື່ມເຫຼົ້າຍ້ອມໃຈແລ້ວ,ລຸງກໍໄດ້ສະແດງການອ່ານກາບກອນອວຍພອນເວລາຍົກຈອກເຫຼົ້າທີ່ເພິ່ນແຕ່ງເອງສູ່ຟັງ.
ລຸງບອກນັກຂ່າວວ່າ,ເພິ່ນມັກວັນນະຄະດີຕັ້ງແຕ່ຍາມຍັງນ້ອຍພຸ້ນ,ແຕ່ວ່າຍ້ອນວ່າຄອບຄົວທຸກຍາກ,ລູງພຽງແຕ່ຮຽນຈົບຊັ້ນປະຖົມກໍຈຳເປັນເຊົາຮຽນ.
ຊູ່ມື້ນີ້,ລູງວາຊີລີໄດ້ຝາກຄວາມຫວັງຂອງຕົນທີ່ບໍ່ໄດ້ບັນລຸຜົນເປັນຈິງໃນເມື່ອກ່ອນນັ້ນໄວ້ກັບຄົນລຸ້ນຫຼັງ. ລູກຫຼານຂອງລຸງລ້ວນແຕ່ໄດ້ຮັບການສຶກສາໃນລະບົບສາມັນ,ໃນນັ້ນ,ມີຊາວໜຸ່ມບາງຄົນກໍອາດຈະເສັງເຂົ້າມະຫາວິທະຍາໄລໃນປີໜ້າ.ລູງວາຊີລີບອກວ່າ,ຊົນເຜົ່າສ່ວນໜ້ອຍທີ່ມີປະຊາກອນໜ້ອຍຄືເຜົ່າຣັດເຊຍຍັງຈະໄດ້ ເສັງເຂົ້າມະຫາວິທະຍາໄລຕາມນະໂຍບາຍພິເສດ. ຕໍ່ການສຶກສາຂອງຄົນລຸ້ນຫຼັງ,ປ້າໂຕເນຍກໍມີແຜນການຂອງຕົນ,ປ້າບອກນັກຂ່າວວ່າ,ເພິ່ນຈະຕັ້ງໃຈເຮັດທຸລະກິດທ່ອງທ່ຽວ,ຫາເງິນໃຫ້ຫຼາຍ,ຕໍ່ໜ້າ,ຈະສົ່ງຫຼານສາວໄປຮຽນຢູ່ຕ່າງປະເທດ.
ປ້າໂຕເນຍເວົ້າວ່າ,ເພິ່ນຍັງມີຍາດຕິພີ່ນ້ອງຈຳນວນໜຶ່ງຢູ່ຣັດເຊຍ,ພວກເຂົາເຈົ້າໄດ້ຊັກຊວນຫຼາຍເທື່ອໃຫ້ປ້າຍ້າຍຄອບຄົວໄປພຸ້ນ.ແຕ່ວ່າປ້າໂຕເນຍຄິດວ່າຕົວເມືອງນ້ອຍຊືເວີຍ ແມ່ນບ້ານເກີດທີ່ແທ້ຈິງຂອງຕົນ.
"ແຫ່ງນີ້ແມ່ນບ້ານເກີດເມືອງນອນຂອງຂ້ອຍ,ຂ້ອຍດຳລົງຊີວິດຢູ່ແຫ່ງນີ້ມາແຕ່ຍາມຍັງນ້ອຍ,ສະນັ້ນ,ຈິ່ງມີຄວາມຜູກພັນກັບບ້ານນີ້ຫຼາຍ"
|