|
ຫວ່າງກ່ອນນີ້ບໍ່ດົນ, ບຸນວັດທະນະທຳຂົງຈື້ສາກົນເມືອງຊີຟູຈີນປີ 2006 ແລະສັບປະດາແລກປ່ຽນວັດທະນະທຳຂົງຈື້ລະຫວ່າງສອງຝັ່ງຊ່ອງແຄບໄຕ້ຫວັນໄດ້ຈັດຂຶ້ນຢູ່ບ້ານເກີດຂອງຂົງຈື້.ໃນເວລາຫນຶ່ງອາທິດ, ອົງການສະຫະປະຊາຊາດເພື່ອການສຶກສາ ວິທະຍາສາດແລະວັດທະນະທຳຫລືອຸຍເນັສໂກແລະພາກສ່ວນທີ່ກ່ຽວຂ້ອງຂອງຈີນໄດ້ຮ່ວມມືກັນຈັດກິດຈະກຳຕ່າງໆ,ລະລຶກນັກປັດສະຍາຜູ່ນີ້ຢ່າງຄຶກຄື້ນ.
ປີນີ້ແມ່ນປີລະລຶກຂົງຈື້ກຳເນີດຄົບຮອບ 2557 ປີ,ເມືອງຊີຟູແຂວງຊານຕົງ ບ້ານເກີດຂອງຂົງຈື້ພ້ອມກັບວັດຂົງຈື້ຂອງເມືອງໄຕເປແລະເມືອງຖາຍ ນານຂອງແຂວງໄຕ້ຫວັນຈີນໄດ້ຈັດພິທີບູຊາຢ່າງໃຫຍ່ໂຕມະໂຫລານ.ທີ່ທ່ານຟັງຢູ່ນີ້ແມ່ນສຽງຂອງສະຖານທີ່ຈັດພິທີບູຊາທີ່ຈັດຂຶ້ນຢູ່ວັດຂົງຈື້ຂອງເມືອງຊີຟູແຂວງຊານຕົງ.
ບຸນວັດທະນະທຳຂົງຈື້ແລະສັບປະດາແລກປ່ຽນວັດທະນະທຳຂົງຈື້ ລະຫວ່າງສອງຝັ່ງຊ່ອງແຄບໄຕ້ຫວັນໃນປີນີ້ມີຫົວຂໍ້ຫລັກວ່າ:ເສີມຂະຫຍາຍວັດທະນະທຳດັ້ງເດີມອັນລ້ຳເລີດ,ເພີ່ມທະວີການແລກປ່ຽນວັດ ທະນະທຳລະຫວ່າງສອງຝັ່ງ,ຊຸກຍູ້ການຮ່ວມມືແລະພັດທະນາ.ໃນໄລຍະຈັດກິດຈະກຳດັ່ງກ່າວຍັງຈະຈັດເວທີປາໃສສາກົນຂອງນັກທຸລະກິດປັນຍາຊົນຈີນຄັ້ງທີສາມ.ໃນພິທີໄຂງານດັ່ງກ່າວ, ທ່ານນາງລິນເຊີນຈື ອະດີດຮອງປະທານພັກກົກມິນຕັງຈີນ ຫົວຫນ້າຄະນະສຳພາດພິທີບູຊາວັດທະນະທຳຂົງຈື້ຂອງພັກກົກມິນຕັງທີ່ເດີນທາງມາຈາກໄຕ້ຫວັນໂດຍຈຳເພາະໄດ້ກ່າວຄຳປາໃສ,ບັນລະຍາຍຜົນສະທ້ອນຂອງຂົງຈື້ທີ່ມີຕໍ່ປະຊາຊາດຈີນ.ທ່ານນາງເວົ້າວ່າ:
ເວົ້າສຳລັບລູກຫລານປະຊາຊາດຈີນທຸກຖ້ວນຫນ້າແລ້ວ,ຂົງຈື້ແມ່ນຄົນທີ່ຫນ້າສັກກາລະບູຊາທີ່ສຸດໃນດວງໃຈພວກເຮົາ.ແນວຄິດປັດຊະຍາຂົງຈື້ໄດ້ຝັງເລິກຢູ່ໃນດວງໃຈຂອງລູກຫລານປະຊາຊາດຈີນສອງພັນກວ່າປີມາແລ້ວ, ກິລິຍາວາຈາຂອງພວກເຮົາໄດ້ຮັບຜົນສະທ້ອນຈາກສຳນັກປັດຊະຍາຂົງຈື້.ການກາບໄຫວ້ບູຊາແມ່ນເພື່ອສືບທອດແລະເສີມຂະຫຍາຍວັດທະນະທຳ.ເມືອງຕ່າງໆຂອງແຂວງໄຕ້ຫວັນຈັດພິທີບູຊາຂົງຈື້ກໍ່ສະແດງໃຫ້ເຫັນວ່າ, ວັດທະນະທຳປະຊາຊາດຈີນໄດ້ຝັງເລິກຢູ່ໄຕ້ຫວັນ.ຫົວຂໍ້ຫລັກຂອງບຸນວັດທະນະທຳເທື່ອນີ້ແມ່ນໃຫ້ສອງຝັ່ງແລກປ່ຽນວັດທະນະທຳນຳກັນ.ຂ້າພະເຈົ້າເຊື່ອວ່າ, ເຖິງວ່າສອງຝັ່ງແຍກອອກຈາກກັນແຕ່ດົນແລ້ວ, ແຕ່ກໍ່ຍັງເພີ່ງພາອາໃສກັນຄືປາກັບນ້ຳ,ທັງມີເຊື້ອຊາດອັນດຽວກັນ,ໂດຍສະເພາະແມ່ນໃນດ້ານວັດທະນະທຳ,ມີຫລາຍໆສິ່ງທີ່ເປັນຫນ້າຮ່ຳຮຽນນຳກັນ.
ທ່ານນາງລິນເຊີນຈືແນະນຳວ່າ, ຢູ່ແຫ່ງຕ່າງໆທົ່ວແຂວງໄຕ້ຫວັນ, ລ້ວນແຕ່ໄດ້ສ້າງວັດຂົງຈື້ເພື່ອສັກກາລະບູຊາ,ໃນນັ້ນ, ວັດຂົງຈື້ຂອງເມືອງຖາຍນານສ້າງຕັ້ງຂຶ້ນເມື່ອສັດຕະວັດທີ 15,ວັດຂົງຈື້ຂອງເມືອງໄຕເປສ້າງຂຶ້ນເມື່ອສັດຕະວັດທີ 19,ໃນວັນລະລຶກວັນຄ້າຍວັນເກີດຂອງຂົງຈື້ໃນແຕ່ລະປີ, ປະ ຊາຊົນໄຕ້ຫວັນກໍ່ຕ້ອງຈັດພິທີບູຊາ,ເທື່ອນີ້ແມ່ນຄະນະຜູ່ແທນໄຕ້ຫວັນມາບູຊາຢູ່ບ້ານເກີດຂອງຂົງຈື້ເປັນຄັ້ງທຳອິດ.
ຂົງຈື້ແມ່ນນັກປັດຊະຍາ ນັກການເມືອງ ນັກການສຶກສາແລະຜູ່ລິເລີ່ມ ສ້າງແນວຄິດປັດຊະຍາຂົງຈື້ທີ່ຍິ່ງໃຫຍ່ໃນສະໄຫມຈີນບູຮານ.ເພິ່ນສົ່ງເສີມເມດຕາທຳແລະຄວາມເທົ່າທຽມກັນຫມົດທົ່ວໂລກ,ຖືມາດລະຍາດເປັນສຳຄັນ,ທິດສະດີແນວຄິດຂອງເພິ່ນໄດ້ເກີດມີຜົນສະທ້ອນເລິກເຊິ່ງຍາວໄກໃນປັດຊະຍາ ການເມືອງ ວັດທະນະທຳ ການສຶກສາ ຊີວິດສັງຄົມແລະຮີດຄອງປະເພນີໃນສະໄຫມຈີນບູຮານ,ແມ່ນກະແສຫລັກຂອງວັດທະນະທຳດັ້ງເດີມຂອງປະຊາຊາດຈີນ.
ໃນ 2000 ກວ່າປີມານີ້, ຂົງຈື້ໄດ້ຮັບນາມມະຍົດເປັນເມທາຈານຂອງຈີນ,ສະຖານທີ່ປະຫວັດສາດທີ່ກ່ຽວກັບຂົງຈື້ເຊັ່ນຕຳຫນັກຂົງຈື້ ວັດຂົງຈື້ແລະສຸສານຂົງຈື້ລ້ວນແຕ່ຖືກອົງການອຸຍນິສໂກຈັດເປັນມໍລະດົກວັດທະນະທຳໂລກ.
ໃນບຸນວັດທະນະທຳຂົງຈື້ສາກົນເມືອງຊີຟູຈີນປີ 2006,ຍັງໄດ້ຈັດພິທີມອບລາງວັນການສຶກສາຂົງຈື້ຂອງອົງການອຸຍນິສໂກຄັ້ງປະຖົມມະເລີກ.ຕະຫລອດຊີວິດຂອງຂົງຈື້ໄດ້ທຸ່ມເທເຫື່ອແຮງໃນການສຶກສາ,ໄດ້ເຜີຍແຜ່ແນວຄິດການສຶກສາໂດຍບໍ່ຈຳແນກຊົນຊັນວັນນະຂອງຄົນ,ແລະອຳນວຍໂອກາດໃຫ້ໄດ້ຮັບການສຶກສາທີ່ສະເຫມີພາບກັນແກ່ຫມົດທຸກຄົນ.ແນວຄິດການສຶກສານີ້ເມື່ອຜ່ານເວລາ 2000 ກວ່າປີ,ຍັງໄດ້ຮັບການສົ່ງເສີມໃນສັງຄົມຊູ່ມື້ນີ້.ທ່ານຖາງຊຽນ ຜູ່ແທນອົງການອຸຍນິສໂກກ່າວວ່າ:
ນີ້ແມ່ນລາງວັນດ້ານການສຶກສາທີ່ມີຊື່ຄົນຈີນທີ່ອຸຍນິສໂກຈັດຂຶ້ນເປັນຄັ້ງທຳອິດໃນໂລກ.ຂ້າພະເຈົ້າເຫັນວ່າຢ່າງຫນ້ອຍມັນມີຄວາມຫມາຍໃນສາມດ້ານຄື:ຫນຶ່ງແມ່ນຢືນຢັນແນວຄິດການສຶກສາຂອງຂົງຈື້;ສອງແມ່ນຢືນຢັນຜົນງານທີ່ລັດຖະບານແລະປະຊາຊົນຈີນໄດ້ຮັບໃນດ້ານການສຶກສາໂດຍສະເພາະແມ່ນດ້ານການລົບລ້າງຄວາມກຶກຫນັງສືພາຍໃນຫລາຍສິບປີທີ່ຜ່ານມາ;ສາມ,ຜ່ານການມອບລາງວັນນີ້,ໄດ້ຊຸກຍູ້ການຂະຫຍາຍຕົວຂອງການສຶກສາທົ່ວປວງຊົນໃນທົ່ວໂລກ,ໂດຍສະເພາະແມ່ນການຂະຫຍາຍຕົວຂອງການສຶກສາເພື່ອລົບລ້າງຄວາມກືກຫນັງສື,ເພື່ອລະດົມໃຈຂອງພາກ ສ່ວນເອກະຊົນ ລັດຖະບານຫລືອົງການຈັດຕັ້ງທີ່ບໍ່ຂຶ້ນກັບລັດຖະບານທີ່ໄດ້ຮັບຜົນງານພົ້ນເດັ່ນໃນການສຶກສາທົ່ວປວງຊົນ,ພິເສດແມ່ນໃນຂົງເຂດການສຶກສາເພື່ອລົບລ້າງຄວາມກືກຫນັງສືຢູ່ຊົນນະບົດ,ການຕັ້ງຊື່ຂົງຈື້ໃສ່ລາງວັນນີ້,ແມ່ນເພື່ອລະດົມເຂົາເຈົ້າທຳຄວາມພະຍາຍາມແລະປະກອບສ່ວນຫລາຍກວ່າເກົ່າໃນຂອບເຂດທົ່ວໂລກໃນອະນາຄົດ.
ໃນໄລຍະຈັດບຸນວັດທະນະທຳ,ສະຖາບັນຂົງຈື້ເມືອງຊີຟູຈີນໄດ້ເປີດປ້າຍຢ່າງເປັນທາງການ, ສະຖາບັນນີ້ໄດ້ສືບທອດປະເພນີການສິດສອນຂອງສະຖາບັນໃນທຸກສະໄຫມຂອງຈີນ,ຖືການສຶກສາແນວຄິດປັດຊະຍາຂົງຈື້ເປັນໃຈກາງ,ທັງຮັບເອົາວັດທະນະທຳທີ່ດີເລີດພາຍໃນປະເທດຈີນແລະຕ່າງປະເທດ,ທາງຝ່າຍຕາເວັນອອກແລະຝ່າຍຕາເວັນຕົກ.ຜ່ານການສິດສອນ,ຈັດງານວາງສະແດງແລະພິມຈຳຫນ່າຍ,ຊຸກຍູ້ການແລກປ່ຽນວັດທະນະທຳຈີນກັບຕ່າງປະເທດ.
ບຸນວັດທະນະທຳຂົງຈື້ສາກົນເມືອງຊີຟູແລະສັບປະດາແລກປ່ຽນວັດທະ ນະທຳຂົງຈື້ລະຫວ່າງສອງຝັ່ງຊ່ອງແຄບໄຕ້ຫວັນໄດ້ດຶງດູດແຂກພາຍໃນແລະຕ່າງປະເທດມາເຂົ້າຮ່ວມຢ່າງຫລວງຫລາຍ.ອາເຄິ້ແມ່ນພີ່ນ້ອງຊົນເຜົ່າສ່ວນຫນ້ອຍທີ່ຢູ່ໃກ້ກັບຫນອງຢື້ຢ້ວຍຖານຂອງໄຕ້ຫວັນ.ເພິ່ນບອກນັກຂ່າວວ່າ, ຢູ່ໄຕ້ຫວັນ, ເພິ່ນກໍ່ເຄີຍເຂົ້າຮ່ວມພິທີບູຊາຂົງຈື້,ແຕ່ເທື່ອນີ້ມາບູຊາຢູ່ບ້ານເກີດຂອງຂົງຈື້,ກໍ່ມີຄວາມຮູ້ສຶກທີ່ຕ່າງກັນ.ເພິ່ນເວົ້າວ່າ:
ພວກເຮົາຖືຂົງຈື້ເປັນອາຈານຜູ່ຍິ່ງໃຫຍ່,ແຕ່ພວກເຮົາຮູ້ກ່ຽວກັບ ປະຫວັດຂອງເພິ່ນບໍ່ຫລາຍ.ຄວາມຮັບຮູ້ຂົງຈື້ຂອງພວກເຮົາແມ່ນມາຈາກການບັນທຶກໃນປື້ມ,ໃນເວລາເຂົ້າຮ່ວມການບູຊາຢູ່ໄຕ້ຫວັນ,ພຽງແຕ່ແມ່ນເພື່ອບູຊາຊື່ໆ,ຫາກບໍ່ແມ່ນເພື່ອໄປຮູ້ຈັກກັບຂົງຈື້.ມື້ນີ້ໂຊກດີຫລາຍທີ່ໄດ້ຮູ້ຂົງຈື,ເພິ່ນເປັນສັນຍະລັກຂອງຄຸນສົມບັດດັ້ງເດີມຂອງຈີນ,ໂສມຫນ້າແທ້ຈິງຂອງຂົງຈື້ຕ່າງກັບຄວາມສຳນຶກຂອງພວກເຮົາ.ຂ້າພະເຈົ້າເຫັນວ່າເພິ່ນມີສ່ວນກ່ຽວຂ້ອງກັບປະຫວັດສາດວັດທນະທຳຂອງຈີນໃນຫລາຍພັນປີນີ້ຫລາຍ.ເມື່ອມາຮອດແຜ່ນດິນໃຫຍ່ແລ້ວ, ກໍ່ຈະຮູ້ສຶກເຖິງຄວາມຍິ່ງໃຫຍ່ຂອງເພິ່ນ,ສະນັ້ນ, ຂ້າພະເຈົ້າເຄີຍເວົ້າວ່າໃນສາມມື້ທີ່ຢູ່ແຜ່ນດິນໃຫຍ່, ຂ້າພະເຈົ້າຈະຄົ້ນຄວ້າປະຫວັດສາດກ່ຽວກັບຂົງຈື້ຢ່າງຈິງຈັງ.
|
