|
ຕາມຂ່າວສານຊິນຮວາ: ວັນທີ 19 ຕຸລາ, ທ່ານລີຈິ່ນຈ່າງ ລັດຖະມົນຕີຊ່ອຍວ່າການກະຊວງການຕ່າງປະເທດຈີນກ່າວວ່າ, ຈີນຍິນດີພ້ອມກັນກັບຝ່າຍຣັດເຊຍສືບຕໍ່ເພີ່ມທະວີການຮ່ວມມືໃນການອະນຸລັກຊັບພະຍາກອນໃນແມ່ນ້ຳຊາຍແດນລະຫວ່າງສອງປະເທດ.
ໃນເວລາໃຫ້ສຳພາດຕໍ່ເວັບໄຊທາງການຂອງ "ປີມິດຕະພາບ" ຈີນຣັດເຊຍຢູ່ທີ່ປັກກິ່ງ, ທ່ານລີຈິ່ນຈ່າງກ່າວວ່າ, ລັດຖະບານຈີນຍຶດໝັ້ນຍຸດທະສາດພັດທະນາແບບຍືນຍົງ, ໄດ້ເພີ່ມທະວີວຽກງານອະນຸລັກສິ່ງແວດລ້ອມຢ່າງບໍ່ຢຸດຢັ້ງ, ການປັບປຸງເຂດລ້ອງແມ່ນ້ຳຊົ່ງຮ່ວາໄດ້ຖືກຈັດເຂົ້າໃນໂຄງການອະນຸລັກສິ່ງແວດລ້ອມທີ່ສຳຄັນ. ຝ່າຍຈີນຍິນດີຜ່ານກົນໄກທີ່ບັງເກີດຜົນ ເຊັ່ນ ກຳມາທິການອະນຸລັກສິ່ງແວດລ້ອມຂອງຄະນະກຳມະການພົບປະຈຳລະຫວ່າງນາຍົກລັດຖະມົນຕີຈີນຣັດເຊຍ, ປຶກສາຫາລືກັນຢ່າງໃກ້ຊິດ, ເຮັດໃຫ້ແມ່ນ້ຳຊາຍແດນຈີນຣັດເຊຍຍິ່ງສະອາດກວ່າເກົ່າ, ເພື່ອສ້າງຄວາມຜາສຸກໃຫ້ປະຊາຊົນສອງຊາດຫຼາຍກວ່າເກົ່າ.
ທ່ານລີຈິ່ນຈ່າງຍັງກ່າວວ່າ, ການຮ່ວມມືລະດັບທ້ອງຖິ່ນລະຫວ່າງຈີນກັບຣັດເຊຍໄດ້ພັດທະນາຢ່າງວ່ອງໄວ, ສອງຝ່າຍໄດ້ມີຕົວເມືອງ ແຂວງແລະລັດມິດຕະພາບ 68 ຄູ່ແລ້ວ, ໃນລະດັບທ້ອງຖິ່ນຂອງສອງປະເທດກໍໄດ້ສ້າງກົນໄກພົບປະຢ່າງເປັນປົກກະຕິລະຫວ່າງເຈົ້າແຂວງແລະປະທານລັດ, ສອງຝ່າຍຍັງໄດ້ຈັດງານວາງສະແດງສິນຄ້າ ງານວາງສະແດງວິທະຍາສາດເຕັກໂນໂລຊີແລະກອງປະຊຸມສຳມະນາເສດຖະກິດ.
|
