|
ຕາມຂ່າວສານຊິນຮວາ: ວັນທີ 20 ຕຸລາ, ກອງປະຊຸມລັດຖະມົນຕີຄັ້ງທີ 5 ກ່ຽວກັບການຮ່ວມມືດ້ານເສດຖະກິດພາກພື້ນອາຊີກາງໄດ້ຈັດຂຶ້ນຢູ່ເມືອງອູຣຸມກີເຂດຊິນຈ່ຽງຈີນ, ທ່ານເຈິ່ງເຜິຍອຽນ ຮອງນາຍົກລັດຖະມົນຕີຈີນກ່າວວ່າ, ຫວັງໃຫ້ຝ່າຍຕ່າງໆທີ່ຮ່ວມປະຊຸມສ້າງການພົວພັນຄູ່ຮ່ວມມືທີ່ແໜ້ນແຟ້ນກວ່າເກົ່າ, ເປີດກວ້າງການໄປມາຫາສູ່ກັນດ້ານເສດຖະກິດການຄ້າ, ປັບປຸງກົນໄກຮ່ວມມື, ພະຍາຍາມສ້າງພາກພື້ນນີ້ໃຫ້ເປັນພາກພື້ນທີ່ມີສັນຕິພາບຖາວອນ ຈະເລີນຮຸ່ງເຮືອງພ້ອມກັນແລະກົມກຽວກັນ.
ທ່ານເຈິ່ງເຜິຍອຽນກ່າວວ່າ, ຈີນຈະສືບຕໍ່ຊຸກຍູ້ການຄ້າແລະການລົງທຶນໃຫ້ເສລີແລະສະດວກກວ່າເກົ່າ, ເພີ່ມທະວີການກໍ່ສ້າງດ່ານຊາຍແດນ, ໃຫ້ລະບອບດ່ານພາສີເຂົ້າສູ່ຄວາມເປັນລະບົບລະບຽບ, ຫຼຸດກຳແພງການຄ້າໃຫ້ຕ່ຳລົງ, ເພື່ອສ້າງເງື່ອນໄຂທີ່ດີກວ່າເກົ່າໃຫ້ແກ່ວິສາຫະກິດຂ້າມຊາດດຳເນີນການຮ່ວມມື.
ໃນກອງປະຊຸມ, ທ່ານຈິ່ນເຢິນຊິ້ງ ລັດຖະມົນຕີວ່າການກະຊວງການເງິນຈີນກ່າວວ່າ, ການຮ່ວມມືດ້ານເສດຖະກິດພາກພື້ນອາຊີກາງເລີ່ມເຂົ້າສູ່ໄລຍະໃໝ່ຂອງການຮ່ວມມືຮອບດ້ານແລ້ວ.
|
