|
|
 |
| (GMT+08:00)
2006-10-23 16:57:43
|
 |
|
ຈີນອາຊຽນ:ຄວາມໄວ້ເນື້ອເຊື່ອໃຈແລະການຮ່ວມມືນັບມື້ນັບຫຼາຍຂຶ້ນ(ສຽງ)
cri
|
ປີນີ້ແມ່ນຈີນກັບສະມາຄົມປະຊາຊາດອາຊີຕາເວັນອອກສຽງໃຕ້ຫຼືອາຊຽນໄດ້ສ້າງການພົວພັນຄູ່ເຈລະຈາຄົບຮອບ15ປີ.ວັນທີ30ຕຸລາ,ກອງປະຊຸມສຸດຍອດເພື່ອລະລຶກການສ້າງເປັນປະເທດຄູ່ເຈລະຈາຈີນອາຊຽນຄົບຮອບ15ປີຈະຈັດຂຶ້ນຢູ່ເມືອງນານນິງເຂດກວາງຊີ ທາງພາກໃຕ້ຂອງຈີນ.ໃນ15ປີມານີ້,ການພົວພັນລະຫວ່າງຈີນກັບອາຊຽນໄດ້ປ່ຽນຈາກການລະແວງສົງໄສກັນມາເປັນການຮ່ວມມືກັນຢ່າງໂຫຼ່ງຫຼ່ຽນ,ແລ້ວມາເປັນການພົວພັນຄູ່ເຈລະຈາຍຸດທະສາດໃນປະຈຸບັນ.
ໃນເວລາໃຫ້ສຳພາດຕໍ່ນັກຂ່າວCRI,ທ່ານເສີນຊື້ຊຸ້ນ ຫົວໜ້າຫ້ອງການຄົ້ນຄວ້າອາຊີປາຊີຟິກສະຖາບັນຄົ້ນຄວ້າບັນຫາສາກົນຈີນເວົ້າວ່າ,ແຕ່ຈັດການເຈລະຈາໃນປີ1991ເປັນຕົ້ນມາ,ການພົວພັນຈີນອາຊຽນໄດ້ຜ່ານຫຼາຍໄລຍະ,ຄືຈາກລົບລ້າງຄວາມລະແວງສົງໄສໄປສູ່ເປັນປະເທດຄູ່ເຈລະຈາໄວ້ເນື້ອເຊື່ອໃຈກັນຖານບ້ານໃກ້ເຮືອນຄຽງທີ່ດີຕໍ່ກັນແລະປະເທດຄູ່ຮ່ວມມືຍຸດທະສາດເປັນຕົ້ນ.
ທ່ານເສີນຊື້ຊຸ້ນເວົ້າວ່າ,ເມື່ອໄດ້ເຈລະຈາກັບແລະຮ່ວມມືກັນເປັນເວລາ15ປີ,ຄວາມໄວ້ເນື້ອເຊື່ອໃຈຊຶ່ງກັນແລະກັນໄດ້ເພີ່ມຂຶ້ນ,ມີທັດສະນະຕໍ່ກັນຕ່າງເກົ່າຫຼາຍ.ທີ່ຈິງແລ້ວກົນໄກເຈລະຈາແນວນີ້ໄດ້ສ້າງຕົວແບບທີ່ດີແຫ່ງການຮ່ວມມືໃຫ້ແກ່ການຮ່ວມມືລະຫວ່າງຈີນກັບປະເທດອ້ອມຂ້າງ,ໂດຍສະເພາະແມ່ນປະເທດໂລກທີສາມ.
ທ່ານເສິນຊືຊຸ້ນເຫັນວ່າ,ການສົນທະນາແລະການຮ່ວມມືກັນລະຫວ່າງຈີນກັບອາຊຽນໄດ້ຂະຫຍາຍຕົວຢ່າງວ່ອງໄວ,ສ່ວນຫຼາຍແມ່ນຍ້ອນໄດ້ຮັບຜົນດີຈາກຈີນປະຕິບັດທິດທາງການຕ່າງປະເທດທີ່ມີໄມຕີຈິດຕໍ່ປະເທດໃກ້ຄຽງ,ຖືປະເທດໃກ້ຄຽງເປັນເພື່ອນແລະນະໂຍບາຍທີ່ເປັນບ້ານໃກ້ເຮືອນຄຽງທີ່ດີຕໍ່ກັນ,ຢູ່ຮ່ວມກັນກັບປະເທດໃກ້ຄຽງຢ່າງສະຫງົບ,ຮ່ວມກັນຮັ່ງມີຜາສຸກ.ປີ1997,ອາຊີໄດ້ເກີດວິກິດການທາງດ້ານການເງິນ,ໃນຄາວນັ້ນ,ຈີນບໍ່ຄຳນຶງເຖິງກຳລັງກົດດັນແລະຄວາມສ່ຽງອັນໃຫຍ່ຫຼວງທີ່ຕົນປະເຊີນ,ຍຶດໝັ້ນບໍ່ໃຫ້ເງິນຢວນລົງລາຄາ,ແລະໃຫ້ການສະໜັບສະໜູນດ້ານການເງິນແກ່ອາຊຽນຕາມຄວາມສາມາດຂອງຕົນຢ່າງທັນການ,ເຮັດໃຫ້ສອງຝ່າຍມີຄວາມໄວ້ເນື້ອເຊື່ອໃຈກັນຫຼາຍກວ່າເກົ່າ,ອັນກາຍເປັນບາດລ້ຽວສຳຄັນໃນປະຫວັດການພົວພັນລະຫວ່າງສອງຝ່າຍ.ນອກນີ້,ຈີນຍັງເດີນຕາມເສັ້ນທາງພັດທະນາໂດຍສັນຕິ,ບໍ່ສະແຫວງຫາການເປັນມະຫາອຳນາດຂອງພາກພື້ນ.ເພື່ອກຳຈັດຄວາມລະແວງສົງໃສຂອງອາຊຽນ,ໃນເວລາຮ່ວມມືໃນຂົງເຂດຕ່າງໆກັບອາຊຽນ,ຈີນກໍໄດ້ສະໜັບສະໜູນອາຊຽນເສີມຂະຫຍາຍບົດບາດນຳໜ້າໂດຍຕະຫຼອດ.
ປັດຈຸບັນ,ການພົວພັນລະຫວ່າງຈີນກັບອາຊຽນໄດ້ກາຍເປັນການພົວພັນຄູ່ຮ່ວມມືທີ່ມີຊີວິດຊີວາ,ມຸ້ງໜ້າໄປໄດ້ດີແລະໄດ້ຮັບໝາກຜົນຫຼາຍກວ່າໝູ່ໃນບັນດາການພົວພັນຄູ່ເຈລະຈາ ຂອງອາຊຽນໃນປັດຈຸບັນ.ທ່ານເສິນຊືຊຸ້ນເຫັນວ່າ,ໝາກຜົນແຫ່ງການຮ່ວມມືດັ່ງກ່າວໄດ້ຍົກອິດທິພົນຂອງທົ່ວອາຊີຕາເວັນອອກໃຫ້ສູງຂຶ້ນ,ເວົ້າສຳລັບສອງຝ່າຍແລ້ວແມ່ນໄດ້ຮັບຜົນປະໂຫຍດນຳກັນ.
"ຍ້ອນວ່າໄດ້ມີຄວາມໄວ້ເນື້ອເຊື່ອໃຈກັນຫຼາຍຂຶ້ນ,ຈຶ່ງເຮັດໃຫ້ການຮ່ວມມືດຳເນີນໄປຢ່າງ ສະດວກ,ເຮັດໃຫ້ພາກພື້ນແຫ່ງນີ້ນັບມື້ນັບສົດໃສຫຼາຍກວ່າເກົ່າ,ນັບມື້ນັບມີກຳລັງດຶງດູດຫຼາຍກວ່າເກົ່າ.ປະເທດແລະເຂດແຄ້ວນທີ່ຢູ່ນອກພາກພື້ນ,ຄື ອິນເດຍ ອົສຕຼາລີ ນູແວນເຊລັງ ຣັດເຊຍ ສະຫະພາບເອີລົບຈົນຮອດອາເມລິກາ,ລ້ວນແຕ່ຫັນມາໃຫ້ຄວາມສຳຄັນຕໍ່ພາກພື້ນນີ້,ນີ້ກໍແມ່ນຄວາມໝາຍແຫ່ງການຮ່ວມມືລະຫວ່າງຈີນກັບອາຊຽນ."
ວັນທີ30ຕຸລາປີນີ້,ກອງປະຊຸມສຸດຍອດລະລຶກການສ້າງເປັນປະເທດຄູ່ເຈລະຈາລະຫວ່າງຈີນກັບອາຊຽນຄົບຮອບ15ປີຈະຈັດຂຶ້ນຢູ່ເມືອງນານນີງຂອງຈີນ.ຮອດເວລານັ້ນ,ຜູ້ນຳຂອງ 10ປະເທດສະມາຊິກອາຊຽນຈະມາເຕົ້າໂຮມກັນ,ພ້ອມກັບຜູ້ນຳຈີນເພື່ອຫວນຄືນແລະສະຫຼຸບຜົນສຳເລັດທີ່ໄດ້ຮັບໃນ15ປີມານີ້,ພ້ອມກັນປຶກສາຫາລືແຜນພັດທະນາການຮ່ວມມືລະຫວ່າງຈີນອາຊຽນໃນອະນາຄົດ.ທ່ານເສິນຊື້ຊຸ້ນຊີ້ອອກວ່າ,ສອງຝ່າຍຈະຖືກອງປະຊຸມເທື່ອນີ້ເປັນໂອກາດທີ່ອຳນວຍໃຫ້ແກ່ກັນ,ປັບປຸງແລະຍົກສູງການພົວພັນປະເທດຄູ່ຮ່ວມມືຍຸດທະສາດລະຫວ່າງຈີນກັບອາຊຽນຕື່ມອີກ.
|
|
|
