|
ຫວ່າງມໍ່ໆນີ້,ການແຈ້ງຂ່າວກ່ຽວກັບໃນເຄື່ອງສຳອາງມີສິ່ງທີ່ມີຜົນຮ້າຍນັ້ນ,ໄດ້ເຮັດໃຫ້ມີປະຕິກິລິຍາຢ່າງຮຸນແຮງຈາກຜູ້ບໍລິໂພກຂອງຈີນ.ຕາມຂ່າວແຈ້ງວ່າ,ຜະລິດຕະພັນຈຳນວນໜຶ່ງຂອງຫຍີ່ຫໍ້ SK-II ເຄື່ອງສຳອາງທີ່ມີຊື່ສຽງໄດ້ຖືກກວດພົບວ່າ,ມີທາດໂກຼມຽມແລະທາດເນໂອດີມຽມເຊິ່ງເປັນທາດໂລຫະໜັກທີ່ຜິດກົດໝາຍ,ແລະໄດ້ພາໃຫ້ເກີດກະແສການຊື້ແລ້ວສົ່ງຄືນຢູ່ນະຄອນປັກກິ່ງ ຊຽງໄຮ້ແລະຮາງໂຈ່ເປັນຕົ້ນຍ້ອນເລື່ອງນີ້.ທາດໂລຫະໜັກໃນເຄື່ອງສຳອາງຈະມີຜົນຮ້າຍແນວໃດແດ່ຕໍ່ຮ່າງກາຍຂອງຄົນເຮົາ?ໃນເວລາໃຊ້ເຄື່ອງສຳອາງ,ຄວນເອົາໃຈໃສ່ນຳບັນຫາໃດແດ່?ໃນລາຍການ"ສວນວິທະຍາສາດແລະການສຶກສາ"ພາກນີ້,ພວກເຮົາຈະມາລົມກັນກ່ຽວກັບເລື່ອງນີ້.
ວັນທີ 14 ກັນຍາປີນີ້,ກົມໃຫຍ່ຕິດຕາມກວດກາຄຸນນະພາບແລະກວດກາພະຍາດແຫ່ງຊາດຈີນປະກາດວ່າ,ໃນຜະລິດຕະພັນ 12 ຊະນິດຂອງເຄື່ອງສຳອາງຫຍີ່ຫໍ້ SK-II ເຊິ່ງແມ່ນບໍລິສັດ P&G ຂອງອາເມລິກາເປັນຜູ້ຜະລິດນັ້ນ,ໄດ້ກວດພົບທາດໂກຼມຽມແລະທາດເນໂອດີມຽມເຊິ່ງເປັນທາດໂລຫະໜັກທີ່ຜິດກົດໝາຍ.ທາດໂລຫະໜັກສອງຊະນິດນີ້ຖ້າຕົກຄ້າງຢູ່ໃນຮ່າງກາຍ,ຈະມີຜົນຮ້າຍຕໍ່ຮ່າງກາຍຄົນ,ທາດໂກຼມຽມຈະພາໃຫ້ເກີດຜີວອັກເສບລັກສະນະຄືແພ້ຢາຫຼືຕຸ່ມ,ທາດເນໂອດີມຽມຈະເຮັດໃຫ້ເຄືອງຕາຢ່າງຮ້າຍແຮງ,ແລະຈະບາດຜີວພັນໃນລະດັບກາງ.ທ່ານທານທ່ຽນເຫວີຍ ຜູ້ອຳນວຍການວິທະຍາໄລວິທະຍາສາດແລະເຕັກນິກດ້ານຊີວິດຂອງມະຫາວິທະຍາໄລອຸດສາຫະກຳເຄມີປັກກິ່ງບອກນັກຂ່າວວ່າ,ຖ້າເອົາທາດໂລຫະໜັກທົ່ວໄປໃນຊີວິດການເປັນຢູ່ຈຳນວນໜຶ່ງໃສ່ເຂົ້າໃນເຄື່ອງສຳອາງ,ກໍ່ຈະມີຜົນຮ້າຍຫຼາຍ.ທ່ານເວົ້າວ່າ:
"ທາດໂລຫະໜັກໃນເຄື່ອງສຳອາງມີຜົນຮ້າຍອ່າວຫຼາຍ,ຕົ້ນຕໍແມ່ນຍ້ອນຜີວໜັງຈະປ່ຽນຖ່າຍທາດໂລຫະໜັກຢ່າງເປັນປົກກະຕິບໍ່ໄດ້,ມັນຈະສະສົມຢູ່ໃນຜີວໜັງແລະຮ່າງກາຍຂອງຄົນເຮົາ,ເມື່ອໄດ້ສະສົມຮອດລະດັບໃດໜຶ່ງ,ກໍ່ຈະເບື່ອເມົາລະບົບອັງໂດກຼີນຂອງຮ່າງກາຍຄົນໃນລະດັບໃດໜຶ່ງ,ເຮັດໃຫ້ການຖ່າຍເທທີ່ເປັນປົກກະຕິສັບສົນຂຶ້ນ,ແລ້ວພາໃຫ້ເກີດພະຍາດຊະນິດຕ່າງໆ."
ຜູ້ຊ່ຽວຊານເວົ້າວ່າ,ເນື່ອງຈາກວ່າທາດໂລຫະໜັກຈຳນວນໜຶ່ງເຊິ່ງລວມທັງທາດໂກຼມຽມແລະທາດເນໂອດີມຽມສາມາດເຮັດໃຫ້ບົດບາດເສີມຄວາມງາມຂອງເຄື່ອງສຳອາງເດັ່ນຊັດກວ່າເກົ່າ,ຫຼືສາມາດເພີ່ມຄວາມຫົດຍືດຂອງຜີວໜັງຢ່າງເດັ່ນຊັດ,ສະນັ້ນ,ບໍລິສັດການຜະລິດຈຳນວນໜຶ່ງຈຶ່ງເອົາທາດເຫຼົ່ານີ້ໃສ່ເຂົ້າໃນນ້ຳມັນບຳລຸງຜີວ ແຜ່ນບາງຕິດໜ້າຂາວແລະແປ້ງທາໜ້າ.
ນາງຫຼີຢູນເຝິ່ງທີ່ເຮັດວຽກປະຊາສຳພັນຢູ່ປັກກິ່ງໃຊ້ເຄື່ອງສຳອາງຫຍີ່ຫໍ້ SK-II ຄົບຊຸດຕະຫຼອດມາ,ເມື່ອໄດ້ຍິນວ່າຜະລິດຕະພັນເຫຼົ່ານີ້ມີທາດໂລຫະໜັກທີ່ຜິດກົດໝາຍແລ້ວ,ເຖິງວ່າບໍ່ໄດ້ຮູ້ສຶກມີຄວາມຜິດປົກກະຕິໃດໆ,ແຕ່ນາງກໍ່ຍັງເປັນຫ່ວງນຳວ່າ,ຈະມີຄວາມອັນຕະລາຍຕາມມາຫຼືບໍ່.ນາງເວົ້າວ່າ:
"ພາຍຫຼັງໄດ້ເກີດເຫດການນີ້ແລ້ວ,ຂ້ອຍກໍ່ບໍ່ໃຊ້ອີກ,ແຕ່ຂ້ອຍເປັນຫ່ວງນຳທີ່ສຸດວ່າ,ທາດໂລຫະໜັກເຫຼົ່ານີ້ຈະມີຜົນສະທ້ອນທາງລົບຫຍັງບໍ່ໃນຕໍ່ໜ້າ,ເພາະວ່າ,ຜີວພັນຂອງຂ້ອຍໄດ້ດູດຊຶມເອົາມັນແລ້ວ,ຈະມີຜົນຮ້າຍຕໍ່ຮ່າງກາຍຂອງຂ້ອຍຫຼືບໍ່,ນີ້ແມ່ນເລື່ອງທີ່ຂ້ອຍເປັນຫ່ວງນຳທີ່ສຸດ."
ໂດຍແນໃສ່ຄວາມເປັນຫ່ວງນຳຂອງນາງຫຼີຢູນເຝິ່ງ,ນັກຂ່າວໄດ້ສຳພາດນາງສົ້ງພີງ ນາຍແພດຂອງສະພາບັນດິດວິທະຍາສາດແພດສາດພື້ນເມືອງຈີນ,ນາງບອກນັກຂ່າວວ່າ,ຜູ້ບໍລິໂພກສາມາດຮູ້ດ້ວຍຕົນເອງວ່າເກີດມີອາການແພ້ຢາຫຼືບໍ່ໂດຍຜ່ານຈາກອາການຈຳນວນໜຶ່ງຂອງຕົນເອງ.ນາງເວົ້າວ່າ:
"ຖ້າຜີວຂອງພວກເຮົາໄດ້ເກີດມີອາການຄັນຫຼືເປັນສີແດງຫຼືຜີວລອກ,ກໍ່ໝາຍຄວາມວ່າ,ຜີວຂອງພວກເຮົາໄດ້ຢູ່ໃນສະພາບທີ່ແພ້ເຄື່ອງສຳອາງແລ້ວ."
ນາງສົ້ງພີງເວົ້າວ່າ,ຖ້າເກີດມີອາການແພ້ຢາ,ຕ້ອງຢຸດໃຊ້ເຄື່ອງສຳອາງໃນທັນທີ,ແລ້ວລ້າງອອກໃຫ້ສະອາດແລະໃສ່ນ້ຳກ້ອນ,ເວົ້າທົ່ວໄປແລ້ວ,ຜີວຂອງຄົນເຮົາລ້ວນແຕ່ສາມາດປັບຕົວເອງ,ຖ້າແກ້ໄຂໂດຍໄວແລະທັນການກໍ່ຈະດີເອງ.ພ້ອມກັນນັ້ນ,ນາງເວົ້າວ່າ,ສຳລັບຄົນທີ່ມີອາການແພ້ໃນລະດັບສູງ,ຫຼືວ່າມີບາດຢູ່ເທິງຜີວໜັງ,ໃນເວລາໃຊ້ເຄື່ອງສຳອາງ,ຕ້ອງລະມັດລະວັງຫຼາຍທີ່ສຸດ.
ເຫດການເຄື່ອງສຳອາງຫຍີ່ຫໍ້ SK-II ໄດ້ພາໃຫ້ປະຊາຊົນຈີນ,ໂດຍສະເພາະແມ່ນຜູ້ບໍລິໂພກເພດຍິງເປັນຫ່ວງນຳຄວາມປອດໄພຂອງຕົນຫຼາຍ,ຈົນມີຫຼາຍຄົນຮູ້ສຶກຢ້ານກົວຕໍ່ເຄື່ອງສຳອາງແລະຮູ້ສຶກວ່າ,ເຄື່ອງສຳອາງທັງໝົດລ້ວນແຕ່ຈະເຮັດໃຫ້ຜູ້ໃຊ້ມີອາການແພ້ຢາ,ຕໍ່ເລື່ອງນີ້,ນາງສົ້ງພີງເວົ້າວ່າ,ເຖິງວ່າໄດ້ກວດພົບທາດໂລຫະໜັກທີ່ຜິດກົດໝາຍໃນເຄື່ອງສຳອາງຈຳນວນໜຶ່ງກໍ່ຕາມ,ແຕ່ເນື່ອງຈາກວ່າ,ແຕ່ລະມື້ຄົນເຮົາໃຊ້ໜ້ອຍທີ່ສຸດ,ສະນັ້ນ,ຜູ້ບໍລິໂພກບໍ່ຈຳເປັນຕ້ອງກັງວົນຫຼາຍໂພດແລະຄວນຕິດຕາມເອົາໃຈໃສ່ດູເລສຸຂະພາບຮ່າງກາຍຂອງຕົນຢ່າງໃກ້ຊິດ.ນາງເວົ້າວ່າ:
"ຂ້າພະເຈົ້າຄິດວ່າ,ການໃຊ້ເຄື່ອງສຳອາງແມ່ນໜ້ອຍທີ່ສຸດ,ແຕ່ລະມື້,ອາດຈະໃຊ້ແຕ່ 1—2 ກຼາມເທົ່ານັ້ນ,ເຖິງວ່າໄດ້ໃຊ້ເປັນເວລາຫຼາຍປີກໍ່ຕາມ,ປະລິມານທີ່ຕົກຄ້າງຢູ່ໃນຜີວກໍ່ບໍ່ຫຼາຍປານໃດ,ອັດຕາສ່ວນກໍ່ຕ່ຳທີ່ສຸດ,ສະນັ້ນ,ຄວາມອາດສາມາດທີ່ຈະທຳລາຍຮ່າງກາຍຄົນຢ່າງຮ້າຍແຮງນັ້ນກໍ່ບໍ່ຫຼາຍ.ຖ້າຜູ້ໃຊ້ຮູ້ສຶກເປັນຫ່ວງຢູ່ໃນໃຈ,ກໍ່ໄປກວດຢູ່ໂຮງໝໍກໍ່ໄດ້."
ໃນເວລາສຳພາດ,ມີບຸກຄົນໃນຂະແໜງການດັ່ງກ່າວຈຳນວນໜຶ່ງບອກນັກຂ່າວວ່າ,ຜູ້ບໍລິໂພກຄວນເລືອກເອົາແລະນຳໃຊ້ເຄື່ອງສຳອາງທີ່ເໝາະສົມກັບຕົນເອງ.
ກ່ອນອື່ນ,ຕ້ອງຮູ້ລັກສະນະຜີວພັນຂອງຕົນ,ແມ່ນຜີວມັນ ຜີວແຫ້ງ ຜີວຜ້ານກາງຫຼືແມ່ນຜີວທີ່ແພ້ງ່າຍ.ຜີວມັນຄວນເລືອກເອົາເຄື່ອງສຳອາງສຳລັບທຳຄວາມສະອາດ,ແລະເຄື່ອງບຳລຸງຜີວທີ່ມີນ້ຳມັນອ່າວໜ້ອຍ;ຜີວແຫ້ງຄວນເລືອກເອົາເຄື່ອງບຳລຸງຜີວທີ່ມີນ້ຳມັນອ່າວຫຼາຍ;ສຳລັບຜີວຜ້ານກາງ,ທຳມະດາແລ້ວບໍ່ຕ້ອງການບຳລຸງເປັນພິເສດ,ແຕ່ສາມາດເລືອກເອົາເຄື່ອງສຳອາງທີ່ເໝາະສົມຕາມສະພາບການປ່ຽນແປງຂອງລະດູການແລະອາກາດ;ສຳລັບຜີວທີ່ແພ້ງ່າຍ,ດີທີ່ສຸດແມ່ນເລືອກເອົາເຄື່ອງສຳອາງທີ່ບໍ່ໃສ່ເຄື່ອງຫອມ ແອກໍຮໍ ເຄື່ອງກັນບູດແລະທາດສີ,ພາກສ່ວນປະກອບຍິ່ງໜ້ອຍຍິ່ງດີ.
ນອກນີ້,ໃນເວລາເລືອກເອົາເຄື່ອງສຳອາງ,ຍັງຕ້ອງເອົາໃຈໃສ່ນຳການຫົ່ມຫໍ່ສິນຄ້າ,ເບິ່ງມັນສອດຄ່ອງກັບມາດຖານຄຸນນະພາບທາງອະນາໄມຂອງເຄື່ອງສຳອາງຫຼືບໍ່.ສຳລັບຄົນທີ່ຜີວແພ້ງ່າຍແລະມີບາດແຜຢູ່ເທິງຜີວ,ສາມາດທົດລອງໃຊ້ຢູ່ຂໍ້ແຂນຫຼືຄໍ,ເພື່ອຫຼີກເວັ້ນບໍ່ໃຫ້ເກີດອາການແພ້ຢາ.ໃນເວລາໃຊ້ເຄື່ອງສຳອາງ,ກໍ່ຕ້ອງເອົາໃຈໃສ່ນຳວິທີໃຊ້,ຖ້າແຕ່ງໜ້າແບບເຂັ້ມໆຈະກະທົບເຖິງບົດບາດຂອງຜີວທີ່ເປັນທຳມະຊາດ,ໃຊ້ດົນແລ້ວກໍ່ຈະເຮັດໃຫ້ຜີວຫຍາບແລະເຖົ້າໄວ.
|
