|
|
 |
| (GMT+08:00)
2006-10-27 20:10:47
|
 |
|
ເອື້ອຍນ້ອງຂອງເຮືອນພັກຈ້າງເຈ່ຍຈ່ວງ
cri
Author: da
ຢູ່ເມືອງຕ່ານບ່າແຂວງເຊສວນພາກຕາເວັນຕົກສຽງໃຕ້ຂອງຈີນ,ມີບ້ານໜຶ່ງຊື່ວ່າ"ເຈຍຈູ່"ແມ່ນບ້ານເຜົ່າຕິເບດທີ່ມີທິວທັດອັນສວຍງາມ. ບ້ານນີ້ ຖືກນັກທ່ອງທ່ຽວຍ້ອງຍໍເປັນ"ໂລກໃນຈິນຕະນາການ",ມີເຮືອນພັກຊື່ວ່າຈ້າງເຈ່ຍຈ່ວງ ເຈົ້າຂອງແມ່ນເອື້ອຍນ້ອງ3ຄົນ. ໃນຂະນະທີ່ເອື້ອຍກຸ້ຍຮວ່າຂອງເຮືອນພັກຈ່າງເຈ່ຍຈ່ວງສ້າງລາຍໄດ້ໃຫ້ຄອບຄົວ,ລາວຍັງໄດ້ຄຶດວິທີອະນຸລັກສິ່ງແວດລ້ອມທຳມະຊາດຢູ່ບ້ານເຈຍຈູ່.
ບ້ານເຈຍຈູ່ຕັ້ງຢູ່ຕີນພູຫິມະແລະແຄມນ້ຳທີ່ໄຫຼຕາມຮ່ອມພູ,ເຜົ່າຕິເບດມີຊາວບ້ານ 150 ກວ່າຄອບຄົວ. ຕັ້ງເຮືອນຢັ່ງຢາຍກັນຂຶ້ນໄປຕາມເນີນພູ,ທ່າມກາງປ່າໄມ້ຂຽວອຸ່ມທຸ່ມ.ຢູ່ຕາມທາງນ້ອຍທີ່ປູດ້ວຍຫີນ,ຈະເຫັນມີນັກທ່ອງທ່ຽວເປ້ຖົງກຳລັງຍ່າງທ່ຽວຫຼິ້ນຢູ່.
ຢູ່ປາກທາງເຂົ້າບ້ານ ນາງກຸ້ຍຮວ່າບອກນັກທ່ອງທ່ຽວວ່າ: "ນີ້ແມ່ນນາມບັດຂອງຂ້ອຍທີ່ເຮືອນພັກຈ້າງເຈ່ຍຈ່ວງ.ເຈົ້າຍ່າງຕາມທາງຫຼວງນີ້ໄປ,ຖ້າວ່າຊອກເຮືອນພັກບໍ່ເຫັນ,ເອົານາມບັດຂ້ອຍໄປຖາມໂລດ,ໃຜໆກໍ່ຮູ້ດີ."
ຕອນເຊົ້າທຸກມື້,ນາງກຸ້ຍຮວ່າ ແມ່ຍິງເຜົ່າຕິເບດກໍຕ້ອງອອກໄປລໍຖ້ານັກທ່ອງທ່ຽວຢູ່ປະຕູທາງເຂົ້າບ້ານ.ເຮືອນພັກຈ້າງເຈ່ຍຈວ່າງທີ່ນາງກຸ້ຍຮວ່າກັບນ້ອງສາວ 2 ຄົນພ້ອມກັນດຳເນີນທຸລະກິດ,ແມ່ນເຮືອນປະຊາຊົນທີ່ຮັບຕ້ອນນັກທ່ອງທ່ຽວທີ່ໃຫຍ່ກວ່າໝູ່ຢູ່ທ້ອງຖິ່ນນີ້,ມີຊື່ສຽງຫຼາຍ.ນອກຈາກນອນພັກແລະກິນອາຫານໄດ້ແລ້ວ,ນາງກຸ້ຍຮວ່າຍັງພານັກທ່ອງທ່ຽວທ່ຽວຊົມບ້ານ,ເພື່ອຮູ້ຮີດຄອງປະເພນີຢູ່ແຫ່ງນັ້ນ.ນາງເວົ້າວ່າ,ເອກະລັກພິເສດຂອງບ້ານເຜົ່າຕິເບດເຈຍຈູ່ ແຫ່ງນີ້ໄດ້ຮັກສາເຮືອນຊານແບບເຜົ່າຕິເບດທີ່ສົມບູນຄົບຖ້ວນ,ເຮືອນຢູ່ເຫຼົ່ານີ້ສ່ວນຫຼາຍແມ່ນສ້າງດ້ວຍຫີນແລະໄມ້,ສູງປະມານ 15 ແມັດ. ສ່ວນຫຼາຍເປັນສີຂາວ,ປະຕູ ປ່ອງຢ້ຽມທາດ້ວຍສີຕັບໝູ,ຢູ່ລະຫວ່າງຊັ້ນຕຶກແມ່ນທາດ້ວຍເສັ້ນສີດຳ.ນາງກຸ້ຍຮວ່າແນະນຳວ່າ:
"ເຈຍຈູ່ ແປວ່າ 100ຄອບຄົວ.ດຽວນີ້ ເບິ່ງແລ້ວ ບ້ານເຫຼົ່ານີ້ໃໝ່ອ່ຽມຫຼາຍ,ເພາະວ່າໃນຍາມບຸນແຕ່ລະປີ,ພວກເຮົາຕ້ອງທາສີໃໝ່ທຸກເທື່ອ. ສີຂາວໝາຍເຖິງຄວາມບໍລິສຸດຜຸດພ່ອງ,ສີແດງໝາຍເຖິງສີລິມຸງຄຸນ,ສີດຳໝາຍເຖິງການລຶບໂຊກບໍ່ດີໃຫ້ຫາຍໄປ."
ນາງລ່າໝູ້ ນ້ອງສາວຫຼ້າຂອງນາງກຸ້ຍຮວ່າແມ່ນນາງງາມໃນບ້ານເຈຍຈູ່,ນັກທ່ອງທ່ຽວຫຼາຍໆຄົນມາທ່ຽວແຫ່ງນີ້ຍ້ອນຊື່ສຽງຂອງນາງ ຢາກມາເບິ່ງ.ໃນເວລາເອື້ອຍກຸ້ຍຮວ່າກຳລັງນຳທ່ຽວຢູ່ນັ້ນ,ນາງລ່າໝູ້ກໍຮັບຕ້ອນນັກທ່ອງທ່ຽວໃນເຮືອນພັກ.ນາງລ່າໝູ້ໄດ້ກາຍເປັນຜູ່ຊ່ວຍທີ່ດີຂອງເອື້ອຍຂອງລາວ.
ນາງລ່າໝູ້ແນະນຳຕໍ່ນັກທ່ອງທ່ຽວວ່າ,ເອົາຊາເນີຍບໍ່?ເພາະວ່າຊານີ້ສາມາດແກ້ອາການເມົາຍ້ອນອາກາດບໍ່ພຽງພໍຢູ່ເທິງພູສູງ.
ທິວທັດສວຍງາມຂອງບ້ານເຈຍຈູ່ແມ່ນຖືກນັກທ່ອງທ່ຽວພົບເຫັນຢ່າງບັງເອີນເມື່ອທ້າຍປີ 1990. ຢູ່ແຫ່ງນີ້ ປ້ອມລົບກັບເຮືອນເຊື່ອມເຂົ້າເປັນສິ່ງກໍ່ສ້າງທາງຮີດຄອງປະເພນີອັນພິເສດຂອງເຜົ່າຕິເບດ ທິວທັດທຳມະຊາດທີ່ສວຍງາມ ພ້ອມກັບນາງງາມ,ຄ່ອຍໆຖືກເຜີຍແຜ່ສູ່ພາຍນອກ,ແລະດຶງດູດນັກທ່ອງທ່ຽວນັບມື້ນັບຫຼາຍມາທ່ຽວແຫ່ງນີ້. ມາຮອດບ້ານເຈຍຈູ່,ນັກທ່ອງທ່ຽວຢາກຈະພັກຫຼາຍມື້,ເພື່ອຊົມທິວທັດທຳມະຊາດຂອງບ້ານເຜົ່າຕິເບດ. ປີ 1999,ນາງກຸ້ຍຮວ່າທີ່ຫົວໄວ ສະຫຼາດຫຼັກແຫຼມກໍເລີ່ມຕ້ອນຮັບນັກທ່ອງທ່ຽວຢູ່ເຮືອນຂອງຕົນ. ປະຈຸບັນ,ນອກຈາກເອື້ອຍນ້ອງນາງກຸ້ຍຮວ່າ 3 ຄົນແລ້ວ,ໃນບ້ານນີ້ ຍັງມີຄອບຄົວ 1 ສ່ວນ 3 ກໍເລີ່ມຮັບຕ້ອນນັກທ່ອງທ່ຽວມາພັກຢູ່ໃນເຮືອນຕົນເອງ.
ແຕ່ວ່າ,ຄຽງຄູ່ກັບນັກທ່ອງທ່ຽວຈຳນວນຫຼວງຫຼາຍເລີ່ມເຂົ້າມາ,ບ້ານເຈຍຈູ່ທີ່ເຄີຍສະຫງົບງຽບກໍເລີຍຟົດຟື້ນຂຶ້ນ. ຊາວບ້ານພາກັນສ້າງບ້ານແປງເຮືອນໃຫ້ໃຫຍ່ກວ່າເກົ່າເພື່ອຮັບນັກທ່ອງທ່ຽວ,ຕົ້ນໄມ້ຢູ່ອ້ອມພູຖືກຕັດຢ່າງຫຼວງຫຼາຍ. ເຖິງວ່າການທ່ອງທ່ຽວໄດ້ເຮັດໃຫ້ເສດຖະກິດຂອງບ້ານພັດທະນາຫຼາຍ,ຂະນະດຽວກັນ ກໍ່ນຳເອົາບັນຫາທາງສິ່ງແວດລ້ອມມາໃຫ້ບ້ານຄືກັນສິ່ງແວດລ້ອມທີ່ກົມກຽວກັນແລະຮີດຄອງປະເພນີທີ່ເປັນມູນເຊື້ອຂອງບ້ານນີ້ພວມຖືກທ້າທາຍ. ນາງກຸ້ຍຮວ່າທີ່ເຮັດທຸລະກິດການທ່ອງທ່ຽວໄວກວ່າໝູ່ກໍເລີ່ມຮູ້ສຶກເປັນຫ່ວງນຳເລື່ອງນີ້.
ຫວ່າງມໍ່ໆນີ້,ໃນງານແລກປ່ຽນການທ່ອງທ່ຽວ,ນາງກຸ້ຍຮວ່າໄດ້ຮູ້ຄວາມໝາຍຂອງນິຍາມການທ່ອງທ່ຽວແບບອະນຸລັກເປັນເທື່ອທຳອິດ.ຜູ້ຊ່ຽວຊານແນະນຳວ່າ,ການທ່ອງທ່ຽວແບບອະນຸລັກແມ່ນການທ່ອງທ່ຽວທີ່ມີຄວາມຮັບຜິດຊອບ,ບໍ່ພຽງແຕ່ສາມາດນຳເອົາຜົນກຳໄລມາໃຫ້ຄົນທ້ອງຖິ່ນທໍ່ນັ້ນ,ຫາກຍັງສາມາດອະນຸລັກສິ່ງແວດລ້ອມແລະວັດທະນະທຳຂອງທ້ອງຖິ່ນອີກດ້ວຍ.ນາງກຸ້ຍຮວ່າຮູ້ສຶກວ່າ,ຂໍ້ສະເໜີຂອງຜູ້ຊ່ຽວຊານພໍດີຖືກກັບທິດພັດທະນາການທ່ອງທ່ຽວຂອງບ້ານເຈຍຈູ່ໃນອະນາຄົດ.
ເມື່ອປະສານຄວາມເຫັນຂອງຜູ້ຊ່ຽວຊານການທ່ອງທ່ຽວແບບອະນຸລັກແລ້ວ,ນາງກຸ້ຍຮວ່າເຫັນວ່າ,ວິທີຮັບຄະນະນັກທ່ອງທ່ຽວເປັນຄະນະໃຫຍ່ນັ້ນແມ່ນເຮັດບໍ່ໄດ້ອີກແລ້ວ,ການຮັບນັກທ່ອງທ່ຽວແບບຂີ່ລົດເອງອອກມາທ່ຽວແລະນັກທ່ອງທ່ຽວຈັກສອງສາມຄົນທີ່ຮັກທຳມະຊາດນັ້ນ ຈຶ່ງສອດຄ່ອງກັບການພັດທະນາການທ່ອງທ່ຽວແບບອະນຸລັກຂອງບ້ານເຈຍຈູ່.ນາງເວົ້າວ່າ:
"ຖ້າວ່າທຸລະກິດການທ່ອງທ່ຽວລະດັບສູງ,ກໍຕ້ອງຮັບນັກທ່ອງທ່ຽວແບບຂີ່ລົດອອກມາທ່ຽວເອງ. ເຂົາເຈົ້າມາແຫ່ງນີ້,ບໍ່ແມ່ນຢາກໄດ້ຫ້ອງພັກທີ່ຫຼູຫຼາ,ຫາກແມ່ນເອົາຫ້ອງທຳມະດາແຕ່ສະອາດ.ພາຍຫຼັງເຂົາເຈົ້າມາທ່ຽວເທື່ອໜຶ່ງແລ້ວ,ຍັງຈະແນະນຳໃຫ້ໝູ່ມາທ່ຽວອີກ.ອີກດ້ານໜຶ່ງ,ນັກທ່ອງທ່ຽວແບບນີ້ຈະບໍ່ຖິ້ມຂີ້ເຫຍື້ອຊະຊາຍ."
ນາງກຸ້ຍຮວ່າຕັດສິນໃຈນຳໃຊ້ຜົນໄດ້ຮັບທີ່ດີຂອງເຮືອນພັກຕົນມາເຜີຍແຜ່ໂຄສະນາການທ່ອງທ່ຽວແບບອະນຸລັກ. ນາງຮຽກໂຮມພີ່ນ້ອງແລະຜູ້ໃກ້ເຮືອນ 20 ກວ່າຄອບຄົວ,ສ້າງຕັ້ງຫຼາຍສາຂາຂອງເຮືອນພັກ.ເມື່ອຮອດລະດູທ່ອງທ່ຽວ,ເຮືອນພັກສາຂາຂອງນາງກຸ້ຍຮວ່າກໍມັກຈະຮັບກຸ່ມນັກທ່ອງທ່ຽວຂະໜາດນ້ອຍ.ກາງເວັນທ່ຽວຊົມບ້ານ,ກາງຄືນຟ້ອນລຳທຳເພງອ້ອມກອງໄຟໃນເຮືອນກຸ້ຍຮວ່າ,ຊື່ນຊົມກັບປະເພນີເຜົ່າຕິເບດຢ່າງສະບາຍໃຈ.
"ດອກພິລາບານເຮືອງເຕັມບ້ານ,ນົກເຂົາຮ້ອງສຽງແຈ້ວໆ,ບ້ານເກີດເມືອງນອນທີ່ໜ້າຮັກຂອງຂ້ອຍເອີຍ,ເຈົ້າຄືບ່ອນທີ່ງາມທີ່ສຸດໃນໃຈຂອງຂ້ອຍ."
ນາງກຸ້ຍຮວ່າເວົ້າວ່າ,ເຊື່ອວ່າ,ໃນອະນາຄົດບໍ່ດົນ,ທົ່ວບ້ານເຜົ່າຕິເບດຈະຮຽນແບບຢ່າງນຳນາງເພື່ອເຮັດການທ່ອງທ່ຽວແບບອະນຸລັກ.
|
|
|
