ຕາມ​ຂ່າວສານ​ຊິນ​ຮວາ: ​ໃນ​ກອງ​ປະຊຸມ​ທີ່​ກ່ຽວຂ້ອງ​ທີ່​ຈັດ​ຂຶ້ນຢູ່​ທີ່​ປັກ​ກິ່ງ​ໃນ​ວັນ​ທີ 28 ຕຸ​ລາ, ທ່ານ​ເຈິ່ງ​ເຜິ​ຍອຽນ ຮອງ​ນາຍົກລັດຖະມົນຕີຈີນກ່າວ​ເນັ້ນວ່າ, ຕ້ອງ​ຍົກ​ລະ​ດັບ​​​ກໍ່​ສ້າງ​​ແລະ​ຄຸ້ມ​ຄອງ​ເຂດ​ສະຫງວນ​ທຳ​ມະ​ຊາດ​ໃຫ້​ສູງ​ຂຶ້ນຕື່ມ​ອີກ, ​ເພື່ອ​ເສີມ​ຂະ​ຫຍາຍ​ບົດ​ບາດ​ໃຫຍ່​ກວ່າ​ເກົ່າ​ໃນ​ການ​ປົກ​ປັກ​ຮັກສາ​ຄວາມ​ປອດ​ໄພ​ດ້ານ​ຊີວະ​ພາບ​ແຫ່ງ​ຊາດ.

ທ່ານ​ເຈິ່ງ​ເຜິ​ຍອຽນ​ກ່າວ​ວ່າ, ​ໃນ 50 ປີ​ມາ​ນີ້, ​​ເຂດ​ສະຫງວນ​ທຳ​ມະ​ຊາດ​ຂອງ​ຈີນ​ໄດ້​ຈາກ​ບໍ່​ມີ​ຮອດ​ມີ ຈາກ​ນ້ອຍ​ຫາ​ໃຫຍ່, ​ໄດ້​ມີ​ລະບົບທີ່​​ແຈກ​ຢາຍ​ຢ່າງ​ສົມ​ເຫດ​ສົມ​ຜົນ​ໂດຍ​ພື້ນ​ຖານ ​ແລະ​ມີ​ປະ​ເພດ​ອ່າວ​ຄົບ​ຖ້ວນ, ​ໄດ້​ເສີມ​ຂະຫຍາຍ​ບົດ​ບາດ​ອັນ​ຕັ້ງ​ໜ້າ​​ເພື່ອ​ປົກ​ປັກ​ຮັກ​ສາ​ຄວາມ​ປອດ​ໄພ​ດ້ານ​ຊີວະ​ພາບ​ແຫ່ງ​ຊາດ.

ທ່ານ​ເຈິ່ງ​ເຜິ​ຍອຽນ​ຮຽກຮ້ອງ​ໃຫ້​ພາກສ່ວນ​ທີ່​ກ່ຽວ​ຂ້ອງ​ຈົ່ງ​ເລັ່ງລັດ​ຈັດ​ວາງ​ແລະ​ປະ​ຕິ​ບັດ​ແຜນ​ການ​ພັດທະນາ​ເຂດ​ສະຫງວນ​ທຳ​ມະ​ຊາດ​ທົ່ວ​ປະ​ເທດ, ​ເພີ່ມ​ການ​ລົງ​ທຶນ​ເປັນ​ກ້າວໆ, ​ເພີ່ມ​ທະ​ວີ​ການ​ຄຸ້ມ​ຄອງ, ​​ແລະເລັ່ງລັດ​ສ້າງກົນ​ໄກທົດ​ແທນ​ຊີ​ວະ​ພາບ.

​ເຂດ​ສະຫງວນ​ທຳ​ມະ​ຊາດຕິ​ງຫູ​ຊ່ານ ​ເຊິ່ງ​ແມ່ນ​ເຂດ​ສະຫງວນ​ທຳ​ມະ​ຊາດ​ແຫ່ງ​ທຳ​ອິດ​ຂອງ​ຈີນ​ໄດ້​ສ້າງ​ຂຶ້ນຢູ່​ເມືອງ​ຈ້າວ​ຊິ້ງ​ແຂວງ​ກວາງ​ຕຸ້ງ​ເມື່ອ​ປີ 1956. ປັດ​ຈຸ​ບັນ ​ເຂດ​ສະ​ຫງວນ​ທຳ​ມະ​ຊາດ​ຂອງ​ຈີນ​ໄດ້​ມີ​ເຖິງ 2300 ກວ່າ​ແຫ່ງ, ​ກວມເນື້ອ​ທີ່​ດິນ​ແດນ​ທາງ​ບົກ​ແຫ່ງ​ຊາດ​ຈີນ​ປະ​ມານ 15%.