|
ຕາມຂ່າວ CRI: ວັນທີ 30 ຕຸລາ ຢູ່ເມືອງໜານໜິງເຂດກວາງຊີຈີນ, ທ່ານບົວສອນ ບຸບຜາວັນ ນາຍົກລັດຖະມົນຕີລາວທີ່ເດີນທາງໄປເມືອງໜານໜິງເພື່ອເຂົ້າຮ່ວມກອງປະຊຸມສຸດຍອດລະລຶກການສ້າງເປັນປະເທດຄູ່ເຈລະຈາຈີນອາຊຽນຄົບຮອບ 15 ປີນັ້ນໄດ້ໃຫ້ສຳພາດຕໍ່ນັກຂ່າວ CRI ພວກເຮົາ, ທ່ານໄດ້ຕີລາຄາສູງຕໍ່ໝາກຜົນທີ່ໄດ້ຮັບໃນ 15 ປີຂອງການເປັນປະເທດຄູ່ເຈລະຈາຈີນອາຊຽນ.
ທ່ານບົວສອນ ບຸບຜາວັນກ່າວວ່າ, ໃນ 15 ປີຜ່ານມາ, ການພົວພັນລະຫວ່າງຈີນກັບອາຊຽນໄດ້ຂະຫຍາຍຕົວຢ່າງວ່ອງໄວ, ສອງຝ່າຍໄດ້ເພີ່ມຄວາມເຂົ້າໃຈກັນແລະເຊື່ອໃຈເຊິ່ງກັນແລະກັນໃນດ້ານການເມືອງແລະຄວາມປອດໄພ, ແລະໄດ້ສ້າງພື້ນຖານອັນໝັ້ນແກ່ນໃຫ້ແກ່ສອງຝ່າຍທີ່ສ້າງການພົວພັນຄູ່ຮ່ວມມືຍຸດທະສາດ, ໄດ້ປະກອບສ່ວນອັນສຳຄັນເຂົ້າໃນສັນຕິພາບແລະຄວາມຜາສຸກຂອງປະຊາຊົນພາກພື້ນນີ້. ອາຊຽນຍຶດໝັ້ນຫຼັກການຈີນດຽວ, ແລະຮັບຮອງຈີນມີຖານະເສດຖະກິດຕະຫຼາດທີ່ສົມບູນ.
ທ່ານກ່າວວ່າ, ອາຊຽນສະແດງຄວາມຂອບອົກຂອບໃຈຕໍ່ຈີນທີ່ສະໜັບສະໜູນອາຊຽນເສີມຂະຫຍາຍບົດບາດນຳທາງໃນວຽກງານພາກພື້ນອາຊີຕາເວັນອອກ, ແລະກໍ່ຍ້ອງຍໍຈີນທີ່ໄດ້ປະກອບສ່ວນອັນສຳຄັນເຂົ້າໃນການປົກປັກຮັກສາສັນຕິພາບແລະສະຖຽນລະພາບຂອງພາກພື້ນນີ້. ຈີນແມ່ນບ້ານໃກ້ເຮືອນຄຽງທີ່ດີ ເພື່ອນມິດທີ່ດີແລະໝູ່ຄູ່ທີ່ດີຂອງອາຊຽນຈົນເທົ່າໃດໆ.
|
