|
ຕາມຂ່າວ CRI: ວັນທີ 1 ພະຈິກ ຢູ່ທີ່ພຽງຢາງ, ໂຄສົກກະຊວງການຕ່າງປະເທດ ສປປ ເກົາຫຼີປະກາດວ່າ, ສປປ ເກົາຫຼີຈະກັບຄືນສູ່ການເຈລະຈາ 6 ຝ່າຍ, ແຕ່ເງື່ອນໄຂເບື້ອງຕົ້ນແມ່ນ ສປປ ເກົາຫຼີກັບອາເມລິກາຕ້ອງປຶກສາຫາລືບັນຫາຍົກເລີກການລົງໂທດທາງການເງິນໃນຂອບການເຈລະຈາ 6 ຝ່າຍ.
ວັນທີ 31 ຕຸລາຢູ່ທີ່ປັກກິ່ງ, ຫົວໜ້າຄະນະຜູ່ແທນຈີນ ສປປ ເກົາຫຼີແລະອາເມລິກາທີ່ເຂົ້າຮ່ວມການເຈລະຈາ 6 ຝ່າຍໄດ້ເປັນເອກະສັນກັນຟື້ນຟູການເຈລະຈາ 6 ຝ່າຍຄືນໃໝ່ໃນໄລຍະມໍ່ໆນີ້. ຫຼັງຈາກປະກາດຂ່າວດັ່ງກ່າວແລ້ວ, ຝ່າຍຕ່າງໆທີ່ກ່ຽວຂ້ອງໄດ້ສະແດງຄວາມຊົມເຊີຍຕໍ່ຂ່າວດັ່ງກ່າວ.
ທ່ານໂກຟີ ອານນານ ເລຂາທິການໃຫຍ່ສະຫະປະຊາຊາດໄດ້ອອກຖະແຫຼງການວ່າ, ຫວັງໃຫ້ຟື້ນຟູການເຈລະຈາ 6 ຝ່າຍໂດຍໄວແລະໄດ້ຮັບໝາກຜົນອັນຕັ້ງໜ້າ, ເພື່ອຜ່ອນຄາຍສະຖານະການອັນເຄັ່ງຕຶງໃນປັດຈຸບັນ.
ທ່ານຈອຈ໌ ບຸສ ປະທານາທິບໍດີອາເມລິກາສະແດງຄວາມຂອບອົກຂອບໃຈຕໍ່ຈີນທີ່ໄດ້ເຮັດວຽກເພື່ອຟື້ນຟູການເຈລະຈາ 6 ຝ່າຍຄືນໃໝ່, ແຕ່ພ້ອມກັນນັ້ນ ທ່ານບຸສກ່າວວ່າ, ອາເມລິກາຈະສືບຕໍ່ຊຸກຍູ້ຝ່າຍຕ່າງໆປະຕິບັດມະຕິຂອງສະພາຄວາມໝັ້ນຄົງສະຫະປະຊາຊາດກ່ຽວກັບ ສປປ ເກົາຫຼີທົດລອງນິວເຄຼຍ.
ກະຊວງການຕ່າງປະເທດແລະການຄ້າສ.ເກົາຫຼີໄດ້ວິຈານວ່າ, ລັດຖະບານສ.ເກົາຫຼີຈະຮ່ວມມືຢ່າງແໜ້ນແຟ້ນກັບປະເທດທີ່ເຂົ້າຮ່ວມການເຈລະຈາ 6 ຝ່າຍ, ສືບຕໍ່ທຳຄວາມພະຍາຍາມທາງການທູດເພື່ອແກ້ໄຂບັນຫານິວເຄຼຍແຫຼມເກົາຫຼີແລະປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ.
ທ່ານອາເລັກຊັນເດີ ອາເລັກຊີເອັຟ ລັດຖະມົນຕີຊ່ອຍວ່າການກະຊວງການຕ່າງປະເທດຣັດເຊຍກ່າວວ່າ, ຝ່າຍຣັດເຊຍເຫັນວ່າ ການຕົກລົງດັ່ງກ່າວມີຄວາມຕັ້ງໜ້າຫຼາຍ, ແລະຫວັງຢ່າງຈິງໃຈວ່າ ການເຈລະຈາ 6 ຝ່າຍກ່ຽວກັບບັນຫານິວເຄຼຍແຫຼມເກົາຫຼີຈະຈັດຂຶ້ນຄືນໃໝ່ໃນໄວໆນີ້.
ທ່ານຊິໂອຈາກີ ຢາຊູຮີຊາ ເລຂາທິການລັດຖະບານຍີ່ປຸ່ນກ່າວວ່າ, ລັດຖະບານຍີ່ປຸ່ນຈະບໍ່ເຫັນດີທີ່ ສປປ ເກົາຫຼີກັບຄືນສູ່ການເຈລະຈາ 6 ຝ່າຍໃນຖານະເປັນປະເທດທີ່ມີອາວຸດນິວເຄຼຍ, ລັດຖະບານຍີ່ປຸ່ນກໍ່ຈະບໍ່ຍົກເລີກການລົງໂທດ ສປປ ເກົາຫຼີ.
|
