ຕາມ​ຂ່າວ CRI: ວັນ​ທີ 1 ພະຈິກຢູ່​ທີ່​ພຽງ​ຢາງ, ​ໂຄສົກ​ກະຊວງ​ການ​ຕ່າງປະ​ເທດ ສປປ ​ເກົາ​ຫຼີ​ປະ​ກາດ​ວ່າ, ສປປ ​ເກົາຫຼີຈະ​ກັບ​ຄືນ​ສູ່​ການ​ເຈລະຈາ 6 ຝ່າຍ, ​ແຕ່​ເງື່ອນ​ໄຂ​ເບື້ອງ​ຕົ້ນ​ແມ່ນ ສປປ ​ເກົາ​ຫຼີກັບ​ອາ​ເມ​ລິ​ກາ​ເຈລະຈາ​ບັນຫາ​ຍົກ​ເລີກ​ການລົງ​ໂທດດ້ານ​ການ​ເງິນ​ໃນ​ຂອບ​ການ​ເຈ​ລະ​ຈາ 6 ຝ່າຍ.

ມື້​ດຽວ​ກັນ ຢູ່​ທີ່​ເຊ​ອຸນ, ທ່ານ​ລີ​ຈົງ​ເຊ​ວຄ໌ ​ລັດຖະມົນຕີ​ວ່າການ​ກະຊວງ​ໂຮມປະ​ເທດ​ເປັນ​ເອກະ​ພາບ​ຂອງ ສ.​ເກົາຫຼີກ່າວ​ວ່າ, ສ.​ເກົາຫຼີຈະ​ບໍ່​ເຫັນ​ດີ​ທີ່ ສປປ ​ເກົາຫຼີ​ກັບ​ຄືນ​ສູ່​ການ​ເຈ​ລະ​ຈາ 6 ຝ່າຍ​ໃນ​ຖານະ​ເປັນ​ປະ​ເທດ​ທີ່ມີ​ອາວຸດ​ນິວ​ເຄຼຍ, ການ​ເຈ​ລະ​ຈາ 6 ຝ່າຍ​ຄວນ​ວາງ​ເງື່ອນ​ໄຂ​​ເບື້ອງ​ຕົ້ນທີ່​ໃຫ້ ສປປ ​ເກົາຫຼີປະລະອາວຸດ​ນິວ​ເຄຼຍ. ທ່ານ​ກ່າວ​ວ່າ, ຝ່າຍ​ຕ່າງ​ທທີ່​ເຂົ້າ​ຮ່ວມ​ການ​ເຈ​ລະ​ຈາ 6 ຝ່າຍ​ຄວນ​ສະ​ແດງ​ອອກ​ລັກສະ​ນະທີ່ຄ່ອງ​ແຄ້ວ​​ໃນ​ລະດັບ​ໃດ​ໜຶ່ງ​ບົນ​ພື້ນ​ຖານ​ຍຶດ​ໝັ້ນ​ຫຼັກ​ການ, ​ໂດຍ​ສະ​ເພາະ​ແມ່ນ​ອາ​ເມ​ລິ​ກາ​ຄວນ​ສະ​ແດງ​ທ່າ​ທີ​ອັນ​ຄ່ອງ​ແຄ້ວ​ທີ່​ສົມ​ຄູ່​ກັນ, ​ເພື່ອ​ຊຸກ​ຍູ້​ໃຫ້ ສປປ ​ເກົາຫຼີປະລະ​ອາວຸດ​ນິວ​ເຄຼຍ.

ວັນ​ທີ 31 ຕຸລາຢູ່​ທີ່​ປັກ​ກິ່ງ, ຫົວໜ້າ​ຄະນະ​ຜູ່​ແທນ​ຈີນ ສປປ ​ເກົາຫຼີ​ແລະ​ອາ​ເມ​ລິ​ກາ​ທີ່​ເຂົ້າ​ຮ່ວມ​ການ​ເຈ​ລະ​ຈາ 6 ຝ່າຍ​ກ່ຽວ​ກັບ​ບັນຫາ​ນິວ​ເຄຼຍ​ແຫຼມ​ເກົາຫຼີ​ໄດ້​ເປັນ​ເອ​ກະ​ສັນ​ກັນ​ເຫັນ​ດີ​ຟື້ນ​ຟູ​ການ​ເຈລະຈາ 6 ຝ່າຍ​ຄືນ​ໃໝ່​ໃນ​ໄວໆ​ນີ້. ຫຼັງຈາກ​ປະກາດ​ຂ່າວ​ດັ່ງ​ກ່າວ​ແລ້ວ, ຝ່າຍ​ຕ່າງໆ​ທີ່​ກ່ຽວຂ້ອງ​​ໄດ້ສະ​ແດງ​ຄວາມຊົມ​ເຊີຍ​.