|
ຊີວິດຂອງຄົນພິການຢູ່ມະຫາວິທະຍາໄລ
ການໃຫ້ໂອກາດແກ່ຄົນພິການໄດ້ຮັບການສຶກສາຂັ້ນສູງເໝືອນດັ່ງຄົນທຳມະດານັ້ນ ແມ່ນນະໂຍບາຍທີ່ສຳຄັນອັນໜຶ່ງທີ່ລັດຖະບານຈີນເອົາໃຈໃສ່ນຳຄົນພິການ. ປະຈຸບັນ,ຈີນໄດ້ສ້າງຕັ້ງໂຮງຮຽນຊັ້ນສູງສະເພາະໃຫ້ຮັບນັກສຶກສາຜູ່ພິການ 4 ແຫ່ງ,ໂຮງຮຽນຊັ້ນສູງທຳມະດາຈຳນວນໜຶ່ງກໍຈັດຕັ້ງຫຼັກສູດສະເພາະໃຫ້ຄົນພິການ,ຄົນພິການນັບມື້ນັບຫຼາຍຈຶ່ງມີໂອກາດຮຽນຢູ່ໂຮງຮຽນຊັ້ນສູງ.
ສະຖາບັນສຶກສາພິເສດຂອງມະຫາວິທະຍາໄລຊາງຊຸ່ນຕັ້ງຢູ່ແຂວງຈິລິນ ພາກຕາເວັນອອກສຽງເໜືອຂອງຈີນ. ນັກຂ່າວຫາກໍ່ຍ່າງເຂົ້າຕຶກສິດສອນຂອງໂຮງຮຽນນີ້,ກໍ່ໄດ້ຍິນສຽງເສບດົນຕີທີ່ມ່ວນອອນຊອນຈັບໃຈ ແລະສຽງເພງຄວາມຮັກແພງອັນເລິກເຊິ່ງ. ນັກຂ່າວນຳໄປຕາມສຽງເພງ,ໄຂປະຕູອອກ,ກໍ່ເຫັນນາງລິວຈ້ຽນຊຸ່ນກຳລັງຫຼິ້ນເປຍໂນແລະຮ້ອງເພງຢູ່ຢ່າງຕັ້ງໃຈ.
ນາງລິວຈ້ຽນຊຸ່ນແມ່ນນັກສຶກສາທຳມະດາສາມັນຂອງສະຖາບັນສຶກສາພິເສດມະຫາວິທະຍາໄລຊາງຊຸ່ນ,ນາງບອກນັກຂ່າວວ່າ,ນາງຖືກຕັດຂາຍ້ອນເປັນພະຍາດຕອນອາຍຸໄດ້ 15 ປີ. ແຕ່ວ່າ,ນາງບໍ່ໄດ້ນ້ອຍໃຈແລະຖິ້ມການຮຽນຍ້ອນເລື່ອງນີ້. ເມື່ອໄດ້ທຳຄວາມພະຍາຍາມຢ່າງບໍ່ລົດລະແລ້ວ,ນາງໄດ້ເສັງເຂົ້າເປັນນັກສຶກສາຄະນະສະແດງດົນຕີຂອງສະຖາບັນສຶກສາພິເສດມະຫາວິທະຍາໄລຊາງຊຸ່ນຕອນອາຍຸໄດ້ 32 ປີ.ສິ່ງທີ່ເຮັດໃຫ້ນາງດີໃຈນັ້ນແມ່ນ ຢູ່ແຫ່ງນີ້ ພອນສະຫວັນດ້ານດົນຕີຂອງນາງໄດ້ຮັບການສົ່ງເສີມ.ນາງເວົ້າວ່າ:
"ແຕ່ລະພາກຮຽນ ຂ້ອຍກໍມັກຈັດງານລາຕີ ແລະງານສະແດງຂະໜາດໃຫຍ່,ສະຖາບັນເຮົາສະໜັບສະໜູນຫຼາຍ.ທາງໂຮງຮຽນເວົ້າວ່າ,ເຈົ້າຈັດໂລດ,ໂຮງຮຽນຈະເອົາຄ່າໃຊ້ຈ່າຍໃຫ້,ຖ້າບໍ່ສະດວກຍັງສາມາດເອົາລົດຂີ່ໄປເຮັດ,ເຈົ້າກໍ່ເຮັດຢ່າງກ້າຫານໂລດ.ຂ້ອຍຈັດຕັ້ງໃຫ້ນັກຮຽນຫູໜວກປາກກືກຟ້ອນເລື່ອງ"ທົ່ງຫຍ້າຂຽວ",ໄດ້ຮັບລາງວັນທີໜຶ່ງໃນການແຂ່ງຂັນສິລະປະນັກສຶກສາທົ່ວປະເທດ.ຂ້ອຍຮູ້ສຶກວ່າ ວິຊາທີ່ໄດ້ຮຽນລ້ວນແຕ່ໄດ້ຮັບການສົ່ງເສີມນັບມື້ນັບສູງຂຶ້ນ."
ສະຖາບັນສຶກສາພິເສດຊາງຊຸ່ນສ້າງຕັ້ງຂຶ້ນເມື່ອປີ 1987,ແມ່ນສະຖາບັນຂັ້ນສູງທີ່ຈີນຮັບເອົານັກຮຽນຄົນພິການແຫ່ງທຳອິດ.ມັນເຮັດໃຫ້ນັກຮຽນຄົນພິການເໝືອນດັ່ງນາງລິວຈ້ຽນຊຸ່ນມີໂອກາດໄດ້ຮັບການສຶກສາຂັ້ນສູງ.ປະຈຸບັນ ໃນໂຮງຮຽນດັ່ງກ່າວມີນັກຮຽນ 500 ກວ່າຄົນ.
ສະຖາບັນສຶກສາພິເສດຂອງມະຫາວິທະຍາໄລຊາງຊຸ່ນໄດ້ອີງຕາມຈຸດພິເສດຕ່າງກັນຂອງຄວາມພິການ,ຕັ້ງວິຊາທີ່ຕ່າງກັນ.ເຊັ່ນ,ຄົນຫູໜວກປາກກືກເສຍຄວາມສາມາດໃນການຟັງແລະການເວົ້າ,ແຕ່ຈິນຕະນາການໃນຮູບພາບແລະຄວາມສາມາດການສັງເກດການຂອງເຂົາເຈົ້າມີຫຼາຍ,ສະຖາບັນຈຶ່ງເປີດຫຼັກສູດວິຊາການອອກແບບສິລະປະຫັດຖະກຳແລະວິຊາແຕ້ມຮູບສະເພາະໃຫ້ຄົນຫູໜວກປາກກືກ; ສ່ວນຄົນຕາບອດມີຄວາມສາມາດດີໃນດ້ານການຟັງ,ຈຶ່ງເປີດການສະແດງດົນຕີແລະວິຊານວດຝັງເຂັມແບບແພດພື້ນເມືອງຈີນ; ນອກນີ້,ຍັງເປີດວິຊາການບັນຊີແລະວິຊາຄອບພິວເຕີໃຫ້ນັກຮຽນຄົນພິການຂາຫຼືແຂນ.
ທ່ານຈ້າວລີ້ຈຸ່ນ ຮອງຫົວໜ້າສະຖາບັນສຶກສາພິເສດຂອງມະຫາວິທະຍາໄລຊາງຊຸ່ນແນະນຳວ່າ,ໃນຫຼາຍປີມານີ້,ເຂົາເຈົ້າໄດ້ພະຍາຍາມສະໜອງຄວາມສະດວກໃນດ້ານການຮ່ຳຮຽນແລະຊີວິດການເປັນຢູ່ທີ່ດີໃຫ້ນັກຮຽນໂດຍຕະຫຼອດ.ປະຈຸບັນ,ສະຖາບັນດັ່ງກ່າວບໍ່ພຽງແຕ່ສາມາດສິດສອນດ້ວຍເຄື່ອງກ້າວໜ້າຫຼາຍປະເພດເຊັ່ນ ເຄື່ອງສາຍພາບສະໄລ ເຄື່ອງສາຍແຜ່ນໃສ ເຄື່ອງດີວີດີ ແລະລະບົບສື່ສານຕ່າງໆແລ້ວ,ຍັງໄດ້ສ້າງຫ້ອງທົດລອງທີ່ມີເຄື່ອງປະກອບຄົບຊຸດສະເພາະໃຫ້ຄົນພິການໃຊ້ອີກ.ທ່ານເວົ້າວ່າ:
"ຫ້ອງທົດລອງຂອງພວກເຮົາມີຫ້ອງທົດລອງຄອມພິວເຕີໃຫ້ຄົນຕາບອດແລະຄົນຫູໜວກ,ຍັງມີຫ້ອງທົດລອງອິນເຕີເນັດທີ່ຕໍ່ກັບສາກົນໄດ້ໂດຍກົງ. ຫ້ອງທົດລອງນີ້ແມ່ນເຄືອຄ່າຍການສຶກສາທາງໄກໃຫ້ຄົນຫູໜວກແບບສາກົນ,ໃນທົ່ວໂລກປະຈຸບັນມີ 13 ປະເທດໄດ້ເຂົ້າຮ່ວມເຄືອຄ່າຍນີ້. 13 ປະເທດສະມາຊິກນີ້ສາມາດໃຊ້ເນື້ອໃນການສຶກສາດ້ານການສື່ສານຕ່າງໆໃນເວລາດຽວກັນ,ທັງສາມາດແລກປ່ຽນຄວາມເຫັນໄດ້,ແມ່ນເຄື່ອງປະກອບທີ່ກ້າວໜ້າຫຼາຍ."
ນອກນີ້,ສະຖາບັນສຶກສາພິເສດຂອງມະຫາວິທະຍາໄລຊາງຊຸ່ນຍັງໄດ້ສ້າງຕັ້ງຫໍສະໝຸດທີ່ມີປຶ້ມ 2 ແສນກວ່າເຫຼັ້ມ,ໃນນັ້ນມີ 7 ພັນກວ່າເຫຼັ້ມຮັບໃຊ້ຄົນຕາບອດໂດຍສະເພາະ.
ນາງລິວຢຸ້ຍທີ່ຕາບອດທັງສອງແມ່ນຈາກເມືອງຈຸ່ງກິ່ງທີ່ພາກຕາເວັນຕົກຈີນມາຮຽນຢູ່ສະຖາບັນສຶກສາພິເສດມະຫາວິທະຍາໄລຊາງຊຸ່ນ.ນາງເວົ້າວ່າ,ນາງຮູ້ສຶກດີໃຈຫຼາຍທີ່ມາຢູ່ໃນໂຮງຮຽນນີ້,ບໍ່ພຽງແຕ່ແມ່ນຍ້ອນໃນໂຮງຮຽນມີເຄື່ອງປະກອບທີ່ໃຊ້ໄດ້ດີ,ສິ່ງທີ່ເຮັດໃຫ້ນາງຕື້ນຕັນໃຈຫຼາຍນັ້ນແມ່ນ ຄວາມເອົາໃຈໃສ່ຂອງຄູສອນຕໍ່ນັກສຶກສາ.ນາງເວົ້າວ່າ:
"ບາງເທື່ອ ພວກເຮົາຄຶດວ່າ ຕົນເອງແມ່ນຄົນຕາບອດ,ຕ່າງກັບຄົນທຳມະດາ.ມາຢູ່ແຫ່ງນີ້,ຄູສອນລະມັດລະວັງບໍ່ເວົ້າສັບທີ່ວ່າ"ເຫັນຫຼືບໍ່ເຫັນ",ປະຕິບັດຕໍ່ພວກເຮົາເປັນຄົນທຳມະດາ,ທັງຮຽກຮ້ອງໃຫ້ພວກເຮົາເປັນຄົນເຂັ້ມແຂງທັງກາຍແລະໃຈ,ເພື່ອໃຫ້ສາມາດປະເຊີນກັບຊີວິດໃນອະນາຄົດ."
ການສຶກສາຊັ້ນສູງສະເພາະໃຫ້ຊາວໜຸ່ມຄົນພິການຍັງມີເອກະລັກພິເສດອັນພົ້ນເດັ່ນ,ຄວາມບົກຜ່ອງດ້ານສະລິລະເຮັດໃຫ້ເຂົາເຈົ້າໄດ້ຮັບຂ່າວສານຈາກພາຍນອກຢ່າງມີການຈຳກັດ.ສະນັ້ນ,ການທີ່ເຮັດແນວໃດເພື່ອເພີ່ມທະວີການແລກປ່ຽນກັບເຂົາເຈົ້າ,ຍົກຄຸນນະພາບການສິດສອນໃຫ້ສູງຂຶ້ນ,ແມ່ນຫຼັກສູດຂອງຄູສອນທຸກຄົນໃນສະຖາບັນນີ້ທີ່ຈະປັບປຸງຕື່ມ.
ໃນຂະນະດຽວກັນ,ໂຮງຮຽນຍັງຕັ້ງໜ້າຊຸກຍູ້ໃຫ້ນັກສຶກສາຄົນພິການແລະນັກສຶກສາທຳມະດາແລກປ່ຽນແລະຢູ່ຮ່ວມກັນຢ່າງກົມກຽວ,ເພື່ອຍົກສູງຄວາມໝັ້ນໃຈແລະຄວາມສາມາດເພື່ອເຊື່ອມໂຍງເຂົ້າໃນສັງຄົມຂອງເຂົາເຈົ້າໃຫ້ສູງຂຶ້ນ.ນາງລິວຢຸ້ຍເວົ້າຕໍ່ນັກຂ່າວວ່າ:
"ໂຮງຮຽນໄດ້ຊອກຜູ່ຊ່ອຍໃຫ້ພວກເຮົາ,ເພາະວ່າຄົນຕາບອດບໍ່ສະດວກ,ຕ້ອງການຄວາມຊ່ອຍເຫຼືອຈາກພາຍນອກ.ເຊັ່ນ,ນັກສຶກສາຂອງມະຫາວິທະຍາໄລສ້າງຄູຕົ່ງເປມາຊ່ອຍຮຽນ,ເມື່ອເປັນແນວນີ້ ຈະສາມາດຕິດຕໍ່ພົວພັນກັບຄົນປົກກະຕິ.ນັກສຶກສາຄົນພິການລ້ວນແຕ່ມັກແລະຄອງຄອຍການເຄື່ອນໄຫວແບບນີ້."
ປະຈຸບັນ,ສະຖາບັນສຶກສາພິເສດພວມນຳເຂົ້າຮູບການສິດສອນອັນກ້າວໜ້າຂອງຕ່າງປະເທດຄື"ການສຶກສາຮັບເອົາໃຫ້ໝົດ".ໝາຍຄວາມວ່າ,ພະຍາຍາມໃຫ້ນັກສຶກສາຄົນພິການເຂົ້າໄປຢູ່ໃນສະພາບແວດລ້ອມຂອງຄົນປົກກະຕິ,ເພື່ອໃຫ້ເຂົາເຈົ້າຫຼຸດພົ້ນອອກຈາກວິຊາສະເພາະທີ່ຈັດສະເພາະໃຫ້ຄົນພິການ,ແລ້ວໄປຮຽນຫຼັກສູດທີ່ຕົນເອງມັກກັບນັກສຶກສາປົກກະຕິ.ຄູສອນແລະນັກສຶກສາຂອງສະຖາບັນສຶກສາພິເສດຂອງມະຫາວິທະຍາໄລຊາງຊຸ່ນເຫັນວ່າ,ຄຽງຄູ່ກັບການລົງເລິກໃຊ້ຮູບການສິດສອນດັ່ງກ່າວໃຫ້ສົມບູນຢ່າງບໍ່ຢຸດຢັ້ງ,ຈະສາມາດສະໜອງໃຫ້ນັກສຶກສາຄົນພິການມີຄວາມພ້ອມເພື່ອບິນອອກໄປສູ່ໂລກພາຍນອກທີ່ກວ້າງໃຫຍ່ໄພສານ.
|
